Author: admin

Ti Maikadua a Bitla

1-2 Job, ubbaw dagiti imbalikasmo, ubbawda!

3 Awan ti masirib nga agsao a kas kenka

wenno mangikalintegan iti bagina

kadagiti awan serserbina a sao.

4 Dagiti agbuteng iti Dios maupayda;

lapdam ida nga agkararag kenkuana.

5 Ti basolmo ti mamagsao kenka;

ab-abbongam dagiti basolmo kadagiti nasikap a sao.

6 Saan a masapul nga ikeddengko a nagbasolka;

dagiti met la saom ti mangukom kenka.

7 Ipagarupmo aya a sika ti kaunaan a nayanak?

Addaka kadin idi parsuaen ti Dios dagiti bantay?

8 Nangngegmo kadi dagiti panggep ti Dios?

Siksika la aya ti tao nga adda ammona?

9 Ammomi amin ti ammom.

10 Nagtaud ti kinasiribmi

kadagiti ub-ubanan a lallakay,

lallaki a nayanak sakbay ni amam.

11 Liwliwaennaka ti Dios ngem dimo ikaskaso;

iti naganna, naalumamay dagiti saomi ngem dimo ikankano.

12 Nupay kasta, masair ta riknam,

ket sipupungtotka a mangkuskusilap kadakami.

13 Kapungtotmo ti Dios,

ket agsaoka pay iti maibusor kenkuana.

14 Addaaya tao a nadalus?

Adda kadi nalinteg iti imatang ti Dios?

15 Di pay talken ti Dios dagiti anghelesna;

uray isuda, saanda a nadalus iti imatangna.

16 Anianto ketdin ti narukop a tao nga awan serserbina,

Arub-obenna ti dakes a kas iti danum nga inumenna.

17 Dumngegka, Job,

ta ibagak ti ammok.

18 Insuro dagiti mamasirib kaniak

ti pudno a naadalda kadagiti ammada,

ket awan inlimlimedda.

19 Awan ti mangyadayo kadakuada iti Dios,

ta awan ganggannaet a nakipagtaeng kadakuada.

20 Ti dakes a tao a mangirurumen,

agtutuokto bayat ti panagbiagna.

21 Nakabutbutengto nga ikkis dagiti mangngegna;

no ipagarupna nga awan ti pakaan-annoanna,

serken dagiti mannanakaw ti balayna.

22 Awan namnamana a makaaon iti sipnget,

ta agur-uray ti kampilan a mangpapatay kenkuana.

23 Agur-uray met dagiti buitrea mangsida iti bangkayna.

Ammona a nasipnget ti masakbayanna,

24 ta agur-uray kenkuana ti pannakadadael

kas nabileg nga ari a mangdarup kenkuana.

25 Kasta ti pagtungpalan ti tao a bumusor iti Dios,

ti pagbanagan ti agsukir iti Mannakabalin-amin.

26-27 Napalangguad ken nasukir ti kasta a tao;

sitatangsit a mangitag-ay iti kalasagna,

ket agdarasudos a mangsaranget iti Dios.

28 Dayta ti tao a nangsakup kadagiti siudad

ken nangtagikua kadagiti balbalay

a dagiti akinkukua pimmanawda

ngem madadaelto dagitoy inton adda gubat.

29 Dinto agbayag ti kinabaknangna;

dinto met agpaut ti sanikuana.

Mapukawto uray ti anniniwanna

30 ket dinanto malisian ti sipnget.

Mayarigto iti kayo

a mauram dagiti sangsangana,

ken ipalais ti angin dagiti sabongna.

31 No maag nga agtalged iti kinadakesna,

kinadakes met laeng ti apitenna.

32 Malaylaytosakbay ti naikeddeng a tiempona,

ket saanton a lumangto dagiti sangana.

33 Kaslanto iti ubas a maregreg dagiti bungana

sakbay a maluomda;

kaslanto iti olibo nga agtinnag dagiti sabongna.

34 Awanto ti kaputotan dagiti awan Diosna;

mauramto dagiti balay

a nabangon gapu iti pasuksok.

35 Dagitoy dagiti tattao a dakes ti panggepda;

panangallilaw ti kanayon a pampanunotenda.

1-2 Nangngegkon dagita a sasao;

padagsenandak laeng kadagita a panangliwliwayo.

