Author: admin

Mabingbingay ti Canaan babaen iti Binnunot

1 Dagitoy dagiti naited kadagiti Israelita a daga ti Canaan iti laud ti Jordan. Biningbingay da Eleazar a padi, Josue nga anak ni Nun ken dagiti papangulo dagiti familia kadagiti tribu ti Israel.

2 Kasimbilin ni Yahweh ken ni Moises, nabingbingay babaen iti binnunotti daga a tagikuaen dagiti siam ket kagudua a tribu iti laud ti Jordan.

3-4 Naitudingidin ni Moises ti daga iti daya ti Jordan nga agpaay kadagiti dua ket kagudua a tribu. (Nabingay ti kaputotan ni Jose iti dua a tribu: ti Manases ken Efraim.) Awan ti inted ni Moises a daga kadagiti Levita. Nupay kasta, naikkanda kadagiti siudad a pagnaedanda, agraman kadagiti pagpastoranda kadagiti baka ken karneroda.

5 Nagbibingayan dagiti Israelita ti daga a kas imbilin ni Yahweh ken ni Moises.

Maited ti Hebron ken ni Caleb

6 Maysanga aldaw, adda sumagmamano a tattao ti tribu ti Juda a napan ken ni Josue idiay Gilgal. Kinuna kenkuana ni Caleb nga anak ni Jefone a Kenezeo; “Ammom ti kinuna tiApoidi idiay Kades Barnea maipapan kadata; imbagana daytoy ken ni Moises a tao ti Dios.

7 Uppata pulo ti tawenko idi ibaonnak ni Moises nga adipen tiApomanipud Kades Barnea tapno innak espiaan ti daga. Idi agsubliak kenkuana, insangpetko ti pudno a damag.

8 Nupay kasta, nagbuteng dagiti tattao gapu ta sabali ti imbagbaga dagiti kinaduak a simmang-at. Ngem sipupudnoak a nagtungpal itiApoa Diosko.

9 Inkarikaniak ni Moises iti daydi nga aldaw, ‘Gapu ta nagtulnogka a sipupudno itiApoa Diosko, tagikuaenyonto nga agaama ti daga a nagnaam.’”

10 “Panunotem,” intuloy ni Caleb. “Uppat a pulo ket lima a tawenen ti napalabas manipud imbaga tiApodaytoy ken ni Moises. Imbagana daytoy idi agdaldaliasat ti Israel idiay let-ang. Wen, manipud idi, impalubos tiAponga agbiagak. Kitaennak! Walopulo ket lima ti tawenkon,

11 ngem napigsaak pay laeng a kas idi imbaonnak ni Moises. Napigsaak pay laeng a makigubat wenno mangaramid iti aniaman.

12 Ngarud, itedmo kaniak daytoy katurturodan a disso nga inkari tiApoiti daydi nga aldaw. Imbagami idi kadakayo nga adda puli dagiti higante a maaw-awagan iti Anakim nga agnaed kadagiti dadakkel ken nabakudan a siudad. Nalabit nga addanto kaniak tiApo, ket paksiatekto ida kas imbagana.”

13 Binendisionan ni Josue ni Caleb nga anak ni Jefone, ket intedna a kukuana ti siudad ti Hebron.

14 Agpapan ita, kukua dagiti kaputotan ni Caleb nga anak ni Jefone a Kenezeo ti Hebron agsipud ta sipupudno ni Caleb a nagtungpal itiApoa Dios ti Israel.

15 Maaw-awagan idi ti Hebron iti Kiryat Arba. (Ni Arba idi ti kabibilgan kadagiti Anakim.)

Addan kappia iti daga.

Ti Daga a Naited iti Tribu ti Juda

1 Daytoy ti daga a naited kadagiti familia iti tribu ti Juda:

Dumanon ti sakupda iti abagatan agingga iti pungto ti let-ang ti Zin, iti beddeng ti Edom.

2 Daytoy ti akin-abagatan a beddeng a mangrugi iti pungto ti Natay a Baybay,

3 ket agpa-abagatan manipud iti Bessang ti Akrabbim, sa lumasat idiay Zin. Agturong iti abagatan idiay Kades Barnea, agtuloy iti Hezron ket mapan idiay Addar, agpa-Karka,

4 labsanna ti Azmon, sana suroten ti waig nga adda iti beddeng ti Egipto agingga a rummuar iti Taaw Mediterranean a pagpatinggaan ti beddeng. Daytoy ti akin-abagatan a beddeng ti Juda.

5 Ti Natay a Baybay ti beddengna iti daya, agingga iti sabangan ti Jordan. Mangrugi met ditoy ti akin-amianan a beddeng,

6 aglayon nga agturong idiay Bet-hogla ket agpa-amianan agingga iti pantok a pakatannawagan iti tanap ti Jordan. Sumang-at manen iti Bato ni Bohan (anak ni Ruben ni Bohan),

7 ket manipud iti Tanap ti Acor mapan idiay Debir, sa agpa-amianan nga agsikko idiay Gilgal a sumango iti Bessang ti Adummim iti akin-abagatan a bangir ti tanap. Manipud dita, aglayon nga agturong iti ubbog ti Ensemes, ket rummuar a mapan idiay Enrogel,

8 sumang-at ti beddeng iti Tanap ti Hinnom iti abagatan a paset ti turod a nakaisaadan ti Jerusalem a siudad dagiti Jebuseo. Sumang-at ti beddeng iti tapaw ti bantay a kasumbangir ti Tanap ti Hinnom iti abagatan, iti akin-amianan a pungto ti Tanap ti Refaim.

9 Manipud iti bantay, agturong iti ubbog ti Neftoa, ket rummuar kadagiti siudad nga asideg ti Bantay Efron; agsikko nga agturong idiay Baala (wenno Kiriat Jearim).

10 Manglikaw iti laud ti Baala, mapan iti katurturodan ti Edom, agpangato iti amianan a bangir ti Bantay Jearim (wenno Kesalon), bumaba idiay Betsemes, ket aglayon idiay Timnat.

11 Rummuar kadagiti bakras iti amianan ti Ekron, agbaw-ing nga agpa-Sikkeron, labsanna ti Bantay Baala, ket aglayon idiay Jabneel. Agpatingga ti beddeng iti Taaw Mediterranean a mangbukel

12 iti akinlaud a beddeng.

