Author: admin

Uk-ukom 20

Agsagana ti Israel a Makigubat

1 Impangag ti amin nga Israelita ti ayab a makigubat ket naguummongda iti imatang ni Yahweh idiay Mizpa. Naggapuda idiay Dan iti amianan agingga iti Beerseba iti abagatan ken idiay Galaad iti daya.

2 Adda dagiti pangulo ti amin a tribu ti Israel iti daytoy a panaguummong dagiti tattao ti Dios. Adda 400,000 a mannakigubat.

3 Kabayatanna, naammoan dagiti tattao ti Benjamin a napan dagiti dadduma nga Israelita idiay Mizpa. Kinuna dagiti Israelita iti Levita a kabbalay ti babai a napapatay, “Kasano a naaramid daytoy a kinadakes?”

4 Insungbat ti Levita, “Dimmagaskami a dua iti kamalalak idiay Gabaa iti Benjamin tapno ummiankami sadiay.

5 Iti rabii, immay dagiti lallaki a taga-sadiay ket linawlawda ti balay a yanko. Kayatdak a patayen; rinamesda ketdi ti kabbalayko ket natay.

6 Innalak ti bangkayna, rinangrangkayko ket pinaikkak ti tunggal maysa kadagiti 12 a tribu ti Israel agsipud ta dakes ken dinederrep ti inaramidda kadatayo.

7 Israelitatayo amin ditoy. Ania ti nasayaat nga aramidentayo?”

8 Sangsangkamaysa a timmakder dagiti amin a tattao ket kinunada, “Awan agaw-awid kadatayo, agnaed man iti tolda wenno balay.

9 Daytoy ti aramidentayo: Agbibinnunottayo tapno ammoentayo no siasino dagiti mapan mangraut iti Gabaa.

10 Maysa nga apagkapullo kadagiti tattao ti Israel ti matudingan a mapan agala iti abasto ti buyot a mapan idiay Gabaa tapno dusaenda ida iti dinederrep nga inaramidda iti Israel.”

11 Iti kasta, nagtitipon amin a lallaki ti Israel a maymaysa ti panggepda: ti panangrautda iti siudad.

12 Nangibaon dagiti tribu ti Israel kadagiti mangipakaammo iti amin a masakupan ti tribu ti Benjamin. Kinunada, “Apay nga inaramidyo daytoy a kinadakes?

13 Yawatyo dagiti nakarimrimon a lallaki ti Gabaa ta patayenmi ida tapno mapukaw daytoy a kinadakes iti Israel.”

Ngem saan nga inkaskaso dagiti Benjaminita dagiti naibaon.

14 Naguurnong ketdi idiay Gabaa dagiti amin a lallaki a naggapu iti amin a siudad ti Benjamin ket napanda ginubat dagiti dadduma nga Israelita.

15 Iti dayta nga aldaw, naayaban ti 26,000 a mannakigubat kadagiti siudadda. Adda pay napili a 700 a lallaki a taga-Gabaa.

16 Pasigda a kattigid ket nalaingda nga agpallatibong; saanda nga agmintis iti aniaman a puntaanda, uray buok.

17 Malaksid dagiti Benjaminita, adda met 400,000 a nasanay a mannakigubat ti Israel.

Maraut dagiti Benjaminita

18 Napan dagiti Israelita iti pagdaydayawan idiay Betel ket nakiumanda iti Dios. “Ania a tribu ti umuna a manggubat kadagiti Benjaminita?” sinaludsodda.

“Ti tribu ti Juda,” insungbat ni Yahweh.

19 Ngarud, iti agsapa ti sumuno a bigat, napan nagkampo dagiti Israelita iti asideg ti Gabaa.

20 Pinagpuestoda dagiti mannakigubat iti sango ti siudad tapno rautenda ti tribu ti Benjamin.

21 Manipud iti siudad, rimmuar ti armada ti Benjamin, ket sakbay ti ilelennek ti init, pinatayda ti 22,000 a mannakigubat ti Israel.

22-24 Nagkamang dagiti Israelita iti pagdaydayawan idiay Betel ket nagmalmalemda a nagdungdung-aw iti imatang ni Yahweh. “Rumbeng kadi nga inkam man gubatenen dagiti kakabsatmi a Benjaminita?” sinaludsodda.

“Wen,” kinuna ni Yahweh.

Iti kasta, napatured ti armada ti Israel ket iti sumaruno nga aldaw, napanda nagpuesto iti isu met laeng a lugar a nagyananda tapno gubatenda dagiti Benjaminita.

25 Nagrarangetda manen iti ruar ti Gabaa ket iti daytoy a gundaway, napapatay ti 18,000 a mannakigubat ti Israel.

26 Nagsubli dagiti amin nga Israelita idiay Betel ket nagdung-awda. Nagtugawda iti imatang ni Yahweh ket dida nangnangan agingga iti rabii. Nangidatagda iti daton a pakikappia ken daton a mapuoran.

27-28 Gapu ta adda sadiay ti Lakasa ti Tulag nga ay-aywanan ni Finees nga anak ni Eleazar ken apoko ni Aaron, sinaludsod dagiti tattao ken ni Yahweh: “Inkam kadi gubaten manen dagiti kakabsatmi a Benjaminita wenno saanen?”

Kinuna ni Yahweh, “Inkay rumaut ta inton bigat, agballigikayto a mangparmek kadakuada.”

29 Nangibaon dagiti Israelita kadagiti mannakigubat nga aglemmeng iti likmut ti Gabaa.

30 Iti maikatlo nga aldaw, simmang-atda a manggubat kadagiti Benjaminita. Nagpuesto dagiti soldado iti sango ti Gabaa a kas met la idi.

31 Rimmuar a makigubat dagiti Benjaminita, ket nayadayoda iti siudad. Kas iti napalabas a pannakigubatda, nagpapatayda kadagiti tattao iti dalan nga agpa-Betel, agpa-Gabaa ken iti tay-ak. Pinatayda ti agtallopulo nga Israelita.

32 Impagarup dagiti Benjaminita a nagballigida manen a nangparmek iti Israel.

Ngem plano dagiti Israelita ti agpakamat tapno mayadayoda dagiti Benjaminita iti siudad.

33 Isut’ gapuna nga idi nagsanud ti kadakkelan a bunggoy ti armada ti Israel ket naguummongda idiay Baaltamar, rimmuar met dagiti mannakigubat a nanglikmut iti siudad kadagiti rukib a naglemmenganda iti laud ti Gabaa.

34 Agdagup iti 10,000 a napili a mannakigubat ti Israel ti dimmarup iti Gabaa. Napinget ti dangadang. Saan nga ammo dagiti Benjaminita a ngannganidan agkanibusanan.

35 Pinagballigi ni Yahweh dagiti Israelita; iti dayta nga aldaw, naparmek dagiti Benjaminita, ket 25,100 kadakuada ti napapatay.

36 Ket nabigbig dagiti Benjaminita a pinarmek dagiti Israelita idan.

Agballigi ti Israel

Nagsanud dagiti Israelita ta mangnamnamada kadagiti pinaglemmengda nga agsaneb iti ruar ti Gabaa. Inalistoan dagitoy ti rimmuar iti puestoda.

