Author: admin

Ti Ipapatay ni Samuel

1 Natay ni Samuel, ket naguummong amin dagiti Israelita a mangdung-aw kenkuana. Intanemda iti balayna idiay Rama.

Ni David ken ni Abigail

Kalpasan daytoy, napan ni David iti let-ang ti Paran.

2-3 Adda idi lalaki nga agnagan iti Nabal a nagtaud iti kapuonan ni Caleb. Taga-Maon ni Nabal. Nakabakbaknang ket adda dagana iti asideg iti ili ti Carmel. Adda 3,000 a karnerona ken 1,000 a kaldingna. Napintas ken nasaririt ni Abigail nga asawana, ngem nasabrak ken dakes ti ugali ni Nabal.

Pukpukisan idi ni Nabal dagiti karnerona idiay Carmel.

4 Adda met idi ni David idiay let-ang ket idi maammoanna daytoy,

5 nangibaon iti sangapulo nga agtutubo a mapan idiay Carmel. Binilinna ida a birokenda ni Nabal ket idanonda kenkuana ti pakomustana.

6 Kastoy ti pinaibagana: “Pakomustaannaka ni David; pakomustaanna met ti familiam ken amin nga adda kenka.

7 Nadamagna a pappapukisam dagiti karnerom, ket kayatna nga ipakaammo kenka nga adda idi dagiti pagpaspastorem iti sakupna ket dida rinangranggasan ida. Pulos nga awan ti natakaw a kukuada bayat ti kaaddada idiay Carmel.

8 Damagem laeng kadakuada, ket ibagada kenka a pudno daytoy. Dawaten ni David a sangailiennakami ta umaykami iti kaaldawan ti fiesta. Pangngaasim ngarud ta itedmo ti mabalinmo nga ipaay kadakami nga adipenmo ken ni David a napateg a gayyemmo.”

9 Dimteng dagiti tattao ni David ket indanonda ken ni Nabal ti pinaibaga ni David. Nagur-urayda.

10 Kamaudianna, simmungbat ni Nabal: “David? Siasino dayta a tao? Diak pay nadamag dayta a tao. Kadagitoy nga aldaw, napno ti pagilian iti tagabu a nagtalaw iti balay ti apoda.

11 Ha! Kayatyo a sawen nga alaek ti tinapay ken ti arakko ken dagiti animal a pinartik nga agpaay kadagiti agpukpukis kadagiti karnerok ket itedko kadagiti tattao a diak ammo no sadino ti naggapuanda?”

12 Nagsubli dagiti tattao ni David ket imbagada kenkuana ti sao ni Nabal.

13 “Ibarikesyo dagiti kampilanyo,” imbilin ni David. Kasta ti inaramidda. Imbarikes met ni David ti kampilanna ket pimmanaw agraman dagiti ag-400 a tattaona. Nagbati ti 200 a tattao a mangbantay kadagiti masapsapulda.

14 Adda maysa kadagiti adipen ni Nabal a napan ken ni Abigail. Kinunana, “Nadamagmo kadin? Adda sumagmamano a tattao ni David nga imbaonna manipud let-ang tapno kablaawanna ti apomi, ngem ininsultona ida.

15 Naimbag unay dagiti tattaona kadakami. Didakam siningsinga ket bayat ti kaaddami kadakuada idiay away, pulos nga awan ti natakaw a kukuami.

16 Aldaw-rabii a sinalaknibandakami bayat ti panangipastormi kadagiti arban iti asidegda.

17 Ita, panunotem a naimbag daytoy ket ikeddengmo no ania ti rumbeng nga aramidem amangan la ketdi no dakes ti mapasamak ti apomi ken ti amin a kameng ti familiana. Nadamsak unay ket pulos nga awan ti makatured a makisao kenkuana!”

18 Nagdardaras ni Abigail a nangala iti 200 a tinapay, dua a supot a lalat a napno iti arak, lima a litson a karnero, dua kasukat nga iniruban a trigo, 100 a karaay nga ubas ken 200 a kankanen a naaramid iti namaga nga igos. Impasakayna dagitoy kadagiti asno.

19 Kinunana kadagiti adipen, “Umunakayon ta sumarunoak.” Ngem dina imbagbaga daytoy iti asawana.

20 Sisasakay ni Abigail iti asnona ket agsikko koma iti bakras ti turod a pagpagnaanna idi pagammoan la ta masabatna ni David ken dagiti tattaona.

21 Kunkuna itay ni David iti bagina, “Dinaddadaelko la ti tiempok iti let-ang a nangsalaknib kadagiti sanikua daytoy a tao. Pulos nga awan ti natakaw a kukuana, ket daytoy ketdin ti pagsupapakna kaniak iti panangtulongko kenkuana!

22 Siakkoma ti patayen ti Dios no diak ikisap dagita a tattao sakbay a dumteng ti bigat!”

23 Idi makita ni Abigail ni David, dagus a dimsaag iti asnona ket nagpakleb iti daga,

24 iti sakaanan ni David sana kinuna kenkuana, “Pangngaasim ta denggennak, apo. Siak ti mangibaklay iti biddut.

25 Dimo ikankano ni Nabal. Awan serserbi dayta a tao! Kasla met laeng iti naganna—maysa a maag!Awanak idi immay dagiti imbaonmo nga adipen, apo.

26 TiApoti manglapped kenka nga agibales ken mangpatay kadagiti kabusormo. Ita, isapatak kenka iti nagan tiApoa sibibiag a madusanto dagiti kabusormo ken dagiti agpanggep a mangranggas kenka a kas iti pannakadusanto ni Nabal.

27 Pangngaasim, apo, ta awatem daytoy sagut nga inyegko kenka ket itedmo kadagiti tattaom.

28 Pakawanennak, apo, iti aniaman a biddut a naaramidko. Isaadnakanto tiApoa kas ari, kasta met dagiti kaputotam, agsipud ta makirangrangetka kadagiti gubatna ket dikanto agaramid iti dakes bayat ti panagbiagmo.

29 No addanto mangdarup kenka ket kayatnaka a patayen, aywanannakanto tiApoa Diosmo ket awanto ti pakaan-anoam, kas iti panangaywan ti maysa a tao iti napateg a gameng. Ngem no maipapan kadagiti kabusormo, ipurruaknanto ida a kas iti panangipurruak ti tao iti bato iti pallatibong.

30 Ket inton maaramid tiApoti amin a naimbag nga inkarina kenka ket isaadnaka a kas ari ti Israel,

31 awanto ti panagbabawim wenno pannakatuok ti konsensiam iti panagpapataymo nga awan gapgapuna wenno panagibalesmo. Ket inton nabendisionannakan tiApo, pangngaasim ta dinakto liplipatan.”

32 Kinuna ni David kenkuana, “Madaydayaw tiApoa Dios ti Israel a nangibaon kenka nga umay mangsabat kaniak ita nga aldaw.

