Categories
Isaias

Isaias 62

1 Agsaoak tapno pumigsa

ti pakinakem ti Jerusalem;

diak agulimek agingga a di maisalakan ti siudad,

ket agraniag ti balligina a kas silaw iti rabii.

2 Jerusalem, makitanto dagiti nasion ti panagballigim!

Makitanto dagiti arida ti dayagmo.

Addanto baro a naganmo,

nagan nga ited a mismo tiApo.

3 Agbalinkanto a napintas a korona iti ima tiApo.

4 Saankanton a maawagan iti “Nabaybay-an,”

dinto met maawagan ti dagam iti “Asawa a Napanawan.”

Baro a naganmonto ti “Isu ti Ipangpangruna ti Dios.”

Maawaganto ti dagam iti “Naragsak a Naasawaan,”

gapu ta maragsakan tiApokenka,

ket ibilangnanto ti dagam a kas asawa.

5 Kas iti lalaki nga agtutubo,

a mangasawa iti ubing a balasang,

Isu a nangbukel kenka alaennaka a kas asawa.

Kas iti nobio a maragsakan iti ay-ayatenna,

Kastanto met a maragsakan ti Dios kenka.

6 Kadagiti bakudmo, Jerusalem, nangikabilak kadagiti guardia;

aldaw man wenno rabii, awan panagulimekda,

masapul nga ipalagipda itiApodagiti karina

tapno saanna a malipatan ida.

7 Masapul a dida pagtalnaen agingga a bangonenna

ti Jerusalem ket pagbalinenna a siudad

a daydayawen ti entero a lubong!

8 Insapata tiApoa babaen iti bilegna,

ibanagna nga ibanag daytoy:

“Dinton kanen ti kabusoryo ti taraonyo,

dinton inumen dagiti ganggannaet ti arakyo.

9 Ngem dakayo a nangimula ken nangapit iti trigo

dakayto ti mangan iti tinapay ket idaydayawyo tiApo!

Dakayo a nangaywan ken nagburas kadagiti ubas,

dakayto ti uminum iti arak iti paraangan ti Templo.”

10 Tattao ti Jerusalem, rummuarkayo iti siudad,

ket agaramidkayo iti kalsada a pagnaan

dagiti agsubli a kailianyo.

Mangisaganakayo iti nalawa a dalan;

ikkatenyo dagiti batbatona.

Mangikabilkayo iti pagilasinan

11 apakaammoan dagiti nasion a kastoy ti ipakaammo

tiApoiti amin a daga:

“Ibagayo kadagiti tattao ti Jerusalem

nga umayen tiApoa mangisalakan kadakayo,

ket yegna dagiti tattao nga inispalna!”

12 Maawagankayto iti “Nasantoan a Tattao ti Dios,”

“Tattao nga Insalakan tiApo!”

Maawaganto ti Jerusalem iti “Siudad nga Ay-ayaten ti Dios,”

“Ti Siudad a Saan a Binaybay-an ti Dios.”

Categories
Isaias

Isaias 63

Parmeken ni Yahweh dagiti Nasion

1 Siasinodaytoy sumungad, daytoy aggapu iti siudad ti Bosra iti Edom? Siasino daytoy nakadaydayag ti kawesna a nalabbaga, isu a magmagnaa napnoan iti pigsa?

Isu tiApo, ti mannakabalin a mangisalakan! Umayna ipakaammo iti panagballigina.

2 Apay a nalabbaga ti pagan-anayna? Apay a kasla iti pagan-anay ti tao nga agpespespes iti ubas a maaramid nga arak?

3 IsungbattiApo, “Binaddebaddekko dagiti nasion a kasla ubas ket awan ti immay timmulong kaniak. Pinayatpayatko ida gapu iti pungtotko ket nagparsiak ti darada iti pagan-anayko.

4 Inkeddengko a dimtengen ti tiempo nga isalakanko dagiti tattaok. Dimtengen ti tiempo a dusaek dagiti kabusorda.

5 Nasdaawaka nakakita nga awan ti tumulong kaniak. Ngem pinapigsanak ti pungtotko ket nagballigiak.

6 Iti pungtotko, binaddebaddekko dagiti pagilian ket nawarawarada. Imbuyatko ti darada iti daga.”

Ti Kinaimbag ni Yahweh iti Israel

7 Saritaek ti di agbaliw nga ayat tiApo;

itan-okko gapu iti amin nga inaramidna kadatayo.