37 Dinagdagusda ti simrek iti Gabaa, nagwarasda ket pinatayda amin nga adda iti siudad.

38 Adda pagilasinan a nagnunumoan ti kadakkelan a bunggoy ti Israel ken dagiti aglemlemmeng a mannakigubat: no adda napuskol nga asuk nga agpangato manipud iti siudad,

39 agsubli dagiti Israelita nga adda iti paggugubatan. Tallopulo idin kadakuada ti napapatay, isu nga impagarup dagiti Benjaminita a naparmekda dagiti Israelita a kas iti damo.

40 Ket nagparang ti napuskol nga asuk nga agpangpangato manipud iti siudad. Idi tumalliaw dagiti Benjaminita, nasdaawda a nakakita a maur-uram metten ti entero a siudad.

41 Nagsubli dagiti Israelita ket nagbuteng dagiti Benjaminita ta ammoda nga agkanibusanandan.

42 Panggepda ti aglibas ket nagtatarayda a nagturong iti tay-ak ngem awan paglisianda. Dinarundon ida ti kadakkelan a bunggoy ti armada ti Israel ken dagiti naggapu iti siudadket nagpapatayda.

43 Awan ti paglisian dagiti Benjaminita ket saan a nagsardeng dagiti Israelita a nangsunson ken nagpapatay kadakuada agingga iti dayaen ti Gabaa.

44 Sangapulo ket walo a ribu kadagiti kalalaingan a mannakigubat a Benjaminita ti napapatay.

45 Nagturong dagiti nakalasat idiay let-ang, ket nagkamangda iti lugar a maaw-awagan iti Bato ti Rimmon; 5,000 kadakuada ti napapatay iti daldalan. Intuloy dagiti Israelita a sinunson ida agingga iti Gidom ket 2,000 pay ti pinatayda kadakuada.

46 Agdagup iti 25,000 dagiti napasag a soldado a Benjaminita iti dayta nga aldaw—maingelda amin.

47 Ngem nakalibas ti 600 kadakuada. Napanda iti let-ang, ket nagkamangda iti lugar a maaw-awagan iti Bato ti Rimmon. Nagyanda sadiay iti uppat a bulan.

48 Sinublian dagiti Israelita ti nangpapatay kadagiti dadduma a Benjaminita—inkisapda amin a tao ken animal a nasarakanda. Pinuoranda amin nga il-ili iti dayta a deppaar.

Uk-ukom

Uk-ukom 21

Assawa para kadagiti Nakalasat a Benjaminita

1 Naguummong dagiti lallaki nga Israelita idiay Mizpa ket insapatada ken ni Yahweh: “Saanminto nga ipalubos nga adda Benjaminita a mangasawa iti siasinoman nga anakmi a babai.”

2 Kalpasanna, napan dagiti tattao idiay Betel ket nagyanda sadiay agingga iti rabii. Iti imatang ti Dios, silaladingitda a nangidung-aw;

3 “Apoa Dios ti Israel, apay a naaramid daytoy iti Israel? Apay a kasapulan a mapukaw ti tribu ti Benjamin?”

4 Iti sumuno a bigat, nasapa a bimmangon dagiti tattao ket nagaramidda iti altar sadiay. Nangidatagda iti daton a pakikappia ken daton a mapuoran.

5 Sinaludsodda, “Asino kadagiti tribu ti Israel ti saan a nakigimong idiay Mizpa iti imatang tiApo?” (Ngamin, nagkarida idi a mapapatay ti siasinoman a saan a mapan sadiay tapno sumango ken ni Yahweh.)

6 Kasta unay ti ladingitda gapu iti napasamak kadagiti kakabsatda a Benjaminita. Kinunada, “Ita nga aldaw, napukaw ti Israel ti maysa kadagiti tribuna.

7 Ania ti aramidentayo tapno adda yasawatayo kadagiti lallaki a nabati agsipud ta insapatatayo itiApoa ditay yasawa kadakuada dagiti annaktayo?”

8 Nagdamagda no ania kadagiti tribu ti Israel ti saan a dimmar-ay iti taripnong ni Yahweh idiay Mizpa. Natakuatanda nga awan ti siasinoman a taga-Jabes idiay Galaad a napan nakigimong sadiay.

9 Idi saggaysa a maawagan dagiti tattao, pudno nga awan naggapu idiay Jabes.

10 Iti kasta, nangibaon ti entero a gimong iti 12,000 a katuredan a tattaoda ket daytoy ti naibilin kadakuada, “Inkayo idiay Jabes ket patayenyo amin a taga-sadiay, agraman babbai ken ubbing.

11 Patayenyo amin a lallaki agraman dagiti babbai a saan a birhen.”

12 Napanda idiay Jabes ket nakasarakda iti 400 a babbalasang; impanda ida idiay kampo ti Silo idiay Canaan.

13 Pinaibaga ti entero a gimong kadagiti Benjaminita nga adda iti lugar a maaw-awagan iti Bato ti Rimmon a nagsardengen ti gubat.

14 Nagsubli dagiti Benjaminita. Inted dagiti Israelita kadakuada dagiti babbalasang a dida pinatay idiay Jabes. Ngem nagkurang ti bilang dagiti babbai.

15 Naasian dagiti tattao kadagiti Benjaminita ta nangaramid ni Yahweh iti giwang ti panagkaykaysa dagiti tribu ti Israel.

16 Iti kasta, kinuna dagiti pangulo ti entero a gimong, “Awanen babbai iti tribu ti Benjamin. Ania ti aramidentayo tapno adda yasawatayo kadagiti nabati a lallaki?

17 Masapul a saan a mapukaw iti Israel ti maysa kadagiti sangapulo ket dua a tribuna. Kasano ti pamay-antayo tapno mataginayon ti tribu ni Benjamin?

18 Ditay mabalin nga ipaasawa kadakuada dagiti annaktayo, gapu ta inlunodtayo ti siasinoman a mangipalubos iti anakna a balasang nga asawaen ti Benjaminita.”

19 Pagammoan, nalagipda a dandanin ti tinawen a fiesta ni Yahweh idiay Silo. (Adda ti Silo iti amianan ti Betel, abagatan ti Lebona ken dayaen ti kalsada iti nagbaetan ti Betel ken Sikem.)

20 Imbagada kadagiti Benjaminita, “Inkay aglemmeng iti kaubasan,

21 ket agsiputkayo. No lumabas dagiti babbalasang ti Silo a mapan agsala iti fiesta, rummuarkayo iti kaubasan ket mangtiliw ti tunggal maysa kadakayo iti asawaenna a yawidna iti sakup ti Benjamin.

22 No umayto agriri kadakami ti ama wenno kabsatda, kunaminto kadakuada a kasla dakayo ti agsasao: ‘Pangngaasiyo ta ipalubosyo nga asawaenmi ida, ta dimi met rinabsut ida iti paggugubatan. Uray ta diyo inted ida kadakami, saanyo ngarud a sinalungasing ti sapatayo.’”

