Month: September 2020

Agreklamo dagiti Tattao

1 Nagpatpatnag a nagsangsangit dagiti tattao gapu iti ladingitda.

2 Nagsaoda iti maibusor kada Moises ken Aaron. Kinunada, “Naim-imbag la koman a nataykam idiay Egipto wenno uray ditoy let-ang.

3 Apay nga ipannatayo tiApoiti dayta a daga? Patayendatayto dagiti kabusortayo ket tiliwenda dagiti assawa ken annaktayo. Nasaysayaat nga agsublitayo idiay Egipto.”

4 Iti kasta, nagsasaritaanda ti panangpilida iti mangipangulo kadakuada nga agsubli idiay Egipto.

5 Nagpakleb da Moises ken Aaron iti imatang dagiti amin a tattao.

6 Rinay-ab ti dua kadagiti napan nangsukimat iti daga ti pagan-anayda gapu iti ladingitda. Isuda da Josue ken Caleb nga anak ni Jefone.

7 Kinunada kadagiti tattao, “Nasayaat ti daga a napanmi kinita.

8 No maragsakan kadatayo tiApo, ipannatayto sadiay ket itedna kadatayo dayta a nabaknang ken nadam-eg a daga.

9 Diyobusoren tiApo, ket dikay agbuteng kadagiti tattao nga agnanaed sadiay. Nalaka a parmekentayo ida ta kaduatayo tiApoidinto nga awanen dagiti didiosen a mangsalsalaknib kadakuada. Ngarud, dikay agbuteng.”

10 Ranta dagiti tattao a batoen ida agingga a matayda, ngem pagammoan, nakitada ti makapurar a lawag ti dayag ni Yahweh iti ngatoen ti Tolda ti Dios.

Ikararagan ni Moises dagiti Tattao

11 Kinuna ni Yahweh ken ni Moises, “Kasano pay kabayag ti panangumsi kaniak dagitoy a tattao? Kasano pay kabayag ti dida panagtalek kaniak idinto a nagipakitaak kadakuada kadagiti adu a milagro?

12 Mangyegak iti angol ket dadaelek ida. Ngem pagbalinenka nga ama ti maysa a nasion a dakdakkel ken nabilbileg ngem isuda.”

13 Ngemkinuna ni Moises ken ni Yahweh, “Inruarmo dagitoy a tattao idiay Egipto babaen iti pannakabalinmo. Inton madamag dagiti Egipcio ti inaramidmo kadagiti tattaom,

14 ibagadanto kadagiti tattao nga agnaed iti daytoy a daga. Nadamagen dagitoy a tattao a sika ngaApoket addaka kadakami. Ammoda nga agparangka a silalatak no agsardeng ti ulepmo iti ngatoenmi, ket ammoda nga idaldalannakami babaen iti monmon nga ulep iti aldaw ken monmon nga apuy iti rabii.

15 Ita, no ikisapmo ida, ibaganto dagiti nasion a makaammo iti kinalatakmo

16 a pinapataymo dagiti tattaom iti let-ang, agsipud ta dimo kabaelan nga ipan ida iti daga nga inkarim nga ited kadakuada.

17 Dawatek ngarud, OApo, nga ipakitam a naindaklanka, kas inkarim idi kinunam,

18 ‘Siak,ni Yahweh, saanak a nalaka nga agpungtot. Ipakitak ti naindaklan nga ayat ken kinapudnok, ket pakawanek ti basol ken panagsukir. Nupay kasta, dusaek dagiti annak ken appoko agingga iti maikapat a kaputotan gapu kadagiti basol dagiti nagannak kadakuada.’

19 Ita ngarud, OApo, dawatek a pakawanem ti basol dagitoy a tattao a kas mayannatup iti kadakkel ti di agbalbaliw nga ayatmo, kas iti panangpakawanmo kadakuada manipud pay iruruarda idiay Egipto.”

20 Simmungbat ni Yahweh, “Pakawanek ida a kas iti dinawatmo.

21 Ngemisapatak iti naganko ken iti dayagko a mangpunno iti lubong,

22 nga awan kadagitoy a tattao ti makastrek iti dayta a daga. Nakitada ti makapurar a lawag ti dayagko ken dagiti milagro nga inaramidko idiay Egipto ken idiay let-ang, ngem namin-adu a sinuotda ti anusko, ket dida nagtulnog kaniak.

23 Pulos a didanto makastrek iti daga nga inkarik nga ited kadagiti kapuonanda. Awan ti uray maysa kadagiti nanglaksid kaniak ti makastrek iti dayta a daga.

24 Ngemagsipud ta maisupadi kadakuada ti rikna ni Caleb nga adipenko, ket nagtalinaed a napudno kaniak, ipankonto iti daga a nakitana. Tagikuaento dagiti kaputotanna ti daga

25 a dagiti tanapna pagnaedan ita dagiti Amalekita ken dagiti Cananeo. Inton bigat, agsublikayo ket inkay iti let-ang nga agturong iti Gulfo ti Aqaba.”

Dusaen ni Yahweh dagiti Tattao gapu iti Panagreklamoda

26 Kinuna ni Yahweh kada Moises ken Aaron,

27 “Kaanonto nga agsardeng ti panagrekreklamo dagitoy managdakdakes a tattao? Naumaakon kadagiti panagtantanabutobda!

28 Ibagam kadakuada daytoy a sungbatko: ‘Isapatak iti naganko a maaramidto ti dinawatyo. Siak, ni Yahweh a sibibiag, ti nagsao.

29 Mataykaytoket maiwalang dagiti bangkayyo ditoy let-ang. Agsipud ta nagsaokayo iti maibusor kaniak, awanto kadakayo nga agtawen iti nasursurok ngem duapulo ti makastrek iti dayta a daga.

30 Inkarik nga agnaedkayto sadiay, ngem awanto ti uray maysa a makagteng sadiay malaksid kada Caleb ken Josue.

31 Kinunayo a matiliwto dagiti annakyo, ngem ipankonto ida iti dayta a daga a linaksidyo, ket agyandanto sadiay.

32 Mataykayto ditoy let-ang.

33 Agalla-allantodagiti annakyo ditoy let-ang iti las-ud ti uppat a pulo a tawen. Agsagabadanto iti dusa ti kinasukiryo agingga iti ipapatay ti maudi kadakayo.

34 Uppat a pulonto a tawen nga ikaroyo dagiti basolyo. Uppat a pulo nga aldaw a sinukimatyo ti daga, ket maysa a tawen ti kaibatogan ti maysa nga aldaw. Maammoanyonto ti kaipapanan ti panangbusorko kadakayo.

35 Isapatak nga aramidek daytoy kadakayo a managdakdakes a tattao, dakayo a naguummong a bumusor kaniak. Mataykayto amin ditoy let-ang. Siak, ni Yahweh, ti nagsao.’”

36-37 Saan a pudno ti impadamag dagiti imbaon ni Moises a mangsukimat iti daga, ket gapu iti daytoy, nagsao dagiti tattao iti maibusor ken ni Yahweh. Iti kasta, pinagsakit ida ni Yahweh ket natayda.

38 Kadagiti sangapulo ket dua a naibaon, da la Josue ken Caleb ti nakalasat.

Padasen dagiti Israelita a Rauten ti Daga

39 Kasta unay ti leddaang dagiti Israelita idi ipakaammo ni Moises ti sao ni Yahweh.

40 Kabigatanna, nasapada a nagrubbuat a mangsakup iti katurturodan a pagilian. Kinunada, “Ita, nakasaganakamin a mapan iti lugar nga imbaga tiApo. Bigbigenmi a nagbasolkami.”

41 Ngem kinuna ni Moises, “Apay ngarud a sukirenyo tiApo? Saankayto nga agballigi.

42 Dikayo mapmapan. Awan kadakayo tiApoket parmekendakayto dagiti kabusoryo.

43 Inton makigubatkayo kadagiti Amalekita ken kadagiti Cananeo, mataykayto. Awanto tiApokadakayo agsipud ta diyo kinayat ti sumurot kenkuana.”

