Author: admin

Ti Lakasa ti Tulag iti Ikut dagiti Filisteo

1 Idi naagaw dagiti Filisteo ti Lakasa ti Tulag, binagkatda manipud Ebenezer sada impan iti siudadda nga Asdod.

2 Inserrekda iti templo ni Dagon a didiosenda ket insaadda iti abay ti estatua ni Dagon.

3 Iti sumuno nga agsapa, nakita dagiti umili a sipapakleb iti daga ti estatua ni Dagon. Natnag ngamin iti nagsaadanna ket nagdisso iti sango ti Lakasa ti Tulag ni Yahweh. Insublida iti yanna.

4 Ngem iti agsapa iti kabigatanna, nakitada manen ti estatua a sipapakleb iti sango ti Lakasa ti Tulag ni Yahweh. Naisina ti ulo ken dagiti imana, ket nawarawarada dagitoy iti pagserkan. Ti laeng bagina ti nabati. (

5 Daytoy ti gapuna nga uray kadagitoy nga aldaw, saan a baddeken dagiti papadi ni Dagon ken dagiti agdaydayaw kenkuana ti pagserkan no dida ket layawen.)

6 Nakaro ti panangdusa ni Yahweh kadagiti taga-Asdod. Nagbuteng dagiti tattao. Dinusana dagiti umili ken dagiti agnaed iti kabangibangna babaen iti panangparnuayna kadagiti letteg iti bagbagida.

7 Idi makitada ti mapaspasamak, kinunada, “Dusdusaennatayo ti Dios ti Israel. Dusdusaenna pay ni Dagon a diostayo. Masapul a saanen nga agtalinaed ti Lakasa ti Tulag ditoy ayantayo.”

8 Pinaayabanda ngarud dagiti amin a lima nga ari a Filisteo, ket idi sumangpetda, sinaludsodda kadakuada, “Ania ti aramidentayo iti Lakasa ti Dios ti Israel?”

“Ipanyo idiay Gat,” insungbatda, isu nga impanda ti Lakasa iti dayta a siudad dagiti Filisteo.

9 Ngem kalpasan ti pannakaipanna sadiay, dinusa ni Yahweh dagiti tattao iti siudad, ket pinataudna ti dakkel a riribuk. Pinarnuayna iti adu a letteg iti bagbagi dagiti tattao, ubing ken nataengan.

10 Ngarud, impanda ti Lakasa ti Tulag idiay siudad ti Ekron. Idi maisangpet sadiay, inyikkis dagiti tattao, “Inyegda ditoy ti Lakasa ti Tulag ti Dios ti Israel tapno patayennatay amin!”

11 Ngarud, pinaayabanda manen dagiti lima nga ari a Filisteo ket kinunada, “Ipanawyo ti Lakasa ti Tulag ti Israel. Isubliyo iti sigud a yanna, ta no saan, mataykam agraman dagiti familiami.”

Nagsaknap ti buteng iti entero a siudad gapu ta nakaro unay ti panangdusa ti Dios kadagiti tattao.

12 Uray dagiti saan a natay, nagtubo met dagiti letteg iti bagbagida ket immasug dagiti tattao kadagiti didiosenda.

Ti Pannakaisubli ti Lakasa ti Tulag

1 Pito a bulan a nagyan ti Lakasa ti Tulag ni Yahweh idiay Filistia.

2 Kalpasanna, inayaban dagiti tattao dagiti papadi ken dagiti mammadles ket sinaludsodda, “Ania ti aramidenmi iti Lakasa ti Tulag tiApoti Israel? Ania ti ipakuyogmi no isublimi iti sigud a yanna?”

3 Insungbatda, “No isubliyo ti Lakasa ti Tulag ti Dios ti Israel, masapul a pakuyoganyo iti daton a pakapakawanan ti basolyo. Diyo isubsubli ti Lakasa ti Tulag no diyo pakuyogan iti daton. Wen, masapul a pakuyoganyo iti daton tapno umimbagkayo, ket maammoanyonto no apay a dusdusaennakayo pay laeng tiApo.”

4 “Ania ti sagut nga ipakuyogmi?” sinaludsodda.

Insungbatda, “Mangtedkayo iti lima a sinan-letteg ken lima a sinan-marabutit a naaramid iti balitok, kas mayannurot iti bilang dagiti ari a Filisteo. Ta maymaysa a didigra ti dimteng kadakay amin ken kadagiti lima nga ari.

5 Masapul nga aramidenyo dagiti sinan-letteg ken sinan-marabutit a mangdaddadael iti pagilianyo, ket masapul a padayawanyo ti Dios ti Israel. Nalabit nga isardengna ti panangdusdusana kadakayo, kadagiti didiosenyo ken iti dagayo.

6 Apay a nasukirkayo a kas iti ari ti Egipto ken kadagiti Egipcio? Laglagipenyo ti panangang-angaw ti Dios kadakuada agingga a pinalubosanda dagiti Israelita a pumanaw idiay Egipto.

7 Mangisaganakayo ngarud iti baro a karison ken dua nga agpaspasuso a baka a dipay nasangolan. Ipakoyo dagiti baka iti karison ket ipanyo dagiti urbonda iti koral.

8 Alaenyo ti Lakasa ti Tulag tiAposayo ikarga iti karison. Ikahonyo dagiti balitok a sinan-letteg ken marabutit ket ikabilyo iti abay ti Lakasa—dagitoy dagiti ipakuyogyo nga agpaay kenkuana a kas daton a pakapakawanan ti basolyo. Iduronyo ti karison ket bay-anyo a magna nga is-isuna.

9 Kitaenyo: no agpa-Betsemes, kaipapananna a ti Dios dagiti Israelita ti nangyeg kadatayo iti daytoy nakabutbuteng a didigra. Ngem no saan nga agturong sadiay, daytoy ti pakaammoantayo a saan nga isu ti nangyeg iti didigra no di ket nairanrana laeng.”

10 Tinungpalda ti naibaga kadakuada: Nangalada iti dua a baka sada impako iti karison. Impupokda dagiti urbonda iti koral.

11 Inkargada ti Lakasa ti Tulag iti karison ken ti kahon a nakaikabilan dagiti balitok nga imahen dagiti marabutit ken dagiti letteg.

12 Nagna dagiti baka iti dalan nga agpa-Betsemes ket dida simmiasi iti dalan. Agem-emmakda bayat ti pannagnada. Sinursurot ida dagiti lima nga ari a Filisteo agingga iti beddeng ti Betsemes.

13 Madama idi nga agan-ani dagiti taga-Bet-semes iti trigo iti tanap, ket idi kumitada, nakitada ti Lakasa ti Tulag. Kasta unay ti ragsakda a nakakita iti Lakasa.

14 Dimteng ti karison iti talon ni Josue a taga-Betsemes. Nagsardeng sadiay, iti asideg ti maysa a dakkel a bato. Binalsig dagiti tattao ti karison. Pinartida dagiti baka sada pinuoran a kas daton ken ni Yahweh.