23 Kasta ti inaramid dagiti Benjaminita: Pimmili ti tunggal maysa iti asawaenna kadagiti babbalasang nga agsalsala ket ginuyodna nga impanaw. Nagsublida iti sakupda, binangonda manen dagiti ilida ket nagnaedda sadiay.

24 Nagawid met dagiti dadduma nga Israelita. Napan ti tunggal maysa iti pagtaenganna, iti tribu, familia ken bukodna a daga.

25 Itidaydi a panawen, awan ari ti Israel ket inaramid ti tunggal maysa ti kinaykayatna.

Ruth

Ruth 1

Mapan ni Elimelec ken ti Familiana idiay Moab

1 Idi panawen a panagturay dagiti ukom iti Israel, adda bisin a nagsaknap iti pagilian. Iti kasta, napan nagnaed idiay Moab iti apagbiit a tiempo ti maysa a lalaki a taga-Betlehem idiay Juda. Inkuyogna ti asawana ken dagiti dua a lallaki nga annakna.

2 Elimelec ti nagan ti lalaki, Noemi ti nagan ti asawana, ket Mahalon ken Kilion dagiti annakda. Nagtaudda iti kapuonan ni Efrata.

3 Kabayatan ti kaaddada idiay Moab, natay ni Elimelec ket naulila ni Noemi ken dagiti dua nga annakna.

4 Nangasawa dagiti annakna kadagiti Moabita. Orfa ti nagan ti maysa, Ruth ti sabali. Kalpasan ti dandani sangapulo a tawen a panagnaedda sadiay,

5 natay da Mahalon ken Kilion. Nabalo ni Noemi ket natay met dagiti dua nga annakna.

Agsubli da Noemi ken Ruth idiay Betlehem

6 Nadamag ni Noemi a pinaraburan ni Yahweh dagiti tattaona iti nawadwad nga apit. Iti kasta, nagsagana a pumanaw iti Moab agraman dagiti manugangna.

7 Nagdaliasatda nga agsubli idiay Juda ngem iti dalan,

8 kinuna ni Noemi kadagiti manugangna, “Agsublikayon ket makipagnaedkayo kadagiti innayo. No kasano ti kinaimbagyo kaniak ken kadagiti pimmusay nga annakko, kasta koma met ti kinaimbag tiApokadakayo.

9 Ipalubosna koma a maasawaankayo manen ket maaddaankayo iti baro a familia.”

Inagkan ni Noemi dagiti manugangna a kas pammakadana ngem nagsangitda iti napigsa.

10 Kinunada kenkuana, “Saan! Sumurotkami kenka nga agsubli kadagiti kailiam.”

11 “Annakko, masapul nga agsublikayo,” insungbat ni Noemi. “Apay a kayatyo ti sumurot kaniak? Makaanakak pay aya iti mangasawa kadakayo?

12 Agawidkayon kadagiti balbalayyo, ta baketakon a makiasawa manen. Uray pay no kunak nga adda namnamak ket makiasawaak ita a rabii tapno aganakak,

13 makauraykayo kadi agingga a makadakkel dagiti annakko? Daytoy kadi ti makalapped iti pannakiasawayo iti sabali? Annakko, ammoyo a narigat a mapasamak dayta. Binaybay-annak tiApo, ket maasianak kadakayo.”

14 Nagsangit manen dagiti manugang ni Noemi. Kalpasanna, inagkan ni Orfa ti katuganganna sa nagpakada, ket nagawid. Ngem saan a pinanawan ni Ruth ti katuganganna.

15 Kinuna ni Noemi kenkuana, “Ruth, kitaem, nagsublin ti abiratmo kadagiti kailianna ken iti didiosenna. Agawidka metten.”

16 Ngem insungbat ni Ruth, “Diyo koma kiddawen a panawankayo. Palubosandak koma a sumurot kadakayo. Umayak iti sadinoman a papananyo. Agnaedak iti sadinoman a pagnaedanyo. Kailiak metten dagiti kailianyo, ket ti Diosyo isu metten ti Diosko.

17 Iti sadinoman a pakatayanyo, sadiayto metten ti pakatayak ken pakaitanemak. Dusaennak koma ti Dios no ipalubosko ti aniaman a banag a mamagsina kadatayo malaksid ken ni patay.”

18 Idi makita ni Noemi a natibker ti pangngeddeng ni Ruth, saanen a nagtagtagari.

19 Intuloyda ti nagbiahe agingga a nakadanonda idiay Betlehem. Idi sumangpetda, nasdaaw ti amin. Sinaludsod dagiti babbai, “Pudno kadi a sika ni Noemi?”

20 Kinunana, “Didak awagan iti Noemi. Awagandak iti Mara,ta pinarigatnak ti Dios a Mannakabalin-amin.

21 Narang-ayak idi pumanawak ditoy, ngem ita, ima-imaak nga insubli tiApo. Apay nga awagandak iti Noemi idinto a dinidigra ken pinarigatnak tiApoa Mannakabalin-amin?”

22 Kastoy ti napasamak idi nagsubli ni Noemi idiay Betlehem manipud Moab. Kaduana ni Ruth, ti Moabita a manugangna. Mangrugin ti panagani iti sebada idi sumangpetda idiay Betlehem.

Ruth

Ruth 2

Ni Ruth iti Talon ni Boaz

1 Adda idi kabagian ni Noemi iti partido daydi Elimelec nga asawana. Isu ni Boaz, maysa a baknang ken mararaem a tao.

2 Itimaysa nga aldaw, kinuna ni Ruth ken ni Noemi, “Innak idiay taltalon ket agtudtodak kadagiti dawa a mabati dagiti agan-ani. Agyanak iti likudan ti siasinoman a mangipalubos nga agtudtodak iti dawa a mabati.”

“Inka, a, anakko,” insungbat ni Noemi.

3 Iti kasta, napan ni Ruth iti taltalon, ket nagtudtod kadagiti dawa a malabsan dagiti agan-ani. Nairana nga iti talon ni Boaz a kabagian ni Elimelec ti napananna.

4 Iti saan a mabayag, simmangpet ni Boaz a naggapu idiay Betlehem. Kinablaawanna dagiti agan-ani, “Adda koma kadakayo tiApo.”

“Kasta met koma kenka,” insungbatda.

5 Idi makita ni Boaz ni Ruth, sinaludsodna iti pangulo dagiti agan-ani, “Siasino dayta a balasang?”

6 “Isu ti ganggannaet a babai a kinakuyog ni Noemi a naggapu idiay Moab,” insungbat ti lalaki.

7 “Impakpakaasina a palubosak a sumaruno kadagiti agan-ani tapno agtudtod kadagiti dawa. Manipud pay la itay bigat nga agtudtudtod, ket ita la nga aglinong tapno aginanat’ biit.”

8 Iti kasta, kinuna ni Boaz ken ni Ruth, “Denggem ti balakadko kenka. Dika mapmapan agtudtod iti sabali a talon. Ditoy laengen ti pagtudtodam iti dawa. Agyankan ditoy ket makipagtrabahoka kadagiti babbai.

9 Siputam no sadino ti paganianda, ket sumurotka kadakuada. Binilinko dagiti tattaok a didaka an-anoen. No mawawka, inka latta uminum kadagiti karamba a sinakdoanda.”