3 Dikay pay laeng aya sumardeng a sao a sao?

Dakayo laengen ti mapatpati ti saona?

4 No dakayo ti adda iti lugarko,

mabalinko met a sawen ti ibagbagayo.

Mabalinkay met a wingiwingan,

layusenkayo iti adu a sao.

5 Mapapigsakayo met kadagiti pammagbagak;

diak met sumardeng nga agsasao

a mangliwliwa kadakayo.

6 Ngem awan ti maitulong ti amin a sasawek;

di met maep-ep dagiti ut-otko no agulimekak.

7 Inibusmo, O Dios, ti amin nga adda kaniak;

binaybay-am a napapatay ti familiak.

8 Tiniliwnak, sika ti kabusorko.

Kudil laengen ti nangbungon kadagiti tulangko,

ket dayta ti ibilang dagiti tattao

a pammaneknek a nakabasolak.

9 Iti pungtot ti Dios, lasanglasangennak;

urayna la kagaten ti bibigna

gapu iti gurana kaniak.

10 Guyabandak dagiti tattao;

aribungbongandak ket tungpaendak.

11 Inyawatnak ti Dios kadagiti managdakdakes.

12 Natalna idi ti panagbiagko,

ngem binekkelnak ti Dios,

ket dinudog ken indumudomnak.

Aramatennak a pagsanayanna iti panagpana,

13 ket panaenna ti amin a sikigak

kadagiti pana a mangdunor ken mangsalput kaniak;

uray kasta, pulos a dinak kaasian.

14 Saan a mauma a mangdundunor kaniak;

kasla agpagunggan a mannakigubat a mangdarup kaniak.

15 Agladingitak ket agpanesak iti nakersang a lupot;

agtugawak iti katapokan gapu iti pannakaparmekko.

16 Nakalablabbagan toy rupak iti kasasangit;

lumlumbeg ken lumitlitem payen dagitoy matak.

17 Ngem awan ti inaramidko a kinaranggas,

ket napasnek ti kararagko iti Dios.

18 O daga, dimo kaluban dagiti dakes

a naaramid kaniak!

Ipalubosmo a mangngeg ti asugko

a mangtunton iti kalintegak.

19 Sadilangit, adda mangkanunong

ken mangitakder kaniak.

20 Umsiendak dagiti gagayyemko;

agarubos dagiti luluak iti Dios.

21 Adda koma mangikalintegan kaniak iti Dios,

kas panangitakder ti maysa a tao iti gayyemna.

22 Bassiten ti nabati nga aldawko,

ket magnaakton iti dalan

nga awan ti makasubli.

1 Asidegen ti ipapatayko.

Mapugsaten ti angesko;

agur-urayen ti tanemko.

2 Malikmutak kadagiti manglalais kaniak

iti sadinoman a papanak.

3 Napudnoak, O Dios;

patiem koma ti saok!

Awanen ti uray maysa a kumanunong kaniak.

4 O Dios, kinullaapam ti panunotda ket dida makaawat;

dimo ipalubos nga abakendak.

5 Adda pagsasao a gapu iti kuarta,

liputan ti maysa a tao dagiti gagayyemna,

ket agsagaba dagiti annakna gapu iti dayta.

6 Ita, aramatenda daytoy a pagsasao a maibusor kaniak,

ket umayda tupraan ti rupak.

7 Dandanin diak makakita gapu iti ladingitko;

nakakutkuttongen dagiti takkiag ken luppok.

8 Makigtot dagiti agkunkuna a nalintegda,

ket kunada amin nga awan Diosko.

9 Dagiti agkuna a nataknengda,

umad-adda ti panangipapanda a nalintegda.

10 Ngem no umayda amin agparang kaniak,

awan ti uray maysa a masirib a masarakak.

11 Naglabasen dagiti aldawko;

saan a natungpal dagiti arapaapko,

napukawen ti namnamak.

12 Ngem kuna dagiti gagayyemko

a nagbalin nga aldaw ti rabii.

Kunada nga asidegen ti panaglawagna,

ngem addaak pay met la iti sipnget.

13 Ti la namnamakon isut’ panagtaengko

iti lubong dagiti natay

a pagiddaak a maturog iti sipnget.

14 Kunakto a ti tanem isut’ amak

ket dagiti igges nga agkaan kaniak,

isuda ti inak ken kakabsatko a babbai.