33 Agyamanak iti Dios iti naimbag a panagnaknakemmo ken iti pananglappedmo kaniak nga agibales ken pumatay.

34 Saan nga impalubos tiApoa dangranka. Ket no dika nagdardaras nga immay nangsabat kaniak, isapatak itiApoa sibibiag a Dios ti Israel a sakbay a dumteng ti bigat, natay koma aminen a tattao ni Nabal!”

35 Inawat ni David ti sagut ni Abigail nga inyegna kenkuana sana kinuna, “Agawidkan ket dika agdanag. Patgak ti dawatmo!”

36 Idi agawid ni Abigail iti balayda, nadanonna nga adda parambak nga inangay ni Nabal. Kasla parambak ti ari ti inangayna. Nabartek ni Nabal ket kasta unay ti ragsakna, isu a pulos nga awan imbagbaga ni Abigail kenkuana agingga iti bigat.

37 Idi maunawanen ni Nabal, imbaga ni Abigail ti amin kenkuana. Naatake ni Nabal iti puso ket naparalitiko a namimpinsan.

38 Kalpasan ti 10 nga aldaw, dinissoan manen ni Yahweh ket natay ni Nabal.

39 Nadamag ni David ti pannakatay ni Nabal ket kinunana, “Madaydayaw tiApo! Binalesna ni Nabal gapu iti pananginsultona kaniak. Dinak pinalubosan nga adipenna nga agaramid iti dakes. Dinusana ni Nabal gapu iti kinadakesna.”

Nangibaon ni David kadagiti tattaona a mapan ken ni Abigail tapno idanonda ti singasingna a mangasawa kenkuana.

40 Dimteng dagiti adipenna idiay Carmel ket imbagada ken ni Abigail, “Imbaonnakami ni David a mangala kenka tapno agbalinka nga asawana.”

41 Nagkurno ni Abigail iti daga sana kinuna, “Siak ti adipenna a sisasagana a mangbuggo kadagiti saka dagiti adipen ti apok.”

42 Dinagdagusna ti timmakder ket nagsakay iti asnona. Simmurot kadagiti adipen ni David. Kimmuyog kenkuana dagiti lima a babbai a babaonenna. Nagbalin ni Abigail nga asawa ni David.

43 Sakbay ti panangasawana ken ni Abigail, inasawa ni David ni Ahinoam a taga-Jezreel.

44 Kabayatanna,ni Palti nga anak ni Lais a taga-Gallim ti nangyasawaan ni Saul ken ni anakna a Mical, ti asawa idi ni David.

Ispalen manen ni David ti Biag ni Saul

1 Addalallaki a taga-Sif a napan ken ni Saul idiay Gabaa ket imbagada kenkuana nga aglemlemmeng ni David iti Bantay Hakila iti beddeng ti let-ang ti Juda.

2 Dinagdagus ni Saul ti napan idiay let-ang ti Zif. Kinuyog ti 3,000 a kamaingelan a mannakigubat ti Israel tapno birokenda ni David.

3 Nagkampo ni Saul iti igid ti dalan iti Bantay Hakila. Adda pay laeng ni David iti let-ang, ket idi naammoanna a simmangpet ni Saul a mangsapsapul kenkuana,

4 nangibaon kadagiti espia ket napaneknekanda a pudno nga adda sadiay.

5 Nagdardaras ni David a napan sadiay ket nasarakanna ti nagkampoan ni Saul. Tinannawaganna ti pagturturogan ni Saul ken ni Abner nga anak ni Ner a komander ti buyot ti ari. Naturog ni Saul iti tengnga ti kampo, ket nagyan dagiti soldadona iti lawlawna.

6 Sinaludsod ni David ken ni Ahimelec a Heteo ken ni Abisai a kabsat ni Joab (annak ida ni Zeruyas), “Siasino kadakayo ti kumuyog kaniak a mapan iti kampo ni Saul?”

“Siak,” insungbat ni Abisai.

7 Ngarud, simrek da David ken Abisai iti kampo ni Saul iti dayta a rabii. Nasarakanda a matmaturog ni Saul iti tengnga ti kampo. Situtugkel iti daga ti gayangna iti asideg iti ulona. Matmaturog ni Abner ken dagiti soldado iti likmutna.

8 “Ita a rabii,” kinuna ni Abisai ken ni David, “inyawat ti Dios ti kabusormo iti pannakabalinmo. Ipalubosmo nga iduyokko kenkuana ti bukodna a gayang agingga a sumalput iti daga. Maminsan laeng a duyokek, saankon a piduaen!”

9 Ngem kinuna ni David, “Saanmo a dangran! Awan duadua a dusaen tiApoti siasinoman a mangranggas iti pinilina nga ari.

10 Iti nagan ti sibibiag ngaApo,” intuloy ni David, “ammok a tintoApoa mismo ti mangpatay kenkuana inton umay ti tiempo a pannakatayna wenno inton matay iti paggugubatan.

11 Yad-adayokoma ti Dios a dangrak ti ari a pinili tiApo! Ngem alaenta ti gayang ken ti pagkargaan ti danum ket pumanawta.”

12 Innala ni David ti gayang ken ti pagkargaan ti danum iti abay ti ulo ni Saul sada pimmanaw ken ni Abisai. Awan ti nakakita iti inaramidda wenno nakaammo iti napasamak wenno nakariing la koma. Nakaturogda amin, agsipud ta pinaturog ida ni Yahweh iti nairut.

13 Kalpasanna, bimmallasiw ni David iti sabali a bangir ti tanap ket napan iti tapaw ti maysa a turod. Adayo ti baetda ken ni Abner ken dagiti soldado ni Saul.

14 Impukkawna kadakuada, “Abner! Mangngegnak kadi?”

“Siasino ti agpukpukkaw ken mangririing iti ari?” sinaludsod ni Abner.

15 Kinuna ni David, “Abner, di met sika aya ti kamainglan iti Israel? Apay a dimo salsalakniban ti apom nga ari? Adda simrek itay iti kampo tapno patayenna ni apom.

16 Nagliwayka iti pagrebbengam, Abner! Iti nagan tiApoa sibibiag, rumbeng a matayka agsipud ta dimo sinalakniban ti apom nga ari a pinili tiApo. Ita, kitaem no sadino ti ayan ti gayang ti ari. Sadino ti ayan ti pagkargaan ti danum nga adda iti abay ti ulona?”

17 Nailasin ni Saul ti timek ni David ket sinaludsodna, “David, sika kadi dayta, anakko?”

“Wen, siak, Natan-ok nga Ari,” insungbat ni David.

18 Ket innayonna, “Apo, apay kadi a birbirokennak pay laeng nga adipenmo? Ania kadi ti inaramidko? Ania a dakes ti inaramidko?

19 Natan-ok nga Ari, denggem koma ti ibagak. No tiApokoma ti akin-aramid iti ibubusormo kaniak, awatenna ti maysa a daton tapno baliwanna ti panunotna. Ngem no tao ti akin-aramid, agdissuor koma kadakuada ti lunod tiApo. Imbagada kaniak nga innak agdaydayaw kadagiti didiosen, ket agpeggad ti kalintegak a makipagtawid iti daga nga inted tiApokadagiti tattaona.