10 Nagrukob a nagdayaw ni Ruth sana kinuna ken ni Boaz, “Naimbagkayo unay kaniak idinto a maysaak laeng a ganggannaet.”

11 Simmungbat ni Boaz, “Nadamagko dagiti amin nga impaaymo ken ni Noemi a katugangam manipud natay ti asawam. Ammok a pinanawam dagiti nagannak kenka ken ti ilim tapno umayka makipagnaed kadagiti tattao a dimo am-ammo.

12 Gunggonaannaka koma tiApogapu iti inaramidmo. Wen, naan-anay koma ti gunggonam nga ited tiApoa Dios ti Israel, isu a nagkamangam!”

13 Kinuna ni Ruth, “Naimbagkayo unaykaniak, apo. Nakagin-awaak iti naanus a panagsaoyo kaniak, nupay no saanak a maipada iti maysa kadagiti adipenyo a babbai.”

14 Iti tiempo ti pannangan, kinuna ni Boaz ken ni Ruth, “Umayka mangala iti tinapay ket isawsawmo iti arak.” Iti kasta, nakilanglang ni Ruth kadagiti agan-ani, ket inikkan ni Boaz iti pilipig. Nangan ni Ruth agingga a nabsog. Adda pay natedda iti taraon a naited kenkuana.

15 Idi mapan manen agtudtod ni Ruth kadagiti nalabsan a dawa, binilin ni Boaz dagiti agan-ani, “Palubosanyo nga agtudtod uray iti asideg dagiti binettek. Diyo singsingaen.

16 Aguyoskayo ketdi kadagiti dawa iti binettek ket iwarayo tapno adda tudtodenna. Diyo dildillawen.”

17 Nagtudtod ni Ruth agingga iti sumipnget. Idi mairikna amin, aganay a maysa nga efati sebada ti dagsenna.

18 Inyawidna ti irik ket impakitana iti katuganganna ti naurnongna. Intedna pay ken ni Noemi ti natda iti taraon a naited kenkuana.

19 Sinaludsod ni Noemi, “Sadino ti napanmo nagtudtodan ita nga aldaw? Akintalon ti napanmo nagtudtodan? Bendisionan koma ti Dios ti tao a nangngaasi kenka.”

Imbaga ni Ruth ken ni Noemi a napan nagtudtod iti talon ti maysa a lalaki nga agnagan iti Boaz.

20 Kinunani Noemi kenkuana, “Bendisionan koma tiApodayta a tao! Tungpalen tiApodagiti karina kadagiti sibibiag man wenno natay.” Intuloyna, “Asideg a kabagiantayo dayta a tao, maysa kadagiti adda pagrebbenganna a mangaywan kadata.”

21 Kalpasanna, kinuna ni Ruth, “Malaksid kadagiti impaayna kaniak, kinunana pay nga itultuloyko ti agtudtod agingga a malpas ti ani.”

22 “Wen, anakko,” insungbat ni Noemi, “nasaysayaat no makipaganika kadagiti babbai iti talon ni Boaz. Amangan no adda mangdangran kenka no mapanka iti talon ti sabali a tao.”

23 Iti kasta, nakiani ni Ruth kadakuada, ket nagtudtod kadagiti dawa agingga a naani amin a sebada ken trigo. Intuloyna ti nakipagnaed iti katuganganna.

Ruth

Ruth 3

Makiasawa manen ni Ruth

1 Iti maysa nga aldaw, kinuna ni Noemi ken ni Ruth, “Masapul nga ibirokanka iti asawam, tapno adda met bukodmo a taeng.

2 Laglagipem a kabagianta ni Boaz. Isu ti among dagidi babbai a kinaduam a nagani iti talonna. Denggem ti ibagak. Agpairik ni Boaz iti sebada inton rabii.

3 Agdigoska, agbangbangloka ket ikawesmo ti kapintasan a pagan-anaymo saka mapan iti pagpairikanna. Ngem dimo ipadpadlaw ken ni Boaz ti kaaddam agingga a malpas a mangan ken uminum.

4 Siputam a naimbag no sadino ti pagturoganna. Inton namnamaem a nakaturogen, mapanka iti ayanna, ilukaismo ti ulesna, ket agiddaka iti sakaananna. Ibagananto ti rumbeng nga aramidem.”

5 “Aramidek amin nga ibalakadyo,” insungbat ni Ruth.

6 Napan ni Ruth iti pagirikan ket inaramidna amin nga imbilin ti katuganganna.

7 Kalpasan ti pannangan ken panaginum ni Boaz, mayat ti riknana. Napan naturog iti pempen ti sebada. Nagin-inayad nga immasideg ni Ruth ket ingngatona ti ules sa nagidda iti sakaanan ni Boaz.

8 Idi makariing ni Boaz, nagballikid, ket nasdaaw a nakakita iti maysa a babai nga agid-idda iti sakaananna.

9 “Siasinoka?” sinaludsod ni Boaz.

“Siak ni Ruth nga adipenmo, apo,” insungbatna. “Gapu ta asideg a kabagianka, adda kalintegam a mangasawa kaniak.”

10 “Bendisionannaka koma tiApo,” kinuna ni Boaz. “Iti daytoy nga inaramidmo, dakdakkel nga adayo ti panangipakitam iti kinapudnom kadakami nga agkakabagian ngem ti inaramidmo iti katugangam. Ngamin, dika nagsapul iti agtutubo, nabaknang man wenno napanglaw.

11 Dika agdanag, Ruth. Ammo dagiti amin nga umili a naimbagka a babai. Aramidek amin a dawatem.

12 Pudnonga asideg ti panagkabagianta, ngem adda lalaki nga as-asideg a kabagiam ngem siak.

13 Maturogkan, ket inton bigat, ammoenta no kayatna nga isu ti mangaywan kenka. No kayatna, naimbag. Ngem no saan, isapatak iti nagan ti Dios a sibibiag a siak ti mangaywan kenka. Ita, maturogkan agingga iti agsapa.”

14 Naturog ngarud ni Ruth iti sakaanan ni Boaz agingga iti agsapa, ngem bimmangon sakbay nga aglawag ta kayat ni Boaz nga awan ti makaammo a naturog sadiay.

15 Kinuna ni Boaz kenkuana, “Uksobem ta kagaymo ket yaplagmo ditoy.” Inikkat ni Ruth ti kagayna, ket binukbokan ni Boaz iti dandani 23 a kilo ti sebada sana tinulongan nga impasusuon kenkuana. Nagawid,

16 ket napan ken ni katuganganna. “Kumusta ti napanam, anakko?” sinaludsod ni Noemi.

Imbaga ni Ruth kenkuana ti amin nga inaramid ni Boaz.

17 Kinunana pay, “Imbagana kaniak a saan a mabalin nga agawidak nga ima-ima, isut’ gapuna nga intedna kaniak dagitoy a sebada.”

18 Kinuna ni Noemi kenkuana, “Agan-anuska, Ruth, agingga a maammoam ti pagbanagan daytoy. Saan nga agtalna ni Boaz ita nga aldaw agingga a marisutna daytoy.”