15 Sadino ngarud ti ayan ti namnamak?

Adda kadi makakita iti namnamak?

16 Saan a kumuyog kaniak ti namnama

inton mapanak iti lubong dagiti natay.

1-2 Job, dika pay la sumardeng nga agsasao?

No agsardengka ket dumngegka

mabalinmi ti makisarita kenka.

3 Apay nga ibilangnakami

a kas iti nakuneng a baka?

4 Dangdangram la ta bagim iti pungtotmo.

Maulila aya ti daga wenno yalis

ti Dios dagiti bantay gapu kenka?

5 Maiddeptoti silaw ti managdakdakes,

ket pulos a dinto magangtanen.

6 Kumudrep ken maiddepto

ti pagsilawan iti taengna.

7 Natibker idi ti pannagnana, ngem ita maitibkolen;

maidaramudom gapu iti bukodna a pammagbaga.

8 Magna iti lugar nga adda batengna,

ket agturong iti pakaipalab-oganna.

9 Masiloan dagiti mukodna,

ket maparautan a naimbag.

10 Adda palab-og a nailemmeng iti daga,

adda silo a naipakat iti dalanna.

11 Nalikmut iti nakaro a pammutbuteng;

sumursurot kenkuana iti sadinoman a papananna.

12 Nabaknang idi ngem ita agbisinen;

agur-uray kenkuana ti didigra.

13 Agwaras ti nakaro a sakit iti bagina,

ket runotenna dagiti takkiag ken luppona.

14 Maitalaw iti nagtaenganna a sitatalged,

ket maiguyodguyod a maisaklang ken ni Ari Patay.

15 Ita, mabalinen ti agnaed iti balayna;

nawarakiwakaneniti asufre

a pangdalus iti taengna.

16 Magango dagiti ramutna,

ket malaylay dagiti sangana.

17 Saanen nga agdindinamag iti ilina ken iti sabali a lugar;

awanen ti makalagip kenkuana.

18 Mapagtalawto iti taeng dagiti sibibiag;

maipanto iti sipnget, maipanaw iti lawag.

19 Awan ti natda a kaputotanna;

awan ti nakalasat uray la koma no maysa.

20 Iti amin a disso a makadamag iti napasamakna,

agpigergerto dagiti tattao

gapu iti daksanggasat a nagbanaganna.

21 Kasta ti pagtungpalan dagiti managdakdakes;

kasta ti pagbanagan dagiti di mangikankano iti Dios.

1-2 Apay a didak sardengan a tutuoken babaen kadagiti sasaoyo?

3 Dikay agsardeng a mangpabpabain kaniak;

awan kadi bainyo ta lalaisendak?

4 No kas pangarigan nagbasolak,

ania koma ti pakaibianganyo?

5 Ipagarupyo a naim-imbagkayo ngem siak,

ket ibilangyo ti rigatko

a mangipaneknek a nakabasolak?

6 Saanyo kadi a makita

a ti Dios ti akin-aramid iti daytoy?

Nangipakat iti palab-og a pakatiliwak.

7 Busorek ti kinaranggasna,

ngem awan ti mangikaskaso kaniak.

Awan dumngeg iti asugko

nga agkiddaw iti hustisia.

8 Binangenan ti Dios ti dalan ket diak makalasat;

pinagsipngetna ti pagnaak.

9 Innalana amin a sanikuak,

ket inuksobna ti dayag ken dayawko.

10 Pisangpisangennak iti amin a sikigak;

kas iti mula, bag-otenna ti namnamak,

ket bay-annak a malaylay ken matay.

11 Kasta unay ti pungtot ti Dios kaniak,

ket imbilangnak a kadaksan a kabusorna.

12 Ibaonna ti armadana a mangdarup kaniak;

agkalida iti abut a paglingedanda,

ket lakubenda ti taengko.

13 Inyadayo ti Dios dagiti kakabsatko,

ket binaybay-andak.

Ganggannaetakon kadagiti makaam-ammo kaniak.

14 Pinanawandakon dagiti kakabagiak;

awan metten dagiti gagayyemko.

15 Nalipatandakon dagiti sinangailik idi iti balayko;

ibilangdak payen a ganggannaet dagiti babaonek.

16 No ayabak ti maysa kadagiti adipenko, saan a sumungbat,

uray no agpakpakaasiak a tulongannak.

17 Saan a maibturan ni asawak ti sang-awko,

didak pay asitgan dagiti kakabsatko.

