Author: admin

Ti Pannakigubat ni Ari Ahab kadagiti Taga-Siria

1 Pinagtitipon ni Ben-hadad nga ari ti Siria dagiti amin nga armadana tapno rautenda ti Samaria. Kaduana a makigubat ti 32 nga ari agraman dagiti kabalioda ken dagiti luganda a pakigubat.

2 Nangibaon kadagiti pannakabagina a mapan ken ni Ahab nga ari ti Israel ket kastoy ti ibagada kenkuana: “Dawaten ni Ari Ben-hadad nga

3 isukom kenkuana dagiti pirak ken balitokmo, dagiti assawam ken dagiti kapigsaan nga annakmo.”

4 “Ibagayo ken Ari Ben-hadad nga apok nga itedko ti kiddawenna; mabalinko nga ited ti bagik ken amin a kukuak,” insungbat ni Ahab.

5 Iti saan a mabayag, nagsubli ken ni Ahab dagiti naibaon. Adda manen sabali a dawat ni Ben-hadad: “Pinaibagak kenka a masapul nga itedmo kaniak dagiti pirak ken balitokmo, dagiti assawam ken dagiti annakmo.

6 Ngem ita, ibaonko dagiti ofisialesko a mangsukimat iti palasiom ken dagiti balbalay dagiti ofisialesmo ket alaenda ti amin nga ibilangdaa napateg. Addadanto dita iti agarup kastoy nga oras inton bigat.”

7 Pinaayaban ni Ari Ahab amin dagiti pangulo ti pagilian ket kinunana, “Kitaenyo, kayatnatay a dadaelen daytoy a tao. Pinaibagana a kayatna nga alaen dagiti assawak ken dagiti annakko, dagiti pirak ken balitokko ket immannugotak.”

8 Insungbat dagiti pangulo ken dagiti tattao, “Saankayo nga umannugot; diyo ikaskaso dayta a tao.”

9 Ngarud, kastoy ti sungbat ni Ahab kadagiti pannakabagi ni Ben-hadad: “Ibagayo iti apok nga ari a patgak ti umuna a dawatna ngem diak mabalin nga ited daytoy maikadua a kiddawenna.”

Pimmanaw dagiti naibaon sada met la nagsubli. Adda manen sabali a paibaga

10 ni Ben-hadad: “Dadaelek daytoy a siudadmo ket ipanawto dagiti tattaok ti amin a batbato ken ladrilio a nakabangonanna. Uray patayendak dagiti didiosen no diak aramiden daytoy!”

11 Insungbat ni Ari Ahab, “Ibagayo ken ni Ari Ben-hadad a saan nga agpangas ti pudpudno a soldado no mapan iti paggugubatan.”

12 Naawat ni Ben-hadad ti sungbat ni Ahab idi madamada nga agiinum kadagiti kakaduana nga agturay iti uneg ti toldada. Binilin ni Ben-hadad dagiti tattaona nga agsaganada a mangraut iti siudad ket nagtungpalda.

13 Kabayatanna, adda profeta a napan ken ni Ari Ahab ket kinunana, “Imbaga tiApoa dika agbuteng iti dayta dakkel nga armada. Pagballigiennaka tiApoita nga aldaw ket maammoam nga isu tiApo.”

14 “Siasino ti mangipangulo iti iraraut?” sinaludsod ni Ahab.

Insungbat ti profeta, “Kuna tiApoa dagiti agtutubo a mannakigubat nga adda iti babaen dagiti gobernador.”

“Siasino ti mangipangulo iti kadakkelan a bilang ti buyot?” sinaludsod ti ari.

“Sika,” insungbat ti profeta.

15 Ngarud, inayaban ti ari dagiti agtutubo a mannakigubat nga adda iti babaen dagiti heneral dagiti probinsia—232 da amin. Inummongna met ti armada ti Israel nga agdagup iti 7,000 a soldado.

16-17 Rimmautda iti tengnga ti aldaw. Immuna a dimmarup dagiti agtutubo. Madama idi nga agbabartek da Ben-hadad ken dagiti 32 nga ari kadagiti toldada. Dimteng dagiti imbaon ni Ben-hadad a napan nagsiim ket impadamagda nga adda bunggoy ti mannakigubat a rimmuaren iti Samaria.

18 Imbilinna, “Alaenyo ida a sibibiag, umayda man makigubat wenno makikappia.”

19 Immuna ngarud a rimmuar dagiti agtutubo a mannakigubat a sinaruno ti armada dagiti Israelita.

20 Pinatay ti tunggal maysa ti kinarangetna. Nagtataray dagiti soldado ti Siria ket kinamat ida dagiti Israelita. Ngem nakalibas ni Ben-hadad a sikakabalio a kinuyog ti sumagmamano a soldado a nagkabalio.

21 Napan ni Ari Ahab iti paggugubatan, innalanadagiti kabalio ken lugan a pakigubat ket adu ti pinapatayna kadagiti taga-Siria.

22 Kalpasanna, napan ti profeta ken ni Ari Ahab ket kinunana, “Agsublika ket papigsaem ken isaganam a naimbag ti armadam. Planoem a nasayaat ti aramidem gapu ta rumaut manen ti ari ti Siria inton umay a tawen.”

Ti Maikadua nga Iraraut dagiti Taga-Siria

23 Kinuna dagiti ofisiales ni Ari Ben-hadad, “Naparmekdatayo gapu ta didiosen dagiti bambantay dagiti didiosen ti Israel. Ngem awan duadua a parmekentayo dagiti Israelita no gubatentayo ida kadagiti patad.

24 Ita, ikkatem dagiti 32 nga ari a pangulo iti gubat ket suktam ida kadagiti heneral.

25 Mangbuangayka iti dakdakkel nga armada, kas iti armada a nangpanaw kenka ken buklen iti isu met la a bilang dagiti kabalio ken lugan a pakigubat. Sarangtentayo dagiti Israelita kadagiti tanap ket parmekentayo ida iti daytoy a pannakigubattayo.”

Immanamong ni Ari Ben-hadad. Tinungpalna ti pammagbagada.

26 Iti sumaruno a tawen, inummongna dagiti tattaona ket nagturongda iti siudad ti Afec tapno rautenda dagiti Israelita.

27 Naguummong met dagiti Israelita ket kalpasan a naited dagiti kasapulanda a makigubat, rimmuarda a mangsaranget kadagiti taga-Siria. Nagkampoda iti dua a bunggoy ket arigda iti dua a babassit nga arban ti kalding no maidiligda kadagiti taga-Siria a nagwaras iti away.

28 Adda profeta a napan ken ni Ari Ahab ket kinunana, “Kastoy ti kuna tiApo: ‘Gapu ta ipagarup dagiti taga-Siria a didiosenak dagiti turod ket saan a didiosen kadagiti patad, yawatko iti pannakabalinmo ti dakkel nga armadada ket maammoanyonto kadagiti tattaom a siak ni Yahweh.’”

29 Agsinnumbangir ti kampo dagiti taga-Siria ken ti kampo dagiti Israelita. Pito nga aldaw a saan a rimmuar dagiti dua a bunggoy. Iti maikapito nga aldaw, nangrugi ti gubat ket 100,000 a taga-Siria ti pinatay dagiti Israelita.

30 Nagkamang dagiti nakalasat iti uneg ti Afec, a nakatayan ti 27,000 kadakuada a natupakan idi marba dagiti bakud ti siudad.

Nagkamang met ni Ben-hadad iti uneg ti siudad ket naglemmeng iti akinlikud a kuarto ti maysa a balay.

31 Napan kenkuana dagiti ofisialesna ket kinunada, “Nadamagmi a manangngaasi dagiti ari nga Israelita. Palubosannakami koma a mapan iti ari ti Israel a sibabarikeskami iti nakersang a lupot ken napulipolan iti tali dagiti tengngedmi ket nalabit a saannaka a patayen.”

32 Ngarud, nagbarikesda iti nakersang a lupot ken nangipulipolda iti tali iti tengngedda sada napan ken ni Ahab ket kinunada, “Ipakpakaasi ni adipenmo a Ben-hadad nga ispalem ti biagna.”

Insungbat ni Ahab, “Sibibiag kadi pay laeng? Nasayaat! Ibilangko a kas maysa a kabsat!”

33 Agsapsapul dagiti ofisiales ni Ben-hadad iti napintas a pagilasinan ket idi “kabsat” kuna ni Ahab, kinunada a dagus, “Wen, ni kabsatmo a Ben-hadad!”

“Inkay alaen,” imbilin ni Ahab. Idi sumangpet ni Ben-hadad, inawis ni Ahab a makikalugan kenkuana iti luganna a pakigubat.

34 Kinuna ni Ben-hadad, “Isublik kenka dagiti ili nga innala daydi amak iti daydi amam ket mabalinmo ti mangipatakder iti sentro ti negosio idiay Damasco a kas iti inaramid daydi amak idiay Samaria.”

Insungbat ni Ahab, “Wayawayaanka ngarud gapu kadagitoy a kondision.” Nagaramidda iti katulagan a nagfinnirmaanda ket pinalubosanna ni Ben-hadad.