15 Binagkat dagiti Levita ti Lakasa ti Tulag ni Yahweh ken ti kahon a nakaikabilan dagiti nasukog a balitok. Insaadda dagitoy iti dakkel a bato. Iti dayta met la nga aldaw, nagidatag dagiti taga-Betsemes kadagiti daton a mapuoran ken dadduma pay a daton ken ni Yahweh.

16 Binuybuya dagiti lima nga ari a Filisteo ti panangaramidda iti daytoy sada nagsubli idiay Ekron iti dayta met la nga aldaw.

17 Dagitoy dagiti balitok a sinan-letteg nga impaay dagiti Filisteo a kas daton ken ni Yahweh a pakapakawanan ti basolda; maysa iti tunggal siudad ti Asdod, Gaza, Askelon, Gat ken Ekron.

18 Nangipaayda met iti lima a balitok a sinan-marabutit; maysa iti tunggal nasarikedkedan nga ili ken purpurok iti away. Kas pammaneknek iti napasamak, adda pay laeng ti dakkel a bato a nangisaadanda iti Lakasa ti Tulag ni Yahweh iti talon ni Josue a taga-Betsemes.

19 Pinatay ni Yahweh ti 70 nga umili iti Betsemes, gapu ta kinitada ti uneg ti Lakasa ti Tulag. Nagladingit dagiti tattao, agsipud ta adu ti pinatayna kadakuada.

Maipan ti Lakasa ti Tulag iti Kiriat Jearim

20 Daytoy ti gapuna a kinuna dagiti tattao ti Betsemes: “Siasino ti makaitured nga agtakder iti sango tiApoa nasantoan a Dios? Sadino ti mabalintayo a pangipanan kenkuana tapno mayadayo kadatayo?”

21 Iti kasta, nangibaonda kadagiti tattao a mapan iti Kiriat Jearim tapno ibagada, “Insubli dagiti Filisteo ti Lakasa ti Tulag tiApo. Sumalogkayo, ket umayyo alaen.”

1 Napanngarud innala dagiti taga-Kiryat-Jearim ti Lakasa ti Tulag ni Yahweh, ket impanda iti balay ni Abinadab a nabangon iti turod. Inkonsagrarda ni Eleazar nga anakna tapno isu ti mangaywan iti Lakasa.

Iturayan ni Samuel ti Israel

2 Nabayag a nagtalinaed ti Lakasa ti Tulag ni Yahweh iti siudad ti Jearim. Duapulo a tawen ti kaaddana sadiay. Kadagita a tiempo, immas-asug dagiti Israelita ken ni Yahweh.

3 Kinuna ni Samuel kadagiti Israelita, “No naimpusoan ti panagsubliyo itiApo, masapul nga iwaksiyo dagiti didiosenyo ket ibellengyo dagiti kinitikitan nga imahen ni diosa nga Astarte. Ikonsagraryo a naan-anay ti bagiyo itiApoket isu laeng ti pagdaydayawanyo tapno isalakannakayto iti bileg dagiti Filisteo.”

4 Imbelleng ngarud dagiti Israelita dagiti estatua da Baal ken Astarot a didiosenda, ket ni laeng Yahweh ti nagdaydayawanda.

5 Kalpasanna, imbilin ni Samuel kadagiti Israelita nga aguummongda idiay Mizpa. “Sadiay, ikararagankayto itiApo,” kinunana.

6 Naguummongda ngarud idiay Mizpa. Simmakdoda iti danum sada imbuyat iti imatang ni Yahweh, kas datonda kenkuana. Nagmalmalem a nagayunarda iti dayta nga aldaw. “Nagbasolkami itiApo,” kinunada. (Idiay Mizpa ti nagrisutan ni Samuel kadagiti parikut ti Israel.)

7 Idi madamag dagiti Filisteo a naguummong dagiti Israelita idiay Mizpa, nagrubbuat dagiti lima nga ari a Filisteo ken dagiti buyotda tapno rautenda ida. Naammoan daytoy dagiti Israelita ket nagbutengda.

8 Kinunada ken ni Samuel: “Dika agsardeng nga agkararag itiApoa Diostayo tapno isalakannatayo kadagiti Filisteo.”

9 Nangpatay ni Samuel iti kalakian nga urbon ti karnero ket sibubukel a pinuoranna a kas daton ken ni Yahweh. Nagkararag kenkuana a tulonganna koma ti Israel, ket impangag ni Yahweh ti kararagna.

10 Idi agidatdaton, simmangpet dagiti Filisteo a mangdarup kadakuada. Ngem pagammoan la ta manipud iti tangatang, nangparnuay ni Yahweh iti gurruod a namagbuteng kadagiti Filisteo ket nagtatarayda a pimmanaw.

11 Rimmuar dagiti Israelita idiay Mizpa. Sinunsonda dagiti Filisteo agingga idiay Bet-kar, ket pinapatayda ida iti dalan nga agturong sadiay.

12 Kalpasanna, nangala ni Samuel iti maysa a bato sana inkabil iti nagbaetan ti Mizpa ken Sen. Kinunana: “Daytoy ti pakakitaan a tinulongannatayo tiApo.” Pinanagananna ti bato iti Ebenezer.

13 Naparmek ngarud dagiti Filisteo. Iti unos ti panagbiag ni Samuel, saan nga impalubos ni Yahweh a serkenda ti daga ti Israel.

14 Napasubli ti Israel ti amin a siudad nga innala dagiti Filisteo manipud Ekron agingga iti Gat, ket naalana ti amin a sakupna, ket nagkappia dagiti Israelita ken dagiti Amorreo.

15 Inturayan ni Samuel ti Israel bayat ti panagbiagna.

16 Tinawen a mapan idiay Betel, Gilgal ken Mizpa ket risutenna dagiti parikut dagiti tattao kadagita a disso.

17 Kalpasanna, agawid iti balayna idiay Rama a pagserbianna pay a kas ukom. Sadiay, nangbangon iti altar a maipaay ken ni Yahweh.

Dawaten dagiti Tattao a Maikkanda iti Ari

1 Idi lumakayen ni Samuel, dinutokanna dagiti annakna nga ukom iti Israel.

2 Joel ti nagan ti inauna ket Abias met ti inaudi. Nagserbida nga ukom idiay Beerseba.

3 Ngem dida sinurot ti tugot ni amada. Ti laeng panguartaanda ti pampanunotenda, isu a nagawatda iti pasuksok ket saan a nalinteg ti panangrisutda kadagiti darum.

4 Naguummong dagiti amin a panglakayen ti Israel sada napan ken ni Samuel idiay Rama.

5 Kinunadakenkuana, “Kitaem, lumakaykan ket saan a sumurot dagiti annakmo iti tugotmo. Nasaysayaat no mangdutokka iti ari a mangituray kadakami, tapno maaddaankami iti ari a kas kadagiti sabali a pagilian.”

6 Saan a naragsakan ni Samuel iti panagdawatda iti ari, ket nagkararag ken ni Yahweh. Kinuna ni Yahweh:

7 “Ipangagmo ti amin nga ibaga dagiti tattao kenka, ta saan a sika ti linaksidda no di ket siak ta didakon kayat a mangituray kadakuada.