18 Laisen ken katawaandak

dagiti ubbing a makakita kaniak.

19 Karugitdakdagiti nadekket a gagayyemko;

tinallikudandak dagiti ipatpategko.

20 Kudil ken tultulangko laengen ti natda;

tantannawagakon ti ngarab ni patay.

21 Kaasiandak kadi, dakayo a gagayyemko,

ta nagdissuor kaniak ti ima ti Dios.

22 Apay nga idadanesdak

a kas iti pampamay-an ti Dios kaniak?

Dikay pay la aya mapnek

a mangtutuok kaniak?

23 Adda la koma mangisurat kadagiti sasawek,

ket ilanadna ida iti maysa a libro!

24 Wenno ikitikitna dagiti balikasko iti bato,

ket ilanadna ida tapno mataginayonda!

25 Ngem ammok nga adda maysa sadi langit

nga umayto iti kamaudianan

a mangikalintegan kaniak.

26 Uray kalpasan a runoten ti sakit toy kudilko,

makitakto ti Dios iti daytoy a bagik.

27 Makitakto a mismo ti Dios,

ket saanto a ganggannaet kaniak.

Napukaw ti turedko gapu ta kinunayo,

28 “Kasano ti panangparigattayo kenkuana?”

Nagbirokkayo iti panggapuanyo

a mangkabil kaniak.

29 Ngem ita, agbutengkay iti kampilan—

ti kampilan a mangyeg

iti pungtot ti Dios iti basol

tapno maammoanyo nga adda maysa a mangukom.

1-2 Job, riribukem toy panunotko.

Diak maibturanen ti di sumungbat.

3 Makapabain dagiti imbalikasmo,

ngem ammok ti isungbatko kenka.

4 Pagaammom a manipud un-unana,

idi naisaad ti tao ditoy rabaw ti daga,

5 awan ti managdakdakes a nagbayag ti ragsakna.

6 Uray dumanon sadi langit ti kadakkelna

wenno tumukno kadagiti ulep ti katayagna,

7 maipalaisto a kas iti tapok.

Agbalawto dagiti nakaam-ammo kenkuana

no sadino ti napananna.

8 Agpukawtoa kas iti tagtagainep nga awan tugotna,

kas iti parmata iti rabii saanton a makita.

9 Agpukawto iti lugar

a sigud a nagnanaedanna.

10 Birokento dagiti annakna ti parabur dagiti napanglaw,

ket isublinanto ti kinapanglawna.

11 Agkabannuag ken napigsa idi,

ngem agbalinton a tapok ti bagina.

12-13 Naimas ti panagramanna iti dakes;

mangisakmol ken mulmolanna tapno nanamenna.

14 Ngem pumait ti taraon iti tianna,

a kas kapait iti apro ti uleg.

15 Isarwa ti managdakdakes ti kinabaknang a tinakawna;

payula ti Dios uray no addan iti tianna.

16 Kasla sabidong ti aniaman a maalimonna;

kasla gita ti uleg a mangpatay kenkuana.

17 Dinanto makita dagiti karayan ti lana ti olibo

wenno ti waig nga agayus iti gatas ken diro.

18 Yawatnanto ti amin a nagbannoganna;

dinanto mananam ti kinabaknang nga inurnongna.

19 Ngamin, indadanesna dagiti napanglaw,

ket binaybay-anna ida.

Inagawna dagiti balay

a binangon ti sabali.

20 Pulos a di mapnek iti kinaagumna.

21 No mangan awan a pulos ti ibatina,

ngem ita, aggibusen ti kinarang-ayna.

22 Iti alimpatok ti balligina,

agtupakto kenkuana ti dagsen

ti amin a kinadaksanggasat.

23 Bay-am nga aguma a mangan iti kaykayatna;

dusaento ti Dios iti nakaro a pungtotna!

24 No landoka kampilan ket malisianna,

tinto bronse a pana ti mangdaleb kenkuana.

25 Salputen ti pana ti bagina,

ket agaruyot ti darana

iti sumilsilap a murdongna;

buteng ti manglapunos iti pusona.

26 Madadael ti amin nga urnongna;

apuy, saan a tao, ti manguram kenkuana

agraman amin a kameng ti familiana.

27 Ipalgak ti langit ti basol daytoy a tao,

ket agsaksi ti daga a maibusor kenkuana.