44 Nupay kasta, napanda latta iti katurturodan a pagilian, uray no nagbati ti Lakasa ti Tulag ni Yahweh ken ni Moises iti kampo.

45 Dinarup dagiti Amalekita ken dagiti Cananeo nga agnanaed sadiay dagiti Israelita. Naparmek dagiti Israelita ket nasunsonda agingga idiay Horma.

Dagiti Linteg maipapan kadagiti Daton

1 Inted ni Yahweh ken ni Moises

2 dagitoy nga alagaden nga annuroten dagiti Israelita iti daga nga itedna kadakuada.

3 Mabalin a maidatag itiApoti toro a baka, kalakian a karnero, maysa nga urbon ti karnero wenno kalding, a kas daton a mapuoran wenno daton a pagtungpal iti kari wenno daton nga agtaud iti bukod a nakem wenno kas daton kadagiti naituding a nasantoan a fiestayo. Nabanglo dagitoy a daton itiApo.

4-5 Siasinoman a mangidatag iti karnero wenno kalding a kas daton a mapuoran itiApo, masapul a pakuyoganna ti tunggal animal iti sangakilo nga arina a nalaokan iti maysa a litro a lana ti olibo kas daton a makan, agraman sangalitro nga arak.

6 No kalakian a karnero ti maidatag, dua a kilo nga arina a nalaokan iti 1 1/2 a litro a lana ti olibo ti masapul a maidatag a kas daton a makan,

7 agraman sangalitro ket gudua nga arak. Nabanglo dagitoy a daton itiApo.

8 No toro a baka ti idatag itiApoa daton a mapuoran wenno kas daton a pagtungpal iti kari wenno kas daton a pakikappia,

9 masapul a maidatag a daton a makan ti tallo a kilo nga arina a nalaokan iti dua a litro a lana ti olibo

10 agraman dua a litro nga arak. Nabanglo daytoy a daton itiApo.

11 Dagitoyto ti maidatag a maipakuyog iti tunggal toro a baka, kalakian a karnero, urbon ti karnero wenno kalding.

12 No nasursurok ngem maysa ti animal a maidatag, manayonan met dagiti maipakuyog a makan ken inumen.

13 Kastoy ti aramiden ti tunggal puro nga Israelita no mangidaton iti makan, maysa a daton a nabanglo itiApo.

14 Kastoy met ti annuroten ti ganggannaet a makipagnaed kadakayo, iti apagbiit man wenno agnanayon, a mangidatag iti daton a mapuoran kas daton a nabanglo itiApo.

15 Iti amin a panawen, isu met laengnga alagaden ti masapul nga annurotenyo ken dagiti ganggannaet a makipagnaed kadakayo. Agpapadakayo iti imatang tiApo.

16 Maymaysalaeng a linteg ti annurotenyo, nayanak man nga Israelita wenno ganggannaet.

17 Inted ni Yahweh ken ni Moises

18 dagiti sumaganad nga alagaden nga annuroten dagiti Israelita iti daga nga itedna kadakuada.

19 Tunggal mangankayo iti taraon a maapit sadiay, masapul nga adda mailasin nga agpaay a naisangsangayan a sagut itiApo.

20 No agaramidkayo iti tinapay, ilasinyo ti umuna a tinapay kadagiti naaramid iti baro nga apit ket idatagyo a kas naisangsangayan a sagut itiApo. Maidatag daytoy a kas iti panangidatagyo iti naisangsangayan a sagut nga aramidenyo iti trigo nga irikenyo.

21 Iti amin a panawen, maited daytoy naisangsangayan a sagut itiAponga aggapu iti tinapay nga aramidenyo.

22 Ngem no adda saan a mangannurot iti uray ania kadagiti alagaden nga inted ni Yahweh ken ni Moises,

23 aniaman a bilin tiApokadakayo manipud idi damo,

24 ken no naaramid ti biddut gapu ta saan nga ammo ti gimong, masapul a mangidatag dagiti tattao iti toro a baka a kas daton a mapuoran, daton a nabanglo itiApo, agraman dagiti tumutop a daton a makan ken daton nga arak. Malaksid kadagitoy, mangidatagda pay iti kalakian a kalding a daton gapu iti basol.

25 Aramiden ti padi ti seremonia ti pannakadalus nga agpaay iti gimong ket mapakawandanto agsipud ta dida inggagara ti naaramid a biddut ket indatagda ti daton gapu iti basol a kas daton a makan nga agpaay itiApo.

26 Mapakawanto ti entero a gimong ti Israel ken dagiti ganggannaet nga agnaed iti dagada agsipud ta nairamanda amin iti biddut.

27 Noadda makabasol a dina ammo, masapul a mangidaton iti kabayan a kalding a maysa ti tawenna.

28 Iti altar, aramiden ti padi ti seremonia ti pannakadalus tapno madalusan ti tao iti basolna ket mapakawanto.

29 Agpada nga alagaden ti annuroten ti amin nga agbasol a dina igagara, puro man nga Israelita wenno ganggannaet nga agnaed iti dagayo.

30 Ngem mapapatay ti siasinoman a mangigagara nga agbasol, puro man nga Israelita wenno ganggannaet, ta maipakita ti panangbusorna itiApo.

31 Linaksidna ti sao tiApoken sinalungasingna ti maysa kadagiti bilinna. Isu ti akimbasol iti ipapatayna.

Ti Tao a Saan a Nangngilin iti Aldaw a Panaginana

32 Iti naminsan, idi adda pay laeng dagiti Israelita iti let-ang, adda lalaki a mangaykayo iti Aldaw a Panaginana.

33 Indatag dagiti nakasarak kenkuana kada Moises, Aaron ken iti entero a gimong.

34 Saan nga ammo no ania ti maipatay a dusana, isu a naipupok pay laeng.

35 Kinuna ni Yahweh ken ni Moises, “Masapul a mapapatay; iruaryo iti kampo ket kalpasanna batoen ti sangkagimongan agingga a matay.”

36 Iti kasta, naipan ti lalaki iti ruar ti kampo ket binato ti sangkagimongan agingga a natay, kas imbilin ni Yahweh.

Alagaden maipapan kadagiti Baruyboy

37 Imbilin ni Yahweh ken ni Moises

38 ngaibagana daytoy kadagiti Israelita: “Ikkanyo iti baruyboy ti gayadan dagiti pagan-anayyo; masapul nga adda asul a lubid iti tunggal baruyboy. Aramidenyo daytoy iti agnanayon.

39 Agpaay a palagip dagitoy a baruyboy; tunggal makitayo ida, malagipyo ti amin a bilinko ket tungpalenyo ida. Iti kasta, didakto tallikudan tapno surotenyo dagiti pagayatan ken tarigagayyo.

40 Palagip kadakayo dagitoy a baruyboy tapno tungpalenyo dagiti bilinko ket agbalinkayo a nasantoan nga agpaay kaniak.

41 Siak ni Yahweh a Diosyo; inruarkayo idiay Egipto tapno agbalinak a Diosyo. Siak ni Yahweh.”

Ti Ibubusor da Kora, Datan ken Abiram

1-2 Immalsani Kora nga anak ni Izar ken apoko ni Coat nga anak ni Levi a maibusor ken ni Moises. Kaduana ti tallo a kameng ti tribu ti Ruben: da Datan ken Abiram nga annak ni Eliab, ken ni On nga anak ni Pelet agraman 250 nga Israelita a nalalatak a papangulo a pinili dagiti tattao.

3 Naguummongda iti sango da Moises ken Aaron ket kinunada kadakuada, “Aglablabeskayon! Kukua tiApoti amin a kameng ti gimong ket adda tiApokadatay amin. Moises, apay nga insaadyo ti bagiyo a nangatngato ngem ti gimong tiApo?”

4 Apaman a nangngeg ni Moises daytoy, nagpakleb iti daga ket nagkararag.

5 Kalpasanna, kinunana ken ni Kora ken kadagiti pasurotna, “Inton agsapa no bigat, ipakaammonto kadatayo tiApono siasino dagiti tattao a pinilina nga umasideg kenkuana iti altar.