Ipakaammo ti Maysa a Profeta ti Pannakaukom ni Ahab

35 Binilin ni Yahweh ti maysa a kameng ti gunglo dagiti profeta ket kinuna ti maysa a profeta iti padana a profeta, “Kabilennak!” Ngem saan a kinayat ti profeta,

36 isua kinunana kenkuana, “Gapu ta sinalungasingmo ti bilin tiApo, patayennaka ti maysa a leon apaman a makapanawka iti yanko.” Apaman a nakapanaw, adda dimteng a leon ket pinatayna ti profeta.

37 Adda sabali a tao a nasarakan ti isu met la a profeta ket kinunana, “Kabilennak.” Kinabil ngarud ti lalaki ket nasugatan ti profeta.

38 Binarabadan ti profeta ti rupana iti lupot tapno awan ti makailasin kenkuana. Napan iti igid ti dalan a mangur-uray iti ari ti Israel.

39 Idi lumabas ti ari, inawagan ti profeta ket kinunana, “Natan-ok nga Ari, madamaak a makigubgubat idi inyeg kaniak ti maysa a soldado ti maysa a kabusor a natiliwda ket kinunana, ‘Guardiaam daytoy a tao; no makalibas, ta biagmo ti pagbayadmo wenno agmultaka iti 3,000 a bagi ti pirak.’

40 Ngem adu ti nakakumikomak ket nakalibas ti lalaki.”

Insungbat ti ari, “Naipakaammomon ti sentensiam ket masapul a madusaka.”

41 Dinagdagus ti profeta nga inikkat ti lupot a naibarabad iti rupana ket nabigbig ti ari a maysa kadagiti profeta ti kasangsangona.

42 Kinuna ti profeta iti ari, “Kastoy ti sao tiApo: ‘Gapu ta impalubosmo nga aglibas ti tao nga imbilinko a mapapatay, ta biagmo ti pagbayadmo ket madadaelto ti armadam gapu ta binay-am a makatalaw ti armadana.’”

43 Mariribuk ken madandanagan ti ari idi agawid idiay Samaria.

Ti Kaubasan ni Nabot

1 Iti asideg ti palasio ni Ari Ahab idiay Jezreel, adda kaubasan ti maysa a tao nga agnagan iti Nabot.

2 Iti naminsan, kinuna ni Ahab ken ni Nabot, “Itedmo kaniak ti kaubasan; asideg ti kaubasan iti palasiok ket kayatko a mulaan ti daga iti natnateng. Ania ti kaykayatmo? Suktak iti nasaysayaat a kaubasan wenno gatangek?”

3 “Tinawidko daytoy a kaubasan kadagiti kapuonak,” insungbat ni Nabot. “Iparit tiAponga itedko kenka!”

4 Nagawid ni Ahab a mariribuk ken makapungtot gapu iti sinao ni Nabot kenkuana. Nagidda iti katrena, simmango iti diding ket dina kayat ti mangan.

5 Napan kenkuana ni Jezebel nga asawana ket sinaludsodna, “Apay a mariribukanka? Apay a dimo kayat ti mangan?”

6 Insungbat ni Ahab, “Gapu iti imbaga kaniak ni Nabot. Insingasingko a gatangek ti kaubasanna wenno suktak iti sabali a kaubasan no dayta ti kayatna ngem imbagana a diak mabalin a tagikuaen ti kaubasanna!”

7 “Saan kadi a sika ti ari?” insungbat ni Jezebel. “Ala, bumangonkan ket agragsak ken manganka. Alaek ti kaubasan ni Nabot nga agpaay kenka!”

8 Nangaramid ti reyna iti sumagmamano a surat. Infirmana ti nagan ni Ahab kadakuada, minarkaanna iti timbre ti ari sana impatulod ida kadagiti ofisiales ken kadagiti mabigbigbig nga umili ti Jezreel.

9 Kastoy ti linaon ti surat: “Mangipakdaarkayo iti aldaw a panagayunar. Ummongenyo dagiti tattao ket itedyo ken ni Nabot ti kangrunaan a pagtugawan.

10 Mangalakayo iti dua a managdakdakes a lallaki a mangpabasol kenkuana iti rupanrupa nga ilunlunodna ti Dios ken ti ari. Kalpasanna, ipanyo iti ruar ti siudad ket uborenyo agingga a matay.”

11 Inaramid dagiti ofisiales ken dagiti kangrunaan nga umili ti Jezreel ti imbilin ni Jezebel.

12 Impakaammoda ti aldaw a panagayunar, inummongda dagiti tattao ket pinagtugawda ni Nabot iti kangrunaan a pagtugawan.

13 Iti imatang ti publiko, pinabasol dagiti dua a baliodong ni Nabot nga ilunlunodna ti Dios ken ti ari. Ngarud, naipan ni Nabot iti ruar ti siudad ket binatobatoda agingga a natay.

14 Pinaibagada ken ni Jezebel ti pannakapapatay ni Nabot.

15 Apaman a naammoan daytoy ni Jezebel, kinunana ken ni Ahab, “Natayen ni Nabot. Tagikuaemon ti kaubasanna a dina kayat nga ilako kenka.”

16 Dinagdagus ni Ahab ti napan iti kaubasan tapno tagikuaenna.

17 Kinuna ni Yahweh ken ni Elias a profeta a taga-Tisbe,

18 “Inka ken ni Ahab nga ari ti Samaria. Adda ita iti kaubasan ni Nabot tapno tagikuaenna.

19 Ibagam kenkuana a siak, ni Yahweh, kastoy ti kunak kenkuana: ‘Kalpasan ti panangpapataymo iti tao, alaem pay kadi ti kukuana?’ Ibagam kenkuana a kastoy ti kunak, ‘Iti mismo a disso a nangdilpatan dagiti aso iti dara ni Nabot, dilpatandanto met ti daram—wen, ti bukodmo a dara!’”

20 Idi makita ni Ahab ni Elias, kinunana, “Nasarakannak kadi met laengen, sika a kabusorko?”

Insungbat ni Elias, “Wen, gapu ta impamaysam ti agaramid iti dakes iti imatang tiApo.

21 Kastoy ngarud ti kuna kenka tiApo, ‘Yegko kenka ti didigra. Pukawenkanto, kasta met ti tunggal lalaki iti familiam, adipen man wenno siwawaya.

22 Maipadanto ti familiam iti familia ni Ari Jeroboam nga anak ni Nebat ken iti familia ni Ari Baasa nga anak ni Ahija, gapu ta pinagpungtotnak iti panangisungsongmo nga agbasol ti Israel.’

23 Nomaipapan ken ni Jezebel, kuna tiApoa rangrangkayento dagiti aso ti bangkayna iti siudad ti Jezreel.

24 Ket ti siasinoman a kabagiam a matay iti uneg ti siudad, kanento dagiti aso ket ti siasinoman kadakuada a matay iti away kanento dagiti buitre.”

(

25 Awanen ti kas ken ni Ahab a nangipamaysa a namimpinsan a nagaramid iti dakes iti imatang ni Yahweh—babaen iti panangsugsog ni Jezebel nga asawana.

26 Nakarimrimon ti inaramidna iti panagdaydayawna kadagiti imahen, kas kadagiti Amorreo a pinagtalaw ni Yahweh iti daga idi sumangpet dagiti Israelita.)

27 Idi malpas ti panagsao ni Elias, rinay-ab ni Ahab ti pagan-anayna, inuksobna ket nagarruat iti nakersang a lupot. Dina kayat ti mangan. Naturog a sikakawes iti nakersang a lupot ket nagpagnapagna a malmalday ken masmasnaayan.

28 Kinuna ni Yahweh ken ni profeta Elias,

29 “Dimo kadi madlaw ti panagpakumbaba ni Ahab iti imatangko? Gapu ta inaramidna daytoy, saankonto a yeg ti didigra bayat ti panagbiagna. Idissuorkonto ti didigra iti familia ni Ahab inton panawen ti anakna a lalaki.”

Ballaagan ni Micaias ni Ahab

1 Tallo a tawen nga adda kappia iti nagbaetan ti Israel ken Siria.

2 Ngem iti maikatlo a tawen, napan kinita ni Jehosafat nga ari ti Juda ni Ahab nga ari ti Israel.

3 Sinaludsod ni Ahab kadagiti ofisialesna, “Kukuatayo ti Ramot idiay Galaad. Apay nga awan pay inaramidtayo tapno isubli ti ari ti Siria kadatayo?”

4 Ket kinuna ni Ahab ken ni Jehosafat, “Kayatmo kadi ti kumuyog kaniak a mangraut iti Ramot?”

“Madadaanak inton nakasaganaka,” insungbat ni Jehosafat, “kasta met dagiti soldadok ken dagiti soldado a nagkabalio.

5 Ngem umuna pay a makiumanka itiApo.”

6 Inayaban ni Ahab dagiti profeta—agarup uppat a gasutda—ket sinaludsod ti ari, “Rumbeng ngata a rautek ti Ramot?”

“Rautem, pagballigiennaka tiApo,” insungbatda.

7 Ngem sinaludsod ni Jehosafat, “Awan kadin sabali a profeta a mabalin a pakiumanan itiApo?”

8 “Adda pay maysa,” insungbat ni Ahab. “Isu ni Micaias nga anak ni Imla. Ngem kagurgurak ta awan pay naimbag nga impadtona maipapan kaniak; pasig a dakes.”