Dagitoy dagiti beddeng dagiti tattao iti familia ti Juda.

Parmeken ni Caleb ti Hebron ken ti Debir

13 Kasimbilin ni Yahweh ken ni Josue, adda paset ti daga dagiti tattao iti tribu ti Juda a naited ken ni Caleb nga anak ni Jefone. Isu daytoy ti Hebron a siudad ni Arba nga ama ni Anak.

14 Pinapanaw ni Caleb iti dayta a lugar dagiti kaputotan ni Anak: dagiti familia a Sesai, Ahiman ken Talmai.

15 Manipud sadiay, rinautna dagiti agnaed idiay Debir (Kiryat Sefer idi ti nagan daytoy a siudad).

16 Kinuna ni Caleb, “Yasawak ni Acsa nga anakko iti siasinoman a mangparmek iti Kiryat Sefer.”

17 Ni Otniel nga anak ni Kenaz a kabsat ni Caleb ti nangparmek iti siudad. Inted ni Caleb kenkuana ni Acsa nga asawaenna.

18 Iti aldaw ti kasar, imbaga ni Otniel ken ni Acsaa dumawat iti talon ken ni amana. Dimsaag ni Acsa iti asnona, ket dinamag ni Caleb nga amana no ania ti kayatna.

19 “Ikkannak iti sagut,” kinunana. “Gapu ta impannak iti natikag a pagilian, ikkannak iti ubbog.” Inted ni Caleb dagiti akingngato ken akimbaba nga ubbog.

Dagiti Siudad ti Tribu ti Juda

20 Daytoy ti daga nga inawat dagiti familia iti tribu ti Juda a kukuada.

21 Dagiti kaabagatanan a siudad iti asideg ti beddeng iti Edom: Kabzeel, Eder, Jagur,

22 Kina, Dimona, Adada,

23 Kedes, Hasor, Itnan,

24 Zif, Telem, Bealot,

25 Hasor Hadatta, Keriot Hezron (wenno Hasor),

26 Amam, Sema, Molada,

27 Hazargadda, Hesmon, Bet-pelet;

28 Hazarsual, Beerseba, Biziotia,

29 Baala, Iyim, Ezem,

30 Eltolad, Kesil, Horma,

31 Siklag, Madmanna, Sansanna,

32 Lebaot, Silim, Ain, ken Rimmon: 29 a siudad, agraman dagiti kabangibangda nga ili.

33 Iti tanap, dagitoy dagiti siudad: Estaol, Zora, Asena,

34 Zanoa, Engannim, Tappua, Enam,

35 Jarmut, Adullam, Soco, Aseka,

36 Saaraim, Aditaim, Gedera, Gederotaim: 14 a siudad, agraman dagiti kabangibangda nga ili.

37 Adda met ti Senan, Hadasa, Migdalgad,

38 Dilean, Mizpa, Jocteel,

39 Lakis, Bozkat, Eglon,

40 Cabon, Lamam, Kitlis,

41 Gederot, Betdagon, Naama, Makeda: 16 a siudad, agraman dagiti kabangibangda nga ili.

42 Adda met ti Libna, Eter, Asan,

43 Jifta, Asena, Nesib,

44 Keila, Aksib ken Maresa: siam a siudad, agraman dagiti kabangibangda nga ili.

45 Adda met ti Ekron ken dagiti ili ken barriona,

46 ken amin a siudad ken ili nga asideg ti Asdod, manipud Ekron agingga iti Baybay Mediterranean.

47 Adda met ti Asdod ken ti Gaza, agraman ili ken barrioda, a dumanon iti waig iti beddeng ti Egipto ken iti igid ti Baybay Mediterranean.

48 Iti katurturodan, adda ti Samir, Jattir, Soco,

49 Danna, Kiryat Sana (wenno Debir),

50 Anab, Estemoa, Anim,

51 Gosen, Holon ken Gilo: sangapulo ket maysa a siudad, agraman dagiti kabangibangda nga ili.

52 Adda met ti Arab, Duma, Esan,

53 Janim, Bet Tappua, Afeca,

54 Humta, Kiryat Arba (wenno Hebron) ken Zior: siam a siudad, agraman dagiti kabangibangda nga ili.

55 Adda met ti Maon, Carmel, Zif, Jutta,

56 Jezreel, Jocdeam, Zanoa,

57 Canin, Gibea ken Timnat: sangapulo a siudad, agraman dagiti kabangibangda nga ili.

58 Adda met ti Halhul, Bet-sur, Gedor,

59 Moara, Bet-anot ken Eltecon: innem a siudad agraman dagiti kabangibang nga ili.

60 Adda ti Kiryat Baal (wenno Jearim Baal) ken ti Rabba: dua a siudad agraman dagiti kabangibang nga ili.

61 Iti let-ang isuda dagitoy: Bet Araba, Middin, Secaca,

62 Nibsan, ti Siudad ti Ain, ken Engedi: innem a siudad, agraman dagiti kabangibangda nga ili.

63 Ngemsaan a nabalinan dagiti taga-Juda a pinapanaw dagiti Jebuseo nga agnaed idiay Jerusalem. Agpapan ita, adda pay laeng sadiay dagiti Jebuseo a makipagmanaed kadagiti tattao ti Juda.

Ti Daga a Naited iti Tribu ti Efraim ken Manases

1 Daytoy ti daga a naited kadagiti kaputotan ni Jose: mangrugi iti Jordan nga asideg ti Jerico, iti maysa a lugar a dayaen dagiti ubbog ti Jerico, ket agturong idiay let-ang. Manipud Jerico, sumang-at iti katurturodan agingga idiay Betel.

2 Manipud Betel, agpa-Luz, sa aglayon idiay Atarot Adar a pagnaedan dagiti Arkita.

3 Sumalog nga agpa-laud ket mapan iti sakup dagiti Jaflateo agingga iti akimbaba a paset ti Bet-horon sa idiay Gezer ket agpatingga iti Taaw Mediterranean.

4 Daytoy ti daga nga inawat dagiti tribu ti Manases ken Efraim a kaputotan ni Jose.

5 Adtoy ti sakup dagiti familia iti tribu ti Efraim: ti Atarot-addar ti beddengda iti daya agingga iti akingngato a Bet-horon.