6-7 Inton agsapa no bigat, mangalakayto kadagiti insensario, kargaanyo iti beggang ken insenso ket ipanyo dagitoy iti altar. Kitaentayto no siasino kadatayo ti pinili tiApo. Dakayo ketdi a Levita ti aglablabes ti aramidna!”

8 Intuloy ni Moises ti nagsao ken ni Kora: “Dumngegkayo, dakayo a Levita!

9 Saankayo kadi a maragsakan a pinilinakayo ti Dios ti Israel tapno umasidegkayo kenkuana? Pinilinakayo nga agserbi iti Tolda ti Dios, aramidenyo ti pagrebbenganyo iti gimong ket agserbikayo kadakuada.

10 Intedna kenka ken kadagiti dadduma a Levita daytoy a pammadayaw. Ita, kayatyo pay a maisaadkayo a kas padi!

11 Iti panagsaoyo iti maibusor ken ni Aaron, tiApoti busorenyo, sika ken dagiti pasurotmo.”

12 Pinaayaban ni Moises da Datan ken Abiram ngem kinunada, “Saanmi a kayat ti umay!

13 Di pay la kadi umdas ti panangiruarmo kadakami iti nadam-eg a daga ti Egipto tapno papatayennakami ditoy let-ang? Masapul pay kadi nga iturayandakami?

14 Dinakam inyeg iti nadam-eg a daga wenno inikkan kadagiti talon ken kaubasan ket ita, kayatnakami pay nga allilawen. Dimi kayat ti umay!”

15 Nakapungtot ni Moises ket kinunana ken ni Yahweh, “Dimo awaten ti uray ania kadagiti sagut nga idatag dagitoy a tattao. Awan ti rinanggasak kadakuada; awan ti innalak uray la koma ti asno ti siasinoman kadakuada.”

16 Kinuna ni Moises ken ni Kora, “Inton bigat, masapul nga umayka iti Tolda ti Dios agraman dagiti 250 a pasurotmo; addanto met sadiay ni Aaron.

17 Tunggal maysa kadakayo, alaenna ti insensariona, kargaanna iti beggang ken insenso sana idatag iti altar.”

18 Iti kasta, nagitugotda kadagiti insensario a nakargaan iti beggang ken insenso ket napanda iti ruangan ti Tolda a Paguummongan a kaduada da Moises ken Aaron.

19 Kalpasanna, inummong ni Kora ti entero a gimong ket nagtakderda a sisasango kada Moises ken Aaron iti ruangan ti Tolda. Pagammoan, nakita ti entero a gimong ti makapurar a lawag a mangipakita iti kaadda tiApo.

20 Ket kinuna ni Yahweh kada Moises ken Aaron,

21 “Adaywanyo dagitoy a tattao ta dadaelek ida iti apagdarikmat.”

22 Ngem nagruknoy da Moises ken Aaron ket kinunada, “O Dios, sika ti pagtaudan ti amin a biag. No agbasol ti maysa a tao, apay a kapungtotmo ti entero a gimong?”

23 Kinuna ni Yahweh ken ni Moises,

24 “Ibagam kadagiti tattao nga adaywanda dagiti tolda da Kora, Datan ken Abiram.”

25 Kalpasanna, napan ni Moises a kaduana dagiti papangulo ti Israel iti ayan da Datan ken Abiram.

26 Kinunana kadagiti tattao, “Adaywanyo dagiti tolda dagitoy a managdakdakes! Diyo met sagiden ti aniaman a kukuada amangan no mairamankayo a mapukaw gapu kadagiti basolda.”

27 Ngarud, inadaywanda dagiti tolda da Kora, Datan, ken Abiram.

Nakaruaren da Datan ken Abiram ken dagiti assawa ken annakda ket agtatakderda iti ruangan dagiti toldada.

28 Kinuna ni Moises kadagiti tattao, “Maammoanyo ita nga imbaonnak tiApotapno aramidek amin nga impaaramidna kaniak a saan ket a ti bukodko a pagayatan.

29 No matay dagitoy a tattao iti kadawyan nga ipapatay, kayatna a sawen a dinak imbaon tiApo.

30 Ngem no adda naidumduma nga aramiden tiApo, no agungap ti daga ket alun-onenna ida a sibibiag agraman amin a kukuada, ket mapanda iti lubong dagiti natay, kayatna a sawen a sinukir dagitoy a tattao tiApo.”

31 Apaman a nalpas ti panagsao ni Moises, nagungap ti daga iti batog da Datan ken Abiram

32 ket inalun-onna ida ken dagiti familiada, agraman ti amin a pasurot ni Kora ken amin a sanikuada.

33 Iti kasta, sibibiagda a nagpababa iti lubong dagiti natay, agraman dagiti sanikuada. Nagkaem ti daga ket saanen a nakita ida dagiti tattao.

34 Nagtataray dagiti amin nga Israelita a nakangngeg iti ikkisda ket impukkawda, “Umadayotayo amangan no alun-onennatayo met ti daga!”

35 Kalpasanna, nangyeg ni Yahweh iti apuy a gimmil-ayab ken nangikisap kadagiti 250 a lallaki a nagpuor iti insenso.

Dagiti Insensario

36 Kinuna ni Yahweh ken ni Moises,

37 “Ibagam ken ni Eleazar nga anak ni Aaron a padi nga alaenna dagiti bronse nga insensario kadagiti bangkay dagiti napuoran a lallaki ket ibellengna dagiti beggang iti sabali a lugar.

38 Nagbalin a nasagradoan dagiti insensario idi naidatagda iti altarko. Alaenna ngarud dagiti insensario dagitoy a lallaki a napapatay gapu iti basolda ket pitpitenna agingga nga umingpis sana aramiden a kalub ti altar. Agserbi daytoy a ballaag kadagiti Israelita.”

39 Innala ni Eleazar a padi dagiti insensario. Pinapitpitna iti naiingpis ket inaramidda a kalub ti altar.

40 Ballaag daytoy kadagiti Israelita nga awan ti mapalubosan nga agpuor iti insenso iti imatang ni Yahweh no saan a padi wenno agtaud iti kaputotan ni Aaron. No saan, mapapatay a kas ken ni Kora ken dagiti tattaona. Inaramid amin dagitoy ni Eleazar kas imbilin tiApoken ni Moises.

Isalakan ni Aaron dagiti Tattao

41 Iti sumuno nga aldaw, nagsaosao manen ti entero a gimong iti maibusor kada Moises ken Aaron. Kinunada, “Pinapatayyo ti sumagmamano a tattao tiApo.”

42 Nagmaymaysada a bumusor kada Moises ken Aaron, ngem idi kumitada iti Tolda ti Dios, naimatanganda ti ulep a nangkumot iti Tolda ket timpuar ti makapurar a lawag a mangipakita iti dayag ni Yahweh.

43 Nagtakder da Moises ken Aaron iti sango ti Tolda.

44 Kinunani Yahweh ken ni Moises,

45 “Adaywanyo dagitoy a tattao ta pukawek ida iti apagdarikmat!”

Nagpaklebda a dua

46 ket kinuna ni Moises ken ni Aaron, “Alaem ti insensariom, kargaam iti beggang iti altar samo parabawan iti insenso. Dagdagusem nga ipan kadagiti tattao ket annongem ti seremonia ti pannakadalusda. Darasem! Bimtaken ti pungtot tiApoket nangrugin ti didigra.”

47 Nagtungpal ni Aaron. Innalana ti insensariona ket nagtartaray a napan iti tengnga dagiti naummong a tattao. Nakitana nga adun ti natay ta nangrugin ti didigra; inkabilna ti insenso iti beggang sana inaramid ti seremonia tapno mapakawan dagiti tattao.

48 Simmardeng ti didigra ket natda ni Aaron a sitatakder iti nagbaetan dagiti sibibiag ken dagiti natay.

49 Agdagup iti 14,700 dagiti natay, malaksid dagiti napapatay iti panagsukir ni Kora.

50 Idi awanen ti didigra, nagsubli ni Aaron iti ayan ni Moises iti ruangan ti Tolda ti Dios.

Ti Sarukod ni Aaron

1 Kinuna ni Yahweh ken ni Moises,

2 “Ibagam kadagiti Israelita nga ikkandaka iti 12 a sarukod, maysa ti aggapu iti pangulo ti tunggal tribu. Isuratmo ti nagan ti tunggal tao iti sarukodna

3 ket isuratmo ti nagan ni Aaron iti sarukod a mangibagi iti tribu ti Levi. Iti kasta, adda sarukod ti tunggal pangulo ti tribu.