Pinaraburanna a sibubuslon dagiti Israelita,

gapu iti asi ken di agbalbaliw nga ayatna.

8 Kinuna tiApo, “Tattaok ida, ket saandakto nga allilawen.” Ket insalakanna ida

9 iti amin a sagsagabaenda. Saan nga anghel ti nangisalakan kadakuada no di ket tiApo. Wen, tiApoti nangispal kadakuada gapu iti ayat ken asina. Kanayon nga inay-aywananna ida iti napalabas.

10 Ngem nagsukirda kenkuana ket pinagladingitda. Ngarud, nagbalin tiApoa kabusorda ket isu a mismo ti nakiranget kadakuada.

11 Ngem linagipda ti napalabas, daydi tiempo ni Moises nga adipen tiApoket sinaludsodda, “Sadino itan ti ayan tiApoa nangisalakan kadagiti pangulo dagiti tattaona iti ipapatayda iti baybay? Ayan tiApoa nangted ken ni Moises iti naisangsangayan a pannakabalin?

12 AyantiApoa nangaramat iti pannakabalinna ket nagaramid kadagiti naindaklan a banag babaen iti panangaramatna ken ni Moises? Biningayna ti danum ti baybay iti imatang dagiti tattaona tapno maidaydayaw iti agnanayon.”

13 Idi inlasat ida tiApoiti adalem a danum, natibker dagiti sakada a kas kadagiti kabalio ket pulos a dida naikaglis.

14 Kas iti pannakaipan ti arban ti baka iti nalangto a pagaraban iti tanap, kasta met ti pannangted tiApoiti panaginana kadagiti tattaona. Indalan ngarud tiApodagiti tattaona ket naidaydayaw ti naganna.

Kararag a Pagdawat iti Asi ken Tulong

15 OApo, tannawagannakami dita langit a pagnaedam iti kinasanto ken kinadayagmo. Sadino ti ayan ti panangipategmo unay kadakami? Sadino ti ayan ti pannakabalinmo? Ayan ti ayat ken panangngaasim? Dinakam kad baybay-an.

16 Sika ti Amami. Dinakam matulongan da Abraham ken Jacob a kapuonanmi, ngem sika, OApo, ti Amami. Sika ti nangis-ispal kadakami.

17 Apay nga ipalubosmo a sumiasikami kadagiti dalanmo? Apay nga ipalubosmo nga agsukirkami ket tallikudandaka? Agsublika, ipagpagapum kadagiti agserbi kenka, ipagpagapum kadagiti tattao a kukuam.

18 Dandanin papanawen a mamimpinsan dagiti kabusormi dagiti tattaom ket tinulawanda ti Templo.

19 Ibilangnakami a kasla saan a sika ti nangituray kadakami, a kasla saan a dakami ti tattaom.

Categories
Isaias

Isaias 64

1 Apay a dimo ray-aben ti langit ket bumabaka? No aramidem ti kasta, makitadaka dagiti bantay ket agkintayegda iti buteng!

2 Agtigergerda a kas iti danum nga agburburek iti dumardarang nga apuy. Umayka ket ipakitam kadagiti kabusormo ti pannakabalinmo. Pagtigergerem dagiti nasion iti imatangmo.

3 Immayka idi ket nagaramidka kadagiti nakabutbuteng a banag a dimi ninamnama nga aramidem. Nakitadaka dagiti bantay ket nagkintayegda iti buteng.

4 Awanpay ti nakakita wenno nakadamag iti Dios a kas kenka, Dios nga agaramid kadagiti kakasta a banag kadagiti agtalek kenkuana.

5 Siaayatka nga umawat kadagiti agrag-o nga agaramid iti naimbag, kadagiti makalagip nga agbiag kas mayannurot iti pagayatam. Kinapungtotnakami, ngem intultuloymi ti nagbasol. Uray no kasta unay ti pungtotmo kadakami, dikam nagsardeng a nagaramid iti dakes manipud idi un-unana.