6 Manipud sadiay, agpatingga iti Taaw Mediterranean; iti amianan, agpatingga met iti Micmetat. Iti daya, agsikko ti beddeng a mapan idiay Taanat Silo ket labsanna sa aglayon iti daya ti Janoa.

7 Manipud Janoa, agpababa nga agturong idiay Atarot ken Naara. Dumanon idiay Jerico ket agpatingga idiay Jordan.

8 Manipud Tappua, agpa-laud agingga iti waig ti Cana, ket agpatingga ti beddeng iti Taaw Mediterranean. Daytoy ti daga a naited a kukua dagiti familia iti tribu ti Efraim,

9 agraman sumagmamano nga ili ken barrio iti sakup ti Manases, ngem naited kadagiti Efraimita.

10 Nupaykasta, dida pinapanaw dagiti Cananeo nga agnaed idiay Gezer, ket agpapan ita, adda pay laeng dagiti Cananeo iti denna dagiti Efraimita, ngem napilitda nga agserbi a tagabu.

Akinlaud a Manases

1 Adda paset ti daga a naited kadagiti familia a nagtaud iti kaputotan ni Manases nga inauna nga anak ni Jose. Bannuar a mannakigubat ni Makir nga ama ni Galaad ken inauna nga anak ni Manases ket naited kenkuana ti Galaad ken Basan.

2 Adda met daga iti lauden ti Jordan a naited kadagiti dadduma a familia ni Manases: Abiezer, Helec, Asriel, Siquiem, Hefer ken Semida. Dagitoy dagiti lallaki nga annak ni Manases nga anak ni Jose; pangulo ida dagiti familia.

3 Awan lalaki nga anak ni Zelofehad nga anak ni Hefer ken apoko ni Galaad nga anak ni Makir nga anak ni Manases. Pasig a babbai ti annakna: Mala, Noa, Hogla, Milca ken Tirza.

4 Napandaken ni Eleazar a padi, ken ni Josue nga anak ni Nun, ken kadagiti panguloen, ket kinunada: “Imbaga tiApoken ni Moises nga ikkannakam, agraman dagiti kabagianmi, iti daga a kukuami.”

Kas imbilin ni Yahweh, naikkan dagitoy a babbai iti daga, kasta met dagiti lallaki a kabsat ni amada.

5 Sangapulo a kadisso ti naited ken ni Manases, agraman ti Galaad ken ti Basan iti ballasiw ti Jordan,

6 ta padapada nga adda bingay dagiti annakna, babai man wenno lalaki. Naited ti daga ti Galaad kadagiti dadduma a kaputotan ni Manases.

7 Mangrugi ti teritorio ti Manases idiay Aser agingga iti Micmetat iti daya ti Siquiem, ket agpa-abagatan a mangsakup kadagiti agnaed idiay Entappua.

8 Kukua ti Manases ti daga iti lawlaw ti Tappua, ngem dagiti kaputotan ni Efraim ti akinkukua iti ili ti Tappua nga adda iti beddeng.

9 Sumalog ti beddeng iti waig ti Cana. Kukua ti Efraim dagiti siudad iti abagatan ti waig uray addada iti sakup dagiti siudad ni Manases. Aglayon ti beddeng ti Manases iti akin-amianan a ballasiw ti waig, ket agpatingga iti Taaw Mediterranean.

10 Agpa-abagatan ti daga ti Efraim idinto nga agpa-amianan ti daga ti Manases, ket ti Taaw Mediterranean ti beddengda iti laud. Dumanon iti Aser iti amianan, ken Issacar iti daya.

11 Iti sakup da Issacar ken Aser, tinagikua ti Manases ti Bet Sean ken dagiti kabangibang nga ili, ken ti Dor (ti siudad iti asideg ti baybay), Endor, Taanac, Megiddo ken dagiti kabangibangda nga ili.

12 Nupaykasta, saan a nabalinan dagiti tattao ti Manases a pinagtalaw dagiti Cananeo no di ket nakipagnaed dagitoy a tattao kadakuada.

13 Idi pumigsa dagiti Israelita, saanda a pinagtalaw amin a Cananeo, ngem pinilitda ida nga agtrabaho para kadakuada.

Agkiddaw ti Efraim ken Manases iti Ad-adu a Daga

14 Kinuna dagiti kaputotan ni Jose ken ni Josue, “Apay a sangsangkadisso la ti intedmo a tagikuaenmi? Adukami gapu ta binendisionannakami tiApo.”

15 “No adukayo la unay ket saan a makaanay kadakayo ti katurturodan ti Efraim,” insungbat ni Josue, “inkayo kadagiti kabakiran ket mangumakay iti sakupenyo iti daga dagiti Perezeo ken dagiti Refaim.”

16 “Bassit kadakami ti katurturodan,” kinuna dagiti kaputotan ni Jose, “ken adda landok a lugan a pakigubat dagiti Cananeo a taga-tanap, dagiti agnaed idiay Bet Sean ken dagiti kabangibangna nga ili, ken dagiti tattao iti Tanap ti Jezreel.”

17 Kinuna ni Josue kadagiti tribu ti Efraim ken Manases, “Pudno nga adukayo, ket nakabilbilegkayo. Nasursurok ngem maysa a disso ti maited kadakayo.

18 Kukuayo ti katurturodan. Uray no kabakiran, umaenyo ket tagikuaenyo ti amin. No maipapan kadagiti Cananeo, mapaksiatyo ida uray no nabilegda ken addaanda kadagiti landok a lugan a pakigubat.”

Ti Pannakabingay ti Daga

1 Kalpasan ti panangparmekda iti daga, naguummong ti entero nga Israel idiay Silo ket impasdekda sadiay ti Tolda ti Dios.

2 Adda pito a tribu ti Israel a di pay naibingayan iti daga.

3 Kinuna ngarud ni Josue kadagiti Israelita, “Kaanonto a sakupenyo ti daga nga inted kadakayo tiApoa Dios dagiti kapuonanyo? Apay nga itantantanyo?

4 Mangdutokkayo iti tallo a lallaki iti tunggal tribu tapno ibaonko ida a mangmapa iti daga a kayatda a tagikuaen. Kalpasanna, agsublidanto kaniak.

5 Mabingbingayto ti daga iti pito a paset. Agnaedto ti tribu ti Juda iti teritoriona iti abagatan, ket ti tribu ti Jose iti amianan.

