Author: admin

Maibangon dagiti Baton-lagip

1 Idi nakaballasiwen dagiti amin a tattao iti Karayan Jordan, kinuna ni Yahweh ken ni Josue:

2 “Mangpilika iti 12 a lallaki, maysa kada tribu,

3 ket pagpidutem ida iti saggagaysada a bato iti tengnga ti Jordan, iti mismo a nagtakderan dagiti papadi. Baklayenda dagitoy a bato ket ikabilda iti pagkampoanyo inton rabii.”

4 Inayaban ngarud ni Josue dagiti 12 a pinilina

5 ket imbagana kadakuada, “Umun-unakayo ngem ti Lakasa ti Tulag tiApoa Diosyo. Inton dumtengkay iti tengnga ti Jordan, mangala ti tunggal maysa kadakay iti bato a baklayenna, maysa para iti tunggal tribu ti Israel.

6 Agpaayto dagitoy a bato a pakalaglagipan dagiti tattao iti inaramid tiApo. Iti masakbayan, inton saludsoden dagiti annakyo ti kaipapanan dagitoy,

7 ibagayonto kadakuada a nagsardeng ti panagayus ti Jordan idi maiballasiw ti Lakasa ti Tulag tiApo. Kanayonto nga ipalagip dagitoy a bato kadagiti Israelita ti napasamak ditoy.”

8 Kas imbilin ni Yahweh ken ni Josue, nangala dagiti lallaki iti 12 a bato iti tengnga ti Jordan, maysa iti tunggal tribu ti Israel. Imballasiwda dagitoy nga impan iti nagkampoanda ket sadiay ti nangidissoanda.

9 Nangikabil met ni Josue iti 12 a bato iti tengnga ti karayan, iti nagtakderan dagiti papadi a nangawit iti Lakasa ti Tulag. (Agpapan ita, adda pay laeng sadiay dagiti bato.)

10 Nagtalinaed a sitatakder dagiti papadi iti tengnga ti Jordan agingga a nalpas amin nga imbilin ni Yahweh ken ni Josue nga aramiden dagiti tattao. Daytoy ti bilin idi ni Moises.

Nagdardaras a limmasat dagiti tattao.

11 Idi nakaballasiwda aminen, immun-una manen ti Lakasa ti Tulag ni Yahweh ken dagiti papadi.

12 Kas imbaga ni Moises kadakuada, immun-una ngem dagiti Israelita dagiti siiigam a lallaki iti tribu ni Ruben, iti tribu ti Gad ken ti kagudua ti tribu ti Manases.

13 Iti imatang ni Yahweh, agarup 40,000 a mannakigubat ti nagturong iti pagbabakalan iti tanap nga asideg iti Jerico.

14 Iti dayta nga aldaw, intan-ok tiAponi Josue iti imatang dagiti Israelita. Rinaraemda ni Josue iti unos ti panagbiagna a kas met iti panagraemda idi ken ni Moises.

15 Imbaga ni Yahweh ken ni Josue

16 a pasang-atenna iti Jordan dagiti papadi a mangaw-awit iti Lakasa ti Tulag.

17 Nagtungpal ni Josue.

18 Idi makatakdangen dagiti papadi, nagayus manen ti karayan ket naglippias dagiti teppangna.

19 Maika-10 nga aldaw iti umuna a bulanidi ballasiwen dagiti tattao ti Jordan. Nagkampoda idiay Gilgal iti daya ti Jerico.

20 Sadiay ti nangikabilan ni Josue kadagiti 12 a bato nga innalada idiay Jordan.

21 Kinunana kadagiti Israelita, “Iti masakbayan, inton saludsoden dagiti annakyo ti kaipapanan dagitoy a bato,

22 ilawlawagyonto kadakuada a nagmaga ti Jordan idi bimmallasiw ti Israel.

23 Ibagayonto a pinagmaga tiApoa Diosyo ti karayan agingga a nakaballasiwkayo, a kas iti inaramidna iti Nalabaga a Baybay idi bumallasiwkami.

24 Gapu itoy, maammoanto ti amin a tao ditoy daga no kasano ti kadakkel ti pannakabalin tiApoket agnanayon nga agbutengkayto itiApoa Diosyo.”

Ti Pannakakugit dagiti Lallaki idiay Gilgal

1 Nadamag dagiti amin nga ari dagiti Amorreo iti laud ti Jordan ken dagiti ari dagiti Cananeo iti igid ti Taaw Mediterranean a pinagmaga tiApoti Jordan agingga a nakaballasiw dagiti Israelita. Nagbutengda ket timmakrotda a mangsango kadagiti Israelita.

2 Kinuna ni Yahweh ken ni Josue, “Agaramidka kadagiti imuko iti natangken a bato ket kugitem amin dagiti Israelita.”

3 Iti kasta, nagaramid ni Josue kadagiti natadem a bato ket kinugitna dagiti Israelita iti maysa a lugar a maaw-awagan iti Gibeat-haaralot.

4-6 Idipumanaw dagiti Israelita idiay Egipto, nakugit aminen dagiti lallaki. Ngem iti unos ti 40 a tawen a panagdaliasat dagiti Israelita idiay let-ang, awan ti maladaga a nakugit. Maysa pay, kalpasan dayta a tiempo, natay dagiti amin a mannakigubat a lallaki a rimmuar idiay Egipto, agsipud ta nagsukirda itiApo. Kas insapatana, dina impalubos a makitada ti nabaknang ken nadam-eg a daga nga inkarina nga ited kadagiti kapuonanda.

7 Saan a nakugit dagiti annakda ket daytoy baro a kaputotan ti kinugit ni Josue.

8 Kalpasan ti pannakakugitda, nagtalinaed ti entero a nasion iti kampo agingga nga immimbag dagiti sugatda.

9 Kinuna ni Yahweh ken ni Josue, “Ita nga aldaw, inikkatko kadakayo ti pannakaibabainyo a kas tagabu idiay Egipto.” Isut’ gapuna a Gilgalti naipanagan iti dayta a disso, ket isu pay laeng ti naganna agpapan ita.

10 Bayatti panagkampo dagiti Israelita idiay Gilgal, iti tanap ti Jerico, nginilinda ti Paskua iti rabii ti maika-14 nga aldaw ti bulan.

11 Iti sumuno nga aldaw, damo a nanganda iti taraon a naapit idiay Canaan: iniruban ken tinapay nga awan lebadurana.

12 Nagsardengidin a nagtinnag ti mana. Awanen ti mana ket manipud iti dayta a tawen, ti apit ti Canaan ti paggapuan ti kanenda.

Ni Josue ken ti Lalaki a Nakaiggem iti Kampilan

13 Idi adda ni Josue iti asideg ti Jerico, kellaat nakakita iti maysa a lalaki a siiiggem iti kampilan nga agtaktakder iti sangoananna. Inasitgan ni Josue ket sinaludsodna, “Maysaka kadi kadagiti soldadomi wenno maysaka a kabusor?”

14 “Saan,” insungbat ti lalaki. “Addaak ditoy a kas kapitan ti buyot tiApo.”