Ruth

Ruth 4

Asawaen ni Boaz ni Ruth

1 Napan ni Boaz iti ruangan ti siudad, iti disso a masansan a pagtitiponan dagiti tattao, ket nagtugaw sadiay. Iti saan a nabayag, limmabas ti lalaki a kaasitgan a kabagian ni Elimelec, ti lalaki nga imbaga ni Boaz ken ni Ruth. Inayabanna sana kinuna, “Kabagian, mabiit laeng! Agtugawka.” Iti kasta, immasideg ti lalaki ket nagtugaw iti abay ni Boaz.

2 Kalpasanna, nangayab ni Boaz iti sangapulo kadagiti papangulo ti ili ket pinagtugawna ida iti yanda. Idi nakatugawdan,

3 kinunana iti kabagianna, “Ita ta nagsublin ni Noemi manipud Moab, kayatnan nga ilako ti talon daydi Elimelec a kabagianta.

4 Napanunotko a masapul a maammoam daytoy. Ita ngarud, no kayatmo, gatangem ti talon iti imatang dagitoy papangulo nga adda a situtugaw ditoy. Ngem no dimo kayat, ibagam, ta dakdakkel ti kalintegam a gumatang ngem siak.”

“Gatangek ti talon,” insungbat ti lalaki.

5 “Ngarud, no gatangem ti talon ken ni Noemi,” kinuna ni Boaz, “asawaem met ni Ruth,ti balo a taga-Moab, tapno agtalinaed ti talon a kukua ti familia daydi natay a kabagianta.”

6 Simmungbat ti lalaki, “No kasta ngarud, bay-akon ti kalintegak a manggatang iti talon, ta kaipapananna a dinto tawiden dagiti annakko. Sika laengen ti gumatang.”

7 Kastoyidi ti ugali dagiti Israelita: No gumatang wenno makisinnukatda iti sanikua, uksoten ti naglako ti sapatosna sana ited iti gumatang a mangipakita iti pannakarisut ti nagtulaganda.

8 Iti kasta, apaman nga imbaga ti lalaki a ni laengen Boaz ti gumatang iti talon, inuksotna ti sapatosna sana inted ken ni Boaz.

9 Kinuna ni Boaz kadagiti papangulo ken kadagiti amin nga adda sadiay, “Ita nga aldaw, dakayo ti saksi a ginatangko ken ni Noemi ti amin a sanikua da Elimelec, Kilion ken Mahalon nga annakna.

10 Maysapay, asawaek ni Ruth a Moabita, ti asawa daydi Mahalon, tapno agtalinaed ti sanikua iti familia daydi natay. Iti kasta, saan a mapukaw ti kaputotanna kadagiti tattaona ken iti pagilianna. Dakayo ti saksi iti daytoy ita nga aldaw.”

11 Kinunadagiti papangulo ken dagiti dadduma nga adda sadiay, “Wen, dakami ti saksi. Sapay koma ta bendisionan tiApodaytoy a babai, kas kada Raquel ken Lea a nangted iti adu nga annak ken ni Jacob. Rumang-ayka koma iti kapuonan ni Efrata, ket agdinamagka koma ditoy Betlehem.

12 Sapaykoma ta dagiti annak nga ited tiApokadakayo iti daytoy a babai pagbalinenda ti familiayo a kas iti familia ni Perez nga anak da Juda ken Tamar.”

Ni Boaz ken dagiti Kaputotanna

13 Inasawa ngarud ni Boaz ni Ruth ket inyawidna. Pinaraburan ida ni Yahweh iti anak a lalaki.

14 Kinuna dagiti babbai ken ni Noemi, “Madaydayaw koma tiApo! Ita nga aldaw, inikkannaka iti apoko a mangaywan kenka. Sapay koma ta agbalinto a nalatak ti ubing iti Israel!

15 Ipatpategnaka ti manugangmo. Ad-adu ti inaramidna kenka ngem ti pito a lallaki nga annak. Ita, inikkannaka iti apoko a mangted iti baro a biag kenka ken mangted iti talged iti kinabaketmo.”

16 Inubba ken inarakup ni Noemi ti ubing,ket inaywananna.

17 Obed ti impanagan dagiti babbai iti ubing. Kinunada kadagiti amin a tao, “Naipasngay ti maysa a lalaki iti familia ni Noemi!” Isu ti ama ni Jesse nga ama ni David.

Ti Kapuonan ni David

18-22 Daytoy ti kapuonan ni David manipud ken ni Perez: Perez, Hezron, Ram, Aminadab, Naason, Salmon, Boaz, Obed, Jesse, David.

1 Samuel

1 Samuel 1

Mapan ni Elcana ken ti Familiana idiay Silo

1 Adda lalaki nga agnagan Elcana a nagtaud iti tribu ti Efraim ken agnaed iti ili ti Rama iti katurturodan ti Efraim. Isu ti anak ni Jeroham ken apoko ni Eliu iti familia ni Tohu iti kapuonan ni Suf.

2 Dua ti assawa ni Elcana: da Ana ken Fenina. Adda annak ni Fenina ngem awan ti anak ni Ana.

3 Tinawen a mapan ni Elcana idiay Silo tapno agdaydayaw ken agidaton ken ni Yahweh a Mannakabalin-amin. Da Ofni ken Finees nga annak ni Eli ti papadi idi ni Yahweh idiay Silo.

4 Tunggal agidaton ni Elcana, ibingayanna ni Fenina iti karne. Ikkanna met dagiti annakna a lallaki ken babbai.

5 Ket uray no ay-ayatenna unay ni Ana, maysa laeng ti itedna a bingay kenkuana gapu tasaan a pinaraburan ni Yahweh iti anak.

6 Gapu ta awan ti anak ni Ana, masansan a pagpulkoken ken umsien ni Fenina a kasalisalna.

7 Tinawen a kastoy ti mapasamak. Tunggal mapanda iti balay ni Yahweh, masansan a ruroden ni Fenina ni Ana, ket uray la nga agsangsangit ket saan a mangan.

8 Masansan a saludsoden ni Elcana, “Apay nga agsangsangitka, Ana? Apay a dika mangan? Apay a kanayon a nalidayka? Saanak aya a napatpateg kenka ngem iti sangapulo nga annak?”

Da Ana ken Eli

9-10 Iti naminsan, kalpasan ti pannanganda iti balay ni Yahweh idiay Silo, timmakder ni Ana a kasta unay ti pannakariribukna. Agsangsangit iti nasaem bayat ti panagkararagna ken ni Yahweh. Kabayatanna, agtugtugaw idi ni Eli a padi iti lugarna iti abay ti ruangan.

11 Addakari a sinapataan ni Ana: “OApoa Mannakabalin-amin, ipangagnak kadi nga adipenmo. Kitaem ti parikutko ket lagipennak! Wen, dinak koma liplipatan! No ikkannak iti anak a lalaki, ikarik nga idaton kenka iti unos ti panagbiagna, ket pulos a dinanto papukisan ti buokna.”