28 Madadaelto amin a kinabaknangna

inton idissuor ti Dios ti nakaro a pungtotna.

29 Amin a managdakdakes kastoy ti tungpalda,

kastoy ti ikeddeng ti Dios a pagbanaganda.

1-2 Denggenyo a nalaing ti innak ibaga;

dayta la ti pangliwliwa a dawatek kadakayo.

3 Palubosandak nga agsao ket kalpasanna,

ituloyyo ti manglais kaniak no kayatyo.

4 Saan a tao ti pakaiturongan toy asugko;

adda gapuna a saanakon a makaan-anus.

5 Mingmingandak no dikay maikuleng

a makakita iti kasasaadko.

6 No malagipko ti napasamak kaniak,

maikulengak ket agpigergerak.

7 Dagiti managdakdakes napaut ti biagda.

Apay a palubosan ti Dios a rumang-ayda?

8 Makitada ti idadakkel

dagiti annak ken appokoda.

9 Saan nga ipalubos ti Dios

a dumteng ti didigra kadagiti balayda,

ket agbiagda a natalged ken natalna.

10 Agdakep dagiti bakada,

ket nalaka ti panaganak dagiti kabaianda!

11 Agtataray ken agaayam dagiti annakda

a kas kadagiti urbon a karnero.

12 Agsasalada a buyogan

ti arpa ken flauta.

13 Narang-ayda iti unos ti panagbiagda,

natalna ti ipapatayda ket dida agsagaba.

14 Ibaga dagiti managdakdakes iti Dios a bay-anna ida.

Dida kayat a maammoan

ti pagayatanna iti panagbiagda.

15 Kunada a dida masapul

ti agserbi iti Dios,

ket awan magunggonada

nga agkararag kenkuana.

16 Ipagarupda nga agballigida

babaen iti bukodda a pigsa.

Ngem diak patien ti kasta a kapanunotanda.

17 Adda kadin managdakdakes a naiddep ti silawna?

Addan aya maysa kadakuada a nadidigra?

Addan aya dinusa ti Dios kadakuada iti pungtotna,

18 tapno kasda la arutang a mayangin

wenno taep nga itayab ti bagio?

19 Kunayo a dusaen ti Dios ti ubing

gapu kadagiti basol ti amana.

Saan! Dagiti nagbasol koma ti rumbeng a dusaenna;

ipakitana koma a kasta ti aramidenna

gapu kadagiti salungasingda.

20 Rumbeng a sagabaen dagiti nagbasol

ti mismo a dusada;

ti pungtot ti Dios a Mannakabalin-amin masapul a riknaenda.

21 No matayen ti tao,

panunotenna pay kadi

ti kasasaad dagiti annakna?

22 Adda kadi tao a makaisuro iti Dios

idinto nga ukomenna dagiti natan-ok?

23-24 Adda tattao a nasalun-at agingga iti ipupusayda;

naragsakda a matay ken awan pakariribukanda,

awan ti sagubanitda, naimbag ti pannakataraonda.

25 Adda met dagiti awan a pulos ti ragsakda;

agbiag ken nalidayda iti ipapatayda.

26 Ngem agpapadada a matay ken maitanem;

padapadada met nga iggesen.

27 Ammok no ania ti pampanunotenyo a mangdangran kaniak.

28 Ammok a damagenyo no ayanna itan

ti balay ti nabaknang,

ti tao a nagar-aramid iti kinadakes.

29 Dikay aya nagsaludsod kadagiti agbibiahe?

Diyo aya naammoan ti inyawidda a damag?

30 Iti aldaw nga agpungtot ti Dios,

kanayon a ti managdakdakes ti maispal iti pannusana.

31 Awan ti mangbabalaw iti managdakdakes

wenno mangbales kenkuana iti amin nga inaramidna.

32-33 Inton maipan iti pakaitabonanna,

iti nainget ti guardiana a tanemna,

rinibu ti makipamumpon.

Uray ti maigabor a daga

nainayad nga agdisso iti bangkayna.

34 Ket dakayo, awan serserbi ti pangliwliwayo kaniak!

Pasig nga ulbod ti imbagbagayo!

Ti Maikatlo a Bitla

1-2 Addaaya imbag a maipaay ti tao iti Dios,

uray no isut’ kasiriban?

3 Adda aya magun-od ti Dios

iti panagaramidmo iti naimbag?