8 Manipud idi inruarko ida idiay Egipto, tinallikudandakon ket nagdaydayawda kadagiti didiosen. Ita, ar-aramidenda met kenka ti inar-aramidda kaniak.

9 Ipangagmo ngarud ti saoda, ngem ballaagam ida iti nainget ket ilawlawagmo kadakuada no anianto ti aramiden ti ari a mangituray kadakuada.”

10 Impakaammo ni Samuel kadagiti agdawat kenkuana iti ari ti amin nga imbaga kenkuana ni Yahweh.

11 Kinunana, “Kastoyto ti aramiden kadakayo ti ari: Alaennanto dagiti annakyo a lallaki ket pagbalinennanto ida a mannakigubat. Addanto dagiti agserbi kadagiti luganna a pakigubat. Agpaayto dagiti dadduma a kas mannakigubat a nakakabalio. Sabalinto pay dagiti para darup nga adda iti sango dagiti lugan a pakigubat.

12 Pagbalinennanto dagiti dadduma nga ofisiales nga agaywan iti rinibu a tao, ket addanto met dagiti agaywan iti limapulo. Pagaradoennanto dagiti lallaki nga annakyo kadagiti talonna, agani kadagiti apitna, ken agaramid iti armas ken kadagiti alikamen nga agpaay kadagiti luganna a pakigubat.

13 Alaennanto dagiti annakyo a babbai nga agaramid iti bangbanglo, para luto ken panadera.

14 Alaennanto dagiti kasayaatan a talon, kaubasan ken kaoliboanyo ket itedna kadagiti ofisialesna.

15 Alaennanto ti apagkapullo dagiti trigo ken ubasyo nga agpaay kadagiti ofisiales nga agserserbi iti tronona ken dadduma pay a turayen.

16 Alaennanto dagiti tagabuyo, dagiti kasayaatan a bakaken asnoyo, ket agserbidanto kenkuana.

17 Alaennanto ti apagkapullo ti arbanyo. Agbalinkayto a tagabuna.

18 Inton umay dayta a tiempo, agasugkayto iti nasaem gapu iti ari a mismo a piniliyo, ngem dinakayto ipangag tiApo.”

19 Saan a dimngeg dagiti tattao ken ni Samuel, ket kinunada ketdi, “Kayatmi ti maaddaan iti ari

20 tapno maipadakami kadagiti sabali a pagilian. Iturayannakami ket ipanguloannakami a makiranget ken makigubat.”

21 Dinengngeg ni Samuel ti amin a sinaoda ket kalpasanna, napanna imbaga dagitoy ken ni Yahweh.

22 “Aramidem ti kayatda ket ikkam ida iti ari,” insungbat ni Yahweh.

Kalpasanna, pinagawid ni Samuel dagiti amin nga Israelita.

Agsarak da Saul ken Samuel

1 Iti tribu ti Benjamin, adda lalaki nga agnagan iti Kis. Isu ti anak ni Abiel ken apoko ni Zeror a nagtaud iti familia ni Becorat iti kapuonan ni Afia. Nabaknang ken mararaem a tao ni Kis.

2 Adda anakna nga agnagan iti Saul a nataer ken agkabannuag. Isu ti katayagan ken kataeran iti entero nga Israel.

3 Napukaw ti sumagmamano nga asno ni Kis, isu a kinunana ken ni Saul, “Mangalaka iti maysa kadagiti adipen, ket inkay sapulen dagiti asno.”

4 Sinursor da Saul ti katurturodan ti Efraim ken ti daga ti Salisa, ngem awan ti nasapulanda uray maysa nga asno. Sinursorda ti Salim ngem awan latta dagiti animal. Napanda iti masakupan ti Benjamin ngem kaskasdi a dida nabirokan dagiti asno.

5 Idi dumtengda idiay Suf, kinuna ni Saul iti adipenna, “Agawidtan amangan no datan ti pagdandanagan ni tatang ket saanen a dagiti asno.”

6 “Agurayka,” insungbat ti adipen. “Adda tao ti Dios iti daytoy nga ili. Raraemen ti amin ta pumudno amin nga ibagana. Inta agdamag kenkuana. Nalabit a maibagana no sadino ti pakasarakanta kadagiti asno.”

7 “No mapanta, ania ngarud ti itedta kenkuana?” sinaludsod ni Saul. “Naibusen ti taraon kadagiti supotta. Awan ti maitedta kenkuana.”

8 “Adda kuartak nga apagkapat ti pirak a sikloa mabalinko nga ited kenkuana,” insungbat ti adipen. “Ibagananto no sadino ti pakasarakanta kadagiti asno.”

9-11 “Nasayaat ti napanunotmo,” insungbat ni Saul. “Inta ngaruden.”

Napanda iti ili a pagnaedan ti tao ti Dios. Idi sumangsang-atda iti turod a mapan iti ili, nasabatda ti sumagmamano a babbalasang a mapan sumakdo. Sinaludsodda kadagiti babbai, “Adda kadi ti mammadto iti ili?”

(Kadagidi nga aldaw, Mammadto wenno ti awagda iti profeta, isut’ gapuna a no adda makiuman iti Dios, kunana, “Intay iti Mammadto.”)

12-13 “Wen, adda,” insungbat dagiti babbalasang. “Kinapudnona, immun-una la bassit a simmangpet ngem dakayo. Darasenyo ket awan duadua a makamakamyo. Masarakanyo apaman a sumrekkayo iti ili. Simmangpet ita nga aldaw ta mangidatag dagiti tattao iti daton a mapuoran iti altar iti turod. Saan a mangan dagiti naawis no awan sadiay agsipud ta umuna pay a bendisionanna ti daton. Inkayon iti ili ket masarakanyo a dagus sakbay a sumang-at iti turod a mapan mangan.”

14 Nagturongda iti ili ket idi sumrekda, apag-isu a masabatda ni Samuel a mapan iti disso a pagdaydayawan.

15 Iti napalabas nga aldaw, imbaga ni Yahweh ken ni Samuel:

16 “Inton bigat iti agarup kastoy met la nga oras, ibaonkonto kenka ti maysa a lalaki a nagtaud iti tribu ti Benjamin. Ikonsagrarmo a kas agturay kadagiti tattaok nga Israelita, ket salaknibannanto ida kadagiti Filisteo. Nakitak ti panagsagaba dagiti tattaok, ket nangngegko ti asugda.”

17 Idi makita ni Samuel ni Saul, kinuna ni Yahweh kenkuana, “Daytoy ti lalaki nga imbagak kenka. Isunto ti mangituray kadagiti tattaok.”

18 Immasideg ni Saul ken ni Samuel nga adda iti asideg ti ruangan ket sinaludsodna, “Ibagam man kaniak, sadino ti pagtaengan ti mammadto?”

19 “Siak ti mammadto,” insungbat ni Samuel. “Umunakan a mapan iti disso a pagdaydayawan. Ket sumarunoakon. Makipanganka kaniak ita nga aldaw. Inton bigat, sungbatakto ti amin a saludsodmo sakbay a parubbuatanka iti papanam.