Nagrukbab ni Josue a nagdaydayaw kenkuana ket kinunana, “Sidadaanak nga agserbi kenka, apo. Ania ti kayatmo nga aramidek?”

15 Kinuna ti kapitan ti buyot ni Yahweh, “Ikkatem ta pallokam ta nasantoan a daga ti pagtaktakderam.” Nagtungpal ni Josue.

Ti Pannakatnag ti Jerico

1 Narikpan ti Jerico ket naguardiaan tapno saan a mastrek dagiti Israelita. Awan ti makastrek wenno makaruar iti siudad.

2 Kinuna ni Yahweh ken ni Josue, “Yawatko kenka ti Jerico ken ti arina, agraman dagiti natutured a soldadona.

3 Agmartsakayo, sika ken dagiti soldadom, ket lawlawenyo ti siudad, maminsan iti tunggal aldaw. Aramidenyo daytoy iti innem nga aldaw.

4 Masapul nga adda ti Lakasa ti Tulag iti sango dagiti pito a papadi a saggaysa ti iggemda a trumpeta. Iti maikapito nga aldaw, mamimpitonto a rikosenyo ti siudad idinto a puypuyoten dagiti papadi ti trumpetada.

5 Kalpasanna, puyotenda ti trumpetada iti napaut. Apaman a mangngeg dagiti tattao, aggigiddandanto nga agriaw ket marbanto ti bakud ti siudad. Sumrekto a dagus ti entero nga armada iti siudad.”

6 Inayaban ngarud ni Josue dagiti papadi. “Alaenyo ti Lakasa ti Tulag,” kinunana kadakuada. “Pito kadakayo ti magna iti sangoananna a nakaiggem iti trumpeta. Umun-una ngem dakayo dagiti soldado.”

7 Imbilinna kadagiti tattao a rikosenda ti siudad; umun-una dagiti mannakigubat a magna iti sango ti Lakasa ti Tulag ni Yahweh.

8-9 Kas imbilin ni Josue, immun-una a nagrubbuat dagiti guardia a mannakigubat; simmaruno dagiti papadi a mangpuypuyot kadagiti trumpetada. Iti likudanda, adda dagiti papadi a mangaw-awit iti Lakasa ti Tulag a sinaruno dagiti guardia. Saan nga agsardeng ti pannakapuyot dagiti trumpeta.

10 Ngem binilin ni Josue a saan nga agriaw dagiti tattao ken dida agtagtagari malaksid no ibagana kadakuada.

11 Imbaonna ngarud dagiti papadi a mangaw-awit iti Lakasa ti Tulag ni Yahweh. Naminsan a rinikosda ti siudad. Nagsublida met laeng iti kampo a nangpalabasanda iti rabii.

12-13 Kabigatanna, nasapa a bimmangon ni Josue ket iti maikadua a gundaway, rinikos dagiti papadi ken dagiti mannakigubat ti siudad iti isu met la nga urnosda iti napalabas nga aldaw: Immuna dagiti guardia sa dagiti papadi a mangpuypuyot iti trumpetada; kalpasanna, dagiti papadi a mangaw-awit iti Lakasa ti Tulag ni Yahweh, ket kamaudianna, dagiti guardia iti likud. Kabayatanna, mapuypuyot met dagiti trumpeta.

14 Iti sumaruno nga aldaw, linawlawda manen ti siudad iti naminsan sada nagsubli iti kampo. Innem nga aldaw a kastoy ti inaramidda.

15 Iti maikapito nga aldaw, nasapada a bimmangon ket namimpito a rinikosda ti siudad. Dayta laeng ti aldaw a namimpito a rinikosda ti siudad.

16 Iti maikapito a panangrikosda, sakbay ti panangpuyot dagiti papadi iti trumpetada, imbilin ni Josue kadagiti tattao nga agriawda. Kinunana, “Inteden tiApoti siudad kadakayo.

17 Masapul a madadael a mamimpinsan ti siudad ken ti amin a linaonna a kas daton itiApo. Ni laeng Rahab a balangkantis a babai, ken amin nga adda iti balayna ti maispal gapu ta inlemmengna dagiti imbaontayo nga espia.

18 Ngem diyo alaen ti aniaman a nairanta a madadael. No adda alaenyo kadagitoy, yegyonto ti riribuk ken pannakadadael iti kampo dagiti Israelita.

19 Nailasin nga agpaay itiApoti amin a naaramid iti pirak, balitok, bronse wenno landok. Masapul a maipanda iti pagidulinan iti gameng tiApo.”

20 Pinuyotngarud dagiti papadi ti trumpetada. Apaman a nangngeg dagiti tattao, nagriawda, ket narba a namimpinsan dagiti bakud ti siudad. Nagtartarus a simrek ti entero nga armada iti siudad ket sinakupda.

21 Inuloyanda babaen iti kampilan dagiti amin nga adda iti siudad, lallaki ken babbai, ubbing ken lallakay. Pinatayda met dagiti baka, karnero ken asno.

22 Imbilin ni Josue kadagiti dua a lallaki a naibaon nga espia, “Inkay iti balay ti balangkantis a babai, ket iruaryo agraman ti amin a familiana, kas inkariyo kenkuana.”

23 Napanda inruar ni Rahab, ni tatangna, ni nanangna, dagiti kakabsatna ken dadduma a kameng ti familiana. Impanda amin ida, agraman dagiti tagabu iti asideg ti kampo dagiti Israelita.

24 Kalpasanna, pinuoranda ti siudad ket pinadapuda dagiti amin a linaonna, malaksid dagiti alikamen a naaramid iti balitok, bronse ken landok. Innalada ket inkabilda ida iti pagidulinan iti gameng ni Yahweh.

25 Ngeminispal ni Josue ni Rahab a balangkantis a babai ken amin a kakabagianna, gapu ta inlemmengna dagiti dua nga espia nga imbaon ni Josue iti Jerico. Agpapan kadagitoy nga aldaw, agnaed pay laeng ti kaputotan ni Rahab idiay Israel.

26 Itidayta a tiempo, siiinget nga impakdaar daytoy ni Josue,

“Siasinoman a mangbangon iti siudad nga Jerico, ilunodto tiApo.

Siasinoman a mangikabil iti fondasion,

matayto ti inauna nga anakna a lalaki.

Siasinoman a mangikabil kadagiti ruanganna, matayto ti inaudi nga anakna.”

27 Iti kasta, kinadkadua ni Yahweh ni Josue, ket nagdindinamag ni Josue iti entero a pagilian.

Ti Basol ni Acan

1 Saan a natungpal ti bilin ni Yahweh iti Israel nga awan ti mangala iti aniaman a nairanta a madadael iti Jerico. Maysa a lalaki nga agnagan iti Acan ti nangsukir iti bilin ket simged ti pungtot ni Yahweh kadagiti Israelita. (Ni Acan ti anak ni Carmi ken apoko ni Zabdi nga anak ni Zera a nagtaud iti tribu ti Juda.)