Pagsayaatanna aya no agbalinka a nalinteg?

4 Tubngaren ken ukomennaka ti Dios,

saan a gapu ta agbutengka kenkuana,

5 no di ket gapu iti nadagsen a basolmo,

gapu kadagiti amin a dakes nga aramidmo.

6 Tapno mapagbayadmo ti nakautang kenka,

innalam dagiti kawesna ket binay-am nga awan arruatenna.

7 Dimo pinainum dagiti mawaw;

dimo pinakan dagiti mabisin.

8 Inaramatmo ti turay ken saadmo

a nangtagikua iti entero a daga.

9 Dimo tinulongan dagiti balo a babbai;

tinakawam ken inlupitlupitmo pay dagiti ulila.

10 Isu a nalawlawka kadagiti pakatnagan,

ket kellaat a buteng ti manglapunos kenka.

11 Kasta unay ti sipnget ket awan makitam,

ket lemmesennaka ti layus.

12 Saan aya nga agnanaed ti Dios iti kangatoan a langit?

ket tantannawaganna dagiti bituen uray no nangatoda?

13 Ngem kaskasdi a saludsodem, “Ania ti ammo ti Dios?

Nalingdan kadagiti ulep—kasano ngarud nga ukomennatayo?”

14 Ipagarupmo a saan a makakita ti Dios gapu iti napuskol nga ulep

bayat ti pampannagnana iti tangatang

a beddeng ti langit ken daga.

15 Inkeddengmo kadi ti magna iti dalan

a nagnaan dagiti managdakdakes?

16 Sakbay a dimteng ti panawenda,

adda layus a nangyanud kadakuada.

17 Dagitoy dagiti tattao a nangtallikud iti Dios;

namatida nga awan ti maaramidna kadakuada.

18 Nupay kasta, pinarang-ay ti Dios ida.

Diak maawatan ti panunot dagiti managdakdakes.

19 Maragsakan dagiti naimbag a tattao, agkatawa dagiti nalinteg

no makitada a madusa dagiti managdakdakes.

20 Madadael ti amin a sanikua ti managdakdakes;

no adda matda kenkuana, mauram amin awan labasna.

21 Job, makikappiaka iti Dios

tapno imbag ti umadani kenka.

22 Ipangagmo ti pannursurona,

ket ipapusom ti saona.

23 Wen, agsublika a sipapakumbabaiti Dios,

ket ikkatem ti amin a kinadakes iti balaymo.

24 Ibellengmo dagiti balitokmo;

ipurruakmo ti kasin-awan a balitokmo

iti nagmaga a nagayusan ti waig.

25 Ti Mannakabalin-amin a Dios

ti ibilangmo a balitok ken pirakmo.

26 Ket agtalekkanto latta iti Dios;

isunto ti pagtaudan ti rag-om.

27 Inton agkararagka, innakanto sungbatan,

ket tungpalemto dagiti kari a sinapataam.

28 Agballigikanto iti amin nga aramidmo,

ket addanto lawag a mangsilnag iti dalanmo.

29 Itan-ok ti Dios dagiti napakumbaba

ket ipababana dagiti natangsit.

30 Ispalennakanto no awan nakabasolam;

isalakannaka no nalinteg ti aramidmo.

1-2 Agpapan ita, sukirek latta ti Dios;

diak malapdan ti agasug.

3 Ammok la koma ti pangsarakak kenkuana;

innak biroken, mapanak iti ayanna.

4 Ipakaammok kenkuana ti sasaadek,

ibagak kenkuana ti kalintegak.

5 Kayatko a maammoan no ania ti makunana

kayatko a maawatan ti sungbatna.

6 Usaren ngata ti Dios ti bilegna kaniak?

Saan! Ipangagnak no agsaoak.

Diak agulbod, mabalinko ti agrason iti Dios.

7 Nalintegak a makilinnawag kenkuana,

ket ikeddengna a mamimpinsan nga awan basolko.

8 Sinapsapulko ti Dios idiay Daya, ngem saanko a nabirokan.

Sinapsapulko idiay Laud, ngem kaskasdi a diak nasarakan.

9 Adda inaramid ti Dios idiay Amianan ken Abagatan

ngem kaskasdi a saanko a nasarakan.

10 Nupay kasta, ammo ti Dios ti amin nga addangko;

no padasennak, masarakannanto a nadalus ti biagko.