12 Intuloy ni Ana ti nabayag a panagkararagna ken ni Yahweh ket kitkitaen ni Eli ti panagkuti dagiti bibigna.

13 Naulimek ti panagkararag ni Ana. Agkutkuti dagiti bibigna ngem saan a sumngaw ti timekna. Daytoy ti gapuna nga impagarup ni Eli a nabartek ni Ana,

14 ket kinunana kenkuana: “Nabartekka! Isardengmo daytoy binabartek nga aramidmo ket agpamunawka.”

15 “Saanak a nabartek, apo,” insungbat ni Ana. “Saanak a nakainum! Maladingitanak, ket agkarkararagak. Yeb-ebkasko dagiti parikutko itiApo.

16 Dimo koma ipagarup a dakesak a babai. Kastoy ti makitam a panagkararagko gapu ta nakaro ti ladingitko.”

17 “Inka ngarud a sitatalna,” kinuna ni Eli. “Sapay koma ta ited ti Dios ti Israel ti dinawatmo kenkuana.”

18 “Sapay koma ta kankanayon a nasayaat ti panangipapanmo kaniak,” kinuna ni Ana. Kalpasanna, pimmanaw, nangan ket saanen a naliday.

Ti Pannakayanak ken ti Pannakaidaton ni Samuel

19 Kabigatanna, nasapa a bimmangon ni Elcana ken ti familiana ket kalpasan ti panagdaydayawda ken ni Yahweh, nagawidda idiay Rama. Kinaidda ni Elcana ni Ana nga asawana, ket pinatgan ni Yahweh ti kararag ni Ana.

20 Nagsikog ngarud ni Ana ket impasngayna ti maysa a lalaki. Pinanagananna iti Samuel,ta kas iti panangilawlawagna, “Nagdawatak itiAponga ikkannak iti anak.”

21 Dimteng manen ti tiempo nga ipapan ni Elcana ken ti familiana idiay Silo tapno idatagna ken ni Yahweh ti tinawen a daton ken tapno tungpalenna ti inkarina.

22 Ngem saan a napan ni Ana. Imbagana iti asawana, “Apaman a mapusot ti ubing, ipankonto iti balay tiApoa pagnaedannanto iti unos ti panagbiagna.”

23 “Aramidem ngarud ti ammom a kasayaatan,” insungbat ni Elcana. “Agbatika agingga iti panangpusotmo kenkuana. Sapay koma ta tungpalen tiApoti karina.”

Nagbati ngarud ni Ana ket tinagibina ti ubing.

24 Kalpasan ti panangpusotna iti ubing, impanna idiay Silo. Nangitugot iti baka a tallo ti tawenna,maysa nga efanga arina ken arak a naikarga iti supot a lalat. Impanna ni Samuel iti balay ni Yahweh idiay Silo uray no ubing pay laeng.

25 Pinartida ti baka ket kalpasanna, indatagda ti ubing ken ni Eli.

26 Kinuna ni Ana ken ni Eli, “Dispensarem, apo. Malagipnak pay kadi? Siak daydi babai a nakitam a sitatakder ditoy nga agkarkararag itiApo.

27 Dinawatko kenkuana nga itedna kaniak daytoy nga ubing ket pinatganna ti dawatko.

28 Ngarud, idatonko kenkuana daytoy nga ubing. Kukuan tiApoiti unos ti panagbiagna.”

Ket nagdaydayawdaken ni Yahweh sadiay.

1 Samuel

1 Samuel 2

Ti Kararag ni Ana

1 Inkararagni Ana:

“Pinunno tiApotoy pusok iti rag-o;

gapu iti inaramidna, anian a ragsakko.

Katawaak dagiti kabusorko;

wen, maragsakanak ta tinulongannak ti Dios!

2 “Awan ti nasantoan a kas itiApo;

awan ti kas kenkuana;

awan ti bato a kas iti Diostayo.

3 Isardengyo ti panagpaspasindayagyo,

ket isardengyon ti panagpalangguadyo.

Ta tiApoket Dios a makaammo iti amin,

ukomenna ti aramid ti tao.

4 Matukkol ti pana dagiti maingel a soldado,

ngem pumigsa dagiti nakapuy.

5 Dagiti aglaplapusanan idi iti taraon,

manggeddan tapno adda kanenda

ngem dinton agbisin dagiti nabisinan.

Pito ti annak ti babai a saan idi nga aganak,

ngem awanen ti nabati nga anak ti adu ti anakna.

6 MangpapataytiApoken mangted iti biag;

ipanna ti tao iti lubong dagiti natay,

pagungarenna ti natay.

7 Adda dagiti pagpanglawenna ket pabaknangenna ti dadduma.

Adda dagiti ipababana,

ket ti dadduma itan-okna.

8 Manipud iti tapok, bangonenna ti nakurapay

ket ti napanglaw aonenna iti kasasaad a nakaay-ay-ay.

Ikkanna ida iti lugar iti ayan dagiti prinsipe,

ket isaadna ida iti natan-ok a pagtugawan.

Kukua tiApodagiti fondasion ti daga;

binangonna ti lubong iti rabawda.

9 “Salaknibanna ti biag dagiti napudno a tattaona,

ngem mapukaw ti managdakdakes iti kasipngetan;

saan nga agballigi ti tao babaen iti bukodna a pigsa.

10 Madadaelto dagiti kabusor tiApo

inton gurruodanna ida manipud langit.

Ukomento tiApoti entero a lubong;

ikkannanto ti arina iti pannakabalin,

ket pagballigiennanto ti ari a pinilina.”

11 Nagawid da Elcana idiay Rama. Ngem nabati ni ubing a Samuel idiay Silo ket nagserbi ken ni Yahweh iti babaen ni Eli a padi.

Ti Kinadakes dagiti Annak ni Eli

12 Rinuker dagiti annak ni Eli. Saanda nga ikankano ni Yahweh

13 ken dagiti alagaden maipapan kadagiti it-ited dagiti tattao kadagiti papadi. Kastoy ngamin ti ugali dagiti papadi: No adda mangidatag iti datonna, umay ti adipen ti padi a nakaiggem iti tenedor a tallo ti pagtudokna. Bayat ti pannakalutluto ti karne,

14 idugsolna ti tenedor iti paglutoan, ket kukua ti padi ti aniaman a maala ti tenedor. Kastoy ti ar-aramidenda idiay Silo kadagiti daton dagiti amin nga Israelita a mapan sadiay.

15 Maysa pay, sakbay a mailasin ti taba tapno mapuoran, umay ti adipen ti padi ket kunana iti tao a madama nga agidatdaton, “Ikkannak iti karne a tunoen ti padi. Dina awaten ti naanger a karne nga itedmo. Sadiwa laeng ti kayatna.”

16 No kuna dagiti tattao nga agidatdaton, “Bay-am ta mapuoran pay nga umuna ti taba kas kadawyan samonto alaen ti kaykayatmo,” kuna met ti adipen ti padi, “Saan! Itedmo kaniakon! No madika, agawek!”

17 Iti imatang ni Yahweh, nadagsen unay daytoy a basol dagiti annak ni Eli gapu ta awan panagraemda kadagiti maidaton kenkuana.

Ni Samuel idiay Silo

18 Kabayatanna, intultuloy ni ubing a Samuel ti panagserbina ken ni Yahweh. Nagarruat iti nasagradoan nga apron a naaramid iti linen.