20 Dimo koma ngarud ipalubos a matayak iti ganggannaet a daga nga adayo itiApo. Ta rimmuar ti ari tapno patayenna ti maysa a timel a kas kaniak. Apay a nasken nga an-anupennak a kas iti atap a tumatayab?”

21 Insungbat ni Saul, “Nagbasolak. Agsublika, David nga anakko! Pulos a dikanton dangran, ta inispalmo ti biagko ita a rabii. Talaga a maagak ket naka-aramidak iti nadagsen a biddut!”

22 “Adtoy ti gayangmo, Natan-ok nga Ari,” insungbat ni David. “Mangibaonka iti umay mangala.

23 Gunggonaan tiApodagiti tattao a napudno ken nalinteg. Ita nga aldaw, inyawatnaka tiApoiti pannakabalinko ngem dika rinanggasan, sika a pinilina nga ari.

24 Inispalko ti biagmo ita nga aldaw; kasta koma met ti aramiden kaniak tiApoket ilisinak iti amin a riribuk!”

25 Ngarud, kinuna ni Saul ken ni David, “Bendisionannaka koma ti Dios, anakko! Agballigikanto iti amin nga aramidmo!”

Napan ni David iti papananna ket nagawid met ni Saul.

Agkamang ni David idiay Filistia

1 “Addanto aldaw a patayennak ni Saul,” kinuna ni David iti bagina. “Nasaysayaat no agkamangak idiay Filistia. Isardengton ni Saul ti panangbirbirokna kaniak iti Israel ket awanton ti pakaan-anoak.”

2 Ngarud, nagdardaras ni David ken dagiti 600 a tattaona a napan ken ni Akis nga anak ni Maoc ken ari ti Gat.

3 Nagyan ni David ken dagiti tattaona idiay Gat, agraman dagiti familiada. Intugot ni David dagiti dua nga assawana: ni Ahinoam a taga-Jezreel ken ni Abigail a balo ni Nabal a taga-Carmel.

4 Idi madamag ni Saul a nagkamang ni David idiay Gat, insardengnan ti panangbirbirokna kenkuana.

5 Kinuna ni David ken ni Akis, “No gayyemnak met laeng, ikkannak koma iti bassit nga ili a pagnaedak. Saan a rumbeng, apo, a makipagyanak kenka iti kangrunaan a siudad.”

6 Inted ni Akis ken ni David ti ili ti Siklag. Manipud idin, kukua dagiti ari ti Juda ti Siklag.

7 Makatawen ket uppat a bulan a nagnaed ni David idiay Filistia.

8 Iti las-ud dayta a panawen, masansan a rauten ni David ken dagiti tattaona dagiti umili iti Gesur, Girzi ken Amalec a nabayagen nga agnanaed iti dayta a daga. Masansan a dumanonda idiay Shur ken Egipto.

9 Patayenna amin a lallaki ken babbai, ket alaenna dagiti karnero, baka, asno, kamelio agraman dagiti pagan-anay. Kalpasanna, agsubli ken ni Akis,

10 ket saludsoden ti ari, “Sadino ti nagrautanyo ita?” Masansan nga ibaga ni David kenkuana a rinautna ti akin-abagatan a paset ti Juda wenno ti daga a masakupan ti tribu ti Jerameel, wenno ti pagnaedan dagiti Kineo.

11 Iti amin a lugar a rautenna, papapatay ni David ti tunggal maysa, lalaki man wenno babai, tapno awan mapan agipulong idiay Gat iti pudno nga ar-aramidenda kadagiti tattaona. Kastoy ti inar-aramid ni David bayat ti panagyanna idiay Filistia.

12 Ngem nagtalek ni Akis ken ni David. “Awan duadua a guraen unay dagiti Israelita a tattaona,” kinuna ti ari iti bagina, “ket masapul nga agserbi kaniak iti unos ti panagbiagna.”

1 Iti saan a nabayag, inummong dagiti Filisteo dagiti buyotda tapno gubatenda ti Israel. Kinuna ni Akis ken ni David, “Namnamaek a tumiponkay iti armadak, sika ken dagiti tattaom.”

2 “Ammok,” insungbat ni David. “Siak ti adipenmo ket paneknekakto kenka no ania ti kabaelak nga aramiden.”

“Nasayaat,” kinuna ni Akis. “Pagbalinenka a permanente a badigardko.”

Mapan ni Saul iti Makium-uman iti Espiritu ti Natay

3 Natayidin ni Samuel. Dinung-awan dagiti amin nga Israelita ket impumponda idiay Rama nga ilina. Kabayatanna, pinagtalaw ni Saul ti amin a mammadles ken makium-uman kadagiti espiritu ti natay iti Israel.

4 Naguummong dagiti mannakigubat a Filisteo ket nagkampoda iti asideg ti ili ti Sunem. Inummong met ni Saul dagiti Israelita ket nagkampoda idiay Bantay Gilboa.

5 Nagbuteng ni Saul idi makitana ti armada dagiti Filisteo.

6 Sinaludsodnaken ni Yahweh no ania ti aramidenna, ngem pulos a saan a sinungbatan ni Yahweh, iti tagtagainep man wenno iti Urim wenno babaen iti maysa a profeta.

7 Kalpasanna, imbilin ni Saul kadagiti ofisialesna, “Ibirokandak iti babai a makium-uman iti espiritu a mabalinko a pakiumanan.”

Imbagada kenkuana nga adda maysa a babai a makium-uman iti espiritu idiay Endor.

8 Iti maysa a rabii, nanglimlimo ni Saul. Nagarruat iti sabali a pagan-anay, nangitugot iti dua kadagiti tattaona ket napanna kinita ti babai.

“Makiumanka iti natay ket ibagam ti gasatko,” kinuna ni Saul iti babai. “Awagam ti espiritu ti tao nga inaganak.”

9 Ngem kinuna ti babai, “Awan duadua nga ammom ti inaramid ni Ari Saul. Pinagtalawna ti amin a mammadles ken makium-uman kadagiti espiritu ti natay iti Israel. Apay a mangipakatka iti palab-og a pakatayak?”

10 Nagkari ni Saul. “Iti nagan tiApoa sibibiag, ikarik a dikanto madusa iti panangaramidmo iti daytoy,” insapatana kenkuana.

11 “Siasinongarud ti awagak?” sinaludsod ti babai.

“Ni Samuel,” insungbat ni Saul.

12 Nagparang ni Samuel ket nagikkis ti babai. Kinunana ken ni Saul, “Apay nga inallilawnak? Sika ni Ari Saul!”

13 “Dika agbuteng,” imbaga kenkuana ti ari. “Ania ti makitam?”

“Makitak ti maysa nga espiritu a rumrummuar iti daga,” insungbatna.

14 “Ania ti langana?” sinaludsod ti ari.

“Maysa a lakay a mangin-inut a ngumato iti daga,” insungbatna. “Nakakagay iti atiddog.”