6 Mapaenyonto ti daga iti pito a paset sayonto yeg kaniak. Kalpasanna, iti imatang tiApoa Diostayo, bunotekto no ania a paset ti maited iti tunggal maysa.

7 Dinto maibingayan dagiti Levita, ta pannakatagikuada ti panagserbida a kas papadi tiApo. Inawaten dagiti tribu ti Gad, Ruben ken gudua ti Manases ti dagada iti daya ti Jordan. Inted daytoy kadakuada ni Moises nga adipen tiApo.”

8 Imbilin ni Josue kadagiti lallaki: “Inkayo iti entero a daga ket mapaenyo sakayto agsubli kaniak. Ibunotankayto iti imatang tiApoditoy Silo.” Ket napan dagiti lallaki tapno mapaenda ti daga.

9 Sinursorda ti daga ket insuratda no kasano ti panangbingbingayda iti pito a paset; inlistada ti nagan dagiti ili. Kalpasanna, nagsublida ken ni Josue iti kampo idiay Silo.

10 Babaen iti binnunot, nakiuman ni Josue ken ni Yahweh para kadakuada, ket biningbingayna ti daga kadagiti dadduma a tribu ti Israel.

Ti Daga a Naited iti Tribu ti Benjamin

11 Immuna a naituding ti daga a tagikuaen dagiti familia iti tribu ti Benjamin. Adda ti daga iti nagbaetan ti sakup ti tribu ti Juda ken ti tribu ti Jose.

12 Iti amianan, ti Jordan ti pangrugian ti beddeng ket sumang-at iti akin-amianan nga igid ti Jerico, sa agpa-laud a lumasat iti katurturodan agingga iti let-ang ti Bet-aven.

13 Manipud ditoy, aglayon idiay Luz, iti akin-abagatan a sang-atan ti Luz (managan pay Betel), sumalog idiay Atarot-Addar, iti bantay nga adda iti abagatan ti Akimbaba a Bet-horon.

14 Iti laud, ti beddeng agkurba nga agpa-abagatan manipud iti turod nga adda iti abagatan ti Bet-horon sa agpatingga iti siudad ti Kiriat Baal (wenno Kiriat Jearim) a kukua ti tribu ti Juda.

15 Mangrugi ti akin-abagatan a beddeng iti igid ti Kiriat Jearim, ket agpa-laud nga agturong iti ubbog ti Neftoa.

16 Sumalog agingga iti arisadsad ti bantay a tumannawag iti Tanap ni Ben-Hinnom, iti akin-amianan a pungto ti Tanap ni Refaim. Lumasat iti Tanap ni Hinnom, iti abagatan ti pantok ti Jebus, ket agpababa nga agpa-Enrogel.

17 Agkurba nga agpa-amianan ket aglayon idiay Ensemes, sa idiay Gelilot, iti kasumbangir ti Bessang Adummim. Sumalog manen ket agturong iti Bato ni Bohan (ti anak ni Ruben).

18 Agpa-amianan iti pantok a pakatannawagan iti tanap ti Jordan, ket sumalog nga agturong iti tanap.

19 Lumasat iti amianan ti pagsalogan ti Bet-hogla, ket agpatingga iti akin-amianan a sabangan ti Natay a Baybay a pagpatinggaan ti Karayan Jordan nga akin-abagatan a beddeng.

20 Ti Jordan ti akindaya a beddeng. Dagitoy dagiti beddeng ti daga a tagikuaen dagiti familia iti tribu ti Benjamin.

21 Dagitoy dagiti siudad a sakupen dagiti familia iti tribu ti Benjamin: Jerico, Bet-hogla, Emek Keziz,

22 Bet-araba, Sumaraim, Betel,

23 Avvim, Para, Ofra,

24 Kefar-hammomi, Ofni ken Geba—12 a siudad agraman dagiti ilida.

25 Maibilang pay ti Gabaon, Rama, Beerot,

26 Mizpa, Kefira, Moza,

27 Rekem, Irpeel, Tarala,

28 Sela, Haclef, Jebus (wenno Jerusalem), Gibea ken Kiriat Jearim—14 a siudad agraman dagiti ilida. Daytoy ti daga a naited a tagikuaen dagiti familia iti tribu ti Benjamin.

Ti Daga a Naited iti Tribu ni Simeon

1 Naituding nga agpaay kadagiti familia iti tribu ni Simeon ti maikadua a disso. Adda daytoy iti tengnga ti daga a naited iti tribu ti Juda.

2 Isudadagitoy: Beerseba, Seba, Molada,

3 Hazarsual, Bala, Ezem,

4 Heltolad, Betul, Horma,

5 Siklag, Bet Marcabot, Hazarsusa,

6 Bet Lebaot ken Saruhen—13 a siudad agraman dagiti ilida.

7 Adda met ti Ain, Rimmon, Eter ken Asan—uppat a siudad agraman dagiti ilida.

8 Mairaman dagiti amin nga ili iti lawlaw dagitoy a siudad agingga idiay Baalat Beer (wenno Rama) iti abagatan. Daytoy ti daga a naited a tagikuaen dagiti familia iti tribu ti Simeon.

9 Paset ti sakup ti tribu ti Juda ti naited iti tribu ti Simeon. Gapu ta nalawa unay ti naipatawid iti tribu ti Juda, naited iti tribu ti Simeon ti maysa a paset ti dagana.

Ti Daga a Naited iti Tribu ti Zabulon

10-11 Naituding nga agpaay kadagiti familia iti tribu ti Zabulon ti maikatlo a disso. Dumanon ti beddengda idiay Sarid sa sumang-at nga agpa-laud agingga idiay Marala. Dumanon idiay Dabe-set agingga iti waig iti daya ti Jocneam.