6 Managbasolkami amin; uray dagiti kasayaatan nga aramidmi mayarigda iti nakarugrugit a nisnis. Gapu kadagiti basolmi, mayarigkami iti nagango a bulong a mayang-angin.

7 Awan ti agkararag kenka; awan ti umawag iti tulongmo. Inlemmengannakami ket binaybay-annakamigapu kadagiti basolmi.

8 Ngem sika, OApo, ti Amami. Mayarigkami iti dadamilien ket mayarigka met iti agdamdamili. Pinarsuanakami

9 isut’ gapuna a dinakam koma unay kapungtot. Dimo koma ipempempen dagiti basolmi a maibusor kadakami iti agnanayon. Tattaonakami ket kaasiannakami kadi.

10 Nagbalinen a kasla let-ang dagiti nasantoan a siudadmo. Narba ti Jerusalem ket nagpanawanen.

11 Nauramen ti Templomi, ti nasagradoan ken napintas a lugar a nagdaydayawan idi kenka dagidi kapuonanmi. Nadadael amin a lugar nga impatpategmi.

12 OApo, saanka kadi a matignay gapu kadagitoy? Agulimekka kadi lattan idinto nga agsagsagabakami iti nakarkaro ngem ti maibturanmi?

Categories
Isaias

Isaias 65

Ti Dusa nga Ipatay ti Dios kadagiti Nasukir

1 KinunatiApo, “Sidadaanak idi a mangipangag iti kararag dagiti tattaok ngem dida met nagkararag. Inur-urayko ida a mangbirok kaniak, ngem dida inggay-at ti mangbirok kaniak. Saan a nagkararag kaniak ti nasion, nupay sisasaganaak a mangibaga iti daytoy: ‘Adtoyak a tumulong kenka.’

2 Sisasaganaaknga umawat kadagitoy a tattao, isuda a mangipapilit nga agaramid iti dakes ket mapanda iti kaykayatda.

3 Dida agbain a kanayon a mamagpungtot kaniak. Agidatagda kadagiti sakrifisio nga idatdatag dagiti pagano kadagiti minuyongan a sagradoken agpuorda iti insenso kadagiti altar dagiti pagano.

4 Iti rabii, mapanda kadagiti rukib ken tantanem tapno makiumanda kadagiti espiritu dagiti natay. Agsida dagitoy a tattao iti karne ti baboy. Umigupda iti digo ti karne a naidatag iti panagdaton dagiti pagano.

5 Kalpasanna, ibagada kadagiti tattao nga umadayoda ket dida sagiden ida ta nasantoanda unay. Diak maanusan dagiti kastoy a tattao. Kasla apuy a saan a maiddep ti pungtotko kadakuada.

6 “Inkeddengkon ti dusa nga ipatayko kadakuada ket naisuraten ti sentensia. Diak pakawanen ti inaramidda ket dusaek ida

7 gapu kadagiti basbasolda ken kadagiti basbasol dagiti kapuonanda. Nagpuorda iti insenso kadagiti turod a pagdaydayawan dagiti pagano ket dakes ti saoda maipapan kaniak. Dusaek ngarud ida a kas mayannatup kadagiti inaramidda.”

8 Kuna tiApo, “Awan ti mangdadael kadagiti nasayaat nga ubas. Aramidenda ketdi nga arak. Diak met dadaelen dagiti amin a tattaok—isalakankonto dagiti agserbi kaniak.

9 Bendisionakto dagiti Israelita a nagtaud iti tribu ti Juda ket tagikuaento dagiti kaputotanda ti dagak a kabambantayan. Agnaedto sadiay dagiti pinilik a tattaok, isuda nga agserbi kaniak.

10 Agdaydayawdantokaniak ket ipaarabdanto dagiti karnero ken bakada iti Tanap ti Saron iti laud ken iti Tanap ti Riribuk iti daya.

11 “Ngem saanto a kasta ti maaramid kadakayo a mangtallikud kaniak, dakayo a di mangikankano iti Sion, ti nasantoan a bantayko ken agdaydayaw kada Gad ken Meni a didiosen ti gasat ken pagbanagan.

12 Intudingkayo a matay iti kampilan gapu ta didak impangag idi inayabankayo. Didak inkankano idi nagsaoak. Kinaykayatyo ti nagsukir kaniak ken nagaramid iti dakes.