20 No maipapan kadagiti asno a napukaw idi maikatlo nga aldaw, dimo pagdanagan ida, ta nasapulandan. Ngem ania ti kalikaguman unay ti Israel? Sika; wen, sika ken ti familia ni tatangmo.”

21 “Nagtaudak iti tribu ti Benjamin,” insungbat ni Saul, “ti kabassitan a tribu iti Israel. Ti familiak ti kanumoan iti tribu. Apay a kasta ti ibagam kaniak?”

22 Kalpasanna, inkuyog ni Samuel ni Saul ken ti adipenna iti dakkel a kuarto ket pinagtugawna ida iti kabesera ti panganan. Agtallopulo ti bilang dagiti sangaili a sisasango iti lamisaan.

23 Kinuna ni Samuel iti kosinero, “Idasarmo ti karne a pinaidulinko kenka.”

24 Innala ti kosinero ti kasayaatan a paset ti luppo ket impasangona ken ni Saul. “Kitaem,” kinuna ni Samuel,“daytoy ti nailasin nga agpaay kenka. Kanem, ta inlasinko para iti daytoy nga oras a kagiddanmo dagiti inawisko.”

Nakipangan ngarud ni Saul ken ni Samuel iti dayta nga aldaw.

25 Idi agawidda iti ili manipud iti disso a pagdaydayawan, nangisaganada iti pagiddaan ni Sauliti tuktok ti balay,

26 ket naturog sadiay.

Ikonsagrar ni Samuel ni Saul a kas Ari

Iti parbangon, pinukkawan ni Samuel ni Saul nga adda iti tuktok ti balay. “Bumangonkan ta parubbuatankan,” kinunana.

Bimmangon ni Saul, ket nagkuyogda ken ni Samuel a napan iti kalsada.

27 Idi dumanonda iti ruar ti ili, kinuna ni Samuel ken ni Saul, “Paunaem ti adipen.” Pimmanaw ti adipen ket intuloy ni Samuel, “Agyanka pay laeng ditoy iti mabiit, ta ibagak kenka ti sao ti Dios.”

1 Nangala ni Samuel iti sangabotelia a lana ti olibo ket imbukbokna iti ulo ni Saul sana inagkan ket kinunana, “Konsagrarennaka tiApotapno iturayam dagiti tattaona nga Israelita. Iturayamto dagiti tattaona ket salakniban ida iti amin a kabusorda. Daytoyto ti pagilasinam a pinilinakatiApoa mangituray kadagiti tattaona:

2 Inton makapanawka iti yanko ita nga aldaw, masabatmonto ti dua a lallaki iti asideg ti tanem ni Raquel idiay Selsa, iti sakup ti Benjamin. Ibagadanto kenka nga addan dagiti asno a sapsapulem, isu a saanen a madanagan ni tatangmo kadakuada. Sikan ti pakaringgoranna ket kunkunana, ‘Ania ngata ti aramidek maipapan iti anakko?’

3 “Kalpasanna, ituloymonto ti magna ket inton makadanonka iti lugo idiay Tabor, masabatmonto ti tallo a lallaki a mapan idiay Betel tapno mangidatagda iti daton a mapuoran a maipaay iti Dios. Maysanto kadakuada ti manguk-ukod iti tallo nga urbon ti kalding. Tallo a pandebara a tinapay ti awit ti maikadua, ket ti maikatlo maysa a supot a lalat a napno iti arak.

4 Kablaawandakanto ket ikkandakanto iti dua a tinapay a masapul nga alaem.

5 Inkanto iti Turod ti Dios idiay Gabaa a yan ti maysa a kampo dagiti Filisteo. Masabatmonto ti maysa a bunggoy dagiti profeta iti serkan ti ili a sumalsalog manipud iti altar iti turod. Agtoktokarda iti arpa, pandereta, flauta ken lira, ket agipadpatoda.

6 Pagammoan, umayto kenka ti espiritu tiApoket iturayannaka. Makipagipadtokanto met kadakuada ket agbalinkanto a sabali a tao.

7 Inton mapasamak dagitoy, tungpalem ti aniaman nga ibaga ti Dios nga aramidem.

8 Umun-unaka ngem siak a mapan idiay Gilgal a pangkitaakto kenka tapno mangidatagak iti daton a mapuoran ken iti daton a pakikappia. Pitonto nga aldaw nga urayennak ket ibagakto kenka ti aramidem.”

9 Idi agsinada ken ni Samuel, narikna ni Saul a naikkan iti baro a kinatao. Iti dayta met la nga aldaw, napasamak ti amin nga imbaga ni Samuel kenkuana.

10 Apaman a dimteng ni Saul ken ti adipenna idiay Gabaa, nasabatda ti maysa a bunggoy. Inturayan ti espiritu ti Dios ket timmipon ni Saul iti bunggoy nga agipadpadto.

11 Nakita dagiti makaam-ammo nga agipadpadto ket nagsisinnaludsodda, “Ania ti napasamak ken ni Saul nga anak ni Kis? Nagbalin kadi metten a profeta?”

12 Sinaludsodmet ti maysa nga agnaed iti dayta a lugar, “Ket dagiti dadduma? Siasino kadi dagiti ammada?” Kastoy ti nangrugian ti pagsasao, “Nagbalin kadin ni Saul a profeta?”

13 Nagsalasala ken nagririaw ni Saul, ket kalpasanna, napan iti altar nga adda iti tapaw ti turod.

14 Dimteng ti uliteg ni Saul. Nakitana ni Saul ken ti adipen ket sinaludsodna no sadino ti naggapuanda.

Insungbat ni Saul, “Sinapsapulmi dagiti asno. Idi dimi mabirokan ida, napanmi kinita ni Samuel.”

15 “Ket ania ti imbagana kenka?” sinaludsod ti ulitegna.

16 “Imbagana a nasarakanen dagiti animal,” insungbat ni Saul. Ngem dina imbaga iti ulitegna ti kinuna kenkuana ni Samuel maipapan iti panagbalinna nga ari.

Maipakdaar ni Saul a kas Ari

17 Inummong ni Samuel dagiti tattao iti maysa a nasantoan a gimong idiay Mizpa.

18 Imbagana kadakuada, “Kuna kadakayo tiApoa Dios ti Israel nga inruarnakayo idiay Egipto. Insalakannakayo kadagiti Egipcio ken amin a tattao a namarparigat kadakayo.

19 Isu ti Diosyo. Isu ti mangisalakan kadakayo iti amin a pakariribukan ken pakarigatanyo. Ngem ita nga aldaw, linaksidyo iti panangkiddawyo kaniak nga ikkankayo iti ari. Dumatagkayo ngarud iti imatang tiApoa nabunggo-bunggoy iti tribu ken familiayo.”

20 Pinagpasango ni Samuel ti tunggal tribu, ket pinili ni Yahweh ti tribu ti Benjamin.

21 Kalpasanna, pinagpasango ni Samuel dagiti familia iti tribu ti Benjamin ket napili ti familia ni Matri. Nagpasango dagiti lallaki iti familia ni Matri,ket napili ni Saul nga anak ni Kis. Sinapulda ni Saul ngem dida masarakan.