12 Iti bangir ti Sarid, agpadaya a dumanon iti beddeng ti Kislot Tabor, sa agturong idiay Deberat agingga idiay Jafia.

13 Manipud sadiay, aglayon nga agpadaya idiay Gat Hefer ken Ittakazin, agkurba nga agpa-Nea nga agturong idiay Rimmon.

14 Iti amianan, agsikko ti beddeng nga agpa-Hanaton ket agpatingga iti tanap ti Jefteel.

15 Sakupenna ti Catat, Naalal, Simron, Ideala ken Betlehem—12 a siudad agraman dagiti ilida.

16 Adda dagitoy a siudad ken ili iti daga a naited a tagikuaen dagiti familia iti tribu ti Zabulon.

Ti Daga a Naited iti Tribu ti Issacar

17 Agpaay kadagiti familia iti tribu ti Issacar ti maikapat a disso.

18 Sakupenda ti Jezreel, Jesulot, Sunem,

19 Hafaraim, Sion, Anaarat,

20 Rabbit, Kislon, Ebes,

21 Remet, Enganin, Emhadda ken Bet-passes.

22 Dumanon ti beddeng idiay Tabor, Sahasuma ken Betsemes, ket agpatingga idiay Jordan—16 a siudad agraman dagiti ilida.

23 Dagitoy dagiti siudad ken ili iti daga a naited a tagikuaen dagiti familia iti tribu ti Issacar.

Ti Daga a Naited iti Tribu ti Aser

24 Agpaay kadagiti familia iti tribu ti Aser ti maikalima a disso.

25 Sakupenna ti Helcat, Hali, Beten, Acsaf,

26 Alamelec, Amad ken Misal. Iti laud, dumanon ti beddeng idiay Carmel ken Sihorlibnat.

27 Iti panagpadaya ti beddeng, agturong idiay Betdagon, ket dumanon idiay Zabulon ken iti Tanap ti Jefteel iti akin-amianan a beddeng nga agturong idiay Bet-emec ken Naiel. Aglayon idiay Cabul,

28 Jebron, Rehob, Hammon, Cana agingga iti dakkel a Sidon.

29 Kalpasanna, agsikko nga agpa-Rama ket dumap-aw idiay Tiro, ti nasarikedkedan a siudad; agpa-Hosa ket agpatingga iti Taaw Mediterranean. Mairaman ti Mahalab, Aksib,

30 Umna, Afec ken Rehob—22 a siudad agraman dagiti ilida.

31 Dagitoy dagiti siudad ken ili a naited a tagikuaen dagiti familia iti tribu ti Aser.

Ti Daga a Naited iti Tribu ti Neftali

32 Agpaay kadagiti familia iti tribu ti Neftali ti maikanem a disso.

33 Mangrugi ti beddengna idiay Helef, manipud iti lugo idiay Zaananim, sa aglayon idiay Adami-neceb ken Jebneel agingga idiay Lacum ket agpatingga idiay Jordan.

34 Agkurba nga agpa-laud idiay Asnot Tabor, agpa-Hucuca, dumanon idiay Zabulon iti abagatan, Aser iti laud ken Juda iti daya idiay Jordan.

35 Dagitoy dagiti nasarikedkedan a siudad: Siddim, Ser, Hamat, Raccat, Cineret,

36 Adama, Rama, Asor,

37 Kedes, Edrei, Enhasor,

38 Jiron, Migdalel, Horem, Bet-anat ken Betsemes—19 a siudad agraman dagiti ilida.

39 Dagitoy dagiti siudad ken ili a naited a tagikuaen dagiti familia iti tribu ti Neftali.

Ti Daga a Naited iti Tribu ti Dan

40 Agpaay kadagiti familia iti tribu ti Dan ti maikapito a disso.

41 Masakupan ti daga ti Zora, Estaol, Ir-semes,

42 Saalabin, Aijalon, Itla,

43 Elon, Timnat, Ekron,

44 Elteke, Gibbeton, Baalat,

45 Jehud, Bene-berac, Gatrimmon,

46 Mejarcon ken Racon agraman dagiti daga iti lawlaw ti Joppe.

47 Ngemidi saan a makaanay kadakuada ti daga, rinaut dagiti tattao ti Dan ti Lesem. Naparmekda ti Lesem ket pinatayda dagiti tattaona. Tinagikuada ket nagnaedda sadiay. Binaliwanda ti Lesem a nagan ti siudad ket sinuktanda iti Dan, ti nagan ti kapuonanda.

48 Dagitoy dagiti siudad ken ili a naited a tagikuaen dagiti familia iti tribu ti Dan.

Ti Daga a Naited ken ni Josue

49 Idi nalpasen dagiti Israelita ti panangbingbingayda iti daga, inikkanda ni Josue nga anak ni Nun iti dagana manipud iti sakupda.

50 Kas imbilin ni Yahweh, intedda ti siudad a kiniddawna, ti Timnat Sera iti katurturodan ti Efraim. Binangon manen ni Josue ti siudad ket nagnaed sadiay.

51 Ni Eleazar a padi, ni Josue nga anak ni Nun ken dagiti pangulo ti nadumaduma a familia kadagiti tribu ti Israel ti nangbingbingay iti daga babaen iti binnunotidiay Silo tapno makiumanda ken ni Yahweh. Naaramid daytoy iti ruangan ti Tolda a Paguummongan. Ket nalpas ti pannakabingbingay ti daga.

Dagiti Siudad a Pagkamangan

1 Imbilinni Yahweh ken ni Josue nga

2 ibagana daytoy kadagiti Israelita: “Mangpilikayo kadagiti siudad a pagkamangan kas imbagak kadakay idi babaen ken ni Moises.

3 Mabalin nga agkamang sadiay ti siasinoman a makapatay a dina inggagara tapno malisianna ti agpanggep nga agibales.

4 Mabalinna ti agkamang iti maysa kadagitoy a siudad, dumatag iti pangukoman iti sango ti ruangan ti siudad ket ipalawagna kadagiti panglakayen ti napasamak. Pastrekendanto iti siudad, ikkanda iti pagyananna tapno agnaed sadiay.

5 No suroten sadiay ti tao a mangibales iti inaramidna, saanda nga isuko ta dina met inggagara a pinatay ti padana nga Israelita, ket awan met gurana kenkuana.

6 Agnaedto iti siudad agingga a mausig ti kasona iti sango dagiti tattao ken agingga a matay ti agdama a kangatoan a padi; kalpasanna, mabalinnanto ti agawid iti siudad a naggapuanna.”

7 Pinilida ngarud ti Kedes idiay Galilea, iti katurturodan ti Neftali; Sikem iti katurturodan ti Efraim; ken Hebron iti katurturodan ti Juda.