“Saan a rumbeng a sawem dayta!” kinuna ni Jehosafat.

9 Ngarud, inayaban ni Ari Ahab ti maysa nga ofisial nga agserserbi kenkuana ket binilinna a dagdagusenna a mapan alaen ni Micaias.

10 Adda dagiti dua nga ari iti pagirikan iti ruar ti ruangan ti Samaria. Agtutugawda iti bukodda a trono ken sikakawesda iti pagan-anayda a kas ari. Iti sangoananda, agipadpadto dagiti amin a profeta.

11 Maysa kadagiti profeta, ni Zedekias nga anak ni Kenaana, ti nangaramid kadagiti sinan-sara a landok ket kinunana ken ni Ahab, “Kastoy ti sao tiApo: ‘Dagitoyto ti aramatem a pakigubat kadagiti taga-Siria agingga a maparmekmo ida.’”

12 Kasta met ti imbaga dagiti dadduma a profeta. “Rautem ti Ramot ket agballigika,” kinunada. “Pagballigiennaka tiApo.”

13 Kabayatanna, kinuna ti naibaon a mangala ken ni Micaias, “Sangsangkamaysa dagiti profeta nga agkuna nga agballigi ti ari. Masapul a kasta met ti sawem.”

14 Ngem insungbat ni Micaias, “Isapatak iti nagan ti sibibiag ngaApoa no ania ti sawen tiApo, isu ti sawek.”

15 Idi dumatag ti profeta iti ari, sinaludsod kenkuana ti ari, “Micaias, rumbeng kadi wenno saan a rautenmi ken ni Ari Jehosafat ti Ramot?”

“Inka rauten. Awan duadua nga agballigika. Pagballigiennakanto tiApo,” insungbat ni Micaias.

16 Ngem kinuna ni Ahab, “Namin-anon nga imbagak kenka a ti laeng pudno ti sawem kaniak iti nagan tiApo?”

17 Simmungbatni Micaias, “Nakitak dagiti Israelita a nawarawara kadagiti turod. Kasda la karnero nga awan ti mangipastor kadakuada. Ket kinuna tiApo, ‘Awan ti pangulo dagitoy a tattao; pagawidem nga awan ti pakaan-anoanda.’”

18 Kinuna ni Ahab ken ni Jehosafat, “Kitaem, imbagak kenka nga awan ti ipadto ni Micaias a naimbag maipapan kaniak; bin-ig a dakes!”

19 Intuloyni Micaias, “Ita, denggem ti sao tiApo! Nakitak tiAponga agtugtugaw iti tronona sadi langit; agtatakder dagiti anghelesna iti abayna.

20 Sinaludsod tiApo, ‘Siasino kadakayo ti mangallilaw ken ni Ahab tapno mapan idiay Ramot ket matay sadiay?’ Nagduduma ti sinao dagiti angheles.

21 Idi agangay, adda maysa nga espiritu a nagpasango, inasitganna tiApoket kinunana, ‘Siak ti mangallilaw kenkuana.’

22 ‘Kasano?’ sinaludsod tiApo. Insungbat ti espiritu, ‘Innak kadagiti profeta ni Ahab ket pagulbodek ida amin.’ Kinuna tiApo, ‘Inka ngaruden. Agballigikanto a mangallilaw kenkuana.’”

23 Ket inggibus ni Micaias, “Daytoy ti naaramid. Pinagulbod tiApodagitoy a profetam. Mismo a tiApoti nangituyang iti pannakadidigram!”

24 Inasitgan ni Zedekias ni Micaias sana tinungpa ket kinunana, “Kasano a rimmuar kaniak ti espiritu tiApotapno agsao kenka?”

25 “Maammoamto inton inka aglemmeng iti akinlikud a kuarto ti maysa a balay,” kinuna ni Micaias.

26 Kalpasanna, binilin ni Ari Ahab ti maysa kadagiti ofisialesna: “Tiliwem ni Micaias ket idatagmo iti mangituray iti siudad, ni Amon ken ni Prinsipe Joas.

27 Ibagam kadakuada nga ipisokda iti pagbaludan ket tinapay ken danum laeng ti ipakanda kenkuana agingga nga agsubliak a sikakaradkad.”

28 “No agsublika nga awan ti dakes a napasamakmo,” kinuna ni Micaias, “dayta ti pakakitaan a saan a nagsao kaniak tiApo!” Ket innayonna, “Tunggal maysa kadakayo, denggenyo ti imbagak!”

Matay ni Ahab

29 Nagkuyog ni Ahab nga ari ti Israel ken ni Jehosafat nga ari ti Juda a napan nangraut iti Ramot idiay Galaad.

30 Kinuna ni Ahab ken ni Jehosafat, “Manglimlimoak a makigubat ngem agkaweska a kas ari.” Nanglimlimo ngarud ti ari ti Israel ket napan iti paggugubatan.

31 Binilin idi ti ari ti Siria dagiti 32 a pangulo dagiti lugan a pakigubat a dida makiranget iti siasinoman malaksid ti ari ti Israel.

32 Ngarud, idi makitada ni Ari Jehosafat impagarupda nga isu ti ari ti Israel ket dinarupda a dagus. Ngem idi nagriaw ni Jehosafat,

33 naammirisda a saan nga isu ti ari ti Israel ket insardengda a kinamat.

34 Ngem adda mannakigubat a Siriano a nangipasaksak iti panana ket napuntaanna ni Ari Ahab iti nagsaipan ti kabalna. “Nasugatanak!” inriaw ti ari iti mangiturturong iti luganna a pakigubat ket imbilinna nga umadayoda iti paggugubatan.

35 Iti kangitingitan ti gubat, nagtalinaed a sisasadag ni Ari Ahab iti luganna a sumangsango kadagiti Siriano. Nagayus ti dara ti sugatna ket nalapunos ti datar ti luganna a pakigubat. Natay ti ari idi dumteng ti sumipnget.

36 Idi dandani lumnek ti init, adda bilin a naipaulog iti armada ti Israel, “Tunggal maysa agawid iti bukodna a pagilian ken siudad!”

37 Natay ngarud ni Ari Ahab. Naipan ti bangkayna idiay Samaria a nangitanemanda kenkuana.

38 Dinalusanda ti luganna iti pagdigosan idiay Samaria. Sadiay, dinilpatan dagiti aso ti darana ken nagbuggoan met dagiti balangkantis a babbai, kas imbaga ni Yahweh a maaramid.

39 Nailanad itiPakasaritaan dagiti Ari ti Israelti dadduma a pasamak iti panagturay ni Ari Ahab, agraman ti pakasaritaan ti marfil a palasiona ken amin a siudad a binangonna.

40 Idi natay, ni Ahazias nga anakna ti simmukat kenkuana nga ari.

Ni Jehosafat nga Ari ti Juda

41 Iti maikapat a tawen a panagturay ni Ahab nga ari ti Israel, naisaad ni Jehosafat nga anak ni Asa nga ari ti Juda.

42 Tallopulo ket lima idi ti tawen ni Jehosafat ket nagturay idiay Jerusalem iti 25 a tawen. Ni Azuba nga anak ni Silai ti inana.

43 Kas iti daydi Asa nga amana, nalinteg iti imatang ni Yahweh. Ngem dina dinadael dagiti pagdaydayawan ket intultuloy dagiti tattao ti nagidatag iti daton ken agpuor iti insenso sadiay.

44 Nakikappia ni Jehosafat iti ari ti Israel.

45 Nailanad itiPakasaritaan dagiti Ari ti Judati dadduma a pasamak iti panagturay ni Jehosafat, dagiti gapuananna a mangipakita iti kinaturedna ken dagiti nakigubgubatanna.

46 Pinagtalawna dagiti natda a lallaki ken babbai a balangkantis a nagtalinaed a nagserbi kadagiti altar a pagdaydayawan dagiti pagano uray idi kalpasan ti panagturay ni Asa nga amana.

47 Awan ti ari ti Edom kadagidi a panawen; nagturay sadiay ti pannakabagi ti ari ti Juda.

48 Nagpaaramid ni Ari Jehosafat iti adu a barko a para biahe tapno aggatang iti balitok idiay Ofir ngem pulos a dida naglayag ta narbada idiay Eziongeber.

49 Iti daydi a tiempo, insingasing ni Ahazias nga ari ti Israel a makipaglayag dagiti tattaona kadagiti tattao ni Jehosafat ngem saan a kinayat ni Jehosafat.

50 Natay ni Jehosafat ket naitanem idiay Jerusalem. Ni Jehoram nga anakna ti simmukat kenkuana a kas ari.

Ni Ahazias nga Ari ti Israel

51 Iti maika-17 a tawen a panagturay ni Jehosafat nga ari ti Juda, naisaad ni Ahazias nga anak ni Ahab nga ari ti Israel ket dua a tawen a nagturay idiay Samaria.

52 Nagbasol ken ni Yahweh. Tinuladna dagiti dakes nga aramid daydi amana nga Ahab, ni Jezebel nga inana, ken daydi Ari Jeroboam a nangisungsong kadagiti Israelita nga agbasol.

53 Nagdaydayaw ken nagserbi ken ni didiosen a Baal ket kas iti daydi amana a sinarunona a nagturay, pinagpungtotna ni Yahweh a Dios ti Israel.