4 Ikabilmo dagitoy iti Tolda ti Dios iti sango ti Lakasa ti Tulag a pagkitkitaanta.

5 Agsaringitto ti sarukod ti tao a piliek. Kastoy ti panangpasardengko kadagiti reklamo dagiti Israelita a maibusor kadakayo.”

6 Nakisao ngarud ni Moises kadagiti Israelita ket nangted ti tunggal pangulo ti tribu iti maysa a sarukod—sangapulo ket dua amin, agraman ti sarukod ni Aaron.

7 Inkabil ni Moises dagiti sarukod iti Tolda ti Dios iti sangoanan ti Lakasa ti Tulag ni Yahweh.

8 Idisumrek ni Moises iti Tolda iti sumuno nga aldaw, nakitana a nagsaringit ti sarukod ni Aaron a mangibagi iti tribu ni Levi. Malaksid kadagiti bulong, nagsabong pay ket nagbunga iti naluluom nga almendras!

9 Innala ni Moises dagiti amin a sarukod ket imparangna kadagiti Israelita. Nakitada ti napasamak ket kalpasanna, innala ti tunggal pangulo ti bukodna a sarukod.

10 Kinuna ni Yahweh ken ni Moises, “Isublim ti sarukod ni Aaron iti sangoanan ti Lakasa ti Tulag. Masapul a maidulin a kas ballaag kadagiti nasukir nga Israelita a matayda no dida isardeng ti panagsasaoda iti maibusor kaniak.”

11 Tinungpal ni Moises ti imbilin ni Yahweh.

12 Kinuna dagiti Israelita ken ni Moises, “Daytoyen ti kanibusananmi!

13 No matay ti umasideg iti Tolda ti Dios, kayatna a sawen a mataytayo amin!”

Dagiti Annongen dagiti Papadi ken Levita

1 Kinuna ni Yahweh ken ni Aaron, “Sika, dagiti annakmo ken dagiti Levita masapul a dakay ti agsagaba iti dusa iti aniaman a basol a maaramid iti panagserbi iti Tolda; ngem sika ken dagiti annakmo laeng ti agsagaba no adda pakabasolanyo iti panagserbi a kas padi.

2 Alaem dagiti kabagiam, ti tribu ni Levi, a tumulong kadakayo bayat ti panagserbiyo iti Tolda.

3 Aramidenda ti pagrebbenganda kadakayo ken iti Tolda ngem di maipalubos nga umasidegda kadagiti nasagradoan nga alikamen iti santuario wenno iti altar. No aramidenda ti kasta, agpapadakayo amin a mapapatay.

4 Masapul a makipagtrabahoda kadakayo ket tungpalenda dagiti annongenda iti amin a panagserbi iti Tolda. Saan a makipagtrabaho kadakayo dagiti saan a mapalubosan a tattao.

5 Dakay laeng kadagiti annakmo ti mangannong kadagiti trabahoyo iti Nasantoan a Lugar ken iti altar tapno saan nga agdissuor ti pungtotko kadagiti Israelita.

6 Pinilik dagiti kabagianyo a Levita kadagiti Israelita a sagutko kadakayo. Naidatonda kaniak tapno mabalinda ti agannong iti Tolda.

7 Ngem dakayo laeng kadagiti annakmo ti mangaramid kadagiti pagrebbengan ti padi iti altar ken kadagiti alikamen iti Kasasantoan a Lugar. Dagitoy dagiti annongenyo agsipud ta intedko kadakayo ti sagut a kinapadi. Mapapatay ti siasinoman nga awan karbenganna nga umasideg kadagiti nasagradoan nga alikamen.”

Ti Bingay dagiti Papadi

8 Kinuna ni Yahweh ken ni Aaron, “Itedko kadakayo ken kadagiti kaputotanyo ti amin a naisangsangayan a sagut a maidatag kaniak a di mapuoran, kas bingayyo iti agnanayon.

9 Kadagiti nasagradoan a daton a saan a mapuoran iti altar, dagitoy ti kukuayo: dagiti daton a makan, dagiti daton a maipaay iti basol, ken dagiti daton a pagsupapak. Agpaay kenka ken dagiti annakmo ti amin a maidatag kaniak a nasagradoan a daton.

10 Ibilangyo a nasagradoan dagitoy ket iti laeng nasantoan a lugar ti pangananyo. Dagiti laeng lallaki ti mabalin a mangan kadagitoy a taraon.

11 “Kukuayo pay dagiti dadduma a naisangsangayan a daton dagiti Israelita kaniak. Itedko ida kenka ken kadagiti annakmo a lallaki ken babbai iti agnanayon. Mapalubosan a mangan ti tunggal kameng ti familiam a nadalus iti imatang ti linteg.

12 “Itedko kadakayo ti amin a kasayaatan nga umuna a maapit nga ited kaniak dagiti Israelita iti tunggal tawen: lana ti olibo, arak ken trigo.

13 Kukuayo amin dagitoy ket mabalin a kanen ti tunggal kameng ti familiam a nadalus iti imatang ti linteg.

14 “Agpaaykadakayo ti amin a maidaton kaniak iti Israel.

15 “Kukuayo amin nga inauna nga anak ti tao wenno animal nga idaton kaniak dagiti Israelita. Ngem masapul a subboten ti inauna nga anak ti tao ken ti inauna nga anak ti animal a narugit iti imatang ti linteg.

16 Lima a bagi ti pirak, segun ti naituyang a pagtimbangan, ti pangsubbot kadagiti ubbing nga adda makabulandan.

17 Ngem saan a mabalin a subboten ti inauna nga anak ti baka, karnero ken kalding; kukuak ida ket masapul a maidatonda. Ibuyatyo ti darada iti altar ket puoranyo ti tabada a daton nga agpaay kaniak.

18 Kukuayo ti karne, agraman ti barukong ken kannawan a luppo ti naisangsangayan a daton.

19 “Itedko kenka ken kadagiti annakmo, lallaki man wenno babbai, ti amin a naisangsangayan a daton dagiti Israelita kaniak, kas bingayyo iti agnanayon. Saan a mawaswas daytoy a nakitulagak kadakayo ken kadagiti kaputotam.”

20 Kinuna ni Yahweh ken ni Aaron, “Awan ti sanikua a mabalinmo a tawiden ket awan met bingaymo iti daga ti Israel. Siak, ni Yahweh, ti bingay ken tawidmo.”

Ti Bingay dagiti Levita

21 Kinunani Yahweh, “Intedko kadagiti Levita ti amin nga apagkapullo nga idatag dagiti Israelita kaniak. Daytoy ti tangdanda iti panagserbida iti Tolda.

22 Saanen a mapalubosan dagiti gagangay nga Israelita nga umasideg iti Tolda tapno dida agbasol a pakaigapuan ti pannakapapatayda.

23 Manipud ita, dagiti Levita laeng ti mangaywan iti Tolda ket isuda ti makaammo iti aniaman a maaramid iti unegna. Agnanayon daytoy nga alagaden a masapul a tungpalen dagiti amin a kaputotam. Awan ti daga a tawiden dagiti Levita iti Israel.

24 Kukuada ti apagkapullo nga idatag kaniak dagiti Israelita a naisangsangayan a sagut, isu nga imbagak kadakuada nga awan permanente a dagada iti Israel.”

Ti Apagkapullo

25 Binilin ni Yahweh ni Moises

26 nga ibagana daytoy kadagiti Levita: “No awatenyo ti apagkapullo nga ited dagiti Israelita, masapul nga idatagyo ti apagkapullona kas naisangsangayan a sagut itiApo.

27 Maibilang daytoy naisangsangayan a sagut a kaibatogan ti daton a naggapu iti baro a trigo ken baro nga arak ti mannalon.