2 Nangibaon ni Josue iti sumagmamano a lallaki manipud Jerico a mapan idiay Ai, maysa a siudad iti daya ti Betel nga asideg iti Bet-aven. Pinasiimna kadakuada ti daga. Kalpasan ti panagsukimatda,

3 nagsublida ken ni Josue, ket impadamagda, “Saan a masapul a rumaut ti amin a tattao. Dua wenno talloribu laeng ti ibaonmo a mangraut iti Ai, ta bassit a siudad.”

4 Napan ngarud ti agtalloribu nga Israelita, ngem kapilitan a nagsanudda.

5 Kinamat ida dagiti tattao ti Ai manipud iti ruangan ti siudad agingga iti maysa a lugar a pagalaan iti bato ket pinapatayda ti 36 kadakuada iti salogan sadiay. Naupay dagiti Israelita ket nagbutengda.

6 Iti ladingit ni Josue ken dagiti pangulo ti Israel, rinay-abda ti pagan-anayda, inikkanda iti tapok dagiti uloda ket nagpaklebda iti daga iti sango ti Lakasa ti Tulag ni Yahweh agingga iti sumipnget.

7 Kinuna ni Josue, “O Apo aDios, apay nga inyegnakami pay laeng ditoy ballasiw ti Jordan? Tapno yawatnakami iti pannakabalin dagiti Amorreo? Tapno dadaelennakami? Naim-imbag la koman no nagbatikami idiay ballasiw.

8 Ania ti masaok ita, OApo, ita ta intarayanen dagiti Israelita dagiti kabusor?

9 Inton madamag daytoy dagiti Cananeo ken dagiti amin a tattao iti pagilian, alikubkobendakami ket patayendakaminto amin. Ania ngarud ti aramidem tapno masalaknibam ti dayawmo?”

10 Kinuna ni Yahweh ken ni Josue, “Apay nga agpakpaklebka? Bumangonka.

11 Nagbasol ngamin ti Israel! Sinalungasingna ti katulaganmi ta nagala kadagiti naikari a madadael. Tinakawna daytoy, inyulbodna, ket intiponna kadagiti kukuana.

12 Daytoy ti gapuna a di kabaelan dagiti Israelita a sarangten dagiti kabusorda. Intarayanda ida agsipud ta nairantada metten a madadael. Diakon kumuyog kadakayo malaksid no dadaelenyo dagiti innalayo a nairanta a madadael.

13 Bumangonka! Pasantoem dagiti tattao ket pagsaganaem ida a dumatag kaniak. Ibagam nga agsaganada a sumango kaniak inton bigat ta siak a Dios ti Israel, kunak daytoy: ‘Israel, adda kenka ti sumagmamano a banag a nairanta a madadael. Dimo kabaelan a sarangten dagiti kabusormo malaksid no ibellengmo dagitoy!’

14 Ngarud, inton bigat, maidatagkayto a matribu-tribu. Agpasangonto ti tribu a mabunotko. Agpasangonto ti tunggal kaputotan ti familia a mabunot tiApo. Agpasangonto ti tunggal miembro ti familia a mabunot tiApo.

15 Ti siasinoman a pakasarakan kadagitoy a banag a nairanta a madadael, mapuoranto agraman ti familia ken amin a sanikuana. Inyegna ngamin ti nakaro a pannakaibabain ti Israel, ket sinalungasingna ti katulagak.”

16 Kabigatanna, nasapa nga indatag ni Josue dagiti tribu ti Israel. Saggaysa nga indatagna ida. Nabunot ti tribu ti Juda.

17 Pinagpasangona dagiti kaputotan iti tribu ti Juda, ket nabunot ti grupo ni Zera. Indatagna ti partido ni Zera, kada familia, ket nabunot ti familia ni Zabdi.

18 Saggaysa nga indatag ni Zabdi ti familiana, ket nabunot ni Acan. Isu ti anak ni Carmi nga anak ni Zabdi nga anak ni Zera a nagtaud iti tribu ti Juda.

19 Kinuna ni Josue ken ni Acan, “Anakko, ibagam ti pudno iti sango ni Yahweh a Dios ti Israel. Ipudnom kaniak ti inaramidmo. Dika aglibak kaniak.”

20 “Wen, pudno a nagbasolak itiApoa Dios ti Israel,” insungbat ni Acan. “Daytoy ti inaramidko:

21 Adda dagiti inagumak kadagiti nasamsamtayo; mairaman kadagitoy ti napintas a kagay Babilonia, agarup walo a libra a pirak ken maysa a barreta ti balitok nga agdagsen iti nasurok a dua a libra. Masarakanyo dagitoy a naikali iti uneg ti toldak, agraman ti pirak iti lansadna.”

22 Nangibaon ngarud ni Josue iti sumagmamano a lallaki. Nagtatarayda a napan iti tolda, ket nasarakanda a pudno a naikali dagitoy, agraman ti pirak iti lansadna.

23 Inruarda dagitoy iti tolda sada impan ken ni Josue ken kadagiti amin nga Israelita, ket indissoda ida iti sango tiApo.

24 Innala ni Josue ken amin nga Israel ni Acan, agraman ti pirak, ti kagay, ken ti barreta ti balitok nga indulinna. Inkuyogda met dagiti annakna, dagiti baka, karnero, asno ken amin a kukuana ket impanda ida iti tanap a maaw-awagan iti Riribuk.

25 Kinuna ni Josue, “Insarsaraknakami ti riribuk! Ita nga aldaw, yeg met kenka tiApoti riribuk.”

Binatobato dagiti amin a tattao ni Acan agingga a natay. Pinuoran ken inuborda ti familiana ken dagiti amin a kukuana.

26 Ginaburanda iti bato ti bangkay ni Acan. Agpapan ita, adda pay la dayta a gabsuon ti bato. Isut’ gapuna a maaw-awagan pay la dayta a disso iti Tanap ti Acor.

Ket nagbaaw ti pungtot ni Yahweh.

Ti Pannakaparmek ken Pannakadadael ti Ai

1 Kinuna ni Yahweh ken ni Josue, “Alaem ti entero a buyotmo ket rautenyo ti Ai. Dika agbuteng wenno maupay. Yawatko kadagiti imam ti ari, dagiti tattaona, ti siudad ken ti daga.

2 Aramidem iti Ai ken iti arina ti kas iti inaramidmo iti Jerico ken iti arina. Ngem ita, mabalinyo a samsamen dagiti sanikua ken animal. Mangibaonka kadagiti soldado iti laud ti Ai tapno kellaatenda a rauten ti siudad iti likudan.”

3 Iti kasta, nagsagana ni Josue ken ti amin a mannakigubat a sumang-at idiay Ai. Nangpili iti 30,000 kadagiti kalaingan a mannakigubat, ket imbaonna ida iti rabii.

4 Imbilinna kadakuada, “Aglemmengkay iti laud ti siudad, ngem saan unay nga adayo ti pagyananyo; agsaganakayo a mangraut.

5 Umasidegkami kadagiti mannakigubat a kumuyog kaniak agingga iti sungadan ti siudad. Inton rummuarda a sumaranget kadakami, agsanudkaminto a kas iti inaramidmi idi.