Da Elias ken Ari Ahazias

1 Kalpasan ti ipapatay ni Ahab nga ari ti Israel, immalsa ti pagilian ti Moab a maibusor iti Israel.

2 Natnag ni Ahazias nga ari ti Israel manipud iti balkon ti akingngato a kuarto ti palasiona idiay Samaria. Gapu ta nakaro dagiti sugatna, nangibaon kadagiti mapan makiuman ken ni Baalzebub a dios ti Ekron a siudad dagiti Filisteo, tapno ammoenda no maimbagan pay wenno saan.

3 Ngem binilin ti maysa nga anghel ni Yahweh ni profeta Elias a taga-Tisbe a sabtenna dagiti imbaon ni Ari Ahazias ket saludsodenna, “Apay a mapankayo makiuman ken ni Baalzebub a dios ti Ekron? Gapu kadi ta ipagarupyo nga awan ti Dios iti Israel?

4 Ibagayo iti ari a kastoy ti sao ni Yahweh, ‘Saanka a maimbagan kadagiti sugatmo, ipataymonto la ketdi dagita!’”

Tinungpal ni Elias ti imbilin tiApo.

5 Idi nagsubli dagiti naibaon, sinaludsod ti ari, “Apay a nagsublikayo?”

6 Insungbatda, “Nasabatmi ti maysa a lalaki a nangibaga nga agsublikami ket sawenmi kenka ti sao tiApo, ‘Apay a mangibaonka kadagiti mapan makiuman ken ni Baalzebub a dios ti Ekron? Gapu kadi ta ipagarupmo nga awan Dios ti Israel? Saanka a maimbagan iti sugatmo; awan duadua a matayka!’”

7 “Ania ti langa ti lalaki?” sinaludsod ti ari.

8 “Dutdotanti pagan-anayna kennagbarikes iti lalat,” insungbatda.

“Isu ni Elias!” impukkaw ti ari.

9 Nangibaon iti maysa a kapitan ken 50 a soldado a mangala ken ni Elias. Nasarakanda ni Elias nga agtugtugaw iti tapaw ti maysa a turod. Kinuna ti kapitan kenkuana, “Tao ti Dios, paayabannaka ti ari.”

10 “Notaonak ti Dios,” kinuna ni Elias, “agtudo koma iti apuy ket puorannaka agraman dagiti tattaom!” Pagammoan, nagtudo iti apuy ket inkisapna ti kapitan ken dagiti soldadona.

11 Nangibaon manen ti ari iti maysa a kapitan ken 50 a soldado; napanken ni Elias ket kinunana kenkuana, “Tao ti Dios, imbilin ti ari nga umayka a dagus.”

12 “No taonak ti Dios,” kinuna ni Elias, “agtudo koma iti apuy ket puorannakayo agraman dagiti tattaom!” Pagammoan, nagtudo iti apuy ket inkisapna ti kapitan ken dagiti soldadona.

13 Nangibaon manen ti ari iti maysa a kapitan ken 50 a soldado. Simmang-at iti turod, sa nagparintumeng iti sangoanan ni Elias ket impakpakaasina, “Tao ti Dios, kaasiannak agraman dagiti tattaok. Dinakam papatayen!

14 Natay ti dua a kapitan ken dagiti soldadoda iti apuy a naggapu iti langit; ngem pangngaasim ta kaasiannakami!”

15 Kinuna ti anghel ni Yahweh ken ni Elias, “Kumuyogka kenkuana a bumaba ket dika agbuteng.” Kimmuyog ni Elias iti kapitan a napan iti ari.

16 Kinuna ni Elias iti ari, “Kastoy ti sao tiApo: ‘Gapu ta nangibaonka kadagiti mapan makiuman ken ni Baalzebub a dios ti Ekron—a kasla ti Dios iti Israel a pakiumanam, saanka a maimbagan. Dikanto makabangon iti iddam ket ditanton ti pakatayam!’”

17 Natay ni Ahazias kas kinuna ni Yahweh ken ni Elias. Gapu ta awan lalaki nga anak ni Ahazias, ni Joram a kabsatnati simmukat kenkuana nga ari. Nagturay iti maikadua a tawen a panagturay ni Jehoram nga anak ni Jehosafat nga ari ti Juda.

18 Nailanad itiPakasaritaan dagiti Ari ti Israelti dadduma a pasamak iti panagturay ni Ari Ahazias.

Maipan ni Elias sadi Langit

1 Dimteng ti tiempo a panangala ni Yahweh ken ni Elias idiay langit babaen iti alipugpog. Nagrubbuat da Elias ken Eliseo idiay Gilgal

2 ket iti dalan, kinuna ni Elias ken ni Eliseo, “Agbatika ditoy. Imbilin tiAponga innak idiay Betel.”

Ngem kinuna ni Eliseo, “Ikarik kenka ken iti sibibiag ngaApoa saanka a panawan.” Ket nagkuyogda a napan idiay Betel.

3 Adda bunggoy ti profeta nga agnaed sadiay a napan ken ni Eliseo. Sinaludsodda kenkuana, “Ammom kadi nga ipanaw tiApoti apom kenka ita nga aldaw?”

“Wen, ammok,” insungbat ni Eliseo. “Ngem saantay koma a pagsasaritaan.”

4 Kinuna ni Elias ken ni Eliseo, “Agbatika ditoy. Imbilin tiApoa mapanak idiay Jerico.”

Ngem insungbat ni Eliseo, “Ikarik kenka ken iti kinapudnok iti sibibiag ngaApoken iti naganmo a saanka a panawan.” Ket nagkuyogda a napan idiay Jerico.

5 Adda bunggoy dagiti profeta idiay Jerico a napan ken ni Eliseo. Sinaludsodda kenkuana, “Ammom kadi nga ipanaw tiApoti apom kenka ita nga aldaw?”

“Wen, ammok,” insungbat ni Eliseo. “Ngem saantay koma a pagsasaritaan.”

6 Kinuna ni Elias ken ni Eliseo, “Agbatika ditoy; imbilin tiApoa mapanak iti Karayan Jordan.”

Ngem insungbat ni Eliseo, “Ikarik kenka ken iti sibibiag ngaApoa saanka a panawan.” Ngarud, intuloyda ti panagdaliasatda.

7 Limapulo kadagiti profeta ti simmurot kadakuada a napan idiay Jordan. Nagsardeng da Elias ken Eliseo iti igid ti karayan idinto a nagtakder dagiti profeta iti pangadaywen bassit.

8 Inikkat ni Elias ti kagayna, kinupinna sana imbaut iti danum. Nagbingay ti danum ket bimmallasiwda ken ni Eliseo iti namaga a daga.

9 Sadiay,kinuna ni Elias ken ni Eliseo, “Ania ti kayatmo nga ipaayko kenka sakbay a maipanawak?”

“Ibingayannak iti pannakabalinmo a mangpabileg a sumukat kenka,”insungbat ni Eliseo.

10 “Narigat a mapatgan dayta a dawatmo,” kinuna ni Elias. “Ngem awatemto no makitam ti pannakaipanawko. No dinak makita a maipanaw, saan a mapatgan ti dawatmo.”

11 Nagsarsaritada bayat ti pannagnada. Pagammoan, adda umap-apuy a lugan a pakigubat a guyguyoden dagiti umap-apuy a kabalio iti baetda ket naipangato ni Elias sadi langit babaen iti alipugpog.

12 Nakitani Eliseo daytoy ket impukkawna ken ni Elias, “O amak! O amak! Nabileg a salaknib ti Israel! Awankan!” Manipud idin, saannan a nakita ni Elias.

Gapu iti lidayna, pinigis ni Eliseo ti kawesna.

13 Pinidutna ti kagay ni Elias sa nagsubli ket nagtakder iti igid ti Jordan.

14 Imbautna ti kagay ni Elias iti danum ngem saan a nagbingay ti danum.“Sadino ti ayan tiApoDios ni Elias?” kinunana. Imbautna manen ti kagay iti danum ket nagbingay ti danum. Nagna ni Eliseo a bimmallasiw.

15 Nakita dagiti 50 a profeta ni Eliseo ket kinunada, “Adda ken ni Eliseo ti bileg ni Elias!” Napanda sinabat ni Eliseo, nagpaklebda iti sangoananna

16 ket kinunada, “Limapulokami ditoy a napipigsa a lallaki. Intayo sapulen ti apom. Nalabit nga impanaw laeng ti espiritu tiApoket imbatina iti maysa a bantay wenno iti maysa a tanap.”

“Saankayo a mapan,” kinuna ni Eliseo.

17 Ngem nagpilitda agingga nga immanamong ni Eliseo ket pinalubosanna ida. Napanda amin a limapulo. Tallo nga aldaw nga impasnekda ti nagsapul ken ni Elias ngem dida nabirokan.

18 Idi nagsublida ken ni Eliseo nga agur-uray idiay Jerico, kinunana kadakuada, “Diak kadi imbaga kadakayo a dikay mapmapan?”

Dagiti Milagro nga Inaramid ni Eliseo

19 Adda sumagmamano nga umili ti Jerico a napan ken ni Eliseo ket kinunada, “Pagaammom, apo, a napintas daytoy a siudad ngem saan a nasayaat ti danum gapu ta saan a makapabunga.”