Ammon ni Saul nga isu ni Samuel, ket nagkurno iti daga kas panangipakitana iti panagraemna.

15 “Apay a singsingaennak?” kinuna ni Samuel ken ni Saul. “Apay a pinagsublinak?”

“Mariribukak unay ngamin!” insungbat ni Saul. “Gubgubatendak dagiti Filisteo ket binaybay-annakon ti Dios. Dinakon sungbatan kadagiti profeta wenno kadagiti tagtagainep. Daytoy ti gapuna nga immawagak kenka tapno ibagam no ania ti rumbeng nga aramidek.”

16 Kinuna ni Samuel, “Apay nga awagannak no binaybay-annakan tiApoket nagbalinen a kabusormo?

17 InaramidentiApokenka ti imbagana kaniak idi: Inikkatna kenka ti pagarian ket intedna ken ni David.

18 Dimotinungpal ti bilin tiApo. Dimo ngamin dinadael a namimpinsan dagiti Amalekita ken dagiti amin a kukuada. Daytoy ti gapuna a kastoy ti ar-aramiden kenka tiApo.

19 Yawatnakanto agraman ti Israel iti pannakabalin dagiti Filisteo. Inton bigat, tumiponkanto kaniak, sika ken dagiti annakmo. Yawatto met tiApoti armada ti Israel iti pannakabalin dagiti Filisteo.”

20 Nagbuteng ni Saul iti imbaga ni Samuel ket dagus a natuang ken naunnat iti daga. Napakapsutan ta nagmalmalem ken nagpatpatnag nga awan kinnanna.

21 Napan ti babai iti ayan ni Saul ket idi makitana a kasta unay ti pannakariribuk ti ari, kinunana, “Apo, impustak ti biagko a nangaramid iti dawatmo.

22 Ita, pangngaasim ta aramidem met ti dawatko. Palubosannak koma ta idasaranka iti kanem. Masapul a manganka tapno adda pamigsam nga agbiahe.”

23 Nagkedked ni Saul ket imbagana a pulos a saan a mangan. Ngem pinilit met dagiti ofisialesna a mangan. Impangagna met laeng ti dawatda ket timmakder sa napan nagtugaw iti katre.

24 Dinardaras ti babai a pinarti ti urbon ti baka a palpalukmegenna. Nangala iti arina, insaganana ket nangluto iti tinapay nga awan ti lebadurana.

25 Impasangona dagiti taraon ken ni Saul ken kadagiti ofisialesna. Nanganda iti naidasar. Kalpasan ti pannanganda, pimmanawda iti dayta met la a rabii.

Saan nga Awaten dagiti Filisteo ti Tulong ni David

1 Inummong dagiti Filisteo ti amin a mannakigubatda ket nagkampoda idiay Afec. Nagkampo met dagiti Israelita iti asideg ti ubbog iti Tanap ti Jezreel.

2 Nagmartsa dagiti lima nga ari a Filisteo ket impanguloanda dagiti buyotda a buklen ti ginasut ken rinibu a tattao. Adda ni David ken dagiti tattaona iti likud agraman ni Akis.

3 Idi nakita ida dagiti kapitan a Filisteo, sinaludsodda, “Ania ti kukuaen ditoy dagitoy a Hebreo?”

Simmungbat ni Akis, “Dayta ni David a maysa nga ofisial ni Saul nga ari ti Israel. Nabayagen nga adda kaniak. Manipud idi immay, awan pay nagbiddutanna.”

4 Ngem nakapungtot dagiti kapitan a Filisteo ken ni Akis ket kinunada kenkuana, “Pagsubliem dayta a tao iti ili nga intedmo kenkuana. Dimo palubosan a kumuyog kadatayo amangan no liputannatayo ket agbalin a kabusor inton madama ti ranget. Ta awanen ti nasaysayaat a panggun-odna iti parabur ni apona no di ti panangpapatayna kadagiti tattaotayo!

5 Kinapudnona,isu dayta ni David nga ikankanta dagiti babbai bayat ti panagsasalada:

‘Rinibu ti pinatay ni Saul,

ngem pinullo ribu ti pinatay ni David!’”

6 Inayaban ni Akis ni David ket kinunana kenkuana, “Ammok a napudnoka kaniak ket isapatak daytoy iti nagan ti sibibiag a Dios ti Israel. Maragsakanak iti ikukuyogmo kaniak tapno makirangetka iti daytoy a gubat. Manipud simmangpetka, awan pay ti nasarakak a biddutmo. Ngem saandaka kayat dagiti dadduma nga ari.

7 Ngarud, agawidka a sitatalna ket dika agaramid iti aniaman a mamagpungtot kadakuada.”

8 “Ania kadi ti dakes nga inaramidko?” insungbat ni David. “Pulos nga awan ti nasarakam a biddut kaniak, apo, manipud nagserbiak kenka. Apay kadi a diak mabalin ti kumuyog kenka, sika nga apok ken arik, tapno gubatek dagiti kabusormo?”

9 “Ammok a napudnoka kaniak ket ibilangka a kas anghel ti Dios,” insungbat ni Akis. “Ngem imbaga dagiti dadduma nga ari a dimo mabalin ti kumuyog kadakami iti paggugubatan.

10 Ngarud, David, sapaem ti bumangon inton bigat, agraman dagiti amin a kimmuyog kenka a nangpanaw ken ni Saul, ket pumanawkayo apaman nga aglawag.”

11 Kabigatanna, nasapa a nagrubbuat ni David ken dagiti tattaona tapno agsublida idiay Filistia. Intuloy dagiti Filisteo ti napan idiay Jezreel.

Gubaten ni David dagiti Amalekita

1 Dua nga aldaw sakbay a simmangpet ni David ken dagiti tattaona idiay Siklag, rinaut dagiti Amalekita ti abagatan a Juda. Rinautda met ti Siklag sada pinuoran.

2 Awan pinatayda ngem tiniliwda dagiti amin a babbai ket innalada ida idi pumanawda.

3-5 Idisumangpet da David ken dagiti tattaona, nasarakanda a napuoran a namimpinsan ti ilida ket naitalaw dagiti assawada ken dagiti annakda. Nairaman a naitalaw da Ahinoam ken Abigail nga assawa ni David. Nagsangit ni David ken dagiti tattaona agingga a napaksuyanda.

6 Dakdakkel manen ti parikut ni David. Nasaem unay ti rikna dagiti tattaona gapu iti pannakapukaw dagiti annakda, ket panggepda nga uboren ni David. Ngem pinapigsa ni Yahweh a Diosna.

7 Kinunani David ken ni Abiatar a padi nga anak ni Ahimelec, “Yegmo ditoy ti efod.” Ket napan innala ni Abiatar.

8 Sinaludsod ni David ken ni Yahweh, “Innak kadi kamaten dagiti rimmaut? Makamakamko ngata ida?”

“Wen, inka kamaten ida,” insungbatna. “Awan duadua a makamakammo ida ket ispalem dagiti naitalaw.”