8 Iti ballasiw ti Jordan, ken iti daya ti Jerico, iti let-ang iti Tanap, pinilida ti Beser iti sakup ni Ruben; Ramot iti Galaad, iti tribu ti Gad, Golan iti Basan, iti sakup ti Manases.

9 Dagitoy dagiti siudad a pagkamangan dagiti Israelita ken uray siasino a ganggannaet iti dennada. Siasinoman a makapatay, mabalinna ti agkamang kadagitoy a siudad tapno saan a balsen ti kabagian ti napatayna. Agyan sadiay agingga a malpas a mausig ti kasona iti sango dagiti tattao.

Dagiti Siudad a Naited kadagiti Levita

1-2 Idiaddada idiay Silo, iti daga ti Canaan, napan dagiti pangulo dagiti familia dagiti Levita ken ni Eleazar a padi, ni Josue nga anak ni Nun ken kadagiti pangulo ti tunggal familia ti amin a tribu ti Israel. Kinunada kadakuada, “Imbilin tiApoken ni Moises a maikkankami kadagiti siudad a pagnaedanmi agraman dagiti kabangibangda a daga a pagipastoranmi kadagiti animalmi.”

3 Ngarud, kas imbilin tiApo, inted dagiti Israelita kadagiti Levita dagitoy a siudad ken pagpastoran nga adda kadagiti sakupda.

4 Dagiti familia iti kaputotan ni Coat ti immuna a naikkan kadagiti siudad. Sangapulo ket tallo a siudad ti naited a tagikuaen dagiti Levita a nagtaud iti kaputotan ni Aaron a padi. Naggapu dagiti siudadda kadagiti sakup ti Juda, Simeon ken Benjamin.

5 Naikkan dagiti dadduma a familia iti kaputotan ni Coat iti sangapulo a siudad manipud kadagiti sakup ti Efraim, Dan ken kagudua ti Manases.

6 Sangapulo ket tallo a siudad ti naited a tagikuaen dagiti familia iti kaputotan ni Gerson. Nagtaud dagitoy iti sakup ti Issacar, Aser, Neftali ken akindaya a tribu ti Manases.

7 Sangapulo ket dua a siudad ti naited a tagikuaen dagiti familia iti kaputotan ni Merari. Nagtaud dagitoy a siudad iti sakup ti Ruben, Gad ken Zabulon.

8 Kas imbilin ni Yahweh ken ni Moises, inted dagiti Israelita kadagiti Levita dagitoy a siudad ken pagpaaraban babaen iti binnunot.

9 Dagitoy dagiti siudad iti sakup ti Juda ken Simeon a naituding

10 kadagiti kaputotan ni Aaron a nagtaud kadagiti familia iti kaputotan ni Coat a kamkameng dagiti Levita. Isuda ti immuna a naikkan.

11 Naited kadakuada ti siudad ti Arba (ni Arba ti ama ni Anak), nga isu itan ti Hebron, iti katurturodan ti Juda agraman dagiti pagpastoran iti lawlawna.

12 Nupay kasta, naited ken ni Caleb nga anak ni Jefone dagiti taltalon ti siudad agraman dagiti barriona.

13 Malaksid iti Hebron (maysa kadagiti siudad a pagkamangan), naited kadagiti kaputotan ni Aaron a padi dagiti sumaganad a siudad: Libna,

14 Jattir, Estemoa,

15 Holon, Debir,

16 Ain, Jutta ken Betsemes, agraman dagiti pagpastoranda—siam a siudad iti sakup dagiti dua a tribu.

17 Iti sakup ti Benjamin, naited kadakuada ti Gabaon, Geba,

18 Anatot ken Almon agraman dagiti pagpastoranda—uppat a siudad.

19 Sangapulo ket tallo a siudad amin agraman dagiti pagpastoranda ti naited a tagikuaen dagiti papadi a kaputotan ni Aaron.

20 Iti sakup ti Efraim, sumagmamano a siudad ti naited a tagikuaen dagiti dadduma a familia ti kaputotan ni Coat a kamkameng dagiti Levita.

21 Naited kadakuada ti Sikem agraman ti pagpastoranna iti katurturodan ti Efraim (maysa a siudad a pagkamangan), Gezer,

22 Kibsaim ken Bet-horon agraman ti pagpastoranna—uppat a siudad.

23 Iti sakup ti Dan, naited kadakuada ti Elteke, Gibbeton,

24 Aijalon ken Gatrimmon agraman dagiti paspastoranda—uppat a siudad.

25 Iti sakup ti Manases, naited kadakuada ti Taanac ken Gatrimmon agraman dagiti pagpastoranda—dua a siudad.

26 Sangapulo a siudad amin agraman dagiti pagpastoranda ti inawat dagitoy a familia iti kaputotan ni Coat.

27 Naited iti sabali a grupo dagiti Levita, ti familia ni Gerson, ti dua a siudad iti Akindaya a Manases: Golan, idiay Basan (maysa kadagiti siudad a pagkamangan) ken Borsa agraman dagiti pagpastoranda.

28 Iti sakup ti Issacar, naited kadakuada ti Kision, Daberat,

29 Jaramut ken Engannim agraman dagiti pagpastoranda—uppat a siudad.

30 Iti sakup ti Aser, naited kadakuada ti Miseal, Abdon,

31 Helcat, ken Rehob agraman dagiti pagpastoranda—uppat a siudad.

32 Iti sakup ti Neftali, naited kadakuada ti Kedes idiay Galilea agraman ti pagpastoranda (maysa kadagiti siudad a pagkamangan), Hammotdor ken Cartan agraman dagiti pagpastoranda—tallo a siudad.

33 Sangapulo ket tallo amin a siudad agraman dagiti pagpastoranda ti naited kadagiti nadumaduma a familia ti kaputotan ni Gerson.