6 Sunsonendakaminto agingga a mayadayoda iti siudad. Ipagarupdanto nga itartarayanmi ida, kas idi damo.

7 Rummuarkayonto metten iti paglemlemmenganyo sayonto sakupen ti siudad. Yawatto tiApoa Diosyo ti siudad kadakayo.

8 Kalpasan ti panangsakupyo iti siudad, puoranyonto kas imbilin tiApo. Tungpalenyo dagitoy a bilin.”

9 Imbaon ngarud ida ni Josue ket napanda iti paglemmenganda, iti laud ti Ai, iti nagbaetan ti Ai ken ti Betel. Iti dayta a rabii, immian ni Josue iti kampo.

10 Kabigatanna, nasapa a bimmangon ni Josue ket inummongna dagiti mannakigubat. Kalpasanna, isu ken dagiti pangulo ti Israel, indauloanda dagiti mannakigubat a mapan idiay Ai.

11 Nagna dagiti soldado a kimmuyog kenkuana agingga iti disso a pakatannawaganda iti pagserkan ti siudad ket nagkampoda iti amianan. Adda tanap a nagbaetanda iti Ai.

12 Nangala ni Josue iti aglimaribu a mannakigubat sana pinaglemmeng ida iti laud ti siudad, iti nagbaetan ti Ai ken Betel.

13 Kastoy ti urnos dagiti mannakigubat: ad-adu ti adda iti amianan ti siudad ket aglemlemmeng dagiti kakaduada iti laud. Iti dayta a rabii, immian ni Josue iti tanap.

14 Naggunay a dagus ti ari ti Ai idi makitana dagiti tattao ni Josue. Rimmuar agraman dagiti tattaona, ket nagturongda iti tanap ti Jordan tapno gubatenda dagiti Israelita iti disso a nagrarangetanda idi. Dina ammo nga adda aggapu iti laud a mangdarup kenkuana.

15 Naginsasanud ni Josue ken dagiti tattaona; nagturongda iti let-ang.

16 Naayaban amin a lallaki iti siudad a mangsunson kada Josue, ket iti panangsunsonda kadakuada, immad-adayoda iti siudad.

17 Kinamat ti amin a taga-Aidagiti Israelita. Silulukat ti Ai, ket awan nabati a mangguardia iti dayta a siudad.

18 Kinuna ni Yahweh ken ni Josue, “Ipaturongmo ti gayangmo iti Ai; itedko kenkan ti siudad.” Nagtungpal ni Josue.

19 Apaman a naingatona ti imana, dagus a nagtaray dagiti aglemlemmeng a mannakigubat ket sinerrekda ti siudad sada sinakup. Pinuoranda a dagus.

20 Idi tumalliaw dagiti taga-Ai, nakitada nga umas-asimbuyok ti siudad. Awanen ti pagtarayanda, ta sunsunsonen idan dagiti Israelita a nagkamang iti let-ang.

21 Idi makita ni Josue ken dagiti tattaona a nasakupen dagiti kakaduada ti siudad, ket maur-uramen, nagsublida sada nagpapatay kadagiti taga-Ai.

22-23 Dinarup ida dagiti Israelita a nangpuor iti siudad. Nakita dagiti taga-Ai a linawlaw idan dagiti Israelita, ket napapatayda. Awan ti nakalibas wenno nagbiag malaksid ti ari ti Ai a tiniliwda sada indatag ken ni Josue.

24 Pinapatay dagiti Israelita dagiti amin a kabusor iti natikag a tay-ak a nangkamatanda kadakuada. Kalpasanna, nagsublida idiay Ai ket pinapatayda amin a nabati iti siudad.

25-26 Nagtalinaed a situturong ti gayang ni Josue iti Ai agingga a nagudas ti amin nga umili iti siudad. Iti dayta nga aldaw, napapatay ti amin nga agnaed iti Ai—12,000 a lallaki ken babbai.

27 Kas imbaga ni Yahweh ken ni Josue, innala dagiti Israelita dagiti animal ken sanikua a nasamsam iti siudad.

28 Pinuoran ni Josue ti Ai, ket pinagbalinna a langalang iti agnanayon, kas iti kasasaadna kadagitoy nga aldaw.

29 Pinaibitinna ti ari ti Ai iti kayo ket binaybay-anna a sibibitin ti bangkay agingga iti sumipnget. Idi lumnek ti init, pinaibabana ti bangkay ket pinaipurruakna iti serkan ti siudad. Ginaburanda ti bangkay iti adu a bato nga adda pay laeng agpapan kadagitoy nga aldaw.

Maibasa ti Linteg idiay Bantay Ebal

30 IdiayBantay Ebal, nangbangon ni Josue iti altar a maipaay ken ni Yahweh a Dios ti Israel.

31 Inaramidnadaytoy kas imbilin ni Moises nga adipen ni Yahweh kadagiti Israelita. Binangonna kas mayannurot iti naisurat iti Libro ti Linteg ni Moises—maysa nga altar a naaramid kadagiti bato a saan a natagaan iti landok nga alikamen. Iti rabaw ti altar, nangipaayda ken ni Yahweh kadagiti daton a mapuoran ken kadagiti daton a pakikappia.

32 Sadiay, iti imatang dagiti Israelita, inlanad ni Josue kadagiti bato ti altar ti kopia ti linteg nga insurat ni Moises.

33 Kalpasanna,nagtakder ti amin iti agsumbangir ti Lakasa ti Tulag—dagiti Israelita agraman dagiti papangulo, ofisial, ukom, ken uray pay dagiti ganggannaet nga agtataeng iti dennada; sangsangoenda dagiti papadi a Levita a nangawit idi iti lakasa. Sumangsango ti kagudua a bilang dagiti tattao iti Bantay Gerizim ket ti kagudua, iti Bantay Ebal. Daytoy ti imbilin idi ni Moises nga adipen ni Yahweh nga aramidenda inton awatenda ti bendision.

34 Imbasa ni Josue ti Linteg, agraman dagiti bendision ken dagiti lunod, kas nailanad iti libro ti Linteg.

35 Sinaggaysa ni Josue a binasa ti amin a bilin ni Moises iti sangoanan ti entero a gimong a nakairamanan dagiti babbai, ubbing ken dagiti ganggannaet a makipagnaed kadakuada.

Ni Josue ken dagiti Gabaonita

1 Nagwaras ti damag maipapan kadagiti panagballigi dagiti Israelita. Naammoan daytoy dagiti amin nga ari iti laud ti Jordan, dagiti adda kadagiti katurturodan, kadagiti tanap, ken dagiti amin nga adda iti igid ti Taaw Mediterranean agingga iti Libano iti amianan. Isuda dagiti ari dagiti Heteo, Amorreo, Cananeo, Perezeo, Heveo ken dagiti Jebuseo.

2 Nagmaymaysada amin a manggubat ken ni Josue ken kadagiti Israelita.

3 Ngem nadamag dagiti Heveo nga agnaed iti Gabaon ti inaramid ni Josue iti Jerico ken iti Ai

4 ket inkeddengda ti panangsikapda kenkuana. Nagirubbuatda kadagiti abastoda, kinargaanda dagiti asnoda kadagiti daan a sako ken lalat a pigispigis ken takuptakup.