9-10 Nagrubbuat ngarud ni David ken dagiti 600 a tattaona. Idi dumtengda iti waig ti Besor, nagbati ti 200 ta nabannogda unayen ket dida kabaelan ti bumallasiw. Intuloy ni David ken dagiti 400 a tattaona ti pannagnada.

11 Iti away, adda agtutubo nga Egipcio a nasarakan dagiti tattaona ket indatagda kenkuana. Inikkanda iti kanen ken danum,

12 sumagmamano a napakebbet nga igos ken dua a karaay nga ubas. Nangan ti agtutubo ket nagsubli ti pigsana. Tallo nga aldaw ken tallo a rabii a pulos a di nangan wenno imminum.

13 Sinaludsod ni David, “Taga-anoka? Siasino ti apom?”

“Maysaak nga Egipcio,” insungbatna. “Tagabunak ti maysa nga Amalekita. Imbatinak ti apok ta nagsakitak. Tallo nga aldawen ti napalabas.

14 Rinautmi ti sakup dagiti Kereteo, ti akin-abagatan a Juda, ti daga a masakupan dagiti kapuonan ni Caleb. Pinuoranmi ti Siklag.”

15 “Kuyogennak man a mapan kadagiti rimmaut?” dinawat ni David.

“Kuyogenka no la ket isapatam iti nagan ti Dios a dinakto patayen wenno isubli ken ni apok,” kinunana.

16 Kinuyogna ngarud ni David iti ayan dagiti rimmaut. Sadiay, nawaraswaras dagiti Amalekita. Agpapangan, agiinum ken agrarambakda gapu iti nakaad-adu a sinamsamda idiay Filistia ken Juda.

17 Iti parbangon ti sumuno nga aldaw, rinaut ni David ida ket nakigubat agingga iti sumipnget. Awan ti nakalibas nga Amalekita, malaksid ti 400 nga agtutubo a lallaki a naglibas a nagsakay kadagiti kamelio.

18 Inispal ni David ti amin nga innala dagiti Amalekita agraman dagiti dua nga assawana.

19 Napasublina ti amin, agraman dagiti annak dagiti tattaona ken dagiti amin a sinamsam dagiti rimmaut.

20 Napasublina met ti amin a pangen ken arban. Inabog dagiti tattaona dagiti amin nga animal iti sangoananda,ket kinunada, “Kukua dagitoy ni David!”

21 Kalpasanna, nagsubli ni David kadagiti 200 a tattaona. Dagitoy dagidi nagbati iti waig ti Besor, ta nabannogda unay idin ket didan kabaelan ti kumuyog kenkuana. Sinabatda ni David ken dagiti tattaona. Siraragsak ni David a napan nangkablaaw kadakuada.

22 Ngem nagsao ti sumagmamano a nauyong ken awan serserbina a tattao a kimmuyog idi ken ni David. “Saanda a kimmuyog kadatayo,” kinunada. “Ditay ngarud ibingayan ida kadagiti nasamsam. Mabalinda nga alaen dagiti assawa ken annakda ket pumanawdan.”

23 Ngem kinuna ni David, “Kakabsatko, diyo mabalin nga aramiden daytoy. Bigbigenyo ti impaay tiApokadatayo. Sinalaknibannatayo ket inyawatna kadatayo ti bunggoy a nangraut kadatayo.

24 Awan ti umanamong iti daytoy a singasingyo. Masapul nga agpapada ti bingay ti tunggal maysa. Agpada ti bingay ti agbati a mangbantay kadagiti alikamen ken ti mapan iti paggugubatan.”

25 Manipud idin, daytoy ti impaannurot ni David maipapan iti pannakabingay ti nasamsam ket tinungpal ti entero nga Israel.

26 Idi nagsubli ni David idiay Siklag, pinaipanna kadagiti panglakayen ti Juda ti dadduma a nasamsam. Pinaibagana: “Adtoy ti maysa a sagut a naggapu iti nasamsam nga innalami kadagiti kabusor tiApo.”

27 Pinaipanna dagitoy kadagiti agnaed iti Betel; Rama iti abagatan a paset ti Juda, Jattir,

28 Aroer, Sifmot, Estemoa,

29 Racal, kadagiti kapuonan ni Jerameel, kadagiti Kineo,

30 ken kadagiti tattao iti ili ti Horma, Borasan, Atac,

31 ken Hebron. Pinatulodanna ti amin a lugar a napnapananna ken dagiti tattaona.

Matay ni Saul ken dagiti Annakna

1 Sinunson dagiti Filisteo dagiti Israelita idiay Bantay Gilboa. Adu ti natay kadagiti Israelita ket nagtataray dagiti dadduma agraman ni Saul ken dagiti annakna.

2 Ngem nakamatan ida dagiti Filisteo ket pinatayda ti tallo kadagiti annakna, da Jonatan, Abinadab ken Malkisua.

3 Napinget ti ranget iti likmut ni Saul. Napuntaan kadagiti pana ti kabusor ket nakaro ti sugatna.

4 Kinunana iti agtutubo a para-awit kadagiti igamna, “Asutem ti kampilanmo ket patayennak tapno didak umay pagang-angawan dagidiay awan diosna a Filisteo.”

Ngem kasta unay ti buteng ti agtutubo ket nagkedked a mangtungpal iti naibilin kenkuana. Innala ngarud ni Saul ti bukodna a kampilan sana rinugmaan.

5 Idi makita ti agtutubo a natayen ni Saul, rinugmaanna met ti bukodna a kampilan ket natay a kas kenkuana.

6 Iti dayta nga aldaw, natay ni Saul, dagiti tallo nga annakna, ti agtutubo, agraman amin a tattaona.

7 Idi madamag dagiti Israelita nga agnanaed iti sabali a bangir ti Tanap ti Jezreel ken iti ballasiw ti Karayan Jordan a nagtataray ti armada ti Israel ken natay ni Saul agraman dagiti annakna, binaybay-andan dagiti ilida sada nagtataray. Kalpasanna, simmangpet dagiti Filisteo ket sinakupda dagiti ilida.

8 Iti sumuno nga aldaw kalpasan ti gubat, idi napan nagsamsam dagiti Filisteo kadagiti napapatay, nasarakanda dagiti bangkay ni Saul ken dagiti tallo nga annakna a naiwalang idiay Bantay Gilboa.

9 Pinutolanda ni Saul sada innala dagiti igamna. Nangibaonda kadagiti napan iti entero a Filistia a mangipakaammo iti naimbag a damag kadagiti didiosenda ken kadagiti kailianda.

10 Kalpasanna, inkabilda dagiti igam ni Saul iti templo ni Astarte a diosa sada inlansa ti bangkayna iti bakud ti siudad ti Bet-san.