11 Sursurotek a siaannad ti ituyangna a pagnaan,

ket sipupudnoak a magna iti dalan.

12 Kanayon a tungpalek dagiti amin a bilinna;

surotek ti pagayatanna, saan a ti tarigagayak.

13 Saan nga agbalbaliw ti Dios;

awan ti makabael a mangbusor kenkuana.

Awan ti makalapped kenkuana

no agaramid iti kayatna.

14 Tungpalennanto ti intudingna kaniak;

maysa laeng daytoy iti adu a panggepna,

15 ket agpigergerak iti buteng iti imatangna.

16-17 Pinukaw ti Dios a Mannakabalin-amin ti turedko

Ti Dios, saan a ti sipnget, ti nangyeg iti panagbutengko,

uray no pinagbulseknak ti sipnget.

1 Apay a di mangituding ti Dios

iti aldaw a panangukomna tapno ipaulogna ti hustisia

kadagiti agserserbi kenkuana?

2 Dagiti tattao yalisda dagiti mohon ti daga

tapno makagamgamda iti nalawlawa a sakupenda.

Agtakawda kadagiti karnero,

ket itiponda kadagiti arbanda.

3 Takawenda dagiti asno dagiti ulila,

ket alaenda ti baka ti balo a babai a pangigawidanda iti utangna.

4 Ikkatenda ti kalintegan dagiti napanglaw,

ket kapilitan nga aglemmengda gapu iti butengda.

5 Mayarig dagiti napanglaw iti atap nga asno

nga agsapul iti taraon idiay let-ang.

Awan sabali a pagbirokanda

iti kanen dagiti annakda.

6 Kapilitan nga aganida iti talon a dida kukua,

ket burasenda ti ubas dagiti managdakdakes.

7 Maturogda iti rabii nga awan pagulesda

wenno kagay a mangpapudot kadakuada.

8 Maslepda iti tudo nga agtinnag kadagiti bantay,

ket aglinongda kadagiti dadakkel a bato.

9 Tagabuen dagiti managdakdakes dagiti ulila iti ama.

Alaenda dagiti annak ti napanglaw a kas bayad ti utangna.

10 Ngem rummuar dagiti napanglaw nga awan pagan-anayda;

agan-anida latta uray no mabisinda.

11 Agpespesda kadagiti olibo a maaramid a lana,

ken kadagiti ubas a maaramid nga arak,

ngem isuda mawawda.

12 Manipud siudad, rumkuas ti ikkis dagiti nasugat ken agbugbugsot,

ngem saan nga ipangag ti Dios ti kararagda.

13 Adda dagiti manglaksid iti lawag;

no ania daytoy, saanda a maawatan

ket saanda a suroten ti inna pagturongan.

14 Parbangon a rummuar ti mammapatay,

ket uloyanna ti napanglaw;

rabii no mapan agtakaw.

15 Aguray iti sumipnget sa rummuar ti mannakikamalala;

lingdanna ti rupana tapno awan ti makabigbig kenkuana.

16 Iti rabii, serken dagiti mannanakaw dagiti balbalay.

Ngem aglemmengda iti aldaw

ket liklikanda ti lawag.

17 Kabutengda ti lawag ti aldaw,

ngem awan amakda iti sipnget.

18 Mayanud ti managdakdakes iti layus,

ket ilunod ti Dios ti dagana;

saanen a mapan agtrabaho iti kaubasanna.

19 No kasano a marunaw ti niebe iti tiempo ti kalgaw,

kasta met a mapukaw ti managbasol

iti daga dagiti sibibiag.

20 Awan ti makalagip kenkuana,

uray ti mismo nga inana;

iggesen ket mapukan a kas iti kayo.

21 Inlupitlupitna ngamin dagiti balo a babbai

ken dina kinaasian dagiti babbai nga awan annakna.

22 Babaen iti pigsa ti Dios, dadaelenna ti nabileg.

Agtignay ti Dios, ket matay ti managdakdakes.

23 Palubosan ti Dios nga agbiag a sitatalged,

ngem kanayon a sipsiputanna.

24 Rumang-ay ti managdakdakes iti apagbiit

ngem malaylay a kasla ruot,

kasla garami a maparaspas.

25 Adda kadi makailibak iti daytoy?

Adda kadi makaipaneknek

a saan a pudno ti saok?