28 Kastoy met ti panangidatagyo iti naisangsangayan a sagut a kukua tiApokadagiti amin nga apagkapullo nga awatenyo kadagiti Israelita. Manipud kadagiti awatenyo, masapul nga itedyo ti naisangsangayan a sagut tiApoken ni Aaron a padi.

29 Masapul nga itedyo dagiti kasayaatan iti awatenyo.

30 Inton naidatagyon ti kasayaatan, mabalinyo nga alaen ti natda a kas iti panangala ti mannalon ti nabati iti sagutna nga idatagna.

31 Mabalinyo a kanen a sangafamiliaan iti sadinoman a lugar gapu ta dagitoy ti tangdanyo iti panagserbiyo iti Tolda.

32 Saankay a makabasol no kanenyo, no la ketdi idatagyo ti kasayaatan itiApo. No saanyo pay nga idatag daytoy, kayatna a sawen a matulawan ti sagut ket mapapataykayo.”

Dapu ti Nalabaga a Baka

1 Binilin ni Yahweh da Moises ken Aaron

2 nga itedda kadagiti Israelita dagitoy nga alagaden. Ipanyo kada Moises ken Aaron ti maysa a kabaian a nalabaga a baka nga awan depektona ken di pay naipako.

3 Maipan met laeng daytoy nga animal ken ni Eleazar a padi tapno maparti iti ruar ti kampo iti imatangna.

4 Mangala ni Eleazar iti dara, isawsawna ti ramayna, sumango iti Tolda ket warsianna iti mamimpito.

5 Masapul a mapuoran ti sibubukel a baka iti imatang ti padi, agraman ti lalat, lasag, dara ken bagbagisna.

6 Mangala ti padi iti sumagmamano a kayo ti sedro, saringit ti hisopo ken nalabaga a lupot sana ipurruak dagitoy iti apuy.

7 Kalpasanna, labaanna ti pagan-anayna ken buyatanna ti bagina iti danum sakbay nga agsubli iti kampo; nupay kasta, agtalinaed a narugit iti imatang ti linteg agingga iti rabii.

8 Masapul met a labaan ti tao a nangpuor iti baka ti pagan-anayna sana buyatan ti bagina iti danum ngem agtalinaed met a narugit iti imatang ti linteg agingga iti rabii.

9 Kalpasanna,maummong dagiti dapu ti napuoran a baka sa maikabil iti lugar a maibilang a nadalus iti ruar ti kampo. Annongen daytoy ti tao a maibilang a nadalus. Aramaten dagiti Israelita ti dapu a pangisagana iti danum iti seremonia ti panangikkat iti kinarugit, gapu ta naidaton ti baka a maipaay iti basol.

10 Ti tao a nangummong iti dapu masapul a labaanna ti pagan-anayna ngem agtalinaed a narugit agingga iti rabii. Agtalinaed iti agnanayon daytoy nga alagaden kadagiti Israelita ken dagiti ganggannaet a makipagnaed kadakuada.

Ti Mangsagid iti Bangkay

11 Maibilang a narugit iti pito nga aldaw ti siasinoman a mangsagid iti maysa a bangkay.

12 Iti maikatlo ken maikapito nga aldaw, masapul a dalusanna ti bagina babaen iti danum a maar-aramat iti seremonia ti pannakadalus ket kalpasanna maibilangen a nadalus. Ngem no dina dalusan ti bagina iti maikatlo ken maikapito nga aldaw, saan a nadalus iti imatang ti linteg.

13 Agtalinaed a narugit ti mangsagid iti maysa a bangkay a dina dalusan ti bagina agsipud ta saan a nabuyatan iti danum a maaramat iti seremonia ti pannakadalus. Tulawanna ti Tolda ti Dios ket mailaksid kadagiti tattao ti Dios.

14 No adda matay iti uneg ti maysa a tolda, maibilang a narugit iti las-ud ti pito nga aldaw ti siasinoman nga adda iti uneg wenno sumrek sadiay iti tiempo nga ipapatayna.

15 Agbalin met a narugit iti imatang ti linteg ti amin a karamba wenno banga nga awan kalubna.

16 Maibilang met a narugit iti las-ud ti pito nga aldaw ti siasinoman a mangsagid iti bangkay ti tao a napapatay wenno natay iti ruar wenno ti siasinoman a mangsagid iti tulang ti tao wenno iti tanem.

17 Tapno maikkat ti kinarugit, masapul ti dapu ti baka a napuoran a pangikkat iti basol; ikabil iti banga a nakargaan iti kasaksakdo a danum.

18 Mangala ti siasinoman a maibilang a nadalus iti saringit ti hisopo, itanebna iti danum sana warsian ti tolda, dagiti amin nga alikamen iti unegna ken dagiti tattao nga adda sadiay. Kasta met a tao a nadalus iti imatang ti linteg ti mangwarsi iti tao a nangsagid iti tulang ti tao wenno tanem wenno bangkay.

19 Iti maikatlo ken maikapito nga aldaw, warsian ti tao a nadalus iti imatang ti linteg ti siasinoman a maibilang a saan a nadalus. Iti maikapito nga aldaw, dalusan ti tao a narugit iti imatang ti linteg ti pagan-anayna sana buyatan ti bagina iti danum. Kalpasanna, ti tao a maibilang a nadalus ti mangannong iti seremonia ti pannakadalusna, ket maibilangen a nadalus iti sumipnget.

20 Agtalinaed a saan a nadalus ti tao a nagbalin a narugit iti imatang ti linteg no dina annongen ti pannakadalusna, agsipud ta saan a naibuyat kenkuana ti danum ti pannakadalus. Tulawanna ti Tolda ti Dios ket saanen a maibilang a maysa kadagiti tattao ti Dios.

21 Agtalinaed iti agnanayon daytoy nga alagaden. Masapul a labaan met ti tao a mangiwarsi iti danum ti pannakadalus ti pagan-anayna; agtalinaed a narugit agingga iti rabii ti siasinoman a mangsagid iti danum.

22 Maibilang a narugit ti aniaman a sagiden ti tao a maibilang a saan a nadalus ket agtalinaed a saan a nadalus agingga iti rabii ti siasinoman a mangsagid iti daytoy.

Dagiti Pasamak idiay Kades

1 Iti umuna a bulan, dimteng ti sibubukel a gimong dagiti Israelita iti let-ang ti Zin ket nagkampoda idiay Kades. Sadiay ti nakatayan ken nakaitabonan ni Miriam.

2 Awandanum iti nagkampoanda, isut’ gapuna a naguummong dagiti tattao iti sangoanan da Moises ken Aaron

3 ket nagreklamoda. “Naim-imbag la koman no nairamankami kadagiti padami nga Israelita a napapatay iti sangoanan ti Tolda ti Dios.

4 Apay nga inyegnakami iti daytoy a let-ang? Tapno mataykami ditoy, agraman dagiti animalmi?

5 Apay nga impanawnakam idiay Egipto ket inyegnakam iti daytoy nakapangpanglaw a lugar a pulos nga awan ti agtubo a mula? Awan ti trigo, igos, ubas, ken granada; awan pay danum nga inumen!”

6 Pimmanaw da Moises ken Aaron ket napanda nagpakleb iti daga iti ruangan ti Tolda ti Dios. Nagparang kadakuada ti makapurar a lawag ti dayag ni Yahweh.

7 Kinuna ni Yahweh ken ni Moises,

8 “Alaem ti sarukod iti sango ti Lakasa ti Tulag ket kalpasanna, ayabanyo ken ni Aaron ti entero a gimong. Iti imatangda amin, agsaoka iti dayta a bato ket pumsuak ti danum nga agpaay kadakuada ken dagiti animalda.”

9 Napan innala ni Moises ti sarukod kas imbilin ni Yahweh kenkuana.

10 Inummongda ken ni Aaron ti entero a gimong iti sango ti bato ket kinuna ni Moises, “Dumngegkayo, dakayo a nasukir! Masapul kadi a mangalakam iti danum iti daytoy a bato nga agpaay kadakayo?”