13 Ibagak ngarud kadakayo nga adunto ti kanen ken inumen dagiti agdaydayaw ken agtulnog kaniak, ngem mabisinan ken mawawkayto. Naragsakdanto ngem maibabainkayto.

14 Agkantadanto gapu iti rag-o, ngem agsangitkayto gapu iti ladingityo.

15 Aramatento dagiti pinilik a tattao a pagilunod iti naganyo. Siak nga ApoDiosti mangpapatayto kadakayo. Ngem ikkakto iti baro a nagan dagiti agtulnog kaniak.

16 Siasinoman nga agnaed iti daga nga agkiddaw a mabendisionan, agdawatto iti napudno a Dios. Siasinoman nga agsapata, pagsapatananto ti nagan ti napudno a Dios. Awanton dagiti riribuk iti napalabas ket malipatandanton.”

Ti Baro a Langit ken ti Baro a Daga

17 KunatiApo, “Mangaramidak iti baro a langit ken baro a daga. Malipatanton a mamimpinsan dagiti napasamak iti napalabas.

18 Agrag-o ken agragsakkayo iti agnanayon gapu iti parsuaek. Mapnonto iti rag-o ti baro a Jerusalem a parsuaek. Naragsakto dagiti tattaona.

19 Mapnoaktomet iti rag-o gapu iti Jerusalem ken kadagiti tattaona. Awanton ti agsangit sadiay, awanton ti umawag iti tulong.

20 Awanton ti matay a maladaga. Madanonto ti tunggal maysa ti naikeddeng a panagbiagna. Maibilang nga ubing pay ti tao a makadanon iti sangagasut a tawen. No adda matay sakbay ti naikeddeng a kaatiddog ti biagna, maipakita a dinusak.

21-22 Agbangonto dagiti tattao iti balbalayda ket isudanto a mismo ti agnaed—dinto usaren ti sabali a tao. Agmuladanto iti ubas ket isudanto ti uminum iti arakna—dinto inumen ti sabali. Napautto ti biag dagiti tattaok a kas iti kapaut ti kayo. Isudanto ti naan-anay nga agnam-ay kadagiti nagbannoganda.

23 Agballigidanto iti amin nga aramidda ket awanto ti didigra a sumangbay kadagiti annakda. Bendisionakto ida ken dagiti kaputotanda iti amin a tiempo.

24 Sungbatakto ida uray madama pay laeng nga agkarkararagda.

25 Agkakaarabtodagiti lobo ken dagiti urbon ti karnero. Manganto ti leon iti garami a kas iti baka. Saanton a napeggad ti uleg. Awanton ti aniaman a makadangran wenno dakes idiay Sion a nasantoan a bantayko.”

Categories
Isaias

Isaias 66

Ukomen ni Yahweh dagiti Nasion

1 KunatiApo, “Ti langit ti tronok ket ti daga ti pagbatayak. Ania ngarud a kita ti balay ti mabalinyo a bangonen nga agpaay kaniak? Ania a kita ti lugar ti mabalinyo nga isagana a pagnaedak?

2 Siak a mismo ti nangparsua iti sangalubongan! Maay-ayoak kadagiti napakumbaba ken managbabawi, kadagiti agbuteng ken agtulnog kaniak.

3 “Aramiden dagiti tattao ti kaykayatda. Iti imatangda, awan pagdumaan dagiti aramidda. Agpartida man iti toro a baka a kas sakrifisio, wenno agidatagda iti tao a kas daton; agidatonda man iti urbon a karnero, wenno rungdoenda ti tengnged ti aso. Agidatagda iti daton a makan wenno agidatagda iti dara ti baboy. Agpuorda iti insenso wenno agkararagda iti imahen. Maragsakanda iti makarimon a panagdaydayaw.

4 Iti kasta, idissuorkonto ti didigra kadakuada—dagiti banag a kabutengda, agsipud ta awan ti simmungbat idi immawagak wenno nangipangag idi nagsaoak. Kaykayatda ti agsukir kaniak ken ti agaramid iti dakes.”