5 Nagsapatosda iti rutrot ken takuptakup; nagbadoda iti rutayrutay. Nagbalonda iti timmangken ken binuot a tinapay.

6 Kalpasanna, dimmatagda ken ni Josue iti nagkampoanda idiay Gilgal, ket kinunada kenkuana ken kadagiti Israelita, “Naggapukam iti adayo a pagilian. Kayatmi ti makitulag kadakayo.”

7 Ngemkinuna dagiti Israelita kadagiti Heveo, “Apay a makitulagkami kadakayo? Amangan no asideg ti pagtaenganyo.”

8 Kinunada ken ni Josue, “Madadaankami nga agserbi kenka.”

“Siasinokayo?” sinaludsod ni Josue. “Sadino ti naggapuanyo?”

9 Kastoy ti imbagada kenkuana: “Apo, naggapukam iti nakaad-adayo a daga ta nadamagmi ti maipapan itiApoa Diosyo. Nadamagmi amin nga inaramidna idiay Egipto.

10 Nadamagmiti inaramidna kadagiti dua nga ari nga Amorreo iti daya ti Jordan: ni Sihon nga ari ti Hesbon, ken ni Og nga ari ti Basan a nagnaed idiay Astarot.

11 Imbaga kadakami dagiti pangulomi ken amin a kailianmi a mangisaganakam iti abasto nga agpaay iti biahe tapno sabatendakayo. Imbilinda nga agserbikami kadakayo ken makitulag kadakayo.

12 Kitaenyo ti balonmi a tinapay. Idi agrubbuatkami nga umay sumabat kadakayo, napudot pay laeng. Ita, timmangken ken binuoten.

13 Idi kargaanmi dagitoy a lalat iti arak, baroda pay laeng. Ita pigispigisdan. Kitaenyo dagiti pagan-anay ken sapatosmi; dimmaanda gapu iti nawatiwat a pinagnami.”

14 Inawat dagiti Israelita ti taraon nga intedda, ngem dida nakiuman ken ni Yahweh.

15 Nangaramid ni Josue iti katulagan ti pannakikappiana kadakuada ket pinalubosanna ida nga agbiag. Nagsapata dagiti papangulo ti Israel kas pammasingkedda iti katulagan.

16 Tallo nga aldaw kalpasan ti panagtutulagda, naammoan dagiti Israelita nga asideg met la gayam ti pagnanaedan dagitoy a tattao.

17 Gapu itoy, nagrubbuat dagiti Israelita ket kalpasan ti tallo nga aldaw a panagbiaheda, dimtengda kadagiti siudad dagitoy a tattao: Gabaon, Kefira, Beerot ken Kiriat Jearim.

18 Ngem saan a mabalin a patayen dagiti Israelita ida ta sinapataan dagiti pangulo ti Israel ti pannakitulagda kadakuada babaen iti nagan ni Yahweh a Dios ti Israel. Gapu iti daytoy, nagreklamo dagiti amin a tattao kadagiti pangulo.

19 Ngem insungbat dagiti papangulo, “Ditay mabalin a dangran ida gapu ta sinapataanmi iti nagan tiApoa Dios ti Israel ti pannakitulagmi kadakuada.

20 Kastoy ti aramidentayo. Ispalentayo ida tapno awan ti dusa a yeg ti sinapataantayo a tulag.

21 Palubosantay ida nga agbiag ngem agpaayda kadatayo a para-balsig ken para-sakdo.” Immanamong dagiti tattao iti insingasing dagiti panguloda.

22 Pinaayaban ni Josue dagiti taga-Gabaon ket sinaludsodna, “Apay a sinikapandakami? Apay nga imbagayo a naggapukay iti adayo a lugar idinto a ditoy a mismo ti taengyo?

23 Gapu itoy, inukomnakayo ti Dios. Agnanayonto a tagabu dagiti tattaoyo a para balsig ken para sakdo iti danum a maaramat iti santuario iti Diosko.”

24 “Inaramidmi ti kasta, apo,” insungbatda, “agsipud ta naammoanmi nga agpayso a binilin tiApoa Diosyo ni Moises nga adipenna nga itedna kadakayo ti entero a daga ket pukawenyo amin nga agnanaed ditoy. Inaramidmi daytoy gapu ta napalalo ti butengmi kadakayo; pudno a mabutengkam amangan no patayendakami.

25 Ket ita ta addakamin iti turaymo, aramidem kadakami ti namnamaem a nasayaat ken maiparbeng.”

26 Iti kasta, sinalakniban ni Josue ida ket dina impalubos a patayen dagiti Israelita ida.

27 Ngem pinagbalinna ida a tagabu a para-balsig ken para-sakdo iti danum nga agpaay kadagiti Israelita ken iti altar ni Yahweh. Agpapan kadagitoy nga aldaw, kasta pay laeng ti trabahoda iti sadinoman a lugar a pilien ni Yahweh a pagdaydayawan dagiti tattao kenkuana.

Maparmek dagiti Amorreo

1 Nadamag ni Adonisedec nga ari ti Jerusalema pinarmek ken dinadael ni Josue ti Ai sana pinapatay ti ari sadiay, kas iti inaramidna iti Jerico ken iti arina. Nadamagna pay a nakikappia dagiti taga-Gabaon kadagiti Israelita ket makipagnanaedda kadakuada.

2 Kasta unay ti buteng dagiti tattao ti Jerusalem gapu iti daytoy ta dakkel ti Gabaon a kas kadagiti siudad nga addaan iti ari, ket dakdakkel pay ngem ti Ai ken natutured dagiti soldadona.

3 Iti kasta, nagpaarayat ni Adonisedec kada Oham nga ari ti Hebron, Piram nga ari ti Jarmut, Jafia nga ari ti Lakis ken Debir nga ari ti Eglon.

4 Daytoy ti pinaibagana: “Umaydak tulongan a mangraut iti Gabaon, gapu ta nakikappia dagiti umili ken ni Josue ken kadagiti Israelita.”

5 Pinagtitipon dagitoy lima nga ari dagiti Amorreo dagiti soldadoda; linawlawda ti Gabaon sada rinaut.

6 Pinaibaga dagiti taga-Gabaon ken ni Josue iti kampo idiay Gilgal: “Dinakami baybay-an, apo! Umayka a dagus ket tulongannakami! Isalakannakami! Ta nagtitipon amin nga ari dagiti Amorreo iti katurturodan a pagilian a manggubat kadakami.”

7 Manipud Gilgal, nagrubbuat ni Josue ken ti armadana agraman dagiti kalaingan a soldadona.

8 Kinuna ni Yahweh ken ni Josue, “Saanka nga agbuteng kadakuada, ta intedko kenkan ti balligi. Awanto ti uray maysa kadakuada a makabael a sumaranget kenka.”

9 Nagpatnag a nagdaliasat ni Josue. Idi dumteng idiay Gabaon, kinellaatna a rinaut dagiti Amorreo.

10 Pinaglagaw ida ni Yahweh iti pinnakakitada iti armada ti Israel, ket pinapatay dagiti Israelita ida idiay Gabaon. Dinarundonda ida iti salogan ti Bessang Bet-horon, ket intuloyda ti nagpapatay kadakuada agingga iti abagatan, idiay Azeka ken Makeda.