22 Isut’ gapuna a nagsaludsodda manen ken ni Yahweh, “Immay kadi ditoy ti tao a sapsapulenmi?”

“Adda sadiay ni Saul,” insungbat ni Yahweh. “Aglemlemmeng iti likudan dagiti gargaret.”

23 Nagtarayda ngarud a napan nangala ken ni Saul. Ket idi idatagda kadagiti tattao, nakitada a nataytayag ngem ti siasinoman kadakuada.

24 Kinuna ni Samuel kadagiti tattao, “Adtoy ti tao a pinili tiApo. Awan kadatayo ti kas kenkuana.”

“Agbiag ti ari!” inriaw dagiti tattao.

25 Inlawlawag ni Samuel kadakuada dagiti kalintegan ken pagrebbengan ti maysa nga ari. Inlanadna dagitoy iti maysa a libro ket indulinna iti naisangsangayan a lugar iti imatang ni Yahweh. Kalpasanna, pinagawidna amin a tattao.

26 Nagawid met ni Saul idiay Gabaa. Kimmuyog kenkuana ti sumagmamano a maingel a tattaoa tinignay ti Dios ti pusoda.

27 Ngem adda awan serserbina a tattao a nagkuna, “Ania ti maitedna a pagimbagantayo daytoy a tao?” Inumsida ni Saul ket pulos nga awan sagut nga intedda kenkuana.

Parmeken ni Saul dagiti Ammonita

1 Kalpasanna, napan rinaut ni Naas nga ari ti Ammon ken ti armadana ti ili ti Jabes iti sakup ti Galaad. Idi mapalawlawan ti ili, napan dagiti taga-Jabes ken ni Naas ket imbagada kenkuana, “Mangaramidka iti pagtutulagantayo ket awatendakanto a mangituray kadakami.”

2 Insungbat ni Naas, “Makikappiaak kadakayo iti maysa a kondision: Suatek ti kannawan a mata ti tunggal maysa tapno ikkak ti pakaibabainan ti amin nga Israel.”

3 Kinuna dagiti pangulo ti Jabes, “Ikkannakami iti pito nga aldaw a pawayway ta mangibaonkami kadagiti mapan dumawat iti tulong iti entero nga Israel. No awan ti umay, sumukokaminto kenka.”

4 Dimteng dagiti naibaon idiay Gabaa a pagnaedan ni Saul. Ket nagsasangit dagiti tattao idi mangngegda ti damag.

5 Apag-isu met a simmangpet ni Saul; naggapu iti talon ket sarsarunoenna dagiti bakana. “Ania ti napasamak?” sinaludsodna. “Apay nga agsasangitkayo amin?”

Imbagada kenkuana ti impakaammo dagiti naibaon a naggapu idiay Jabes.

6 Idi mangngeg daytoy ni Saul, inturayan ti espiritu ti Dios ket nagpungtot iti napalalo.

7 Nangala iti dua a baka sana rinangrangkay ket pinaipanna dagiti narangrangkay a paset iti amin a sakup ti Israel. Impakaammona: “Kastoyto ti mapasamak iti baka ti siasinoman a di sumurot kada Saul ken Samuel iti paggugubatan!”

Kasta unay ti buteng dagiti Israelita iti aramiden ni Yahweh, isut’ gapuna a sangsangkamaysada a simmurot.

8 Inummong ni Saul ida idiay Bezek: 300,000 a tattao ti naggapu iti Israel; 30,000 ti naggapu iti Juda.

9 Kinunada kadagiti naibaon a taga-Jabes, “Ibagayo kadagiti tattaoyo a maispaldanton sakbay a dumteng ti tengnga ti aldaw inton bigat.”

Nakaragragsak dagiti taga-Jabes a nakaawat iti damag.

10 Kinunada ken ni Naas, “Sumukokaminto kenka inton bigat, ket mabalinmonton nga aramiden ti kaykayatmo kadakami.”

11 Iti sumaruno nga aldaw, biningay ni Saul dagiti tattaona iti tallo a bunggoy. Iti parbangon iti dayta met la nga aldaw, simrekda iti kampo dagiti Ammonita ket nagpapatayda kadakuada agingga iti agmatuon. Nagwawara dagiti nakalasat. Sabasabali ti tinurong ti tunggal maysa a mangisalakan iti bagina.

12 Kalpasanna, kinuna dagiti Israelita ken ni Samuel, “Siasino dagiti nagkuna a saan a rumbeng a ni Saul ti mangituray kadakami? Yegyo dagitoy a tattao ta patayenmi ida.”

13 Ngem kinuna ni Saul, “Awan ti mapapatay ita nga aldaw, agsipud ta ita nga aldaw, insalakan tiApoti Israel.”

14 Kinuna ni Samuel kadakuada, “Intay idiay Gilgal ket ipakdaartayo manen ni Saul nga aritayo.”

15 Napanda ngarud amin idiay Gilgal, ket sadiay, iti imatang ni Yahweh, impakdaarda ni Saul a kas ari. Nagidatagda kadagiti daton a pakikappia ket nagrambak da Saul ken ti amin nga Israelita.

Ti Pakada ni Samuel

1 Kinuna ni Samuel kadagiti Israelita: “Impangagko ti amin a kiniddawyo kaniak ket nangisaadak iti ari a mangituray kadakayo.

2 Ita, adda ariyon a mangidalan kadakayo. No siak, lakay ken ubananakon, ket adda dagiti annakko iti dennayo. Nagserbiak a panguloyo manipud kinaagtutubok agingga ita.

3 Sitatakderakita iti sangoyo. No adda naaramidko a dakes, idarumdak iti imatang tiApoken iti ari a pinilina. Adda kadi baka wenno asno nga innalak iti siasinoman? Adda kadi sinaur wenno indadanesko? Nagawatak kadi kadagiti pasuksok tapno ikidemko dagiti matak? No adda inaramidko kadagitoy, bayadak ti aniaman nga innalak.”

4 “Saannakami a sinaur wenno indadanes,” insungbat dagiti tattao. “Awan ti uray ania nga innalam a kukua ti siasinoman.”

5 Insungbat ni Samuel, “Saksian tiApoken ti pinilina nga ari nga awan a pulos ti inaramidko a dakes kadakayo.”

“Wen, tiApoti saksimi,” inyanamongda.

6 Intuloyni Samuel, “TiApoti nangpili kada Moises ken Aaron, ken nangiruar kadagidi kapuonanyo idiay Egipto.

7 Ngarud, agtakderkayo iti ayanyo ket aglilinnawagtayo itiApobabaen iti panangipalagipko kadakayokadagiti amin a naindaklan nga inaramidna tapno isalakannakayo ken dagiti kapuonanyo.

8 Idinapan ni Jacob ken ti familiana idiay Egipto, ket indadanes ida dagiti Egipcio, immasug dagidi kapuonanyo itiApo. Imbaonna da Moises ken Aaron a nangiruar kadakuada idiay Egipto ket pinagnaedna ida iti daytoy a daga.