11 Ingngatoni Moises ti sarukod sana impang-or iti namindua ket pimsuak ti aglablabonan a danum. Ket imminum dagiti tattao ken dagiti animalda.

12 Ngem inungtan ni Yahweh da Moises ken Aaron, “Gapu ta nakapsut ti pammatiyo a mangipakaammo iti nasantoan a pannakabalinko iti imatang dagiti Israelita, saanyonto a maidanon ida iti daga nga inkarik nga ited kadakuada.”

13 Napasamak daytoy idiay Meriba,ti lugar a nagreklamoan dagiti Israelita iti maibusor ken ni Yahweh; ditoy a naiparang ti kinasantona.

Iparit ti Ari ti Edom a Lumasat dagiti Israelita

14 Manipud Kades, nangibaon ni Moises kadagiti mapan iti ari ti Edom. Kinunada: “Naggapu daytoy a pakaammo kadagiti kakabagiam, dagiti tribu ti Israel. Ammom amin a rigat a sinagabami,

15 no kasano ti ipapan dagiti kapuonanmi idiay Egipto, ket nagyankami sadiay iti adu a tawen. Pinarparigat dagiti Egipcio dagidi kapuonanmi ken uray dakami.

16 Gapu iti daytoy, immawagkami itiApoiti tulong. Nangngegna ti asugmi ket nangibaon iti anghel a nangiruar kadakami idiay Egipto. Ita, addakami ditoy Kades, maysa nga ili iti beddeng ti dagam.

17 Pangngaasim ta palubosannakami a lumasat iti dagam. Magnakami iti kangrunaan a kalsada;agingga a makaruarkami iti sakupmo. Saankami a sumiasi wenno sumrek kadagiti talonyo wenno kaubasanyo ket dikam met uminum kadagiti bubonyo.”

18 Ngem insungbat dagiti Edomita, “Saankayo a lumasatkayo iti sakupmi. No padasenyo, rummuarkami a manggubat kadakayo.”

19 Kinuna dagiti Israelita, “Itinto laeng dakkel a kalsada ti pagnaanmi. Ket no uminumkami wenno dagiti animalmi iti danumyo, bayadanminto. Daytoy laeng ti dawatenmi: papagnaendakami.”

20 Inulit dagiti Edomita, “Saan a mabalin.” Ket nabukel ti nabileg nga armadada a mangdarup kadagiti Israelita.

21 Gapu ta iparit dagiti Edomita a magnada iti sakupda, nagna dagiti Israelita iti sabali a dalan.

Ti Ipapatay ni Aaron

22 Manipud Kades, nagdaliasat ti entero a gimong ti Israel agingga a nakadanonda iti Bantay Hor

23 iti beddeng ti Edom. Sadiay, kinuna ni Yahweh kada Moises ken Aaron,

24 “Saan a sumrek ni Aaron iti daga nga inkarik nga ited iti Israel; matay ni Aaron gapu ta sinukiryo a dua ti bilinko idiay Meriba.

25 Alaem ni Aaron ken ni Eleazar nga anakna ket sumang-atkayo iti Bantay Hor.

26 Inton dumanonkayo sadiay, uksobem ti pagan-anayna a kas padi samo ikawes ken ni Eleazar. Ket sadiayen ti pakatayan ni Aaron.”

27 Tinungpal ni Moises ti bilin ni Yahweh. Nakita ti sibubukel a gimong ti isasang-atda iti Bantay.

28 Ididumtengda iti tapaw ti bantay, inuksob ni Moises ti pagan-anay ni Aaron ket inkawesna ken ni Eleazar. Sadiay a natay ni Aaron ket simmalog da Moises ken Eleazar.

29 Idi maammoan ti amin a gimong a natay ni Aaron, tallopulo nga aldaw a dinungdung-awanda.

Parmeken dagiti Israelita dagiti Cananeo

1 Idimadamag ti Cananeo nga ari ti Arad iti akin-abagatan a paset ti Canaan a magna dagiti Israelita iti Atarim, rinautna ida ket innalana a balud ti sumagmamano kadakuada.

2 Insapata dagiti Israelita itiApo: “No palubosannakami a mangparmek kadagitoy a tattao, idatonmi kenka ida ken dagiti siudadda ket dadaelenmi ida.”

3 Impangag ni Yahweh ti dawatda ket tinulonganna ida a mangparmek kadagiti Cananeo. Ngarud, dinadael ida dagiti Israelita kasta met dagiti siudadda sada pinanaganan ti lugar iti Horma.

Ti Sinan-uleg a Bronse

4 Pimmanawdagiti Israelita iti Bantay Hor; linikawda ti sakup ti Edom ket nagnada iti kalsada nga agturong iti Gulfo ti Aqaba. Ngem iti dalan, naibus ti anus dagiti tattao

5 ketnagsaoda iti maibusor iti Dios ken ni Moises. Inreklamoda, “Apay nga impanawnakami idiay Egipto? Tapno patayennakam iti daytoy a let-ang nga awan ti taraon wenno danum? Maumakamin iti kastoy a kanen nga awan serserbina!”

6 Gapu iti daytoy, nangibaon ni Yahweh kadagiti nagita nga uleg iti ayanda ket adu nga Israelita ti nakagat a puon ti nakatayanda.

7 Napan dagiti tattao ken ni Moises ket kinunada, “Nagbasolkami iti panagsaomi iti maibusor itiApokasta met kenka. Ikararagmo koma itiAponga ipanawna dagitoy nga uleg.” Iti kasta, inkararagan ni Moises dagiti tattao.

8 Imbaga ni Yahweh a mangaramid ni Moises iti sinan-uleg a bronse sana ibayog tapno ti siasinoman a makagat umimbag no kitaenna ti sinan-uleg.

9 Nangaramidngarud ni Moises iti sinan-uleg, ket inkabilna iti kayo. No adda kagaten ti uleg, umimbag no kitaenna ti sinan-uleg.

Ti Panagdaliasatda iti Tanap ti Moab

10 Intuloy dagiti Israelita ti nagdaliasat ket nagkampoda idiay Obot.

11 Pimmanawda iti dayta a lugar ket nagkampoda kadagiti rebba ti Abarim iti let-ang iti dayaen ti sakup ti Moab.

12 Pimmanawda sadiay ket nagkampoda iti Tanap ti Zered.

13 Manipud sadiay, intuloyda manen ti nagdaliasat ket nagkampoda iti ballasiw ti Karayan Arnon iti let-ang iti bangirna ti amianan a dumanon iti sakup dagiti Amorreo. (Ti Arnon ti nagbeddengan ti sakup dagiti Moabita ken ti sakup dagiti Amorreo.)

14 Daytoy ti gapuna nga iti Libro dagiti Pannakigubat ni Yahweh adda kastoy a nailanad: “…ti ili ti Waheb idiay Sufa, ken dagiti tanap; ti Karayan Arnon,

15 ken ti salogan dagiti tanap a dumanon iti ili ti Ar ken iti beddeng ti Moab.”

16 Manipud sadiay, napanda iti maysa a lugar a managan Bubbubon a nagkunaan ni Yahweh ken ni Moises: “Ummongem dagiti tattao ket ikkak ida iti danum.”

17 Iti dayta a tiempo, kinanta dagiti Israelita daytoy:

“Dakayo a bubon,

agipussuakkay iti danum

ket kantaanmi—

18 Bubon a kinali dagiti papangulo,

dagiti agtuturay dagiti tattao;

bubon a nakali babaen iti setro ken bastonda.”

Pimmanawda iti let-ang ket nagturongda idiay Matana.

19 Manipud sadiay, napanda idiay Nahaliel ket manipud Nahaliel, napanda idiay Bamot

20 ket manipud Bamot, napanda iti tanap iti sakup ti Moab, iti babaen ti Bantay Pisga a pakatannawagan iti let-ang.

Parmeken ti Israel ni Ari Sihon ken Ari Og

21 Nangibaon dagiti Israelita kadagiti pannakabagida a mapan ken ni Sihon nga ari dagiti Amorreo ket kinunada kenkuana:

22 “Palubosannakami koma a lumasat iti dagam. Surotenmi ti dalan, dakami ken dagiti animalmi; dikam sumrek kadagiti talonyo wenno kaubasanyo ket dikam uminum kadagiti bubonyo. Magnakami iti kangrunaan a kalsadaagingga a makaruarkami iti sakupmo.”