20 “Mangikabilkay iti asin iti baro a malukong ket yegyo kaniak,” imbilin ni Eliseo. Impanda kenkuana ti malukong.

21 Napan iti ubbog a paggapuan ti danum ti siudad, impurruakna ti asin iti danum sana kinuna, “Kastoy ti sao tiApo: ‘Dalusak daytoy a danum tapno saanen a mangyeg iti patay wenno mangregreg iti sikog.’”

22 Manipud idin, nadalusen dayta a danum a kas imbaga ni Eliseo.

23 Pimmanaw ni Eliseo idiay Jerico tapno mapan idiay Betel. Iti dalan, adda sumagmamano nga ubbing a lallaki a rimmuar iti maysa nga ili ket rinabrabakda ni Eliseo. “Pumanawka ditoy, kalbo!” impukkawda.

24 Timmalliaw ni Eliseo, kinitana ida iti nasakit sana inlunod ida iti nagan ni Yahweh. Rimmuar ti dua a kabaian nga oso iti bakir ket 42 kadagiti ubbing ti rinangrangkayda.

25 Manipud sadiay, napan ni Eliseo ket napan idiay Bantay Carmel; iti saan a mabayag, nagsubli idiay Samaria.

Aggubat ti Israel ken Moab

1 Iti maika-18 a tawen a panagturay ni Jehosafat nga ari ti Juda, naisaad nga ari ti Israel ni Joram nga anak ni Ahab, ket nagturay idiay Samaria iti 12 a tawen.

2 Nagbasol ken ni Yahweh ngem saan a dakdakes ngem iti daydi ni amana wenno inana a Jezebel. Ngamin, rinakrakna ti imahen nga impatakder ni amana a pagdaydayawan ken ni dios a Baal.

3 Nupay kasta, kas ken ni Ari Jeroboam nga anak ni Nebat a sinarunona, insungsongna nga agbasol ti Israel. Saan a nagsardeng nga agaramid iti dakes.

4 Agtartaraken iti karnero ni Mesa nga ari ti Moab. Kas buisna, tinawen nga ikkanna ti ari ti Israel iti 100,000 a karnero ken de lana a nagtaud iti 100,000 a karnero.

5 Ngem idi natay ni Ahab nga ari ti Israel, immalsa ni Mesa iti maibusor iti Israel.

6 Dagus a pimmanaw ni Ari Joram idiay Samaria ket inummongna dagiti amin a mannakigubat ti Israel.

7 Nangibaon kadagiti mapan ken ni Jehosafat nga ari ti Juda, ket kastoy ti pinaibagana, “Immalsa ti ari ti Moab. Di la mabalin a tulongannak a manggubat kenkuana?”

“Wen,” insungbat ni Jehosafat. “Sidadaanak a tumulong kenka kasta met dagiti soldadok ken dagiti kabaliok.

8 Ania ti dalan a surotentayo a rumaut?”

“Magnatay iti let-ang ti Edom,” insungbat ni Joram.

9 Nagrubbuat ngarud ni Ari Joram ken dagiti ari ti Juda ken Edom. Kalpasan ti pito nga aldaw a panagdaliasatda, naibusanda iti danum. Awanen ti inumen dagiti mannakigubat ken dagiti animal a para-awit iti karga.

10 “Awanen ti mabalintay nga aramiden!” kinuna ni Joram. “Pinagtitiponnatayo a tallo tiApotapno parmekennatayo ti ari ti Moab!”

11 Sinaludsod ni Ari Jehosafat, “Adda kadi profeta ditoy a mabalintay a pakiumanan itiApo?”

Maysa nga ofisial iti armada ni Ari Joram ti simmungbat, “Adda ditoy ni Eliseo nga anak ni Safat. Isu idi ti katulongan ni Elias.”

12 “Wen, napaypayso a profeta,” kinuna ni Ari Jehosafat. Iti kasta, napan dagiti tallo nga ari ken ni Eliseo.

13 “Apay a siak ti pagpatulongam? Apay a dika mapan kadagiti profeta a nakium-umanan dagiti nagannak kenka?” kinuna ni Eliseo iti ari ti Israel.

“Saanak a mapan kadakuada,” kinuna ni Joram. “TiApoti nangyawat kadakami a tallo nga ari iti pannakabalin ti ari ti Moab.”

14 Insungbat ni Eliseo, “Iti nagan tiApoa sibibiag, isu a pagserserbiak, pulos a saanka nga ikankano no diak ipagpagapu ken Ari Jehosafat nga ari ti Juda.

15 Ita, yegandak iti tumutokar.”

Nagtungpalda ket bayat ti pannakatokar ti arpa, narikna ni Eliseo ti pannakabalin ni Yahweh

16 ket kinunana, “Kastoy ti sao tiApo: ‘Agkalikayo kadagiti kanal ditoy nagmaga a waig.

17 Uray no awan makitayo a tudo wenno mariknayo nga angin, mapnonto iti danum daytoy a waig ket nabuslonto ti inumenyo agraman dagiti bakayo ken dagiti animal a para-awit iti kargayo.’”

18 Ket intuloy ni Eliseo, “Ngem nalaka nga aramiden daytoy tiApo; pagballigiennakayto pay kadagiti Moabita.

19 Parmekenyonto amin a nasarikedkedan a siudadda. Pukanenyonto amin a kayoda nga agbunga, pullatanyonto dagiti ubbogda, ken dadaelenyonto amin a nadam-eg a talonda babaen iti pananggaburyo iti bato.”

20 Iti sumuno nga agsapa, iti oras ti panagidatag iti binigat a daton, nakitada ti agay-ayus a danum nga aggapu iti Edom ket nalapunos ti daga.

21 Idi madamag dagiti Moabita a nagmaymaysa dagiti tallo nga ari a mangraut kadakuada, inayabanda dagiti amin a lallaki a makabalin nga agiggem iti armas, manipud iti kalakayan agingga iti kaubingan ket impuestoda ida iti beddeng.

22 Idi bumangon dagiti Moabita iti sumuno a bigat, nakitada ti danum a kasla dara gapu iti sumingsingsing nga init.

23 “Dara daytoy!” impukkawda. “Naggugubat ket ngatan dagiti tallo nga armada a kabusortayo ket nagpipinnatayda. Kakadua, intayon agsamsam iti kampoda!”

24 Ngem idi dumanonda iti kampo, dinarup ida dagiti Israelita. Nagtataray dagiti Moabita idinto nga intuloy dagiti Israelita ti panangkamatda kadakuada. Nagpapatayda kadagiti Moabita

25 ket rinebbada dagiti siudadda. No adda malabsanda a nadam-eg a talon, purruakan dagiti Israelita iti bato agingga a magaburan dagiti amin a talon. Pinullatanda dagiti ubbog ken pinukanda dagiti agbunga a kayo. Kamaudianna, ti laeng Kir Hareset ti nabati. Linawlaw dagiti Israelita sada rinaut daytoy kabesera a siudad.

26 Idi makita ti ari ti Moab nga awan duadua ti pannakaparmekna iti gubat, inkuyogna ti 700 a mannakigubat a nagtagikampilan ket pinadasda ti aglibas a mapan agkamang iti ari ti Siriangem saanda a nagballigi.

27 Iti kasta, innala ti ari ti inauna nga anakna a sumukatto kenkuana nga ari ket impanna iti bakud ti siudad sana pinuoran a daton iti didiosen ti Moab. Nagbutengdagiti Israelita ket nagsanudda sada nagsubli iti pagilianda.

Tulongan ni Eliseo ti Napanglaw a Balo

1 Napan ken ni Eliseo ti balo ti maysa kadagiti kameng ti bunggoy dagiti profeta ket kinunana, “Apo, natayen ti asawak, ket kas ammom, nagbiag a managbuteng iti Dios. Ita, adda lalaki a nakautanganna nga immay idiay balay ket kayatna nga alaen dagiti dua a lallaki nga annakko a kas tagabuna tapno mabayadan ti utang.”

2 “Ania ti maitulongko kenka?” sinaludsod ni Eliseo. “Ania ti adda idiay balaymo?”

“Awan a pulos, malaksid ti sangaputik a lana ti olibo,” insungbatna.

3 “Inka bumulod kadagiti kaarrubam iti adu a putik nga awan nagyanna,” imbaga ni Eliseo.

4 “Kalpasanna, sumrekkayo nga agiina iti balayyo, irikepyo ti ridaw ket bukbokanyo dagiti putik iti lana. Ilasinyo dagiti mapno a putik.”

5 Iti kasta, napan ti babai agraman dagiti annakna iti balay, rinikpanda ti ridaw ket binukbokanna iti lana dagiti putik nga inyeg dagiti annakna kenkuana.

6 Apaman a napno amin a putik, dinamagna no adda pay putik a makargaan. “Awanen,” insungbat ti maysa kadagiti annakna. Ket nagsardeng ti panagayus ti lana.

7 Nagsubli ti ina ken ni Eliseo ket imbaga ti profeta, “Inka ilako ti lana ket bayadam ti amin nga utangmo; addanto pay mabati a kuarta nga umanay a pagbiagyo nga agiina.”