9 Ngemnalipatanda tiApoa Diosda. Daytoy ti gapuna a pinalubosanna dagiti Filisteo ken ti ari ti Moab ken ni Sisera nga ofisial ti armada ti siudad ti Hasor a manggubat ken mangparmek kadakuada.

10 Kalpasanna,nagpatulongda manen itiApo. Kinunada, ‘Nagbasolkami, gapu ta tinallikudandaka, OApo, ket nagdaydayawkami kadagiti imahen da didiosen a Baal ken Astarte. Ispalennakami kadagiti kabusormi, ket agdaydayawkaminto kenka!’

11 “Imbaonngarud tiApoda Gideon, Barac,Jefte; kamaudianna, siak met ti imbaonna. Tunggal maysa kadakami ti nangisalakan kadakayo kadagiti kabusoryo ket agbiagkayo a sitatalged.

12 Ngemidi nakitayo ni Naas nga ari ti Ammon nga umay mangraut kadakayo, linaksidyo tiApoa kas ariyo ket kinunayo kaniak, ‘Kayatmi ti maaddaan iti ari a mangituray kadakami.’

13 “Ita, imatanganyo ti ari a piniliyo. Dinawatyo ket inted tiApoa mangituray kadakayo.

14 Awanto ti mapagtengyo a dakes no la ket agbutengkayo itiApoa Diosyo, agserbikayo kenkuana, ipangagyo ket tungpalenyo dagiti bilinna ken no la ket sumurotkayo kenkuana, dakayo agraman ti ari a mangituray kadakayo.

15 Nupay kasta, no diyo ipangag tiApoket sukirenyo dagiti bilinna, busorennakayto ken ti ariyo.

16 Ngarud, agtalinaedkayo iti yanyo ket maimatanganyo ti naindaklan nga aramiden ita tiApo.

17 Saan a panagtutudo ita. Ngem agkararagak, ket mangyeg tiApoiti gurruod ken tudo. No mapasamak daytoy, mabigbigyonto a nakaro ti basolyo idi kiniddawyo itiAponga ikkannakayo iti ari.”

18 Nagkararag ngarud ni Samuel, ket naggurruod ken nagtudo iti dayta met la nga aldaw. Nagbuteng dagiti tattao ken ni Yahweh. Nagbutengda met ken ni Samuel.

19 Kinunada ken ni Samuel, “Apo, pangngaasim ta ikararagannakami itiApoa Diosyo tapno saankami a matay. Mabigbigmin a malaksid ti dadduma a basolmi, nagbasolkami pay gapu iti panagkiddawmi iti maysa nga ari.”

20 “Dikay agbuteng,” insungbat ni Samuel. “Uray nakaaramidkayo iti kasta a kinadakes, diyo tallikudan tiApongem agserbikayo ketdi kenkuana iti amin a pusoyo.

21 Idianyoti agdaydayaw kadagiti didiosen; didakayo matulongan wenno maisalakan, agsipud ta awan serserbida.

22 Dinakayo baybay-an ti Dios, ta dayta ti kari a sinapataanna ket inkeddengna a pagbalinennakayo a tattaona.

23 No maipapan kaniak, adayo nga agbasolak itiApobabaen iti panagsardengko a mangikarkararag kadakayo. Ngem isurokayo ketdi iti nasayaat ken nalinteg a dalan.

24 Agbutengkayo itiApoket agserbikayo a sipupudno kenkuana iti amin a pusoyo. Lagipenyo dagiti naindaklan a banag nga impaayna kadakayo.

25 Ngem no itultuloyyo ti agbasol, madadaelkayto ken ti ariyo.”

Aggubat dagiti Israelita ken dagiti Filisteo

1 (…ti tawen ni Saul idi maisaad nga ari, ket dua a tawen nga inturayanna ti Israel.)

2 Nangpili ni Saul iti 3,000 nga Israelita. Inkuyogna ti 2,000 idiay Micmas iti katurturodan ti Betel idinto a 1,000 kadakuada ti imbaonna ken ni Jonatan nga anakna idiay Gabaa iti sakup ti tribu ni Benjamin. Pinagawidna dagiti dadduma.

3 Pinatay ni Jonatan ti kapitan dagiti Filisteoidiay Gabaa ket nadamag amin a Filisteo. Kalpasanna, nangibaon ni Saul kadagiti tattao a mangayab kadagiti Hebreo a makigubat babaen iti panagpagunida kadagiti trumpeta iti entero a pagilian.

4 Naammoan dagiti Israelita a pinatay ni Saul ti kapitan dagiti Filisteo ket kagura dagiti Filisteo ida. Impangag ngarud dagiti tattao ti awag a tumiponda ken ni Saul idiay Gilgal.

5 Naguummong dagiti Filisteo tapno gubatenda dagiti Israelita. Adda 30,000 a luganda a pakigubat, 6,000 a nagkabalio ken adu a mannakigubat a kas iti kaadu ti darat iti igid ti baybay. Napanda nagkampo idiay Micmas a dayaen ti Bet-aven.

6 Nakita dagiti Israelita ti napeggad a kasasaadda. Adda dagiti naglemmeng kadagiti rukib ken kadagiti abut, kadagiti kabatoan, kadagiti tanem ken kadagiti bubon.

7 Binallasiw dagiti dadduma ti Karayan Jordan ket napanda kadagiti sakup ti Gad ken Galaad.

Adda pay laeng ni Saul idiay Gilgal, ket agtigtigerger iti buteng dagiti tattao a simmurot kenkuana.

8 Pitonga aldaw nga inuray ni Saul ni Samuel, ngem saan a simmangpet ni Samuel iti aldaw a kinunana a yaayna. Ngarud, nangrugi ti panangpanaw dagiti tattao ken ni Saul.

9 Iti kasta, kinunana, “Yegyo dagiti daton a mapuoran ken dagiti daton a pakikappia.” Indatagna ti daton a mapuoran.

10 Apaman a nalpas ti panagidatonna, simmangpet ni Samuel. Sinabat ni Saul tapno kablaawanna,

11 ngem kinuna ni Samuel, “Apay a kasta ti inaramidmo?”

“Makitak a mawaran ti armada ket mangrugin a panawandakon dagiti tattao,” insungbat ni Saul. “Dika met simmangpet iti aldaw nga imbagam nga isasangpetmo idinto nga aguummong dagiti Filisteo idiay Micmas.

12 Isut’ gapuna a kinunak iti bagik, ‘Rautendakon dagiti Filisteo ditoy Gilgal, ket diak pay nagdawat iti panangngaasi tiApo.’ Daytoy ti gapuna nga inkeddengko ti mangidatag iti daton.”

13 “Minamaag dayta nga aramid,” kinuna ni Samuel. “Dimo impangag ti imbilin kenka tiApoa Diosmo. No impangagmo ti imbilinna kenka, pinagturaynaka koma ken dagiti kaputotam iti agnanayon.