11 Idi itartarayan dagiti Amorreo ti armada ti Israel iti Bessang, pinagtudo ni Yahweh iti yelo agingga idiay Azeka. Adu ti natay nga Amorreo. Ad-adu kadakuada ti natay iti yelo ngem ti pinapatay dagiti Israelita.

12 Iti dayta nga aldaw, idi pinagballigi ni Yahweh dagiti Israelita iti pannakirangetda kadagiti Amorreo, nakisao ni Josue kenkuana. Kinunana iti sango dagiti Israelita:

“Init, dika agkutkuti iti ngatoen ti Gabaon;

Bulan, agsardengka iti ngatoen ti tanap ti Aijalon.”

13 Saana naggaraw ti init ken ti bulan agingga a naparmek ti Israel ti amin a kabusorna. Nailanad daytoy itiLibro ni Jashar.Nagintek ti init iti tengnga ti tangatang, ket nagmalmalem a saan a limnek.

14 Sakbay daytoy wenno manipud iti daytoy nga aldaw, awan pay ti aldaw a kas itoy nga impangag ni Yahweh ti timek ti maysa a tao. Tinulongan ni Yahweh dagiti Israelita a nakigubat.

15 Nagsubli ni Josue ken ti amin a soldadona iti kampo idiay Gilgal.

Tiliwen ni Josue dagiti Lima nga Ari dagiti Amorreo

16 Ngem nakalibas dagiti lima nga ari dagiti Amorreo ket naglemmengda iti rukib idiay Makeda.

17 Adda nakasarak kadakuada ket naibaga ken ni Josue no sadino ti paglemlemmenganda.

18 “Mangitulidkayo kadagiti dadakkel a bato iti pagserkan ti rukib,” kinuna ni Josue, “ken mangikabilkayo kadagiti agguardia sadiay.

19 Ngem dikay agbayag sadiay; ituloyyo a kamaten dagiti kabusor, sunsonenyo ida iti likud. Diyo ipalubos a sumrekda kadagiti siudadda. Ta pinagballiginakayon tiApoa Diosyo; pinarmekyo idan.”

20 Pinapatay ida ni Josue ken dagiti Israelita, nupay adda sumagmamano a nagkamang iti uneg ti nasarikedkedan a siudadda.

21 Kalpasanna, nagsubli ti amin a soldado ken ni Josue iti kampoda idiay Makeda nga awan ti naan-ano kadakuada.

Awan ti siasinoman a tao iti daga a nakaitured nga agsao iti maibusor kadagiti Israelita.

22 Kinuna ni Josue, “Luktanyo ti rukib. Iruaryo dagiti lima nga ari ket idatagyo ida kaniak.”

23 Inruarda dagiti ari ti Jerusalem, Hebron, Jarmut, Lakis ken Eglon.

24 Idi addan dagiti ari iti sango ni Josue, inayabanna amin a mannakigubat, ket binilinna dagiti ofisiales a kaduana a nakigubat. Kinunana, “Umayyo baddekan dagiti tengnged dagitoy nga ari.” Nagtungpalda.

25 Kinuna manen ni Josue kadakuada, “Saankayo nga agbuteng wenno maupay. Pumigsa ken tumuredkayo, ta kastoyto ti aramiden tiApokadagiti amin a kabusoryo.”

26 Pinapatay ni Josue dagiti ari. Saggaysa nga imbitinna ida iti lima a kayo, ket sibibitinda sadiay agingga iti sumipnget.

27 Idi lumnek ti init, pinaibabana dagiti bangkay sana pinaipurruak dagitoy iti rukib a naglemmenganda. Iti ruangan ti rukib, naikabil dagiti dadakkel a bato nga adda pay laeng agpapan ita.

Sakupen ni Josue ti Ad-adu pay a Daga dagiti Amorreo

28 Iti dayta met la nga aldaw, rinaut ken pinarmek da Josue ti Makeda ken ti arina. Pinapatay da Josue dagiti amin a tattao iti siudad; awan ti nabati a sibibiag. Inaramidna iti ari ti Makeda ti kas iti inaramidna iti ari ti Jerico.

29 Kalpasan daytoy, napan rinaut da Josue ken dagiti soldadona ti Libna.

30 Inyawat ni Yahweh kadagiti Israelita daytoy a siudad ken ti arina. Pinatayda amin nga umili. Inaramid ni Josue iti ari ti Libna ti kas iti inaramidna iti ari ti Jerico.

31 Manipud Libna, nagturong da Josue ken dagiti soldadona idiay Lakis; linawlawda sada rinaut.

32 Iti maikadua nga aldaw ti gubat, inyawat ni Yahweh ti Lakis kadagiti Israelita. Kas iti inaramidda idiay Libna, awan ti uray maysa nga inispalda—pinatayda amin a tattao iti siudad.

33 Dimteng ni Horam nga ari ti Gezer tapno tulonganna ti Lakis. Pinarmek ni Josue ti ari ken dagiti tattaona. Awan ti inispalna kadakuada.

34 Manipud Lakis, napan ni Josue ken ti amin a soldadona idiay Eglon. Linawlawda sada rinaut.

35 Iti dayta met la nga aldaw, pinarmekda ti Eglon. Pinapatayda dagiti amin a tattao sadiay, kas iti inaramidda idiay Lakis.

36 Manipud Eglon, rinaut da Josue ken dagiti amin nga Israelita ti katurturodan ti Hebron.

37 Pinarmekda ti Hebron ket pinatayda ti ari ken ti amin nga agnaed iti siudad ken kadagiti kabangibang nga ili. Kas iti inaramid ni Josue idiay Eglon, dinadaelna a namimpinsan ti Hebron ket awan imbatida a sibibiag.

38 Kalpasanna, nagsubli ni Josue ken ti armadana ket dinarupda ti Debir.

39 Pinarmekda ti Debir agraman ti ari ken dagiti kabangibang nga ili. Pinatayda amin a tattao sadiay. Inaramid ni Josue iti Debir ken iti arina ti kas iti inaramidna idiay Hebron, Libna ken kadagiti arida.

40 Sinakup da Josue ti entero a daga. Pinarmekda dagiti ari ti katurturodan a pagilian, ti akindaya a bakras, akinlaud a puon ti bantay, kasta met dagiti natikag a tanap iti abagatan. Awan ti inispalda a biag; pinapatayna amin, ta daytoy ti bilin ni Yahweh a Dios ti Israel.

41 Pinarmekda amin ida manipud Kades Barnea agingga idiay Gaza, manipud iti entero a daga ti Gosen agingga idiay Gabaon.

42 Pinarmek ni Josue dagitoy nga ari. Sinakupna ti pagturayanda iti maysa la a rusuat ti gubat, gapu ta kadua ti Israel ni Yahweh a Diosna a nakigubat.

43 Kalpasan daytoy, nagsubli da Josue ken ti armadana iti kampo idiay Gilgal.

Maparmek ni Jabin ken dagiti Kakaduana nga Ari

1 Idi madamag ni Jabin nga ari ti Hasor ti panagballigi dagiti Israelita, pinakaammoanna ni Jobab nga ari ti Madon, dagiti ari ti Simron ken Acsaf,

2 dagiti ari ti katurturodan a pagilian iti amianan, iti Tanap ti Jordan nga abagatan ti Dan-aw ti Galilea, dagiti pagilian nga adda iti tanap ken iti igid ti baybay iti asideg ti Dor.