11 Nadamag dagiti taga-Jabes, idiay Galaad, ti inaramid dagiti Filisteo iti bangkay ni Saul.

12 Nagrubbuat dagiti katuturedan kadakuada ket nagpatpatnagda a nagdaliasat. Idi dumtengda idiay Bet-san, imbabada dagiti bangkay ni Saul ken dagiti annakna manipud iti bakud ket inyawidda ida idiay Jabes. Pinuoranda dagiti bangkay,

13 innalada dagiti tultulang sada inkali ida iti sirok ti salamagi iti ili. Pito nga aldawda a nagayunar.

Maammoan ni David ti Ipapatay ni Saul

1 Kalpasan ti ipapatay ni Saul, idi naparmeken ni David dagiti Amalekita, nagsubli idiay Siklag, ket dua nga aldawna a nagyan sadiay.

2 Iti sumaruno nga aldaw, adda simmangpet nga agtutubo a lalaki a naggapu iti kampo ni Saul. Tapno maipakita ti panagladingitna, pinigispigisna ti pagan-anayna ken winarakiwakanna ti ulona iti tapok. Dimmatag ken ni David, ket nagparintumeng a siraraem.

3 Dinamag ni David no sadino ti naggapuanna.

“Naglibasak iti kampo dagiti Israelita,” insungbat ti agtutubo.

4 “Ania ti napasamak?” sinaludsod ni David. “Ibagam kaniak.”

“Nagtataray ti armadami manipud iti paggugubatan,” insungbat ti agtutubo, “ket adu ti natay a tattaomi. Natay met ni Saul ken ni anakna a Jonatan.”

5 “Kasano nga ammom a natay da Saul ken Jonatan?” sinaludsod ni David.

6 “Nairananga addaak idiay Bantay Gilboa ket nakitak ni Saul nga agsadsadag iti gayangna,” kinuna ti agtutubo. “Umas-asideg kenkuana dagiti lugan a pakigubat dagiti kabusor ken dagiti nagkabalio.

7 Idi tumalliaw, nakitanak ket inayabannak. Sinaludsodko no ania ti maitulongko kenkuana.

8 Sinaludsodna no siasinoak ket imbagak a maysaak nga Amalekita.

9 Imbagana nga asitgak tapno patayek. Kinunana nga agbiag pay laeng, ngem saannan a maitured ti nakaro a panagsagabana.

10 Inasitgak ngarud ket pinatayko agsipud ta ammok unay a matay met laeng apaman a matuang. Kalpasanna, innalak ti korona iti ulona ken ti pulseras iti takkiagna ket inyegko ida kenka, apo.”

11 Gapu iti ladingitna, rinay-ab ni David ti pagan-anayna. Ket kasta met ti inaramid dagiti amin a tattaona.

12 Nagdung-aw, nagsangit ken nagayunarda agingga iti rabii gapu kada Saul ken Jonatan ken gapu kadagiti Israelita a tattao ni Yahweh, ta adu unay kadakuada ti napasag iti paggugubatan.

13 Sinaludsod ni David no taga-ano ti agtutubo a nangyeg iti damag.

“Maysaak nga Amalekita, ngem agnaedak iti pagilianyo,” insungbatna.

14 “Apay a dika nagbuteng a nangpatay iti ari a pinili tiApo?” kinuna ni David.

15 Inayaban ni David ti maysa kadagiti taona ket imbilinna, “Papatayem!” Dinuyok ti lalaki ti Amalekita ket natay ti agtutubo.

16 Kinuna ni David, “Sika met la ti nangukom iti bagim iti panangipudnom iti panangpataymo iti ari a pinili tiApo.”

Dung-awan ni David da Saul ken Jonatan

17 Kinanta ni David daytoy a dung-aw a maipaay ken ni Saul ken ni Jonatan nga anakna,

18 ketimbilinna a maisuro daytoykadagiti taga-Juda. (Nailanad daytoy itiLibro ni Jasar.)

19 “Kadagiti turod ti Israel, naidasay dagiti pangulomi;

napasag dagiti katuredan a soldadomi.

20 Diyo iwaragawag daytoy idiay Gat

wenno ipakaammo kadagiti kalsada ti Askelon.

Diyo pagragsaken dagiti babbai a Filisteo,

isuda nga annak dagiti pagano.

21 “Sapay koma ta awan linnaaw wenno tudo nga agtinnag kadagiti turturod ti Gilboa.

Sapay koma a kanayon a natikag dagiti kataltalonanna.

Ta naiwalang sadiay dagiti kalasag

dagiti mannakigubat—awanen silapda;

aglatlati ti kalasag ni Saul.

22 Saan a nagsarday ti panagpapatay ti bai ni Jonatan;

awan kinaasian ti kampilan ni Saul,

pinatayna dagiti mannakabalin, ginudasna ti kabusor.

23 “Makaay-ayo ken maipatpateg unay da Saul ken Jonatan.

Iti panagbiag saanda a nagsina,

iti ipapatay nagmaymaysada.

Naparpartakda ngem dagiti agila,

napigpigsada ngem dagiti leon.

24 “Babbai iti Israel, dung-awanyo ni Saul.

Kinawesannakay iti napipintas

a lupot nga eskarlata,

inarkosannakay iti alahas ken balitok.

25 “Napasag dagiti maingel a soldado,

napapatayda iti paggugubatan.

Naidasay ni Jonatan iti katurturodan!

26 “Dung-awanka, Jonatan a kabsatko;

napategka la unay kaniak.

Nakaskasdaaw ti panagayatmo kaniak,

rimbawanna ti panagayat dagiti babbai.

27 “Napasagen dagiti mannakigubat!

Nabaybay-an dagiti igamda,

awanen serserbi dagiti armasda.”

Maisaad ni David nga Ari iti Juda

1 Kalpasan ti ipapatay ni Saul, nakiuman ni David ken ni Yahweh. “Innak kadi iti maysa kadagiti siudad ti Juda?” sinaludsodna.

“Wen, inka,” insungbat ni Yahweh.

“Sadino ti papanak?” sinaludsod manen ni David.

“Idiay Hebron,” insungbatna.

2 Napanngarud ni David idiay Hebron. Inkuyogna dagiti dua nga assawana, ni Ahinoam a taga-Jezreel ken ni Abigail a balo ni Nabal a taga-Carmel.

3 Inkuyogna met dagiti tattaona, agraman dagiti familiada ket nagnaedda kadagiti ili iti asideg ti Hebron.

4 Kalpasanna,dimteng dagiti lallaki ti Juda ket inkonsagrarda ni David a kas ari iti Juda.

Idi nadamag ni David a dagiti agnaed iti Jabes-Galaad ti nangitabon ken ni Saul,

5 nangibaon sadiay iti sumagmamano a tattao ket pinaibagana: “Bendisionannakayo koma tiApoiti impakitayo a kinapudnoyo iti ariyo babaen iti panangitabonyo kenkuana.

6 Sapay koma ta naimbag kadakayo tiApoket saannakayo a baybay-an. Iti biangko, supapakankayto met iti daytoy nga inaramidyo.

7 Ngarud, papigsaenyo ti pakinakemyo, ket tumuredkayo. Natayen ni Saul nga ariyo ket inkonsagrardak dagiti taga-Juda nga arida.”