14 Ngemita, aggibusen ti panagturaymo. Agsipud ta dimo tinungpal tiApo, nagbirok iti lalaki a natulnog ket insaadna a mangituray kadagiti tattaona.”

15 Pimmanaw ni Samuel idiay Gilgal ket intuloyna ti panagdaliasatna. Napan met ni Saul idiay Gabaa iti sakup ti Benjamin tapno tumipon kadagiti mannakigubat. Simmurot kenkuana dagiti nabati a tattao ket nagrubbuatda idiay Gilgal.Kinita ni Saul ti kasasaad dagiti buyotna nga aganay nga 600 a lallaki.

16 Nagtalinaed da Saul ken ni anakna a Jonatan ken dagiti tattaoda idiay Geba iti sakup dagiti Benjamita. Adda ti kampo dagiti Filisteo idiay Micmas.

17 Tallo a bunggoy dagiti mannakigubat a Filisteo ti rimmuar iti kampoda tapno rautenda dagiti Israelita. Maysa a grupo ti nagturong idiay Ofra iti sakup ti Sual;

18 napan iti Bet-horon ti maikadua, ket ti maikatlo iti beddeng a tumannawag iti Tanap ti Seboim ken iti let-ang.

19 Awan ti mammanday a masarakan idi iti entero nga Israel ta saan a kayat dagiti Filisteo nga agaramid dagiti Hebreo kadagiti kampilan ken gayang. (

20 Masapul a mapan dagiti Israelita kadagiti Filisteo tapno paasada dagiti arado, gabion, wasay, ken kumpayda.

21 Maysa a bassit a plata ti ibayadda iti panangpaasada iti wasay ken panagpatarimaanda iti pagtugkik, ket dua met a plata iti panangpaasada iti arado wenno gabion.)

22 Daytoy ti gapuna nga idi bumtak ti gubat, awan ti kampilan wenno gayang dagiti mannakigubat nga Israelita. Ni la Saul ken ni anakna a Jonatan ti adda armasna.

23 Adda bunggoy dagiti Filisteo a naibaon a mangguardia iti Bessang ti Micmas.

Ti Kinatured ni Jonatan

1 Iti maysa nga aldaw, kinuna ni Jonatan iti agtutubo a para-awit kadagiti armasna, “Umayka, ta inta iti kampo dagiti Filisteo idiay bangir.” Ngem saan nga imbaga ni Jonatan ken ni tatangna ti papananna.

2 Adda ti kampo ni Saul iti sirok ti kayo a granada idiay Migron a saan unay nga adayo idiay Gabaa. Agarup nga 600 a tattao ti kaduana.

3 (Ni Ahija a padi nga anak ni Ahitob ti mangaw-awit iti efod.Agkabsat da Ahitob ken Icabod nga annak ni Finees ken appoko ni Eli a padi ni Yahweh idiay Silo.) Saan nga ammo dagiti soldado a pimmanaw ni Jonatan.

4 Iti agsumbangir ti Bessang ti Micmas, adda dua a dadakkel ken natadem a bato a masapul a lasaten da Jonatan iti ipapanda iti kampo dagiti Filisteo. Maaw-awagan iti Boses ti maysa kadagitoy a bato ket Sene met ti sabali.

5 Maysa ti adda iti amianan a bangir ti bessang a sumango iti Micmas. Adda iti abagatan a bangir ti sabali a bato a sumango met iti Geba.

6 “Bumallasiwta a mapan kadagita saan a nakugit a Filisteo,” kinuna ni Jonatan iti agtutubo. “Nalabit a tulongannata tiApo. No tulongannata, awan ti makalapped kenkuana a mangted kadatayo iti balligi, uray no bassittayo.”

7 “Aramidem ti aniaman a kayatmo,”insungbat ti agtutubo. “Sitatallugodak a sumurot kenka.”

8 “Ala wen,” kinuna ni Jonatan. “Bumallasiwta ket agpakitata kadagiti Filisteo.

9 No ibagada nga urayenta ida, agtalinaedta iti yanta.

10 Ngem no ibagada a mapanta iti yanda, mapanta ta daytanto ti pagilasinan nga inteden tiApoti balligi ket naparmekdan.”

11 Nagpakitada ngarud kadagiti Filisteo. Kinuna dagiti Filisteo, “Kitaenyo! Adda sumagmamano a Hebreo a rimmuar kadagiti abut a paglemlemmenganda!”

12 Ket impukkawda ken ni Jonatan ken ti agtutubo, “Umaykay ditoy ta adda ibagami kadakayo!”

“Surotennak,” kinuna ni Jonatan iti agtutubo. “Naparmekdan, ta inteden tiApoti balligi iti Israel.”

13 Kimmalay-at ni Jonatan ket simmurot kenkuana ti agtutubo. Dinarup ni Jonatan dagiti Filisteo. Mapadso ti tunggal karangetna ket ituloy met a patayen ti agtutubo.

14 Iti dayta umuna a panagpapatay, inuloyan ni Jonatan ken ti agtutubo ti agarup 20 a lallaki iti nagrarangetanda nga aglawa iti agarup 50 a metro kuadrado.

15 Nakigtot dagiti amin a Filisteo iti away. Nagpigerger iti buteng dagiti kameng ti bunggoy a para-raut ken dagiti soldado iti kampo. Nagkintayeg ti daga ket nagsaknap ti panagbuteng.

Maparmek dagiti Filisteo

16 Nakita dagiti soldado ni Saul nga agwanwanawan idiay Geba iti sakup ti Benjamin a nawarawaran dagiti Filisteo ket dida ammo ti turturongenda.

17 Isut’ gapuna a kinuna ni Saul kadagiti buyotna, “Bilangenyo dagiti mannakigubat ket ammoenyo no sinno ti awan.”

Nagtungpalda ket nasarakanda nga awan ni Jonatan ken ti agtutubo a para-awit kadagiti igamna.

18 Kinuna ni Saul ken ni Ahija a padi, “Yegmo ditoy ti nasantoan nga efod.”(Iti dayta met la nga aldaw, aw-awiten ni Ahija ti lakasa iti sangoanan dagiti Israelita.)

19 Bayat ti pannakisao ni Saul iti padi, immad-adda ti riribuk iti kampo dagiti Filisteo, isut’ gapuna a kinunana kenkuana, “Awanen ti tiempo ti pannakiuman itiApo!”

20 Nagsagana ni Saul ken dagiti tattaona tapno makirangetda kadagiti Filisteo. Gapu ta kasta unayen ti pannakariribuk dagiti Filisteo, isudan a mismo ti aggugubat.

21 Immalsadagiti Hebreo a kadua dagiti Filisteo ken kimmuyog idi kadakuada a napan iti kampo ket timmiponda kadagiti Israelita nga impanguloan da Saul ken Jonatan.

22 Nadamag met dagiti dadduma nga Israelita nga aglemlemmeng kadagiti turod ti Efraim nga agtatarayen dagiti Filisteo. Timmiponda met ket dinarupda dagiti Filisteo.