34 Iti sakup ti Zabulon, inawat dagiti dadduma a Levita, ti kapuonan ni Merari, dagiti siudad ti Jocneam, Carta,

35 Dimna ken Naalal agraman dagiti pagpastoranda—uppat a siudad.

36 Manipud iti sakup ti Ruben, uppat a siudad ti inawatda: Beser, Jahaz,

37 Kedemot, ken Mefaat agraman dagiti pagpastoranda.

38 Iti sakup ti Gad, naited kadakuada ti Ramot idiay Galaad agraman dagiti pagpastoranna (maysa kadagiti siudad a pagkamangan), Mahanaim,

39 Hesbon ken Jazer agraman dagiti pagpastoranda—uppat a siudad.

40 Sangapulo ket dua a siudad ti naited kadagiti dadduma a Levita, ti kaputotan ti Merari.

41 Iti daga dagiti Israelita, 48 a siudad amin agraman dagiti pagpastoranda ti naited kadagiti Levita.

42 Adda pagpastoran iti aglikmut ti tunggal siudad.

Sakupen ti Israel ti Daga

43 Iti kasta, inted ni Yahweh kadagiti Israelita ti amin a daga nga insapatana nga ited kadagiti kaputotanda. Kalpasan ti panangsakupda iti daga, impasdekda sadiay ti taengda.

44 Ket kas inkari ni Yahweh kadagiti kapuonanda, inyegna kadakuada ti kappia iti aglawlaw. Awan ti uray maysa kadagiti kabusorda ti makabael a sumango kadakuada, ta pinagballigi ni Yahweh dagiti Israelita kadagiti amin a kabusorda.

45 Tinungpal ni Yahweh ti amin nga inkarina kadagiti Israelita.

Agawid dagiti Tribu

1 Kalpasanna, inummong ni Josue dagiti tattao kadagiti tribu ti Ruben, Gad ken Akindaya a Manases.

2 Kinunanakadakuada, “Inaramidyo amin nga imbilin ni Moises nga adipen tiApo. Tinungpalyo met amin a bilinko.

3 Agpapan ita, pulos a diyo binaybay-an dagiti padayo nga Israelita. Sipapasnekkayo a nagtungpal kadagiti bilin tiApoa Diosyo.

4 Ita, kas inkarina, inyegna ti kappia kadagiti padayo nga Israelita. Agawidkayo ngarud iti ballasiw ti Jordan, iti daga nga inted kadakayo ni Moises nga adipen tiApo.

5 Ikagumaanyo a tungpalen ti bilin ken ti linteg nga inted kadakayo ni Moises nga adipen tiApo: ayatenyo tiApoa Diosyo, aramidenyo ti pagayatanna, agtungpalkayo kadagiti bilinna, agtalinaedkayo a napudno kenkuana ken agserbikayo kenkuana iti amin a puso ken kararuayo.”

6-8 Pinagawid ni Josue ida kalpasan ti panangbendisionna kadakuada a kunana: “Nabaknangkayo nga agawid. Adu ti animal, pirak, balitok, gambang, landok ken pagan-anayyo. Ibingayanyo dagiti padayo nga Israelita iti sinamsamyo kadagiti kabusoryo.” Ket nagawid dagiti Israelita.

Ita, ni Moises ti nangted iti daga iti daya ti Jordan iti kagudua ti tribu ti Manases, ngem ni Josue ti nangted iti daga nga adda iti laud ti Jordan iti sabali a kagudua ti tribu ken kadagiti dadduma pay a tribu.

9 Nagawid ngarud dagiti tattao kadagiti tribu ti Ruben, Gad ken ti Akindaya a Manases. Pinanawanda dagiti dadduma nga Israelita idiay Silo iti daga ti Canaan ket napanda idiay Galaad, ti bukodda a daga a tinagikuada idi kas imbilin ni Yahweh ken ni Moises.

Ti Altar iti Igid ti Jordan

10 Idi dumtengda idiay Gelilot a masakupan ti Canaan iti ballasiw ti Jordan, nangipatakderda iti dakkel ken nadaeg nga altar iti igid ti karayan.

11 Naipadamag kadagiti dadduma nga Israelita a nangipasdek dagiti tattao kadagiti tribu ti Ruben, Gad ken ti Akindaya a Manases, iti altar idiay Gelilot, iti masakupan ti Canaan, iti paset a kukuada idiay Jordan.

12 Apaman a nadamag dagiti Israelita daytoy, naguummongda amin idiay Silo tapno mapanda gubaten dagiti tribu ti daya.

13 Naibaon ni Finees nga anak ni Eleazar a padi a mapan kadagiti tattao iti tribu ti Ruben, Gad ken ti Akindaya a Manases idiay Galaad.

14 Sangapulo a tattao ti kimmuyog kenkuana, maysa iti tunggal tribu iti laud, a pangulo iti tunggal familia.

15 Dimtengda idiay Galaad, ket kinunada kadagiti tattao ti Ruben, Gad ken ti Akindaya a Manases:

16 Daytoyti kuna ti entero a gimong tiApo: “Apay nga inaramidyo daytoy a kinadakes a maibusor iti Dios ti Israel? Sinukiryo tiApoiti panangbangonyo iti daytoy nga altar a pagdaydayawanyo! Simminakayon itiApo!

17 Nalipatanyokadin ti basoltay idiay Peor idi nangyeg tiApoiti didigra a pinangdusana kadagiti tattaona? Agsagsagabatayo pay laeng gapu iti daydiay. Saan pay la kadi nga umanay ti nagbasolantayo?

18 Isardengyo kadin ti sumurot itiApo? No agsukirkayo kenkuana ita nga aldaw, agpungtotto kadagiti amin a tattao ti Israel inton bigat.

19 Ita, no ibilangyo a saan a maikari a pagdaydayawan ti dagayo, bumallasiwkayo iti daga tiApoa yan ti toldana a pagdaydayawan. Mangalakayo iti daga a tagikuaenyo iti sakupmi. Ngem dikay agsukir itiApowenno kadakami babaen iti panangaramidyo iti sabali nga altar iti laksid ti altar tiApoa Diostayo.

20 Laglagipenyoni Acan nga anak ni Zera: sinalungasingna ti bilin maipapan kadagiti banag a naikari a madadael, ket nadusa dagiti amin nga Israelita. Saan la a ni Acan ti natay gapu iti basolna.”

21 Insungbat dagiti tattao kadagiti tribu ti Ruben, Gad ken ti Akindaya a Manases kadagiti pangulo dagiti familia ti Israel:

22 “Ti Dios ti Mannakabalin-amin! Isu tiApo! Ti Dios ti Mannakabalin-amin! Isu tiApo! Ammona no apay nga inaramidmi daytoy, ket kayatmi a maammoanyo met! No nagsukirkami, ket tinallikudanmi tiApo, saankayon nga agtaktak a mangpatay kadakami!