Ni Eliseo ken ti Nabaknang a Babai a Taga-Sunem

8 Iti maysa nga aldaw, napan ni Eliseo idiay Sunem. Adda nabaknang a babai sadiay a nangawis kenkuana a makipangan iti balayda. Manipud idin, kanayon a mangan iti balay ti babai tunggal mapan iti dayta a lugar.

9 Kinuna ti babai iti asawana, “Awan duaduak a nasantoan daytoy a lalaki a masansan nga umay ditoy.

10 Mangaramidta iti akingngato a kuarto a mabalinna a pagyanan tunggal sarungkarannata. Mangikabilta iti katre, lamisaan, tugaw ken silaw.”

11 Iti maysa nga aldaw, napan ni Eliseo idiay Sunem ket simrek a naginana iti kuarto.

12 Binilinna ni Gehazi nga adipenna nga ayabanna ti babai. Idi dumteng ti babai,

13 kinuna ti profeta ken ni Gehazi, “Saludsodem no ania ti maipaayko kenkuana a kas subad ti amin a kinaimbagna a nangipaay kadagiti kasapulanta. Nalabit adda kayatna a paibaga iti ari wenno iti pangulo ti armada.”

“Adda amin a kasapulak ditoy, iti sidong dagiti kailiak,” insungbat ti babai.

14 Sinaludsod ni Eliseo ken ni Gehazi, “Ania ngarud ti maipaayko kenkuana?”

Insungbatna, “Awan anakna ket lakayen ti asawana.”

15 “Ibagam nga umay ditoy,” imbilin ni Eliseo. Ket nagtakder ti babai iti ridaw.

16 Kinunani Eliseo kenkuana, “Iti kastoy a tiempo inton umay a tawen, addanton anakmo nga ub-ubbaem.”

“Pangngaasim, apo, ta dinak ul-ulboden,” kinuna ti babai. “Taonaka ti Dios!”

17 Ngem kas iti kinuna ni Eliseo, iti sumaruno a tawen, nangipasngay ti babai iti maysa a lalaki.

18 Naglabas ti sumagmamano a tawen. Tiempo idi ti panagani. Iti maysa a bigat, napan ti ubing iti talon nga ayan ni tatangna agraman dagiti agan-ani.

19 Pagammoan, impukkawna iti amana, “Nasakit ti ulok! Nasakit ti ulok!”

“Ipanmo ti ubing iti inana,” kinuna ti ama iti maysa nga adipen.

20 Binagkat ti adipen ti ubing ket impanna iti inana. Sinaksaklot ti ina ti anakna agingga a natay ti ubing iti agmatuon.

21 Impanna ti ubing iti kuarto ni Eliseo, impaiddana iti katre sa rimmuar ket inrikepna ti ridaw.

22 Inayabanna ti asawana ket kinunana, “Mangibaonka ditoy iti maysa nga adipen agraman maysa nga asno. Masapul a mapanak ken ni profeta Eliseo. Agsubliak met la a dagus.”

23 “Apay nga inka kenkuana ita nga aldaw?” sinaludsod ti asawana. “Saan met nga Aldaw a Panaginana wenno Fiesta ti Lutuad.”

“Saan a bale,” insungbatna.

24 Pinasilyaanna ti asno ket imbilinna iti adipen, “Pagtarayem ti asno ket dimo pagin-innayaden malaksid no ibagak kenka.”

25 Nagrubbuat ngarud ket nagturong idiay Bantay Carmel nga ayan ni Eliseo.

Nakita ni Eliseo a sumungsungad ti babai idi adayo pay ket kinunana ken ni Gehazi nga adipenna, “Kitaem, sumungsungad ti babai a taga-Sunem!

26 Darasem a mapan sabaten ket damagem no nasayaat met la ti kasasaadna, ti asawana ken ti anakna.”

Imbaga ti babai ken ni Gehazi a nasayaat met la ti amin

27 ngem idi dumanon ken ni Eliseo iti bantay, nagpakleb ket inarakupna dagiti saka ti profeta. Iduron koma ni Gehazi ngem kinuna ni Eliseo, “Bay-am. Dimo aya makita a kasta unay ti ladingitna? Ket pulos nga awan ti imbaga tiApokaniak maipapan iti daytoy.”

28 Imbaga ti babai kenkuana, “Apo, dimmawatak kadi kenka iti anak? Diak aya impakpakaasi idi kenka a dinak ang-angawen?”

29 Binilin ni Eliseo ni Gehazi, “Darasem! Alaem ti sarukodko ket inkan. Dika agsardeng a mangkablaaw iti siasinoman a masabatmo ket no adda mangkablaaw kenka, dimo sungbatan. Agderetsoka a mapan iti balay ket iparabawmo ti sarukodko iti ubing.”

30 Kinuna ti babai ken ni Eliseo, “Isapatak iti sibibiag ngaApo, kasta met kenka a dika panawan!” Ngarud, kimmuyog ni Eliseo kenkuana.

31 Immun-una a simmangpet ni Gehazi iti balay ti Sunamita. Iniggamanna ti sarukod iti ngatoen ti ubing ngem awan ti uni wenno aniaman a pakakitaan a sibibiag. Iti kasta, nagsubli a napan nangsabat ken ni Eliseo ket kinunana, “Saan a mariing ti ubing.”

32 Idi dumteng ni Eliseo, is-isu a simrek iti kuarto ket nakitana ti natay nga ubing a nakaunnat iti katre.

33 Inrikepna ti ridaw ket nagkararag ken ni Yahweh.

34 Kalpasanna,pinaklebanna ti ubing. Indekketna ti ngiwatna iti ngiwat ti ubing; dagiti matana kadagiti matana; ken dagiti im-imana kadagiti im-imana. Bayat ti panangarakupna iti ubing, pimmudot ti bangkay.

35 Timmakder ni Eliseo, nagpagnapagna iti kuarto sa met la nagsubli a nangarakup iti bangkay. Nagbaeng ti ubing iti namimpito ket immulagatna dagiti matana.

36 Binilin ni Eliseo ni Gehazi nga ayabanna ti ina ti ubing. Idi sumrek ti babai iti kuarto, kinuna ni Eliseo, “Adtoy ti anakmo.”

37 Nagpakleb ti babai iti sakaanan ti profeta; kalpasanna, innalana ti anakna sa pimmanaw.

Dua pay a Milagro

38 Idi adda bisin a nagsaknap iti daga, napan manen ni Eliseo idiay Gilgal. Iti maysa nga aldaw, bayat ti panangisurona iti maysa a bunggoy dagiti profeta, imbagana iti adipenna a mangisaang iti dungdong tapno ilutoanna dagiti profeta.

39 Napan iti taltalon ti maysa kadakuada tapno agnateng. Nakasarak iti balang a mula a nagpurosanna iti adu a bunga. Inyawidna dagitoy, ginalipna ket indengdengna a dina ammo no ania dagitoy.

40 Idi maluton, nangidasarda iti kanen dagiti lallaki ngem apaman a maramananda, impukkawda, “Tao ti Dios, nasabidongan sa met daytoy!”—ket dida kayat a kanen.

41 Nagpaala ni Eliseo iti bellaay, inwarakiwakna iti dungdong ket kinunana, “Mangidasarka manen iti agpaay kadakuada.” Saanen a makasabidong ti dinengdeng.

42 Iti naminsan, adda maysa a tao a naggapu idiay Baal Salisa. Inikkanna ni Eliseo iti 20 a tinapay a naaramid iti umuna a sebada a naapit iti dayta a tawen ken sumagmamano a kappuros a mais. Imbaga ni Eliseo iti adipenna nga ipakanna daytoy kadagiti profeta

43 ngem kinuna ti adipen, “Makaanay kadi daytoy a kanen ti 100 a tattao?”

Insungbat ni Eliseo, “Itedmo a kanenda gapu ta kuna tiApoa kanenda ket addanto pay matda.”

44 Naidasar ti taraon. Nanganda amin ket adda pay natda, kas imbaga ni Yahweh.

Mapaimbag ni Naaman

1 Itiimatang ti ari ti Siria, natan-ok ni Naaman a pangulo ti armada ti Siria. Raraemenna unay agsipud ta gapu kenkuana, pinagballigi ni Yahweh ti armada ti Siria. Maingel a lalaki ni Naaman, ngem agkukutel.

2 Iti naminsan nga iraraut dagiti taga-Siria iti Israel, nangyawidda iti balasitang nga Israelita ket nagbalin nga adipen ti asawa ni Naaman.

3 Iti maysa nga aldaw, kinuna ti balasitang iti apona, “Makapan la koma ni apok a Naaman iti profeta nga agnaed idiay Samaria. Mapaimbagna ti sakitna.”

4 Idi mangngeg daytoy ni Naaman, napan iti ari ket imbagana kenkuana ti kinuna ti balasitang.

5 Kinuna ti ari, “Inka iti ari ti Israel ket itedmo kenkuana daytoy a surat.”

Nagrubbuat ngarud ni Naaman. Nangitugot iti 30 a bagi ti pirak, 6,000 a bagi ti balitok ken sangapulo a napipintas a pagan-anay a pagsukatan.

6 Kastoy ti nailanad iti intugotna a surat: “Daytoy a surat ti mangyam-ammo ken ni Naaman nga ofisialko. Kayatko a paimbagem ti sakitna.”

