Philippine

1 Tikapintasan kadagiti kanta ni Solomon.

Ti Umuna a Kanta

2 “Pugpogennak iti ungngo dagiti bibigmo;

naim-imas ngem arak ti ayatmo.

3 Nabanglo ti ayamuommo;

no maibalikas ti naganmo kasla agaddiwara a bangbanglo.

Awan ti babai a di agayat kenka.

4 Alaennak ta agtarayta;

agbalinka nga arik, ket iserreknak iti kuartom.

Addaka ditoy sidongko, agragsakta;

ipennekta ti uminum, agpapasta iti ayatta.

Diak nagbiddut iti panagayatko kenka!

5 Babbai iti Jerusalem, napugotak ngem napintasak;

wen, nangisitak a kas kadagiti tolda ti let-ang ti Kedar,

ngem napintasak kas kadagiti kurtina iti palasio ni Solomon.

6 Didak laisen gapu iti kolorko,

ngamin, pinangisit ti init ti kudilko.

Kinapungtotdak dagiti lallaki a kakabsatko,

imbaondak iti kaubasan ket sadiayak a nagtrabaho,

isu a nabaybay-ak ti bagik, diak naasikaso.

7 Ibagam kaniak, biagko:

Sadino ti pangipaarabam iti arbanmo?

Sadino ti paginanaanda iti agmatuon nga init?

Apay a kaslaak agalla-alla nga agsapsapul kenka

kadagiti arban dagiti dadduma nga agpaspastor?”

8 “Dimo ammo ti lugar, kapintasan a babai?

Inka suroten ti tugot ti arban,

ket isapulam dagiti kaldingmo iti pagarabanda

iti asideg dagiti tolda dagiti agpaspastor.

9 “Ay-ayatek, kayawam dagiti lallaki

a kas panangkayaw ti kabaian a kabalio

kadagiti kalakian a kabalio a para-guyod

kadagiti luglugan ti Faraon.

10 Napintas dagiti pingpingmo

a naarkosan kadagiti alahas.

Agbitin iti tengngedmo ti balitok a kuentas.

11 Yaramidandaka iti alahas a balitok

a mapattopattokan iti pirak.”

12 “Bayat ti panagid-idda ti arik iti sofa,

agaddiwara ti ayamuom ti bangbanglok.

13 Agat-mirra ti kaayan-ayatko

nga agsadsadag iti barukongko.

14 Mayarig ti kaayan-ayatko kadagiti balang a sabong

nga agukrad iti kaubasan idiay Engedi.”

15 “Nagpintaska ketdin, biagko;

anian a nagrimat dagiti matam gapu iti ayat!”

16 “Nagtaerka ketdin, sika a kapatgan;

makaay-ayoka unay.

Agpaay nga iddata ti nalasbang a karuotan;

17 sedro ti aoanan ti balayta,

ket aruo ti bobedana.

1 Balang laeng a rosas ti Saron ti kayarigak,

maysaak a lirio kadagiti tanap.”

2 “Lirio kadagiti mula a siitan

ti arig ti ay-ayatek iti ummong dagiti babbalasang.”

3 “Arig ti mansanas iti bakir ti kaingungotko;

kadagiti amin a lallaki, awan makaartap.

Magustoak ti agtugaw iti linongna,

nasam-it iti panagramanko ti bungana.

4 Intugotnak iti pagdadayaan iti taengna,

ket imbayogna ti bandera ni ayat kaniak.

5 Pinakannak iti pasas tapno agsubli ti pigsak;

inikkannak iti mansanas tapno sumarantaak.

Napaksuyanak a nakiinnayat.

6 Pagpungpunganak ti kannigid a takkiagna,

ket lalailoennak ti kannawanna.

7 Ikariyo kaniak, babbai iti Jerusalem,

isapatayo kadagiti napardas nga ugsa ken korso

a diyo singsingaen ti panaglinnailomi.”

Ti Maikadua a Kanta

8 “Mangngegko ti timek ti kaayan-ayatko.

Agtartaray kadagiti bantay ken turturod

nga umay iti ayanko.

9 Arigna iti korso ti kaingungotko,

kasla maysa nga ugsa a bumaro.