23 No nagsukirkam iti Dios gapu iti panangaramidmi iti altar a pagidatonan iti mapuoran a daton wenno daton a makan wenno daton a pakikappia, bay-anyo a tiApoti mangdusa kadakami!

24 Inaramidmi ti kastoy amangan no iti masakbayan, kunanto dagiti kaputotanyo kadagiti annakmi, ‘Ania ti bibiangyo itiApoa Dios ti Israel?

25 Inkabil tiApoa kas beddengtayo ti Jordan, dakayo a tattao ti Ruben ken Gad. Wen, awan ti pakaibianganyo itiApo.’ Iti kasta, paritanto dagiti kaputotanyo dagiti kaputotanmi nga agdaydayaw kenkuana.

26 Nangipatakderkami iti altar, saan a tapno pagpuoran iti daton wenno pagidatonan,

27 no di ket agpaay a pammaneknek iti dua a grupotayo ken kadagiti sumarsaruno a kaputotantayo nga agdaydayawkam itiApobabaen iti panagidatag kadagiti mapuoran a daton, dagiti sakrifisio ken daton iti kappia. Ngarud, dinto makuna dagiti kaputotanyo kadagiti kaputotanmi, ‘Awan ti bibiangyo itiApo.’

28 Napanunotmi a no kastoyto ti mapasamak, ipakitaminto daytoy inaramidmi nga altar a kaasping ti altar tiApo. Saan a pagpuoran iti daton wenno pagsakrifisioan, no di ket baton-lagip dagiti grupotayo.

29 Adayo a panggepmi ti bumusor itiApowenno sumiasi kenkuana iti panangbangonmi iti altar a pagidatagan iti mapuoran a daton wenno daton a makan wenno kadagiti sakrifisio. Dimi panggep ti mangipasdek iti sabali nga altar iti laksid ti altar tiApoa Diostayo nga adda iti sango ti nasagradoan a toldana.”

30 Napnek ni Finees a padi ken dagiti pangulo ti entero nga Israel a kimmuyog kenkuana, isuda a pangulo dagiti familia ti Israel, iti palawag dagiti tattao kadagiti tribu ti Ruben, Gad ken Akindaya a Manases.

31 Kinuna kadakuada ni Finees nga anak ni Eleazar a padi, “Ita makitamin nga adda kadatayo tiApoagsipud ta dikayo met gayam simmukir kenkuana. Insalakanyo dagiti Israelita iti pannusa tiApo.”

32 Manipud Galaad, nagsubli da Finees ken dagiti pangulo dagiti tattao idiay Canaan ket impakaammoda kadagiti Israelita ti napasamak.

33 Napnek dagiti Israelita iti naipadamag kadakuada ket nagdaydayawda iti Dios. Saanda nga intuloy ti panggepda a makigubat tapno dadaelenda ti daga a nangipasdekan dagiti tattao iti tribu ti Ruben ken Gad iti taengda.

34 Kinuna dagiti tattao ti Ruben ken Gad, “Daytoy nga altar ti mangipaneknek kadatay amin a tiApoket Dios.” Pammaneknek ti impanaganda iti altar.

Agsao ni Josue kadagiti Tattao

1 Adun a tawen ti napalabas manipud impaay ni Yahweh ti kappia iti Israel. Saanen a riniribuk dagiti kabusor iti aglikmutda. Lakay unayen ni Josue.

2 Inayabanna dagiti amin nga Israelita, dagiti panglakayen, pangulo, ukom ken ofisiales dagiti tattao, ket kinunana, “Lakayak unayen.

3 Nakitayon ti amin nga inaramid tiApoa Diostayo kadagitoy a pagilian gapu kadakayo. TiApoa Diosyo ti nakigubgubat iti agpaay kadakayo.

4 Intudingko a tagikuaen dagiti tribuyo ti daga dagiti tattao a pinarmekko ken amin a nabati pay a nasion manipud iti Jordan agingga iti Taaw Mediterranean.

5 Pagsanudento ida tiApoa Diosyo, ket mapaksiatdanto bayat ti idadarupyo. Kukuayonto ti dagada, kas inkari kadakayo tiApoa Diosyo.

6 Ngarud, ikagumaanyo a tungpalen ti amin a nailanad iti Linteg ni Moises. Diyo salungasingen ti uray maysa a pasetna.

7 Dikay makilangen kadagiti nabati a tattao iti dennayo wenno baliksen ti nagan dagiti diosda wenno pagsapata ti naganda wenno agserbi kadakuada wenno agdaydayaw kadakuada.

8 Agtalinaedkayo ketdi a napudno itiApoa kas iti inar-aramidyo agpapan ita.

9 Iti imatangyo, pinaksiat tiApoti dadakkel ken nabibileg a pagilian, ket awan pay ti makabael a mangparmek kadakayo.

10 Mabalina pagtarayen ti uray maysa kadakayo ti sangaribu a tattao, gapu ta tiApoa Diosyo ti makirupak iti biangyo a kas inkarina.

11 Isut’ gapuna nga ikagumaanyo nga ayaten tiApoa Diosyo.

12 No sumiasikayo, ket tumiponkayo kadagiti tattao nga adda pay la a nabati iti sidongyo, ken makiasawakayo kadakuada,

13 namnamaenyo a dinton paksiaten tiApoa Diosyo dagitoy a pagilian. Napeggaddanto a kas iti silo wenno palab-og a pakatinnaganyo, ken saplit kadagiti bukotyo wenno siit kadagiti matayo agingga a mapukawkay iti daytoy nasayaat a daga nga inted kadakayo tiApoa Diosyo.

14 “Ita, dandaniakon sumina iti daytoy a biag. Ammoyo iti amin a puso ken kararuayo nga inted tiApoa Diosyo ti amin nga agkakaimbag a banag nga inkarina. Naaramid amin; awan ti saan a natungpal.

15-16 Wen, tinungpal tiApoa Diosyo ti amin a naimbag a banag a kinunana nga aramidenna. Ngem no salungasingenyo ti tulag tiApoa Diosyo nga imbilinna a tungpalenyo, no agserbi ken agdaydayawkayo kadagiti didiosen, dusaennakayto gapu iti pungtotna ket iti saan a mabayag, awanton ti matda kadakay iti daytoy nasayaat a daga nga intedna kadakayo.”