23 Ngem saan a palubosan ni Sihon a lumasat dagiti Israelita iti dagana. Inummongna ketdi ti armadana ket dinarupna dagiti Israelita. Nagrarangetda idiay Jaaz iti let-ang.

24 Nagballigi dagiti Israelita a nangparmek kadagiti kabusor ket sinakupda ti dagada, manipud Karayan Arnon iti amianan ti Jabbok agingga iti Jazer iti beddeng dagiti Ammonita.

25 Sinakup dagiti Israelita ti amin a siudad dagiti Ammonita, agraman ti Hesbon ken amin a kabangibangna nga ili ket nagnaedda sadiay.

26 Ti Hesbon ti kangrunaan a siudad ni Sihon nga ari dagiti Amorreo. Nakiranget ni Sihon iti sigud nga ari ti Moab ket sinakupna ti amin a dagana agingga iti Karayan Arnon.

27 Daytoy ti gapuna nga ikanta dagiti mannaniw:

“Umaykay iti Hesbon a siudad ni Ari Sihon!

Kayatmi a makita a mabangon manen ket matarimaan.

28 Naminsan,manipud iti siudad ti Hesbon,

kasla apuy a rimmuar ti armada ni Sihon.

Dinadaelna ti siudad ti Ar iti Moab

ken inkisapnadagiti turod ti akingngato nga Arnon.

29 Anian a kinadaksanggasatyo, dakayo a tattao ti Moab!

Dakayo nga agdaydayaw ken ni Kemos,

agturongkay iti pannakadadael.

Pinalubosan ti diosmo

a kinamat ti ari dagiti Amorreo dagiti lallaki,

ken tiniliwna a kas balud dagiti babbai.

30 Ngem nadadaelen dagiti kaputotanda,

manipud Hesbon agingga’t idiay Dibon,

manipud Nasim agingga’t idiay Nofa, iti asideg ti Medeba.”

31 Ngarud, nagnaed dagiti Israelita iti sakup dagiti Amorreo.

32 Kalpasanna, nangibaon ni Moises kadagiti tattao tapno ammoenda no kasano a serkenda ti siudad ti Jazer. Sinakup dagiti Israelita ti siudad ken dagiti kabangibang nga ili; pinagtalawda dagiti Amorreo nga agnaed sadiay.

33 Nagsikko dagiti Israelita ket nagnada iti dalan nga agpa-Basan. Rimmuar ni Og nga ari ti Basan agraman ti armadana ket dinarupna ida idiay Edrei.

34 Kinuna ni Yahweh ken ni Moises, “Dika agbuteng kenkuana. Yawatko kenka ti ari, agraman ti amin a tattaona ken ti dagana. Aramidem kenkuana ti inaramidmo ken ni Sihon, ti ari dagiti Amorreo a nagturay idiay Hesbon.”

35 Pinatay dagiti Israelita ni Og, dagiti annakna ken amin a tattaona—awan ti nakalasat kadakuada. Ket sinakupda ti dagana.

Paayaban ti Ari ti Moab ni Balaam

1 Intuloy dagiti Israelita ti panagdaliasatda ket nagkampoda kadagiti tantanap ti Moab iti daya ti Jordan iti ballasiw ti Jerico.

2 Nadamag ni Ari Balak nga anak ni Sefor ti inaramid dagiti Israelita kadagiti Amorreo.

3 Nagbuteng ti ari ken dagiti amin a tattaona gapu iti kaadu dagiti Israelita.

4 Kinuna dagiti Moabita kadagiti pangulo dagiti Midianita, “Iti mabiit, ibusen daytoy a bunggoy ti amin nga adda iti lawlawtayo, kas iti panangibus ti baka iti ruot iti pagaraban.” Iti kasta,

5 nangibaonni Ari Balak kadagiti tattao a mapan mangayab ken ni Balaam nga anak ni Beor idiay Petor iti asideg ti Karayan Eufrates iti daga ti Amaw. Pinaibagana: “Adda sibubukel a nasion a naggapu idiay Egipto; nagsaknap dagiti tattaona iti amin a lugar ket kayatda a sakupen ti daga nga iturayak.

6 Ad-aduda ngem dakami, isu nga umaymo koma ilunod ida, barbareng maparmekmi ida ket mapagtalawmi ida iti daga. Ammok a no mangbendisionka, mabendisionan dagiti tattao, ket no mangilunodka, mailunodda.”

7 Intugot dagiti panglakayen ti Moab ken dagiti pangulo ti Midian ti pagbayad iti panagilunod ni Balaam. Imbagada ken ni Balaam ti pinaibaga ni Balak.

8 Kinuna ni Balaam kadakuada, “Maturogkayo ditoy ita a rabii ket inton bigat, ibagak kadakayo ti aniaman nga ibaga tiApo.” Immian ngarud dagiti pangulo ti Moab iti balay ni Balaam.

9 Iti dayta a rabii, nagparang ti Dios ken ni Balaam ket kinunana, “Siasino dagitoy sangailim?”

10 Insungbat ni Balaam, “Imbaon ida ni Balak nga ari ti Moab; imbagada kaniak

11 nga adda tattao a naggapu idiay Egipto ket nagsaknapda iti daga. Kayatna nga ilunodko ida tapno kabaelanna a sarangten ken paksiaten ida.”

12 Kinuna ti Dios ken ni Balaam, “Dika sumurot kadagitoy a tattao ken dimo ilunod dagiti Israelita gapu ta binendisionak ida.”

13 Kabigatanna, napan imbaga ni Balaam kadagiti imbaon ni Balak, “Agawidkayon; dinak palubosan tiApoa kumuyog kadakayo.”

14 Iti kasta, nagsublida ken ni Balak ket imbagada kenkuana a madi ni Balaam a kumuyog kadakuada.

15 Nangibaon manen ni Balak iti ad-adu a panglakayen nga ad-adda a mararaem ngem dagiti immuna.

16 Napanda ken ni Balaam ket impakaammoda ti imbaga ni Balak: “Pangngaasim ta dimo ipalubos nga adda makalapped iti yaaymo kaniak!

17 Gunggonaanka iti adu ket aramidek ti aniaman nga ibagam. Umaymo koma ilunod dagitoy a tattao.”

18 Ngem insungbat ni Balaam, “Uray no ited kaniak ni Balak ti amin a pirak ken balitok iti palasiona, diak mabalin a sukiren ti bilin tiApoa Diosko iti uray kabassitan a banag.

19 Nupay kasta, umiankayo met ditoy ita a rabii tapno maammoak no adda pay ibaga tiApokaniak.”

20 Iti dayta a rabii, napan ti Dios ken ni Balaam ket kinunana, “No umaydaka ayaban dagitoy a tattao, kumuyogka kadakuada ngem ti laeng ibagak kenka ti aramidem.”

Ni Balaam ken ti Asnona

21 Iti sumuno a bigat, sinilyaan ni Balaam ti asnona ket kimmuyog kadagiti pangulo a taga-Moab.

22 Nakapungtot ti Dios gapu iti ipapan ni Balaam. Idi adda iti dalan a sisasakay iti asnona ken kinuyog ti dua nga adipenna, nagtakder ti anghel ni Yahweh iti kalsada tapno lapdanna.

23 Nakita ti asno ti agtaktakder nga anghel a nakaiggem iti kampilan ket simmina iti dalan sa nagturong iti taltalon. Inablatan ni Balaam ti asno tapno agsubli iti dalan.

24 Nagtakder ti anghel iti dana iti nagbaetan ti dua a kaubasan; nailet dayta a paset ti kalsada nga adda bakud iti agsumbangir.