3 Pinakaammoanna met dagiti Cananeo iti agsumbangir ti Jordan, dagiti Amorreo, Heteo, Perezeo ken dagiti Jebuseo iti katurturodan a pagilian, ket uray pay dagiti Heveo nga agtaeng iti puon ti Bantay Hermon idiay Mizpa.

4 Dimtengda agraman dagiti amin a mannakigubatda—maysa nga armada a buklen ti adu a tattao a kas kaadu ti darat iti igid ti baybay. Adu ti kabalio ken luganda a pakigubat.

5 Pinagtitipon dagiti amin nga ari ti buyotda ket sangsangkamaysada a nagkampo iti Waig ti Merom tapno gubatenda ti Israel.

6 Kinuna ni Yahweh ken ni Josue, “Saanka nga agbuteng kadakuada. Inton bigat, iti kastoy nga oras, napapataykonton amin ida para iti Israel. Baldadoem dagiti kabalioda ket puoram dagiti luganda.”

7 Ngarud, kenellaat a rinaut ida ni Josue ken dagiti tattaona iti Waig ti Merom.

8 Pinagballigi tiApodagiti Israelita. Dimmarup dagiti Israelita ket kinamatda ida agingga iti amianan iti Dakkel a Sidon, ken iti Misrefot Mayim, ken agingga iti tanap ti Mizpa nga agpadaya. Saanda nga insardeng ti ranget agingga a nauloyan amin a kabusor.

9 Kas imbilin ni Yahweh, binaldado ni Josue dagiti kabalioda ken pinuoranna dagiti luganda a pakigubat.

10 Nagsubli ni Josue, ket pinarmekna ti Hasor sana pinatay ti ari sadiay. (Iti dayta a tiempo, ti Hasor ti kabibilgan kadagiti amin a pagarian.)

11 Pinatayda amin a tattaona; awan ti nabati a sibibiag. Pinuoranda ti siudad.

12 Pinarmek ni Josue amin dagitoy nga ari ken dagiti siudadda. Kas imbilin ni Moises nga adipen ni Yahweh, pinapapatayna ti tunggal maysa.

13 Nupay kasta, saan a pinuoran dagiti Israelita dagiti siudad a nabangon iti turod, malaksid ti Hasor a pinuoran ni Josue.

14 Innala dagiti Israelita dagiti amin a napapateg a banag ken dagiti animal kadagitoy a siudad, ket tinagikuada. Pinatayda amin a tattao—awan imbatida a sibibiag.

15 Inted ni Yahweh dagiti bilinna ken ni Moises nga adipenna. Inted met ni Moises dagitoy a bilin ken ni Josue, ket tinungpal ni Josue dagitoy. Tinungpalna amin nga imbilin ni Yahweh ken ni Moises.

Sakupen ni Josue ti Entero a Daga

16 Sinakup ni Josue amin dagita a daga—ti katurturodan a pagilian, amin nga adda iti amianan ken abagatan, ti entero a Gosen ken ti natikag a daga iti deppaar ti abagatanna, agraman ti Tanap ti Jordan.

17-18 Dumanon ti masakupan ti daga manipud Bantay Halac iti abagatan iti asideg ti Edom agingga iti Baal-gad iti amianan, iti tanap ti Libano iti abagatan ti Bantay Hermon. Pinatayna amin nga arida kalpasan ti nabayag a pannakigubgubatna kadakuada.

19 Awan ti siudad a nakikappia kadagiti Israelita, malaksid ti Gibeon a taeng dagiti Heveo. Naparmekda amin iti gubat.

20 Tani Yahweh ti akinnakem iti panagpingetda a makiranget kadagiti Israelita tapno madadaelda a mamimpinsan ket mapapatayda amin nga awan asi. Daytoy ti imbilin ni Yahweh ken ni Moises.

21 Iti daytoy a tiempo, napan pinukaw ni Josue ti maysa a puli dagiti higante a maaw-awagan iti Anakim nga agnanaed iti katurturodan idiay Hebron, Debir, Anab ken iti amin a katurturodan ti Juda ken ti Israel. Inkisap ni Josue ida agraman dagiti siudadda.

22 Awan ti natda nga Anakim iti Israel; nupay kasta, adda sumagmamano a nabati idiay Gaza, Gat ken Asdod.

23 Kas imbilin ni Yahweh ken ni Moises, sinakup ni Josue ti entero a daga. Intedna ti daga kadagiti Israelita a kas kukuada, ket biningbingayna, maysa a paset ti kada tribu.

Iti kasta, nagbiag dagiti Israelita a sitatalna iti entero a daga.

Dagiti Ari a Pinarmek ni Moises

1 Pinarmekken sinakup dagiti Israelita ti daga iti daya ti Jordan, manipud iti Tanap ti Arnon agingga iti Tanap ti Jordan agingga iti Bantay Hermon iti amianan. Pinarmekda ti dua nga ari.

2 Maysa kadakuada ni Sihon nga ari dagiti Amorreo a nagturay idiay Hesbon. Sakupen ti pagarianna manipud Aroer nga adda iti arubayan ti Tanap ti Arnon, ket manipud iti tengnga ti tanap agingga iti karayan Jabbok a beddeng ti Ammon (amin dagitoy buklen ti kagudua ti Galaad);

3 ken ti daga iti daya ti Tanap ti Jordan, manipud Dan-aw ti Galilea nga agpa-Betjesimot iti daya ti Natay a Baybay, agingga iti abagatan iti puon ti Bantay Pisga.

4 Pinarmekda met ti ari ti Basan, ni Og a maysa kadagiti natda a kaputotan dagiti Refaim. Nagturay idiay Astarot ken idiay Edrei.

5 Sakupen ti pagarianna ti Bantay Hermon, Saleca, ken amin a Basan agingga iti beddeng ti Gesur ken Maaca, ken ti kagudua ti Galaad agingga iti masakupan ti daga ni Sihon nga ari ti Hesbon.

6 Pinarmekda Moises ken dagiti Israelita dagitoy nga ari. Inted ni Moises nga adipen ni Yahweh ti dagada kadagiti tribu ti Ruben ken Gad ken iti kagudua ti tribu ti Manases tapno tagikuaenda.

Dagiti Ari a Pinarmek ni Josue

7 Pinarmek ni Josue ken dagiti Israelita ti amin nga ari iti daga nga adda iti laud ti Jordan, manipud Baal-gad iti tanap ti Libano agingga iti Bantay Halac iti abagatan iti asideg ti Edom. Biningbingayna daytoy a daga ket intedna iti tunggal tribu a kukuada iti agnanayon.

8 Mairaman ditoy ti katurturodan a disso, ti nababa a lugar, ti tanap ti Jordan, dagiti puon ti bantay, ti let-ang ken ti natikag a disso iti deppaar iti abagatan. Dagdaga dagitoy idi dagiti Heteo, Amorreo, Cananeo, Perezeo, Heveo ken Jebuseo.