19 Tinawen nga yaramidan ni nanangna iti bassit a kagay, ket ipanna kenkuana no kumuyog iti asawana a mapan mangidatag iti daton.

20 Bendisionan ni Eli da Elcana ken ti asawana, ket kunana iti lalaki, “Sapay koma ta ikkannakayo pay tiApoiti sabali nga annak a mangala iti lugar ti ubing nga indatonyo kenkuana.”

Kalpasanna, agawid dagiti agassawa idiay Rama.

21 Binendisionan ni Yahweh ni Ana, ket naganak pay iti tallo a lallaki ken dua a babbai.

Dimmakkel ni ubing a Samuel bayat ti panagserbina ken ni Yahweh.

Ni Eli ken dagiti Annakna

22 Lakay unayen ni Eli. Kanayon a madamagna ti amin nga ar-aramiden dagiti annakna kadagiti Israelita. Naammoanna pay ti pannakikakaiddada kadagiti babbai nga agserserbi iti ruangan ti Tolda ti Dios.

23 Iti kasta, kinunana kadakuada, “Apay nga ar-aramidenyo dagitoy? Ibagbaga ti amin kaniak ti dakes nga ar-aramidenyo.

24 Isardengyo, annakko! Nakarimrimon dagitoy nga iwarwaras dagiti tattao tiApo.

25 No agbasol ti tao iti padana a tao, salakniban ti Dios. Ngem siasino ti makasalaknib iti tao nga agbasol iti Dios?”

Ngem dida impangag ti amada, ta inkeddengen ni Yahweh a patayenna ida.

26 Bayatti idadakkel ni Samuel, immad-adda ti pannakaitan-okna iti imatang ni Yahweh ken iti tao.

Ti Padto a maibusor iti Familia ni Eli

27 Adda profeta a napan ken ni Eli, ket imbagana daytoy a mensahe ni Yahweh: “Idi tagabu ti ari ti Egipto ni kapuonam nga Aaron ken ti familiana, imparangarangko ti bagik ken ni Aaron.

28 Pinilikida kadagiti amin a tribu ti Israel tapno agbalinda a papadi nga agserbi kaniak iti altar, agpuor iti insenso ken agaruat iti efoda makiuman kaniak. Inikkak ida iti kalintegan a makibingay kadagiti daton a mapuoran iti altar.

29 Ita, apay nga agumanyo dagiti sakrifisio ken daton nga imbilinko nga ited dagiti tattaok? Eli, apay nga ad-adda a padayawam dagiti annakmo ngem iti siak? Apay nga ipalubosmo a palpalukmegenda dagiti bagbagida kadagiti kasayaatan a paset ti amin a daton nga idatag dagiti tattaok kaniak?

30 Siak, ni Yahweh a Dios ti Israel, ti nangikari idi iti familiam ken iti kaputotam nga agserbida kaniak a padi iti agnanayon. Ngem ita, ibabawikon! Ta raemek laeng dagiti agraem kaniak, ket umsiek met dagiti mangumsi kaniak.

31 Denggem, umayen ti tiempo a patayek dagiti amin nga agtutubo a lallaki iti familiam ken iti kaputotam ket awanton ti malakayan iti familiam.

32 Mariribukkanto, ket apalamtoti amin a parabur nga itedko iti Israel, ngem pulos nga awanton malakayan wenno mabaketan iti familiam iti agnanayon.

33 Nupay kasta, pagtalinaedekto a sibibiag ti maysa kadagiti kaputotam, ket agserbinto kaniak a kas padi. Ngem agbulsektoket mapukawnanto amin a namnamana. Nadawelto ti ipapatay dagiti dadduma a kaputotam.

34 Intonaggiddan a matay dagiti dua nga annakmo, da Ofni ken Finees, isunton ti pagilasinam a matungpal ti imbagak.

35 Mangpiliakto iti padi a napudno kaniak ket tungpalenna ti amin nga ibagak nga aramidenna. Ikkakto kadagiti kaputotan a kanayon nga agserbi iti pinilik nga ari.

36 Kasapulan a dumatagto iti pinilik ti amin a makalasat a kaputotam ket dumawatdanto kenkuana iti kuarta ken makan. Agpakpakaasidanto kenkuana a mapalubosanda koma a tumulong kadagiti papadi tapno adda kanenda.”

1 Samuel

1 Samuel 3

Agparang ni Yahweh ken ni Samuel

1 Nagserbi ni ubing a Samuel ken ni Yahweh iti babaen ti panangidalan ni Eli. Kadagidi nga aldaw, manmano ti mensahe nga aggapu ken ni Yahweh. Manmano met ti parmata nga aggapu kenkuana.

2 Iti maysa a rabii, matmaturog ni Eli iti kuartona. (Nakapsuten ti panagkita ni Eli.)

3 Matmaturog met ni Samuel iti santuario nga ayan ti Lakasa ti Tulag ti Dios. Sisesegged pay laeng ti silaw sadiay.

4 Inawagan ni Yahweh ni Samuel, “Samuel! Samuel!”

“Addaak ditoy, apo,” kinuna ni Samuel,

5 ket nagtaray a napan ken ni Eli. “Adtoyak, apo, ta inayabannak,” kinunana.

Ngem kinuna ni Eli, “Anakko, dika inayaban; agsublika iti iddam.”

Nagsubli ngarud a nagidda ni Samuel.

6-7 Inawagan manen ni Yahweh ni Samuel. Saan nga ammo ti ubing a ni Yahweh ti umaw-awag gapu ta di pay nagsao idi kenkuana. Bimmangon ngarud a napan ken ni Eli ket kinunana, “Adtoyak, apo, ta inawagannak.” Ngem insungbat ni Eli, “Anakko, saanka nga inayaban; agsublika iti iddam.”

8 Iti maikatlo a daras, inayaban ni Yahweh ni Samuel. Bimmangon ni Samuel a napan ken ni Eli ket kinunana, “Adtoyak, apo, ta inayabannak.”

Ket nabigbig ni Eli a ni Yahweh ti mangaw-awag iti ubing,

9 isut’ gapuna a kinunana kenkuana, “Agsublika iti iddam, ket no awagannaka pay, kunam: ‘Agsaoka,Apo, ta dumdumngeg toy adipenmo.’”

Nagsubli ngarud a nagidda ni Samuel.

10 Dimteng ni Yahweh ket nagtakder sana inawagan ni Samuel a kas idi damo, “Samuel! Samuel!”

Insungbat ni Samuel, “Agsaoka,Apo. Dumdumngeg toy adipenmo.”

11 Imbaga ni Yahweh kenkuana: “Dumtengto ti aldaw nga adda nakaal-alliaw a banag nga aramidek iti Israel, ket makigtotto ti amin a makadamag iti daytoy.

12 Iti dayta nga aldaw, ibanagkonto ti amin nga insaok a maibusor iti familia ni Eli, manipud idi damo agingga iti panungpalan.

13 Naibagakon ken ni Eli a dusaek ti familiana, gapu ta nagaramid dagiti annakna iti maibusor kaniak. Ammo ni Eli nga ar-aramidenda daytoy, ngem dina napagsardeng ida.