Agtaktakderen iti ruar ti bakudmi,

sumirip iti tawa, iti baet dagiti rehas

tapno makitanak.

10 Agsao ti kaayan-ayatko kaniak.”

“Umaykan, ay-ayatek;

biagko, kumuyogka kaniak.

11 Limmabasen ti tiempo ti lam-ek;

simmardengen ti tudtudo.

12 Agukraden dagiti sabsabong iti tanap.

Tiempon ti panagkakanta,

agkakantan dagiti pagaw iti taltalon.

13 Agluomen ti bunga dagiti igos,

agsabongen dagiti ubas, ti bangloda agadiwara.

Umayka ngaruden, ay-ayatek;

biagko, kumuyogka kaniak.

14 Arigmot’ kalapati nga aglemlemmeng

iti rengngat ti kabatoan.

Kitaek man ti nalibnos a rupam,

denggek man ti nasam-it a timekmo.

15 “Tiliwem dagiti musang nga agdadael iti mula,

amangan no makastrekda iti agsabsabong a kaubasanta.”

16 “Kukuak ti kaayan-ayatko ket kukuanak met.

Ipapaarabna ti arbanna iti kalirioan

17 agingga nga agpul-oy ti angin ti agsapa,

ken agpukaw ti sipnget.

Agsublika, biagko, a kas iti korso,

kas iti bumaro nga ugsa kadagiti bambantay.

1 Rinabii a matagtagainepko ti kaayan-ayatko,

sapsapulek ngem diak masarakan.

2 Bimmangonak ket sinursorko ti siudad,

linasatko dagiti kalsada ken lansangan.

Binirbirokko ti kaayan-ayatko,

sinapsapulko ngem diak masarakan.

3 Nasarakandak dagiti patrolia iti siudad;

sinaludsodko kadakuada no nakitada ti kaayan-ayatko.

4 Idi makapanawakon iti ayan dagiti guardia,

nasarakak ti kaayan-ayatko.

Inarakupko ket diak pinalubosan

agingga nga inyawidko iti balay ni inak,

iti kuarto a nakaipasngayak.

5 Ikariyo kaniak, babbai iti Jerusalem,

isapatayo kadagiti napardas nga ugsa ken korso

a diyo singsingaen ti panaginnayatmi.”

Ti Maikatlo a Kanta

6 “Ania daytoy sumungad nga aggapu idiay let-ang,

kasla umasimbuyok nga asuk

nga agat-mirra ken insenso

ken nabanglo a polbos dagiti agtagtagilako?

7 Umayen ni Solomon, situtugaw iti trono nga awitda;

guguardiaan ti innem a pulo a mannakigubat,

dagiti kalaingan a soldado iti Israel.

8 Nalaingda amin nga agiggem iti kampilan;

beteranoda iti gubat.

Nakaibarikes ti tunggal maysa iti kampilan,

ket sisasaganada a makiranget

iti dumarup iti rabii.

9 Agtugtugaw ni Ari Solomon iti sofa

a naaramid iti kasayaatan a kayo.

10 Nakalupkopan iti pirak dagiti saka ti sofa

naabbongan iti lupot a nabordaan iti balitok.

Nabungon iti nalabaga a lupot dagiti kudsonna

nga inaramid a siaayat dagiti babbai ti Jerusalem.

11 Babbai iti Sion, umayyo kitaen ni Ari Solomon.

Insaad ni inana ti korona iti ulona

iti aldaw a panagkasarna;

wen, iti aldaw ti rag-o ken ragsakna.”

1 “Nagpintaska ketdin, biagko!

Naabbongan dagiti matam iti belom,

ngem rumimatrimatda gapu’t ayatmo.

Agsalsala ti buokmo a kas iti arban ti kalding

a sumalsalog kadagiti turod ti Galaad.

2 Napudaw dagiti ngipenmo

a kas iti kappukis, kaddigos a karnero.

Awan kurangda, uray maysa,

ket napintas ti panagbabatogda.

3 Dagiti bibigmo kasda la ragas nga eskarlata,

no agsaoka, maragsakan ti makangngeg kenka.

Agraniag dagiti pingpingmo

a naabbongan iti belom.