5 Dakayo nga agbuteng ken agtulnog itiApo, denggenyo ti kunana, “Agsipud ta napudnokayo kaniak, guraendakayo ti sumagmamano kadagiti kailianyo, ket awan ti panangikankanoda kadakayo. Rabrabakendakayo ket kunada, ‘Kayatmi a makita a naragsakkayo; ngarud, ipakita koma tiApoti kinatan-okna ket isalakannakayo.’ Ngem isudanto ti maibabain!

6 Denggenyo! Dayta arimbangaw iti siudad, dayta ikkis nga aggapu iti Templo, isut’ timek tiApoa mangdusdusa kadagiti kabusorna!

7 “Mayarigti nasantoan a siudadko iti ina a kellaat a nangipasngay iti anak a lalaki, a pulos a di nagpasikal.

8 Adda kadin nakakita wenno nakadamag iti kastoy a pasamak? Adda kadin nasion a naipasngay iti maysa la nga aldaw? Saan a nasken nga agsagaba ti Sion iti mabayag sakbay a maipasngay ti nasion.

9 Diyo ipagarup a lapdak ti pannakayanak dagiti tattaok a dandanin maipasngay.” Daytoy ti sao tiApo.

10 Makipagragsakkayo iti Jerusalem;

agrag-okayo gapu kenkuana,

dakay a mangipatpateg iti daytoy a siudad.

Makipagrag-okayo itan kenkuana,

dakay a nangdung-aw idi kenkuana.

11 Mairanudkayto iti kinarang-ayna,

kas iti maladaga a sumuso iti inana.

12 Kuna tiApo, “Itedkonto kadakayo ti agnanayon a kinarang-ay. Kaslanto karayan a di agmaga ti panagayus ti kinabaknang dagiti pagilian nga umay kadakayo, kas iti karayan a di agmaga. Mayarigkayto iti maladaga a paspasusoen ti inana, ub-ubbaen ken dungdungoenna.

13 Liwliwaenkayto idiay Jerusalem a kas iti panangliwliwa ti maysa nga ina iti anakna.

14 Agragsakkayto inton makitayo a mapasamak daytoy. Papigsaen ken pasalun-atennakayto. Iti kasta, maammoanyonto a siak, ni Yahweh, tulongak dagiti agtulnog kaniak, ket idissuorkonto ti pungtotko kadagiti kabusorko.”

15 Umayto tiApoa buyogen ti apuy. Agluganto iti payak ti napigsa nga angin tapno dusaenna dagiti kapungtotna.

16 Babaen iti apuy ken kampilan dusaennanto dagiti amin a tattao ti lubong a masarakanna a nakabasol, ket mataydanto.

17 Kuna tiApo, “Asidegen ti kanibusanan dagiti mangdalus kadagiti bagbagida kas mayannurot iti alagaden ti panagdaydayaw dagiti pagano, ket aglibotda kadagiti minuyongan a sagrado. Wen, asidegen ti kanibusanan dagiti agsida iti karne ti baboy ken bao ken kadagiti dadduma a makarimon a taraon.

18 Ammokdagiti panunot ken aramidda.

“Umaykoummongen dagiti tattao ti amin a nasion. Inton dumtengda, maimatangandanto no kasano ti kinabilegko,

19 ket maammoandanto a siak ti mangdusa kadakuada. Ngem ispalekto ti sumagmamano kadakuada tapno maibaonda kadagiti pagilian ken kadagiti adayo a daga a dipay nakadamag kaniak wenno nakakita iti dayag ken pannakabalinko. Ibaonkonto ida idiay Espania, Libyaken Lydia, agraman dagiti pumapana a tattaona ken idiay Tubal ken Grecia. Ibagadanto kadagitoy a nasion ti kinatan-okko.

20 Alaendanto dagiti amin a kailianyo manipud kadagiti pagilian ket yawiddanto ida a kas sagut kaniak. Sumangpetdanto a silulugan kadagiti kabalio, mulo, kamelio, lugan a pakigubat ken karison. Maipandanto iti nasantoan a bantayko idiay Jerusalem, kas ipapan dagiti Israelita iti Templok tapno agidatagda kadagiti daton a makan, a naikarga iti nadalus nga alikamen.