7 Idi mabasa ti ari ti Israel daytoy a surat, rinay-abna ti kawesna iti rurodna ket kinunana, “Apay nga ipagarup ti ari ti Siria a maagasak daytoy a tao? Ipagarupna aya a maysaak a Diosnga adda pannakabalinna a mangbiag ken mangpapatay? Nalawag nga agbirbirok iti panggapuanna a makiriri kaniak!”

8 Idi madamag ni profeta Eliseo ti napasamak, kastoy ti pinaibagana iti ari: “Apay a madi ti riknam? Ibaonmo kaniak ti lalaki ket ipakitak kenkuana nga adda maysa a profeta ditoy Israel!”

9 Ngarud, napan ni Naaman agraman dagiti kabaliona ken luganna a pakigubat ket nagsardeng iti ruangan ti balay ni Eliseo.

10 Nangibaon ni Eliseo iti adipen a mangibaga ken ni Naaman a mapan bumatok iti mamimpito iti Karayan Jordan tapno naan-anayto nga umimbag ti sakitna.

11 Ngem kasta unay ti pungtot ni Naaman a pimmanaw ket kinunana, “Impagarupko nga umaynak sabten, agkararag itiApoa Diosna, aplawanna ti batog ti saksakiten ket maimbagan ti kukutel!

12 Maysa pay, saan aya a nadaldalus dagiti karayan ti Abana ken Farpar idiay Damasco ngem iti aniaman a karayan iti Israel? Diak aya maimbagan no agdigosak kadagidiay a karayan?”

13 Immasideg dagiti adipenna ket kinunada, “Apo, di met aya aramidem ti aniaman nga ipaaramid kenka ti profeta uray narigat? Ita, naglaka a banag ti ibagbagana. Dika pay la mapan bumatok tapno maimbaganka?”

14 Iti kasta, napan ni Naaman iti Jordan, bimmatok iti namimpito kas imbaga ni Eliseo, ket naan-anay a naimbagan ti kukutelna. Simmalun-at ti kudilna a kas iti kudil ti maysa nga ubing.

15 Nagsubli ken ni Eliseo agraman dagiti nangkuyog kenkuana ket kinunana, “Ita, ammokon nga awanen ti dios a kas iti Dios ti Israel. Pangngaasim ngarud, apo, ta awatem toy sagutko kenka.”

16 Insungbat ni Eliseo, “Isapatak iti sibibiag a Dios, isu a pagserserbiak, a diak umawat iti aniaman a sagut.”

Impapilit ni Naaman ti sagut, ngem saan nga inawat ni Eliseo.

17 Iti kasta, kinuna ni Naaman, “No dimo awaten ti sagutko, di la mabalin a mangyawidak iti dagaa kargaen ti dua a mulo? Ngamin, manipud ita, diakon agidatag kadagiti sakrifisio wenno mapuoran a daton iti siasinoman a didiosen malaksid itiApo.

18 Sapay koma ta pakawanennak tiApoiti panangkuykuyogko iti ari a mapan agdaydayaw iti templo ni Rimmon, ti dios ti Siria. Ammok a pakawanennak tiApo!”

19 Pinalubosan ni Eliseo ni Naaman. Ket pimmanaw ni Naaman.

Saan pay unay a nakaadayo ni Naaman

20 idi kinuna ni Gehazi iti bagina, “Pinalubosan ni apok ni Naaman nga awan pulos binayadanna! Inawatna koma ti indiaya ti Siriano. Kamakamek daytoy a Siriano ket dumawatak iti uray ania kenkuana.”

21 Ngarud, sinurot ni Gehazi ni Naaman. Idi makita ni Naaman ti maysa a lalaki a kumamkamakam kenkuana, dimsaag iti luganna ket napanna sinabat. Sinaludsodna, “Adda kadi napasamak?”

22 “Awan,” insungbat ni Gehazi. “Ngem imbaonnak ti apok a mangipakaammo kenka nga adda dua a kameng ti bunggoy dagiti profeta a kasangsangpet manipud iti katurturodan ti Efraim ket kayatna nga ikkam ida iti 3,000 a bagi ti pirak ken dua a napipintas a pagan-anay a pagsukatan.”

23 “Wen. Ipakpakaasik nga alaem ti 6,000 a bagi ti pirak,” kinuna ni Naaman. Impapilitna nga alaen ni Gehazi ti pirak. Inkabilna ti pirak iti dua a supot. Intedna daytoy kasta met ti dua a pagsukatan a pagan-anay kadagiti dua nga adipenna ket pinaawitna kadakuada tapno itulodda ni Gehazi.

24 Idi dumanonda iti turod a pagnaedan ni Eliseo, innala ni Gehazi dagiti dua a supot sana impan iti uneg ti balay. Kalpasanna, pinagawidna dagiti adipen ni Naaman.

25 Nagsubli iti balay ket sinaludsod ni Eliseo, “Napanam, Gehazi?”

“Saanak a pimmampanaw, apo,” kinunana.

26 Ngem kinuna ni Eliseo, “Adda ti espirituk sadiay idi dumsaag ti lalaki iti luganna tapno sabtennaka. Dika manggundaway babaen iti panangawat iti kuarta ken kawes, kaoliboan ken kaubasan, karnero ken baka wenno adipen!

27 Ita, kumpet kenka ti sakit ni Naaman, ket kumpet kenka ken kadagiti kaputotam iti agnanayon!”

Idi pumanaw ni Gehazi, agkukutelen—pimmuraw ti kudilna a kas iti kapas.

Tumpaw ti Ulo ti Wasay

1 Iti maysa nga aldaw, napan ti bunggoy dagiti profeta ken ni Eliseo ket kinunada kenkuana, “Nailet unay ti lugar a pagyanantayo!

2 Palubosannakam a mapan idiay Jordan ket agpukankami kadagiti kayo tapno adda pagaramidtay iti pagnaedantayo.”

“Ala wen,” kinuna ni Eliseo.

3 Impakpakaasi ti maysa kadakuada a kumuyog ni Eliseo. Immanamong ti profeta ket

4 nagkukuyogda a napan. Idi dumtengda iti Jordan, rinugianda ti agpukan.

5 Idi agpukpukan ti maysa kadakuada, pagammoan la ta nasukto ti ulo ti wasay ket natnag iti karayan. “Ania ti aramidek, apo?” kinunana ken ni Eliseo. “Binulodko ti wasay!”

6 “Nakatnaganna?” sinaludsod ni Eliseo.

Intudo ti lalaki ti nakatnagan ti wasay. Nangputed ni Eliseo iti bassit a sanga sana impurruak iti danum. Timpaw ti ulo ti wasay.

7 “Alaem,” imbilinna ket ginaw-at ti lalaki ti ulo ti wasay.

Maparmek ti Armada ti Siria

8 Aggubgubat ti ari ti Siria ken ti Israel. Nakiuman ti ari kadagiti ofisialesna ket nangpili iti lugar a pagkampoanna.

9 Ngem pinakaammoan ni Eliseo ti ari ti Israel ket binallaaganna a saan a mapan iti dayta a lugar gapu ta saneben dagiti taga-Siria.

10 Ngarud, pinakdaaran ti ari ti Israel dagiti lallaki nga agnaed iti dayta a disso ket nagguardiada. Masansan a mapasamak daytoy.

11 Kasta unay ti pannakariribuk ti ari ti Siria gapu iti daytoy. Inayabanna dagiti ofisialesna ket sinaludsodna kadakuada, “Siasino kadakayo ti mangliliput? Siasino ti agipulpulong iti ari ti Israel?”

12 Insungbat ti maysa kadakuada, “Awan, Natan-ok nga Ari. Ngem ibagbaga ni profeta Eliseo iti ari ti Israel ti amin a sasawem, uray dagiti sawem iti uneg ti kuartom.”

13 “Inkay sapulen ti ayanna, ket patiliwko,” imbilin ti ari.

Naipakaammo iti ari nga adda ni Eliseo idiay Dotan.

14 Nangibaon ngarud ti ari iti dakkel a bunggoy dagiti mannakigubat a nagsakay kadagiti kabalio ken lugan a pakigubat. Rabiin idi dumtengda iti Dotan ket linakubda ti ili.

15 Kabigatanna, nasapa a nakariing ti adipen ni Eliseo. Idi rimmuar iti balay, nakitana ti armada ti Siria agraman dagiti kabalio ken dagiti lugan a pakigubat iti lawlaw ti ili. Napan ken ni Eliseo ket kinunana, “Mataytayon, apo! Ania ti aramidentayo?”

16 “Dika agbuteng, gapu ta ad-adutayo ngem isuda,” kinuna ni Eliseo.

17 Ket inkararagna, “OApo, luktam ti mata ti babaonek tapno makakita.” Impangag tiApoti dawatna ket nakita ti adipen a nasaknapan ti bakras ti turod kadagiti kabalio ken umap-apuy a lugan a pakigubat a nanglikmut ken ni Eliseo.

18 Idi dumarup dagiti Siriano, inkararag ni Eliseo: “OApo, pagbulsekem koma dagitoy a tattao!” Impangag ni Yahweh ti kararagna ket nagbulsek dagiti lallaki.