4 Mayarig iti torre ni David ti tengngedmo,

nagtimbukel ken nalamuyot a nabitinan iti kuentas a kasla rinibu a kalasag.

5 Dagiti susom kasda la dua a kigaw,

mayarigda iti singin nga ugsa nga agar-arab iti kalirioan.

6 Agbatiak iti turod ti mirra,

iti turod ti insenso,

agingga nga agbannawag,

ket agpukawen ti sipnget.

7 Naglibnoska ketdin, biagko!

Imnas a naidumduma, awan pagkuranganna!

8 “Sumalogta iti Bantay Libano, biagko;

wen, kumuyogka kaniak manipud Libano.

Sumalogka manipud iti tapaw ti Bantay Amana,

manipud Bantay Senir ken Bantay Hermon

a pagnaedan dagiti leon ken leopardo.

9 Ta ikikitam, ay-ayatek ken biagko,

ken ti kuentas iti tengngedmo

isuda ti nangkayaw itoy puso.

10 Nasam-it ti makiinnayat kenka,

ay-ayatek ken nobiak;

naim-imas ngem arak ti ayatmo.

Awan makaartap iti ayamuom ti bangbanglom.

11 Kasla diro ti sam-it dagiti bibigmo, biagko;

ta dilam kasla gatas ken diro.

Adda iti kawesmo ti amin a banglo ti Bantay Libano.

12 “Mayarig iti minuyongan ti ay-ayatek,

naiputputong a hardin,

adda bakud ken ubbogna a bukbukod.

13 Nalangto dagiti mula sadiay.

Agtuboda a kas minuyongan dagiti kayo a granada

ket agbungada iti kasayaatan a bunga—

bangbanglo nga alkamfor ken nardo.

14 Nardo ken azafran, kalamos ken kanela

ken amin a kayo nga agtutot iti insenso.

Mirra ken aloe

ken amin a kangrunaan a bangbanglo.

15 Ubbog ti mangpadanum iti hardin,

wen, danum nga agayus

manipud iti Bantay Libano.”

16 “Agriingka, O angin ti amianan;

angin ti abagatan, pul-oyam ti hardinko

tapno agwaras ti banglona.

Umay koma ti ay-ayatek iti hardinna

ket mangan kadagiti kaimasan a bungana.”

1 “Addaak iti hardinko, ay-ayatek ken nobiak.

Agal-alaak iti mirra ken balsamok;

kankanek ti rara ken ti dirok,

in-inumek ti arak ken gatasko.”

“Mangan ken uminumkayo, agayan-ayat,

agingga a mabartekkayo iti ayat!”

Ti Maikapat a Kanta

2 “Matmaturogak ngem siririing toy riknak,

mangngegko ti kaayan-ayatko nga agtuktok iti ridaw.”

“Sumrekak man, biagko ken ay-ayatek,

bassit a kalapatik nga awan pagkuranganna.

Sibabasa ti ulok iti linnaaw ti agsapa.”

3 “Nakauksobakon;

masapul kadi nga agbadoak manen?

Nabuggoakon dagiti sakak,

masapul kadi a rugitak manen ida?

4 “Iniggaman ti kaayan-ayatko ti ridaw,

ket naggagarak kenkuana, limmagto ‘toy puso.

5 Timmakderak a mangpastrek iti kaayan-ayatko,

sibabasa dagiti imak iti mirra,

ket agar-aruyot dagiti ramayko

idi uksotek ti balunet.

6 Inlukatko ti ridaw tapno sumrek

ngem nakapanaw metten ti ay-ayatek.

Kailiwko unay a denggen

ti timekna!

Binirokko ngem diak nasarakan;

inawagak ngem awan simmungbat kaniak.

7 “Nasarakandak dagiti agwanwanawan iti siudad;

kinabkabildak agingga a nasugsugatanak.

Dagiti guardia ti bakud pinigisda ti kagayko.

8 Babbai iti Jerusalem, ikariyo kaniak,

a no masarakanyo ti ay-ayatek,

ibagayo kenkuana a masakitak gapu iti ayat.”

9 “Kalibnosan kadagiti babbai,

ania kadi ti nakaidumaan ti ay-ayatem kadagiti kaaduan?

Ania la unay aya ti nakaskasdaaw kenkuana,

ta masapul nga agkarikami kenka?”