21 Pagbalinekto a papadi ken Levita ti sumagmamano kadakuada.

22 “Kasiti panagpaut ti baro a langit ken ti baro a daga babaen iti bilegko, kastanto met ti panagpaut dagiti kaputotanyo ken ti naganyo.

23 Tunggal Fiesta ti Lutuad ken Aldaw a Panaginana, umayto ditoy Jerusalem dagiti tattao iti amin a nasion tapno agdaydayawda kaniak,” kuna tiApo.

24 “Bayatti ipapanawda, makitadanto dagiti bangkay dagiti nagsukir kaniak. Pulos a dinto matay dagiti igges nga agkaan kadagiti bangkayda, ket dinto met maiddep ti apuy a manguram kadakuada. Karimonto ida dagiti amin a tattao a makakita kadakuada.”

Categories
Jeremias

Jeremias 1

1 Nailanad iti daytoy a libro ti pakasaritaan ni Jeremias nga anak ni Hilkias. Maysa ni Jeremias kadagiti papadi iti ili ti Anatot iti daga ti Benjamin.

2 Itimaika-13 a tawen a panagari ni Josias nga anak ni Ari Amon idiay Juda, kinasao ni Yahweh ni Jeremias.

3 Kinasaonamanen idi tiempo ni Ari Jehoyakim nga anak ni Josias. Kalpasanna, namin-adu pay a kinasao ni Yahweh ni Jeremias agingga a naitalaw dagiti tattao ti Jerusalem iti maikalima a bulan iti maika-11 a tawen a panagari ni Zedekias nga anak ni Josias.

Ti Pannakaayab ni Jeremias

4 Kinuna tiApokaniak,

5 “Pinilika sakbay nga inikkanka iti biag, ken sakbay a nayanakka, tinudinganka a profeta kadagiti pagilian.”

6 “O ApoDios,” insungbatko, “diak ammo ti agsarita. Ubingak pay laeng.”

7 Ngem kinuna tiApokaniak, “Dimo kunaen nga ubingka unay; inka ketdi kadagiti tattao a pangibaonak kenka, ket ibagam ti amin nga ibilinko.

8 Dimo kabuteng ida, ta addaakto a mangsalaknib kenka! Siak, ni Yahweh, ti nagsao iti daytoy.”

9 Kalpasanna, sinagid tiApodagiti bibigko, ket kinunana kaniak, “Adtoy, ibagak kenkan ti sawem.

10 Ita nga aldaw, ikkanka iti pannakabalin a mangituray kadagiti pagilian ken pagarian, nga agparut ken agrakrak, agdadael ken agparmek, agbangon ken agmula.”

Dua a Parmata

11 Sinaludsod tiApo, “Ania ti makitam, Jeremias?”

“Maysa a sanga ti kayo ti almendras,” insungbatko.

12 Kinuna ngarud tiApokaniak, “Agpayso ta kunam, ket sisisiputakno matungpal met laeng ti saok wenno saan.”

13 Sinaludsod manen tiApokaniak, “Ania pay ti makitam?”

“Makitak iti amianan ti maysa a kaldero nga agburburek ti linaonna ken agtingtingigen a sumango ditoy,” insungbatko.

14 Kinunana kaniak, “Adda didigra nga aggapu iti amianan nga agbettak kadagiti amin nga agnaed iti daytoy a daga.

15 Denggem: Ayabak dagiti amin a tattao iti amianan. Umayto dagiti amin nga arida ket ipasdekto ti tunggal maysa ti tronona iti sangoanan ti ruangan ti Jerusalem, iti lawlaw ti bakudna ken iti pay lawlaw dagiti siudad ti Juda.

16 Kastoyto ti panangdusak kadagiti nagbasol a tattao agsipud ta linaksiddak ket nagpuorda iti insenso kadagiti didiosen ken nagdaydayawda kadagiti imahen nga inaramidda.

17 Tumuredka ket inka ibaga kadakuada ti aniaman nga ibilinko. Dimo kabuteng ida, ta no agbutengka, ad-addanto a pagbutngenka iti sangoda.