9 Pinarmek dagiti Israelita dagiti ari dagiti sumaganad a siudad: Jerico, Ai (asideg iti Betel),

10 Jerusalem, Hebron,

11 Jarmut, Lakis,

12 Eglon, Gezer,

13 Debir, Geder,

14 Horma, Arad,

15 Libna, Adullam,

16 Makeda, Betel,

17 Tappua, Hefer,

18 Afec, Lasaron,

19 Madon, Hasor,

20 Simron-meron, Acsaf,

21 Taanac, Megiddo,

22 Kedes, Jocneam (idiay Carmel),

23 Dor (iti igid ti baybay), Goiim (idiay Gilgal),

24 ken Tirza. Agdagupda iti 31 nga ari.

Dadduma a Daga a Masakupan Pay

1 Lakay unayen ni Josue. Kinuna ni Yahweh kenkuana, “Lakayka unayen, ngem adu pay laeng ti daga a masapul a sakupen.

2 Isuda dagitoy: amin a daga a masakupan ti Filistia ken Gesur,

3 kasta met dagiti amin a daga ti Avvim iti abagatan. (Maibilang a kukua dagiti Cananeo ti daga manipud waig Sihor a daya ti Egipto agingga iti beddeng ti Ekron iti amianan. Agnaed dagiti turayen dagiti Filisteo idiay Gaza, Asdod, Askelon, Gat ken Ekron.)

4 Adda pay la dagiti amin a pagilian a sakup dagiti Cananeo, ken Mehara (a kukua dagiti Sidonio), agingga idiay Afec iti beddeng dagiti Amorreo;

5 ti daga dagiti Gilbeo, ti entero a Libano nga agturong iti daya, manipud Baal-gad iti puon ti Bantay Hermon, agingga iti serkan ti Bessang Hamat.

6 Mairamanditoy dagiti Sidonio nga agnaed iti katurturodan iti nagbaetan dagiti bantay ti Libano ken Misrefot Mayim. Paksiatekto ida iti dalan dagiti Israelita. Kas imbilinko kenka, masapul a bingbingayem dagitoy a daga tapno tagikuaen ti Israel.

7 Ita, bingbingayemon ti daga ket itedmo kadagiti siam a tribu ken ti sabali a kagudua ti tribu ti Manases a kas kukuada.”

Ti Daga a Masakupan da Manases, Ruben ken Gad

8 Tidaga nga agpadaya iti ballasiw ti Jordan ti naited kadagiti tribu ni Ruben ken ni Gad ken ti sabali a kagudua ti tribu ni Manases. Daytoy ti inted kadakuada ni Moises nga adipen ni Yahweh.

9 Dumanon iti Aroer ti sakupda iti arubayan ti Tanap ti Arnon ken ti siudad iti tengnga ti tanap ken amin a nangato a patad ti Medeba agingga idiay Dibon.

10 Aglayon iti beddeng ti Ammon agraman dagiti amin a siudad ni Sihon nga ari dagiti Amorreo a nagturay idiay Hesbon.

11 Mairaman pay ti Galaad, ti daga ti Gesur ken Maaca, ti entero a Bantay Hermon ken amin a Basan agingga idiay Saleca.

12 Mairaman ti pagarian ni Og, ti kakaisuna a nabati kadagiti Refaim, a nagturay idi idiay Astarot ken Edrei. Pinarmek ni Moises dagitoy a tattao ket pinagtalawna ida.

13 Nupay kasta, saan a pinapanaw dagiti Israelita dagiti agnaed iti Gesur ken Maaca. Adda pay laeng dagitoy a tattao idiay Israel.

14 Awanti daga nga inted ni Moises iti tribu ti Levi. Kas imbaga ni Yahweh ken ni Moises, awatenda a kukuada ti maysa a paset dagiti daton a mapuoran iti altar a maipaay ken ni Yahweh a Dios ti Israel.

15 Inikkan met ni Moises iti daga ti tunggal familia iti tribu ti Ruben.

16 Sakupenda ti Aroer (iti igid ti Tanap ti Arnon), ti siudad iti tengnga ti tanap, ken ti amin a tanap iti lawlaw ti Medeba,

17 agraman ti Hesbon ken amin a siudad iti tanap: Dibon, Bamot Baal, Beth Baalmeon,

18 Jaaz, Kedemot, Mefaat,

19 Kiriataim, Sibma, Saratasar a nabangon iti bantay iti tanap,

20 Bet-peor, dagiti bakras ti Bantay Pisga ken Bet Jesimot.

21 Mairaman dagiti dadduma a siudad iti tanap, ken ti entero a pagarian ni Sihon nga Amorreo a nagturay idiay Hesbon. Pinarmek ni Moises ni Sihon, agraman dagiti agtuturay ti Midian: da Evi, Rekem, Zur, Hur, ken Reba. Nagturayda amin iti daga iti nagan ni Ari Sihon.

22 Kadagiti pinatay dagiti Israelita, nairaman ni Balaam a mammadles nga anak ni Beor.

23 Agpatingga iti Jordan ti daga a naited iti tribu ti Ruben. Dagitoy dagiti siudad ken il-ili a naited kadagiti familia iti tribu ti Ruben a kas kukuada.

24 Adda met inted ni Moises a daga iti kada familia iti tribu ti Gad.

25 Sakupda ti Jazer ken ti amin a siudad ti Galaad, ti kagudua ti daga ti Ammon agingga idiay Aroer iti daya ti Raba.

26 Aglayon ti dagada manipud Hesbon agingga idiay Ramatmizpe ken Betonim; manipud Mahanaim agingga iti beddeng ti Lodebar.

27 Iti tanap ti Jordan, mairaman ti Bet Haram, Bet Nimra, Succot ken Safon, ti dadduma a pagturayan ni Sihon nga ari ti Hesbon. Ti Jordan ti beddengda iti amianan agingga iti Dan-aw ti Galilea sa agpadaya.

28 Dagitoy dagiti siudad ken il-ili a naited kadagiti familia iti tribu ni Gad a kas kukuada.

29 Inted met ni Moises kadagiti familia iti kagudua ti tribu ti Manases ti paset ti daga a kas kukuada.

30 Mangrugi idiay Mahanaim, ket mairaman ti amin a Basan, ti entero a pagturayan ni Og nga ari ti Basan ken dagiti 60 nga il-ili iti Jair idiay Basan.

31 Mairaman pay ti kagudua ti Galaad, agraman Astarot ken Edrei, dagiti siudad iti pagturayan ni Og idiay Basan. Naited amin dagitoy iti kagudua dagiti familia a nagtaud iti kaputotan ni Makir nga anak ni Manases.

32 Kastoy ti panangbingbingay ni Moises kadagiti daga nga adda iti ballasiw ti Jordan ken kadagiti daga iti Jerico. Adda idi ni Moises iti tanap ti Moab.

33 Ngemawan ti daga nga inted ni Moises iti tribu ni Levi. Imbagana kadakuada a kukuada ti maysa a paset dagiti daton a mapuoran a maipaay ken ni Yahweh a Dios ti Israel.