10 “Nataer ken napigsa ti kaayan-ayatko

naiduma kadagiti pinulloribu.

11 Nalinis ken pugot ti rupana,

nangisit a kas iti wak ti kulot a buokna.

12 Napintas dagiti matana kas kadagiti kalapati

iti asideg ti agay-ayus a waig,

kalkalapati a nadigos iti gatas,

ken sitatakder iti abay ti ubbog.

13 Dagiti pingpingna arigda napintas a hardin

a napno iti mula ken bangbanglo.

Kasla lirio dagiti bibigna

a nababasa iti mirra.

14 Nasippukel dagiti takkiagna,

ket nakasingsing iti adda batona.

Nalinis ti bagina a kas iti marfil

a napattokan iti safiro.

15 Kasla adigi nga alabastro dagiti sakana,

a naisaad iti balitok.

Nadaeg a kas iti Bantay Libano,

a namulaan iti nalalayog a sedro.

16 Nasam-it nga agkan ti ngiwatna,

mabatombalaniak iti amin nga adda kenkuana.

Kastoy ti kayarigan ti ay-ayatek,

babbai iti Jerusalem.”

1 “Kaimnasan kadagiti babbai,

napanan kadi ti patpatgem?

Ibagam kadakami ti nagturonganna,

ta tulongandaka a mangbirok kenkuana.”

2 “Napan ti kaayan-ayatko iti hardinna

a pagtubtuboan dagiti kayo a balsamo.

Ipapaarabna ti arbanna iti minuyongan

ken agketkettel kadagiti lirio.

3 Kukuak ti kaayan-ayatko ket kukuanak met;

pagarabenna ti arbanna iti kalirioan.”

Ti Maikalima a Kanta

4 “Ay-ayatek, napintaska a kas iti Jerusalem;

nalibnoska a kas iti siudad ti Tirsa;

makakayawka a kas kadakuada.

5 Dimo iperreng dagita matam kaniak,

ta makayawan toy riknak.

Agsalsala ti buokmo a kas iti arban ti kalding

a sumalsalog kadagiti turod ti Galaad.

6 Napupudaw dagiti ngipenmo

a kas kadagiti kaddigos a karnero.

Awan ti naikkat kadakuada

ket napintas ti panagbabatogda.

7 Agraniag dagiti pingpingmo

a naabbongan iti belom.

8 Addaan ti ari iti innem a pulo a reyna,

ken walopulo a kamalala,

ken babbalasang a di mabilang.

9 Ngem bugbugtong ti ay-ayatek,

napintas a kalapati ti kayariganna.

Kakaisuna nga anak ni inana,

ket idumduma ti nangipasngay kenkuana.

Kitkitaen amin a babbai ket raemenda;

ikankanta dagiti reyna ken kamalala ti panagdaydayawda.

10 “Siasino daytoy pumalpalludip a kas iti parbangon?

Napintas, naraniag;

makapurar a kas iti init wenno bulan

Nakaskasdaaw a kas armada nga addaan kadagiti bandera.

11 Simmalogak iti kaalmendrasan

tapno kitaek dagiti nalangto a mula iti tanap;

tapno kitaek no naguggoten dagiti ubas

ken nagsabongen dagiti granada.

12 Agtigtigergerak, pinaggagarnak iti ayat

a kas iti panaggagar ti maingel a mapan makigubat.”

13 “Agsalaka, agsalaka, balasang a Sulamita;

wen, agsalaka tapno buyaendaka.”

“Apay a kayatyo a buyaen ti Sulamita,

a kas iti sala iti nagbaetan ti dua nga armada?”

1 “Nagpintasen dagita saka a nakasandalia,

O nadayag a babai!

Kasla sinukog ti nalaing nga eskultor dagiti

nasippukel a luppom.

2 Ti pusegmo kasla nagbukel a malukong

a di maibusan iti nalaokan nga arak.

Mayarig iti nabettek a trigo ti siketmo

a nalikmut iti lirio.

3 Kasla singin nga ugsa dagiti susom,

kasda la dua a kigaw.

4 Kasla torre a marfil ti tengngedmo.

Dagiti matam kas libtong ti Hesbon,

iti asideg ti ruangan ti siudad a naindaklan.