19 Napan ni Eliseo kadakuada ket kinunana, “Nayaw-awankayo; saan a daytoy nga ili ti birbirokenyo. Surotendak ket ipankay iti tao a sapsapulenyo.” Inturongna ida idiay Samaria.

20 Apaman a nakastrekda iti siudad, inkararag ni Eliseo: “OApo, luktam dagiti matada tapno makakitada.” Impangag ni Yahweh ti kararagna. Insublina ti panagkitada ket nakitada nga addada iti uneg ti Samaria.

21 Idi makita ti ari ti Israel dagiti mannakigubat ti Siria, sinaludsodna ken ni Eliseo, “Papatayek kadi ida, apo? Papatayek kadi ida?”

22 “Saan,” insungbat ni Eliseo. “Uray dagiti tiniliwmo iti paggugubatan, dimo mabalin a patayen ida. Ikkam ida iti kanen ken inumen ket palubosam ida nga agsubli iti arida.”

23 Iti kasta, insaganaan ti ari ti Israel ida iti dakkel a padaya. Kalpasan ti pannangan ken yiinumda, nagsublida iti ari ti Siria. Manipud idin, simmardengen ti panangraut dagiti taga-Siria iti daga ti Israel.

Ti Pannakalakub ti Samaria

24 Iti saan a mabayag, impanguloan ni Ben-hadad nga ari ti Siria ti entero nga armadana a nangraut iti Israel; linakubna ti Samaria.

25 Gapu iti daytoy, nagsaknap ti bisin iti siudad. Iti kinakirang ti makan, nailako ti ulo ti asno iti 80 a bagi ti pirak ket lima a bagi ti pirak ti gatad ti kagudua ti litro a balang a lasona.

26 Iti maysa nga aldaw a magmagna ti ari ti Israel iti rabaw ti bakud ti siudad, adda babai a nangipukkaw, “Tulongannak koma, Natan-ok nga Ari!”

27 Insungbatna, “No dinaka tulongan tiApo, ania koma ti maitulongko kenka? Adda kadi trigok wenno arakko?

28 Ania ti parikutmo?”

Kinuna ti babai, “Idi kalman, imbaga daytoy a babai a kanenmi ti anakko ket kanenminto met ti anakna iti sumuno nga aldaw.

29 Linutomingarud ti anakko ket sindami. Iti sumuno nga aldaw, imbagak kenkuana a lutoenmi ti anakna ngem inlemmengna ket dina kayat nga iruar.”

30 Rinay-ab ti ari ti pagan-anayna idi mangngegna daytoy. Ket nakita dagiti tattao nga asideg iti bakud a siaarruat gayam ti ari iti nakersang a lupot a pagilasinan iti nakaro a panagladingitna.

31 Kinuna ti ari, “Uray patayennak ti Dios no diak paputolan ni Eliseo ita nga aldaw!”

32 Nangibaon iti mapan mangala iti profeta.

Kabayatanna, adda ni Eliseo iti balayna agraman dagiti panglakayen a napan bimmisita kenkuana. Sakbay a simmangpet ti imbaon ti ari, kinuna ni Eliseo kadagiti panglakayen, “Nangibaon dayta a mammapatay iti umay mangputol kaniak! Ita, siputanyo ta apaman a makadanon ditoy, irikepyo ti ruangan ket diyo pastreken. Sumarsaruno kenkuana ti mismo nga ari.”

33 Madama pay laeng nga agsasao idi dumteng ti ariket kinunana, “TiApoti nangyeg iti daytoy a didigra. Apay nga urayek pay laeng ti tulongna?”

1 Insungbat ni Eliseo, “Denggem ti sao tiApo! Iti kastoy nga oras inton bigat, mabalinyonto ti gumatang iti tiendaan ti Samaria iti sangapulo a litro ti kasayaatan a trigo wenno 20 a litro ti sebada iti maysa a bagi ti pirak.”

2 Nagsao ti ofisial a mangkuykuyog iti ari. Kinunana ken ni Eliseo, “Saan a mapasamak dayta uray no mangyeg a dagus tiApoiti tudo!”

“Makitamto a mapasamak daytoy ngem dimonto maramanan ti uray ania kadagiti makan,” insungbat ni Eliseo.

Pumanaw ti Armada ti Siria

3 Iti ruar ti ruangan ti Samaria, adda uppat a lallaki nga agkukutel. Kinunada iti maysa ken maysa, “Apay nga agur-uraytayo ditoy agingga a mataytayo?

4 Awan serserbina a sumrektay iti siudad ta mataytayo iti bisin; ngem no agyantayo ditoy, mataytayo met laeng. Intayo ngarud iti kampo dagiti Siriano. No didatay an-anoen, agbiagtayo, ngem no papatayendatayo, di mataytayo.”

5 Iti kasta, idi sumipngeten, napanda iti kampo dagiti Siriano ngem idi makasangpetda, awan ti nasarakanda sadiay.

6 Ngamin, nangparnuay ni Yahweh iti kasla daranudor ti sumungsungad a dakkel nga armada, agraman dagiti kabalio ken luglugan a pakigubat. Idi mangngeg dagiti Siriano daytoy, impagarupda a sumangpet dagiti Heteo ken Egipcio a tinangdanan ti ari ti Israel a mangraut kadakuada.

7 Nagdardarasda ngarud a naglibas iti dayta a sumipnget. Pinanawanda ti kampoda agraman dagiti kabalio ken asno ken amin nga adda kadagiti toldada ket nagtatarayda a mangisalakan iti biagda.

8 Idi makadanon dagiti uppat a lallaki iti igid ti kampo, simrekda iti maysa a tolda. Kinnan ken ininumda ti nasarakanda iti unegna. Nagalada kadagiti pirak, balitok ken pagan-anay sada napan inlemmeng dagitoy; kalpasanna, nagsublida, simrekda iti sabali a tolda, sinamsamda met dagiti nagunegda sada napan inlemmeng dagiti innalada.

9 Ngem kinunada iti tunggal maysa, “Saan a rumbeng nga aramidentayo ti kastoy! Adda naimbag a damag a mabalintay nga ipakaammo ket ditay koma ilimlimed. No ipabigattayo, awan duadua a madusatayo. Intay ipakaammo itan kadagiti ofisiales ti ari!”

10 Ngarud, pimmanawda iti kampo dagiti taga-Siria ket nagsublida iti siudad. Pinukkawanda dagiti guardia iti ruangan: “Simrekkam iti kampo dagiti taga-Siria! Pulos nga awan ti nakitami a tao wenno nangngegmi a timek. Sigagalut dagiti kabalio ken asno ket binaybay-anda lattan dagiti toldada.”

11 Inwaragawag dagiti guardia ti damag ket naidanon iti palasio.

12 Rabii pay laeng ngem bimmangon ti ari iti iddana ket kinunana kadagiti ofisialesna, “Ibagak kadakayo ti pampanunoten nga aramiden dagiti taga-Siria! Ammoda nga agbisintayo ditoy ket pimmanawda iti kampoda sada napan naglemmeng iti away. Namnamaenda a rummuartayo tapno agbiroktay iti kanentayo ket tiliwendatay a sibibiag sada sakupen ti siudad.”

13 Kinuna ti maysa kadagiti ofisialesna, “Matayto met laeng dagiti tattao iti siudad a kas kadagiti natayen iti bisin. Mangibaonka ngarud iti lallaki nga agsakay kadagiti lima a kabalio a natda tapno maammoantayo no ania ti napasamak.”

14 Nangpilida iti sumagmamano a lallaki ket nagluganda iti dua a lugan a pakigubat. Imbilin ti ari, “Inkay ammoen no ania ti napasamak iti armada ti Siria.”

15 Pimmanaw dagiti lallaki. Idi makadanonda iti Jordan, awan ti nakitada a kabusor. Nakitada ketdi iti dalan dagiti agkaiwara a pagan-anay ken armas nga impurruak dagiti taga-Siria iti panagdardarasda nga agtalaw. Kalpasanna, nagsubli dagiti naibaon ket impadamagda ti nakitada.

16 Rimmuar dagiti tattao ti Samaria ket nagsamsamda iti kampo dagiti Siriano. Natungpal ti sao ni Yahweh: nailako iti maysa a bagi ti pirak ti sangapulo a litro ti kasayaatan a trigo wenno ti 20 a litro ti sebada.

17 Dinutokan ti ari ti Israel ti ofisial a mangkuykuyog kenkuana a mangipangulo kadagiti mangguardia iti ruangan ti siudad. Nabaddebaddekan dagiti tattao ti ofisial ket natay, kas imbaga ni Eliseo idi napan kenkuana ti ari.

18 Imbaga idi ni Eliseo iti ari nga iti dayta nga oras iti sumuno nga aldaw, mailako iti maysa a bagi ti pirak ti sangapulo a litro ti kasayaatan a trigo wenno ti 20 a litro ti sebada iti tiendaan ti Samaria.

19 Kastoy idi ti insungbat ti ofisial: “Saan a mapasamak uray no mangyeg a dagus tiApoiti tudo!” Kastoy met ti sungbat ni Eliseo: “Makitamto a mapasamak daytoy ngem dimonto maramanan ti uray ania kadagiti makan.”

20 Kasta ti napasamak kenkuana: natay a nabaddebaddekan dagiti tattao iti ruangan ti siudad.