23 Dimmanon ti gubat iti labes ti Bet-aven. Iti dayta nga aldaw, insalakan ni Yahweh ti Israel.

Dagiti Pasamak kalpasan ti Gubat

24 Iti dayta nga aldaw, agkakapsut dagiti Israelita gapu iti bisinda. Adda ngamin bilin nga impaulog ken sinapataan ni Saul a mailunod ti siasinoman kadakuada a mangan iti dayta nga aldaw sakbay a balsenna dagiti kabusorna. Isut’ gapuna a pulos nga awan ti nangan iti dayta nga aldaw.

25 Dimtengda aminiti maysa a kabakiran nga aglablabonan iti diro.

26 Adu ti diro iti dayta a disso, ngem awan ti nangan kadakuada agsipud ta mabutengda iti lunod ni Saul.

27 Nupay kasta, saan nga ammo ni Jonatan ti pangta ni tatangna a mailunod dagiti tattao. Inggaw-atna ti kayo nga iggemna; intanebna iti diro ket nangan. Simmayaat a dagus ti rikna ni Jonatan.

28 Ngem kinuna ti maysa kadagiti tattao, “Agkakapsutkami amin gapu iti bisinmi, ngem impangtanakami ni tatangmo idi kinunana, ‘Mailunod ti siasinoman a mangan ita nga aldaw.’”

29 “Nakaaramid ni tatang iti nakaal-alliaw a banag kadagiti tattaotayo,” insungbat ni Jonatan. “Kitaenyo, simmayaat ti riknak gapu ta nanganak iti diro!

30 Maysa pay, saan aya a nasaysayaat koma ti napasamak ita nga aldaw no nangan dagiti tattaotayo kadagiti taraon a sinamsamda kadagiti kabusor? Panunotenyo no mano pay koma a Filisteo ti napapatayda!”

31 Iti dayta nga aldaw, pinarmek dagiti Israelita dagiti Filisteo; nagrarangetda manipud Micmas agingga idiay Aijalon. Agkakapsuten dagiti Israelita gapu iti bisin,

32 isut’ gapuna a dinagdagusda ti nagtiliw kadagiti animal dagiti kabusor. Nagpartida kadagiti karnero, baka, urbon ti baka, ket gapu iti bisinda, saandan nga inikkat ti darada sakbay a kinnanda.

33 Naibagaken ni Saul, “Kitaem, agbasbasol dagiti tattao itiApoiti pannanganda iti karne nga adda pay laeng darana.”

“Mangliliputkayo!” inyikkis ni Saul. “Mangitulidkayo iti dakkel a bato ditoyyanko.”

34 Kalpasanna, imbilinna, “Ibagayo kadagiti tattao a yegda ditoy dagiti baka ken karneroda. Ditoy ti pagpartian ken pangananda tapno dida agbasol itiApogapu iti pannanganda iti karne nga adda pay la darana.”

Iti dayta a rabii, inyegda amin a bakada ket pinartida sadiay.

35 Nangbangon ni Saul iti maysa nga altar a maipaay ken ni Yahweh. Daytoy ti umuna nga altar a binangonna.

36 Kinuna ni Saul kadagiti tattaona, “Ita a rabii, rautentayo dagiti Filisteo ket agsamsamtayo agingga iti parbangon. Patayentayo amin ida.”

“Aramidem ti ammom a kasayaatan,” insungbatda. Ngem kinuna ti padi, “Makiumantayo pay nga umuna iti Dios.”

37 Sinaludsod ngarud ni Saul iti Dios, “Rautek kadi dagiti Filisteo? Pagballigiennakami kadi?”

Ngem saan a simmungbat ti Dios iti dayta nga aldaw.

38 Kinuna ni Saul kadagiti pangulo dagiti tattao, “Umaykay ditoy ta usigentayo no ania ti basol a naaramid ita nga aldaw.

39 Ikarik iti nagan tiApoa mangisalakan iti Israel, a mapapatay ti siasinoman a matakuatan a nagbasol, uray ni Jonatan nga anakko.”

Ngem awan ti uray maysa a nagtagari.

40 Kinuna ni Saul kadakuada, “Agtakderkay amin sadiay ket agtakderkami met ken Jonatan ditoy.”

“Aramidem ti ammom a naimbag,” insungbatda.

41 Kinunani Saul ken ni Yahweh a Dios ti Israel, “OApo, apay a dinak sinungbatan ita nga aldaw.Apoa Dios ti Israel, sungbatannak koma babaen kadagiti nasagradoan a bato. No ni Jonatan ti nakabasol wenno siak, sungbatannak babaen ti Urim. Ngem no dagiti tattaom nga Israelitati nagbasol, sumungbatka babaen iti Tummim.”

Rimmuar ti nagan da Jonatan ken Saul; awan ti masapul a sungbatan dagiti tattao.

42 Kinuna ni Saul, “Ikeddengmo no siasino kadakami ken ni Jonatan ti nagbasol.”

Rimmuar ti nagan ni Jonatan.

43 Ket sinaludsod ni Saul ken ni Jonatan, “Ania ngamin ti inaramidmo?”

“Nanganak iti sangkabassit a diro,” insungbat ni Jonatan. “Adtoyak, sisasaganaak a matay.”

44 Kinuna ni Saul kenkuana, “Aramiden ti Dios ti rumbeng kenka, kasta met kaniak. Masapul a mapapatayka, Jonatan.”

45 Ngem kinuna dagiti tattao ken ni Saul, “Rumbeng kadi a mapapatay ni Jonatan a nanggun-od iti daytoy naindaklan a balligi ti Israel? Saan! Ikarimi iti nagan ti sibibiag ngaApoa saan a maan-ano ti uray maysa la a buok ni Jonatan. Ti inaramidna ita nga aldaw, naaramid babaen ti tulong ti Dios.”

Saan ngarud nga impalubos dagiti tattao a mapapatay ni Jonatan.

46 Insardeng ni Saul ti panangsunsonna kadagiti Filisteo, ket nagsubli dagiti Filisteo iti bukodda a daga.

Ti Panagturay ni Saul ken ti Familiana

47 Kalpasan ti pannakaisaad ni Saul nga ari ti Israel, ginubatna ti amin a kabusorna iti amin a lugar: dagiti Moabita, Edomita ken Ammonita, dagiti ari ti Soba ken dagiti Filisteo. Nagballigiiti sadinoman a disso a nakirangetanna.

48 Simamaingel a nakigubat, ket pinarmekna pay dagiti tattao ti Amalec. Insalakanna dagiti Israelita tunggal marautda.

49 Da Jonatan, Isvi ken Malkisua dagiti lallaki nga annak ni Saul. Ni Merab ti inauna nga anakna a babai ket ni Mical ti inaudi.

50 Ni Ahinoam nga anak ni Ahimaaz ti asawana. Ni Abner a kasinsinna nga anak ni ulitegna a Ner ti pangulo ti armadana.

51 Annak ni Abiel ni Kis nga ama ni Saul ken ni Ner nga ama ni Abner.

52 Sipipinget a nakigubat ni Saul kadagiti Filisteo iti unos ti panagbiagna. No adda idi masarakanna a lalaki a napigsa wenno natured, pagkamengenna iti armadana.