25 Idi makita ti asno ti anghel, immampir iti bakud ket nalipit ti saka ni Balaam. Inablatan manen ni Balaam ti asno.

26 Binangenan manen ti anghel ti pagnaan; nagtakder iti disso a pulos nga awan makapagna iti agsumbangir.

27 Ita, nagidda ti asno apaman a nakitana ti anghel. Nakapungtot ni Balaam ket rinugianna nga ablatan ti asno.

28 Inikkan ni Yahweh ti asno iti pannakabalin nga agsao ket kinunana ken ni Balaam, “Ania aya ti nakabasolak kenka? Namitlon nga inablatannak.”

29 Insungbat ni Balaam, “Gapu ta pagbalbalinennak a maag! No adda la kampilanko, pinatayka koman.”

30 Kinuna ti asno, “Asnonak, saan kadi? Nabayagen a nagsaksakayannak. Napuotamon aya a sinukirka?”

“Saan pay,” insungbat ni Balaam.

31 Impalubos ni Yahweh a makita ni Balaam ti agtatakder nga anghel a nakaiggem iti kampilan. Nagpakleb ni Balaam iti daga.

32 Kinuna ti anghel kenkuana, “Apay a kasta ti inaramidmo iti asnom? Namitlon nga inablatam! Umayko lapdan ti ipapanmo gapu ta saan a rumbeng a mapanka.

33 Ngem nakitanak ti asnom, ket naglisi iti namitlo. No saan a naglisi, pinatayka koma ket naispal ti asno.”

34 Kinuna ni Balaam, “Nagbasolak. Diak ammo a nakatakderka iti kalsada tapno lapdannak. Agawidakon no saan a rumbeng a mapanak.”

35 Ngem kinuna ti anghel, “Kumuyogka kadagitoy a tattao, ngem ti laeng ibagak ti sawem.” Ket simmurot ni Balaam kadagiti imbaon ni Balak.

Sangailien ni Balak ni Balaam

36 Idi madamag ni Balak a sumangpet ni Balaam, napanna sinabat idiay Ar, maysa a siudad iti igid ti Karayan Arnon iti beddeng ti Moab.

37 Kinuna ni Balak ken ni Balaam, “Apay a dika immay idi damo a pinaayabanka? Impagarupmo kadi nga awan umdas a panggunggonak kenka?”

38 Insungbat ni Balaam, “Uray ket addaakon. Ngem awan bukodko a pannakabalin nga agsao. Ti laeng sawen kaniak ti Dios ti mabalinko nga ibaga.”

39 Simmurot ni Balaam ken ni Balak iti ili ti Husot.

40 Idi dumtengda sadiay, nagparti ni Balak iti baka ken karnero ket inikkanna iti karne ni Balaam ken dagiti pangulo a kinakuyogna.

Ti Umuna a Padto ni Balaam

41 Kabigatanna, simmang-at da Balak ken Balaam idiay Bamot Baal. Manipud iti ayanda, matannawagan ni Balaam ti dadduma a kampo dagiti Israelita.

1 Kinunana ken ni Balak, “Ibangonannak ditoy iti pito nga altar saka mangyeg iti pito a toro a baka ken pito a kalakian a karnero.”

2 Nagtungpal ni Balak, ket kaduana ni Balaam a nangidaton iti toro a baka ken kalakian a karnero iti tunggal altar.

3 Kinuna ni Balaam ken ni Balak, “Agbatika ditoy abay ti datonmo a mapuoran, ta innak kitaen no umaynak kasao tiApo. Ibagakto kenka ti aniaman a maipaltiing kaniak.” Napan ni Balaam iti kalbo a turod

4 ket nagparang ti Dios kenkuana. Kinuna ni Balaam kenkuana, “Nangbangonak iti pito nga altar ket nangidatonak iti baka ken karnero iti tunggal altar.”

5 Kinuna ni Yahweh, “Agsublika ken ni Balak ket ibagam kenkuana ti saok.”

6 Nagsubli ngarud ni Balaam iti ayan ni Balak. Nadanonna ni Balak ken dagiti amin a pangulo ti Moab; agtatakderda pay laeng iti ayan ti datonna a mapuoran.

7 Inyebkas ni Balaam daytoy a padto:

“Pinaalanak ni Balak nga ari ti Moab

idiay Syria, iti kabambantayan ti daya.

Inawisnak a mangilunod kadagiti Israelita.

8 Apay nga ilunodko ti di inlunod ti Dios?

Kasano nga isaok ti dakes a pagbanaganda

idinto a saan nga inyebkas tiApoti kasta?

9 Manipud nangato a kabatoan, makitak ida,

manipud katurturodan, maimatangak ida

maysa a nasion nga agbiag nga agmaymaysa,

naiduma a pagilian, naisalsalumina.

10 Kasla tapok ti kaadu dagiti kaputotan ti Israel—

di mabilang ti umariwekwek a kaaduda.

Ti ipapatayko kas koma ti ipapatay dagiti tattao ti Dios;

pumusayak koma a natalna a kas kadagiti nalinteg.”

11 Kinuna ni Balak ken ni Balaam, “Ania daytoy nga inaramidmo kaniak? Inyegka ditoy tapno ilunodmo dagiti kabusorko, ngem binendisionam ketdi ida.”

12 Insungbatna, “Ti laeng ibaga kaniak tiApoti mabalinko nga ibaga.”

Ti Maikadua a Padto ni Balaam

13 Kinuna ni Balak ken ni Balaam, “Inta iti sabali a lugar a pakatannawagam kadagiti dadduma nga Israelita. Sadiay, ilunodmo ida.”

14 Napanda iti tapaw ti Bantay Pisga. Iti talon ti Zofim, nangbangon manen ni Balak iti pito nga altar ket nangidatag iti toro a baka ken kalakian a karnero iti tunggal altar.

15 Kinuna ni Balaam ken ni Balak, “Agbatika ditoy iti abay ti datonmo a mapuoran ta innak makiuman iti Dios sadiay.”

16 Nakiuman ni Yahweh ken ni Balaam. Imbaga ni Yahweh ti sawenna sana pinagsubli tapno ibagana ken ni Balak ti saona.

17 Nagsubli iti ayan ni Balak a sitatakder pay laeng iti abay ti datonna a mapuoran a kaduana dagiti papangulo ti Moab. Sinaludsod ni Balak no ania ti imbaga ni Yahweh.

18 Kastoy ti padto nga inyebkas ni Balaam:

“Balak nga anak ni Sefor, dumngegka;

denggem ti innak ibaga kenka.

19 Saan a tao ti Dios tapno agulbod;

saan nga agbalbaliw ti panunotna.

Aramidenna ti aniaman nga ikarina.

20 Naibilin a mangbendisionak;

no mangbendision ti Dios, diak mabaliwan.

21 Iti Israel awan makitak a didigra,

awan kinadaksanggasat iti masakbayanna.

Adda kadakuada tiApoa Diosda

ket ipakaammoda nga isu ti arida.

22 Inruar ida ti Dios idiay Egipto;

makiranget gapu kadakuada a kasla atap a baka.

23 Awan buyon wenno padles

a maaramat a maibusor iti Israel.

Ita, kuna dagiti tattao maipapan iti Israel:

‘Kitaenyo ti inaramid ti Dios!’

24 Kasla nabileg a leon ti Israel.

Di agtalna no dina mapisangpisang ti kabusorna,

di agsardeng no dina mainum ti darana.”

25 Kinuna ni Balak ken ni Balaam, “No dimo kayat nga ilunod dagiti Israelita, dimo koma ngarud bendisionan ida!”

26 Insungbat ni Balaam, “Diak aya imbaga kenka a masapul nga aramidek amin a sawen tiApo?”

Ti Maikatlo a Padto ni Balaam

27 Kinuna ni Balak, “Sumurotka ket ipanka iti sabali a lugar. Nalabit a palubosannaka ti Dios a mangilunod kadakuada manipud sadiay.”

28 Iti kasta, impanna ni Balaam iti Bantay Peor a pakatannawagan ti let-ang.

29 Kinuna ni Balaam kenkuana, “Ibangonannak iti pito nga altar ditoy ket yegannak iti pito a toro a baka ken pito a kalakian a karnero.”

30 Inaramid ni Balak ti naibaga kenkuana ket nangidaton iti baka ken karnero iti tunggal altar.