14 Ngarud, isapatak iti familia ni Eli nga awanto ti sakrifisio wenno daton a makaikkat iti dusa a maipatay gapu iti daytoy nakabutbuteng a basol.”

15 Nagidda ni Samuel agingga iti bigat. Bimmangon ket napanna inlukat dagiti ruangan ti balay ni Yahweh. Mabuteng a mangibaga iti parmata ken ni Eli.

16 Ngem inayaban ni Eli, “Samuel, anakko.”

“Adtoyak, apo,” insungbat ni Samuel.

17 “Ania ti imbaga tiApokenka?” sinaludsod ni Eli. “Awan koma ti ilimedmo kaniak. Dusaennakanto ti Dios iti nakaro no dimo ibaga kaniak ti amin nga imbagana.”

18 Imbaga ngarud ni Samuel ti amin nga imbaga tiApo. Awan ti inlimlimedna.

Kinuna ni Eli, “Isu tiApo; aramidennanto ti aniaman nga ammona a naimbag.”

19 Dimmakkel ni Samuel. Adda ni Yahweh kenkuana ket imbanagna ti amin nga impaltiingna ken ni Samuel.

20 Iti kasta, naammoan dagiti amin nga Israelita iti entero nga Israel a ni Samuel ket maysa a pudno a profeta ni Yahweh.

21 Intultuloy ni Yahweh ti panagparangna idiay Silo a nagparanganna ken ni Samuel ket nagsao kenkuana. No agsao ni Samuel, dumngeg amin nga Israel.

1 Samuel

1 Samuel 4

Agawen dagiti Filisteo ti Lakasa ti Tulag

1 Iti dayta a tiempo, naguummong dagiti Filisteo a manggubat iti Israel. Nagrubbuat dagiti Israelita a mangsaranget kadakuada. Nagkampoda idiay Ebenezer, ket nagkampo met dagiti Filisteo idiay Afec.

2 Dimmarup dagiti Filisteo. Kalpasan ti napinget a ranget, naparmek dagiti Israelita ket agarup 4,000 kadakuada ti napapatay iti paggugubatan.

3 Idi nagsubli dagiti nakalasat iti kampo, kinuna dagiti pangulo ti Israel, “Apay nga impalubos tiApoa parmekendatayo dagiti Filisteo ita nga aldaw? Intay alaen ti Lakasa ti Tulag ni Yahweh idiay Silo tapno kumuyog kadatayo iti paggugubatan ket ispalennatayo kadagiti kabusortayo.”

4 Nangibaondangarud kadagiti mapan idiay Silo. Innalada ti Lakasa ti Tulag ni Yahweh a Mannakabalin-amin a naisaad iti ngatoen dagiti kerubin. Kinuyog da Ofni ken Finees nga annak ni Eli ti Lakasa ti Tulag.

5 Idi maisangpet ti Lakasa, kasta unay ti riaw dagiti Israelita, ket uray la nagallangogan ti daga.

6 Nangngeg dagiti Filisteo ti ariwawa, ket kinunada, “Ania ti kaipapanan ti panagdirdir-i dagiti Hebreo iti kampoda?”

Idi maammoan dagiti Filisteo a simmangpet ti Lakasa ti Tulag ni Yahweh iti kampo dagiti Hebreo,

7 nagbutengda ket kinunada, “Adda dios a simmangpet iti kampoda. Nalpastayon! Awan pay ti kastoy a napasamak kadatayo!

8 Siasino ti makaisalakan kadatayo kadagidiay mannakabalin a didiosen? Isuda dagiti nangpapatay idi kadagiti Egipcio iti amin a kita ti didigra!

9 Tumuredkayo, Filisteo! Makirangetkayo a kas pudno a lallaki, ta no saan, agbalintayo a tagabu dagiti Hebreo, kas iti panangtagabutayo idi kadakuada. Makirangetkayo ngarud ket ipakitayo ti kinalalakiyo.”

10 Sipipinget a nakirupak dagiti Filisteo. Naparmek dagiti Israelita ket nagtatarayda a nagawid. Nakaad-adu ti napapatay: 30,000 a mannakigubat nga Israelita.

11 Napapatay met da Ofni ken Finees nga annak ni Eli, ket innala dagiti Filisteo ti Lakasa ti Tulag ti Dios.

Ti Pannakatay ni Eli

12 Manipud iti paggugubatan, maysa a lalaki iti tribu ti Benjamin ti nagtartaray a napan idiay Silo ket simmangpet sadiay iti dayta met la nga aldaw. Naray-ab ti kawesna ken tapoktapok ti ulona a mangipakita iti ladingitna.

13 Agtugtugaw idi ni Eli iti lugarna iti abay ti ruangan iti igid ti dalan. Agpadpadaan ta mariribukan unay a mangpampanunot no ania ti napasamak iti Lakasa ti Tulag.

Inwaras ti lalaki ti damag iti ili, ket nagiikkis dagiti tattao gapu iti butengda.

14 Nangngeg ni Eli ti arimbangaw ket sinaludsodna, “Ania ti kaipapanan daytoy nga ikkis?”

Nagdardaras ti lalaki a napan iti ayan ni Eli ket imbagana met kenkuana ti damag. (

15 Agtawenen ni Eli iti 98 ket saanen a makakita.)

16 Kinuna ti lalaki, “Nakalibasak iti paggugubatan ket nagtartarayak nga immay ditoy ita nga aldaw.”

“Ania ti napasamak, anakko?” sinaludsod ni Eli.

17 “Intarayan dagiti Israelita dagiti Filisteo,” insungbat ti nagpadamag. “Nakaad-adu ti napapatay a tattaotayo! Natay pay da Ofni ken Finees nga annakmo ket inagaw dagiti Filisteo ti Lakasa ti Tulag ti Dios!”

18 Idi madakamat ti lalaki ti Lakasa ti Tulag, naliad ni Eli iti nagtugawanna ket narung-o ti tengngedna ta lakay unayen ken nalukmeg. Uppat a pulo a tawen a nagserbi ni Eli nga ukom iti Israel.

Matay ti Asawa ni Finees

19 Masikog idi ti asawa ni Finees a manugang ni Eli, ket dandani agpasngay. Idi madamagna ti pannakaagaw ti Lakasa ti Tulag ken ti pannakatay ti katuganganna ken ni Finees nga asawana, pagammoan la ta nagpasikal ket naganak.

20 Idi agbugbugsoten, kinuna dagiti babbai a mangas-asikaso kenkuana, “Pabilgem ta nakemmo. Lalaki ti anakmo.”

Ngem saan a simmungbat wenno nangikaskaso ti babai.

21 Pinanagananna ti maladaga iti Icabod,ta kunana, “Pimmanawen ti dayag ti Dios iti Israel,” kayatna a sawen, ti pannakaagaw ti Lakasa ti Tulag ken ti pannakatay ti katuganganna ken ti asawana.

22 “Wen, awanen ti gloria ti Dios iti Israel gapu ta naagaw ti Lakasa ti Tulag ti Dios,” kinunana.