Natundiris ti agongmo, kas torre ti Libano

a mangtantannawag iti Damasco.

5 Natangig ti ulom a kas iti Bantay Carmel.

Napintas ti nasallapid a buokmo a kas iti

kapintasan a nalabaga a lupot;

kayawan ti pintasna ti maysa nga ari.

6 “Nagpintaska ketdin, biagko, anian a pusaksak;

nagimnasen ti ragsak nga ipalak-ammo kaniak.

7 Napintas ti lung-aymo a kas iti kayo ti palma,

ket dagiti susom kasdala sinar-ay a bungana.

8 Uliekto ti kayo a palma

ket purosek dagiti bungana.

Raay ti ubas dagiti susom iti panagkitak,

ti sang-awmo kasla ayamuom ti mansanas.

9 ket dagiti agekmo kas iti kaimasan nga arak.”

“Agayus koma ti arak iti kaayan-ayatko

ket agayus kadagiti bibig ken ngipenna.

10 Kukuanak ti kaayan-ayatko ket tarigagayannak.

11 Umayka, biagko, inta idiay away

ket umianta kadagiti kataltalonan.

12 Agriingtanto a masapa ket kitaenta dagiti ubas;

kitaentanto no agsaringit wenno agsabongdan.

Kitaentanto no agsabongen dagiti granada.

Sadiay, itedkonto toy ayatko kenka.

13 Masay-upmo ti ayamuom ti mandragoras,

adda iti ridawta dagiti bunga nga agkakaimas.

Biagko, iduldulinko a para kenka dagiti daan

ken baro a bunga.

1 “Apay a dika nagbalin a kabsatko?

Pinasusonaka koma ti inak, inaywanannaka,

tapno awan agdildillaw no agkanka,

no masabatka iti kalsada.

2 Yawidka koma iti balay ti inak

ket isuronak nga agayat.

Ikkanka koma iti nalaokan nga arak,

ti arak a nagtaud iti granada a mulak.

3 “Agpungpunganak iti kannigid a takkiagmo,

ket lalailoennak ti kannawanmo.

4 Ikariyo kaniak, babbai iti Jerusalem,

a diyo singsingaen ti ayatmi.”

Ti Maikanem a Kanta

5 “Siasino daytoy sumungad nga aggapu iti let-ang

nga agkibkibinda iti ay-ayatenna?”

“Riniingka iti sirok ti mansanas,

iti lugar a nakaipasngayam.

6 Siak laeng ti ayatem,

siak laeng ti arakupem.

Nabileg ti ayat a kas iti patay;

naranggas ti imon a kas iti tanem.

Rumasuk a kas sumgiab nga apuy,

ket gumil-ayab a kas iti nadawel nga uram.

7 Saan a masebseban ti adu a danum,

ket awan ti layus a makaiddep.

Ngem no adda agpanggep a gumatang iti ayat,

pannakaumsinto laeng ti inna maragpat.”

8 “Adda kabsatmi nga ubing a babai,

babassit pay la dagiti susona.

Anianto ti ipaaymi iti kabsatmi

inton adda barito nga agarem kenkuana?

9 No maysa a bakud ti kabsatmi,

ibangonanmi iti pirak a torre a salaknibna.

No maysa a ruangan,

pakalupkopanmi iti sedro.”

10 “Maysaak a bakud

ket dagiti susok ti torrena.

Ammo unay ti kaayan-ayatko

a natalged ti salaknibko

ket awan pakaan-anoak.”

11 “Adda kaubasan ni Solomon

iti lugar a managan Baal Hamon.

Adda dagiti mannalon a nangipaabanganna;

tunggal maysa sangaribu a bagi ti pirak ti ibayadna.

12 Adda met bukodko a kaubasan.

Solomon, kukuam ti rinibu a pirakmo,

ket maibingayan dagiti mannalon iti sagdudua a gasutda.

13 Denggek man ti timekmo manipud iti hardin, ayatko,

Dagiti kakaduak aggagarda a makangngeg kenka.”

14 “Biagko, darasem ti umay kaniak.

Agtarayka a kas iti ugsa,

iti kabambantayan a napno iti nabanglo a mulmula.”