Maisaad ni Isboset nga Ari ti Israel

8 Naglibas ni Abner nga anak ni Ner a kaduana ni Isboset nga anak ni Saul ket napanda idiay Mahanaim iti ballasiw ti Jordan. Ni Abner ti pangulo ti armada ni Saul.

9 Insaad ni Abner ni Isboset nga ari iti daga a masakupan ti Galaad, Aser,Jezreel, Efraim, Benjamin ken iti entero nga Israel.

10 Uppat a pulo ti tawen ni Isboset idi mangrugi nga agari iti Israel ket nagturay iti dua a tawen. Nupay kasta, napudno ti tribu ti Juda ken ni David.

11 Pito ket gudua a tawen nga inturayanna ti Juda idiay Hebron.

Aggubat ti Israel ken Juda

12 Nagrubbuat ni Abner ken dagiti ofisiales ni Isboset idiay Mahanaim ket napanda iti siudad ti Gabaon.

13 Nagsasarakda sadiay kada Joab nga anak ni Zeruyas. Nakikuyog dagiti dadduma nga ofisiales ni David. Nagtugaw dagiti dua a bunggoy iti agsumbangir ti pagurnongan ti danum idiay Gabaon.

14 Kinuna ni Abner ken ni Joab, “Pagsasalipentayo dagiti agtutubo ket buyaentayo ti panagrangetda—maysa kontra maysa.”

“Ala wen, no dayta ti kayatmo,” insungbat ni Joab.

15 Ngarud, sangapulo ket dua nga agtutubo a mangibagi iti armada ni Isboset ken ti tribu ti Benjamin ti nakiranget kadagiti tattao ni David.

16 Naginniggem iti ulo ti tunggal pareha sada nagdinnuyok iti bakrang ket padapada a napasag a natay dagiti duapulo ket uppat. Daytoy ti gapuna a napanaganan dayta a disso idiay Gibeon iti Helcat-Assurim.

17 Simmaruno ti maysa a napinget a gubat. Ket nagballigi dagiti tattao ni David a nangparmek kadagiti Israelita nga impanguloan ni Abner.

18 Adda sadiay da Joab, Abisai ken Asael nga annak ni Zeruyas. Kasla atap nga ugsa no agtaray ni Asael.

19 Kinamatna ni Abner ket pulos a dina sininsinaan.

20 Timmalliaw ni Abner ket kinunana, “Sika kadi dayta, Asael?”

“Wen, siak,” insungbat ni Asael.

21 “Isardengmo ti panangkamatmo kaniak,” kinuna ni Abner. “Makirangetka iti maysa kadagiti mannakigubat ket alaem ti adda kenkuana.”

Ngem saan nga insardeng ni Asael ti panangkamatna kenkuana.

22 Kinuna manen ni Abner ken ni Asael, “Isardengmo ti panangkamatmo kaniak. Dinak piliten a mangpatay kenka. No mapatayka, anianto ti rupak nga agparang ken ni Joab a kabsatmo?”

23 Ngem intuloy ni Asael ti nangkamat kenkuana, isut’ gapuna nga impatallikud ni Abner nga induyokti gayangna. Napuntaan ti tian ni Asael, ket simmalput ti gayang iti bukotna. Natuang ni Asael ket dagus a natay. Nagsardeng dagiti amin a nakadanon iti disso a nakapasagan ni Asael.

24 Nupay kasta, intuloy da Joab ken Abisai ti panangkamatda ken ni Abner. Limneken ti init idi makadanon dagiti agkabsat iti turod ti Amma, iti daya ti Gia iti dalan nga agturong iti let-ang ti Gabaon.

25 Naguummong manen dagiti tattao iti tribu ti Benjamin. Nagmaymaysada a bunggoy a tumulong ken ni Abner ket nagsaganada a makigubat iti tapaw ti turod ti Amma.

26 Impukkaw ni Abner ken ni Joab, “Isardengtan daytoy a panagpapatay. Awan duadua nga agbanag daytoy iti nakaro a panagsagaba. Agkakailiantayo. Bilinem dagiti tattao nga isardengda ti panangkamatda kadakami a kakabsatda.”

27 “Iti nagan ti sibibiag a Dios,” insungbat ni Joab, “no saanka a nagsao, saan koma nga insardeng dagiti tattaok ti panangsunsonda kadakay agingga iti bigat.”

28 Pinaguni ni Joab ti trumpeta a kas pagilasinan dagiti tattaona nga isardengda ti panangsunsonda kadagiti Israelita. Ket nagsardeng ti panagrarangetda.

29 Nagpatpatnag a nagna da Abner ken dagiti tattaona iti Tanap ti Jordan. Binallasiwda ti Karayan Jordan. Nagnada manen iti sumuno a bigat agingga a nakadanonda idiay Mahanaim.

30 Inummong ni Joab dagiti tattaona kalpasan ti panagsunsonda. Natakuatanna nga awan ti 19 kadagiti tattao ni David, malaksid ni Asael.

31 Tallo gasut ket innem a pulo kadagiti soldado ni Abner a nagtaud iti tribu ti Benjamin ti pinatay dagiti tattao ni David.

32 Innalada ti bangkay ni Asael ket intabonda iti nakaitaneman ti amana idiay Betlehem. Kalpasanna, nagpatpatnagda a nagdaliasat ket parbangonen idi dimtengda idiay Hebron.

1 Nabayag bassit a naggubgubat dagiti pasurot ti familia ni Saul ken dagiti pasurot ti familia ni David. Kabayatanna, pimmigsa a pimmigsa ti pannakabalin ni David idinto a kimmapsut a kimmapsut dagiti kabusorna.

Dagiti Annak ni David a Nayanak idiay Hebron

2 Nayanak idiay Hebron dagiti innem a lallaki nga annak ni David. Isuda dagiti sumaganad kas iti panagsasarunoda a naipasngay: ni Amnon nga anak ni Ahinoam a taga-Jezreel ti inana;

3 ni Keleab a ni Abigail a biuda ni Nabal a taga-Carmel ti inana; ni Absalom nga anak ni Maaca nga anak ni Tolmai nga ari ti Gesur;

4 ni Adoniha nga anak ni Haggit ti inana; ni Safatias nga anak ni Abital ti inana,

5 ken ni Itream nga anak ni Egla ti inana. Nayanak amin dagitoy idiay Hebron.

Makitipon ni Abner ken ni David

6 Nagtuloy ti panaggubat dagiti tattao a napudno ken ni Saul ken dagiti tattao ni David. Kabayatanna, bimmileg met ni Abner ket isu ti mabigbigbig a pangulo dagiti ofisiales ni Saul.

7 Adda sabali nga asawa ni Saul nga agnagan iti Rispa nga anak ni Aia. Iti maysa nga aldaw, pinabasol ni Isboset ni Abner a nangkaidda ken ni Rispa.

8 Nakapungtot ni Abner ket inyikkisna, “Kayatmo kadi a sawen a liputak ni Saul? Ipagarupmo kadi a maysaak a nalimed nga agserserbi iti Juda? Agingga ita, nagtalinaedak a napudno ken ni Saul, kadagiti kakabsatna ken kadagiti gagayyemna. Uray sika, diak impalubos a mayawatka iti pannakabalin ni David. Ngem, ita nga aldaw, pinabasolnak a kinaiddak ti maysa a babai.

9-10 InkaritiApoken ni David nga alaenna ti pagarian ken ni Saul ken kadagiti kaputotanna ket pagturayenna ni David iti Israel ken Juda manipud Dan agingga idiay Beerseba. Ita, uray no patayennak tiApono diak ibanag daytoy.”

11 Saan a nakasungbat ni Isboset, ta kasta unay ti butengna ken ni Abner.

12 Nangibaon ni Abner kadagiti mapan ken ni David nga adda idi idiay Hebron.Pinaibagana: “Siasino ti mangiturayto iti daytoy a daga? Agtulagta ket tulonganka a mangallukoy iti amin nga Israel a makikadua kenka.”

13 “Nasayaat!” insungbat ni David. “Umanamongak ngem adda maysa a kondision: masapul nga yegmo kaniak ni Mical nga anak ni Saul inton umaynak kitaen.”

14 Nangibaonmet ni David kadagiti mapan ken ni Isboset ket pinaibagana: “Isublim kaniak ni Mical nga asawak. Nangtedak idi iti 100 a nageppas a kudil dagiti mabagbagi dagiti Filisteo tapno maasawak.”

15 Pinaala ni Isboset ni Mical iti ayan ti asawana, ni Paltiel nga anak ni Lais.

16 Simmurot ni Paltiel agingga idiay Bahurim. Agsangsangit idi addada iti dalan. Ngem idi kinuna ni Abner, “Agawidkan!” nagawid ti lalaki.

17 Napan ni Abner kadagiti pangulo ti Israel ket kinunana kadakuada, “Nabayagen a kayatyo a ni David ti agbalin nga ariyo.

18 Ita, adtoyen ti gundawayyo. Laglagipenyo ti kinuna tiApo: ‘Aramatek ni David nga adipenko a mangisalakan kadagiti tattaok nga Israelita iti pannakabalin dagiti Filisteo ken kadagiti amin a kabusorda.’”

19 Nakisao met ni Abner kadagiti tattao iti tribu ti Benjamin ket kalpasanna, napan idiay Hebron tapno ibagana ken ni David ti nagnunumoan nga aramiden dagiti tattao ti Israel ken ti tribu ti Benjamin.

20 Idi sumangpet ni Abner idiay Hebron agraman dagiti 20 a lallaki, pinadayaan ida ni David.

21 Kinuna ni Abner ken ni David, “Innakon ket ummongek ti amin nga Israel a maipaay iti Natan-ok nga Ari. Awatendakanto nga ari. Magun-odmonton ti amin a tarigagayam ket iturayam ti entero a pagilian.”

Sakbay a pimmanaw ni Abner, impanamnama ni David kenkuana nga awan ti pakaan-anoanna.

Mapapatay ni Abner

22 Iti saan a nabayag, simmangpet ni Joab ken dagiti dadduma nga ofisiales ni David. Kagapgapuda a nagraut ket adu ti inyawidda a sinamsamda. Awanen ni Abner idiay Hebron gapu ta pinalubosan ni David kalpasan ti panangipatalgedna kenkuana nga awan ti pakaan-anoanna.

23 Idi dumteng ni Joab ken dagiti tattaona, naibaga kenkuana a napan ni Abner ken ni Ari David ket napalubosan a pumanaw kalpasan ti pannakaikari kenkuana nga awan ti pakaan-anoanna.

24 Napan ngarud ni Joab iti ari ket kinunana, “Apay a kasta ti inaramidmo? Immay ni Abner ngem pinalubosam ketdin nga awan ti nakaan-anoanna!

25 Dimo kad ammo nga immaynaka allilawen? Immay laeng tapno ammoenna ti ar-aramidem ken no sadino ti papanam?”

26 Kalpasanna, pinanawan ni Joab ni David sa nangibaon kadagiti mangkamakam ken ni Abner. Saan a naammoan daytoy ni David. Nakamakamda ni Abner iti lugar a managan iti Bubon ti Sira.

27 Idi agsubli ni Abner idiay Hebron, inayaban ni Joab iti asideg ti ruangan a kasla makisao kenkuana iti nalimed. Dinuyokna ti tian ni Abner. Iti kasta, napapatay ni Abner gapu ta pinatayna ni Asael a kabsat ni Joab.

28 Idi madamag ni David ti napasamak, kinunana, “Ammo tiApoa pulos nga awan ti basolko, kasta met dagiti pasurotko, iti pannakapapatay ni Abner.

29 Sapay koma ta ikaro ni Joab ken ti amin a kameng ti familiana ti pannakapapatayna. Iti tunggal kaputotan, adda koma latta lalaki iti familiana nga aggonorrea wenno agkukutel wenno ti laeng trabaho ti babai ti ammona nga aramiden wenno matay iti paggugubatan wenno agkurang ti kanenna!”

30 Ngarud, binales dagiti agkabsat a Joab ken Abisai ni Abner gapu iti panangpapatayna iti kabsatda nga Asael iti paggugubatan idiay Gabaon.

Maitabon ni Abner

31 Binilin ni David ni Joab ken dagiti tattaona a pigisenda ti pagan-anayda, agarruatda iti nakersang a lupot kas pakakitaan iti panagladingitda iti ipapatay ni Abner. Ket iti pannakaitabonna, nakipamumpon ni Ari David.

32 Naitabon ni Abner idiay Hebron; nagdung-aw ti ari, kasta met dagiti tattao.

33 Kastoy ti indung-aw ni David nga agpaay ken ni Abner:

“Apay a natay ni Abner a kasla maysa a maag?

34 Saan a nareppet dagiti imana,

saan met a nakawaran dagiti sakana.

Natay a kasla iti tao a pinatay dagiti managdakdakes!”

Ket sinangitan manen dagiti tattao.

35 Nagmalmalem a pinadas dagiti tattao a kinasarita ni David tapno mangan, ngem kinunana, “Isapatak iti Dios a dusaennak no manganak iti uray ania sakbay a lumnek ti init.”

36 Immanamong dagiti tattao iti inaramid ti ari. Kinapudnona, naragsakanda iti dadduma a nakitada nga inar-aramidna.

37 Naawatan dagiti amin a tattao ni David ken dagiti amin nga Israelita nga awan ti pakaibiangan ti ari iti pannakapapatay ni Abner.

38 Kinuna ti ari kadagiti ofisialesna, “Diyo kadi mabigbig a natay ita nga aldaw ti maysa a natan-ok a pangulo ti Israel?

39 Uray no siak ti napili nga ari, nakapsut ti pakinakemko ket diak maibturan ti kinaranggas dagitoy annak ni Zeruyas. Sapay koma ta dusaen tiApodagitoy a kriminal a kas kaikarianda.”