18-19 Denggem, Jeremias: Busorendakanto dagiti amin a tattao ditoy daga, kasta met dagiti ari ti Juda, dagiti agtuturay, dagiti papadi ken dagiti tattao. Ngem parmekemto ida. Mayarigkanto iti nasarikedkedan a siudad. Kaskanto iti landok nga adigi ken bakud a bronse. Didakanto maparmek agsipud ta addaakto a mangsalaknib kenka. Daytoy ti sao ni Yahweh.”

Categories
Jeremias

Jeremias 2

Ti Panagtallikud ti Israel

1 Imbaga tiApokaniak

2 nga innak ipakaammo daytoy a mensahe kadagiti amin nga agnaed idiay Jerusalem:

“Malagipko ti kinapudnom idi ubingka;

malagipko met ti ayatmo kaniak idi kakaskasarta.

Sinurotnak idiay let-ang,

iti maysa a daga nga awan pay mulana.

3 Israel, nailasinka nga agpaay kaniak,

sika ti pinilik a kasayaatan a bunga.

Pinagsagabak dagiti amin a nangranggas kenka;

inyegko ti didigra kadakuada.

Daytoy ti sao ni Yahweh.”

Ti Basol dagiti Kapuonan ti Israel

4 Denggenyo ti mensahe tiApo, dakayo a kaputotan ni Jacob, dakayo a tribu ti Israel.

5 Kuna tiApo:

“Ania ti pammabasol dagiti kapuonanyo kaniak?

Apay a tinallikudandak?

Nagdaydayawda kadagiti awan serbina a didiosen,

ket nagbalinda met nga awan serbina.

6 Saanda a sinaludsod,

‘Sadino ti ayan tiApo

a nangiruar kadatayo idiay Egipto?

Sadino ti ayan

ti nangidalan kadatayo idiay let-ang,

daga a langalang ken ayan ti adu nga abut,

namaga ken napeggad a daga,

daga a saan a mapagpagnaan

ken daga nga awan agnaed?’

7 Impanko ida iti nadam-eg a daga,

tapno lak-amenda dagiti bungana ken amin a naimbag a masarakan kenkuana.

Ngem idi dimtengda sadiay,

tinulawanda dayta a daga.

Pinagbalinda a makarimon

ti daga nga intedko kadakuada.

8 Saan a sinaludsod dagiti papadi, ‘Sadino ti ayan tiApo?’

Saandak nga am-ammo dagiti papadik;

binusordak dagiti agtuturay.

Iti nagan ni Baal, nagsao dagiti profeta

ket nagdaydayawda kadagiti didiosen nga awan serbina.”

Ti Pammabasol ni Yahweh kadagiti Tattaona

9 Kuna tiApo,

“Isut’ gapuna nga idatagko

daytoy a pammabasol kadakayo.

Idatagko pay daytoy a pammabasol kadagiti annak dagiti annakyo.

10 Agpalaudkayo a mapan idiay puro ti Kitim ket kitaenyo.

Mangibaonkay iti mapan idiay Kedar;

matakuatanyonto nga awan pay ti kastoy a napasamak.

11 Addan aya nasion a nangisukat iti diosna

uray pay saan a pudno a dios?

Ngem insukatdak dagiti tattaok,

siak a Dios a nangitan-ok kadakuada;

wen, insukatdak kadagiti didiosen a saan a makatulong kadakuada.

12 Iti kasta, siak, ni Yahweh,

bilinek ti langit nga agkintayeg,

pagamakek ken pagsiddaawek.

13 Adda dua a basol dagiti tattaok:

binaybay-andak nga ubbog ti danum a sibibiag,

nagkalida kadagiti bubon a di mabalin a pagurnongan iti danum.

Ti Nagbanagan ti Panagtallikud ti Israel

14 “Tagabu aya ti Israel? Nayanak aya a tagabu?

Apay ngarud nga an-anupen dagiti kabusorna?

15 Kasda la leon a nagngernger kenkuana;

pinagbalinda a disierto ti dagana

ket dagiti ilina narbada,

naan-anay a nagpanawan,

awan agnaed kadakuada.

16 Binurak tattao’t Memfis ken Tafnes ti ulona.

17 Israel, sika a mismo ti nangyeg iti daytoy a dusa

ta binaybay-annak, ni Yahweh a Diosmo,

idi kibkibinenka iti dalanmo.

18 Ania ti maal-alam no mapanka idiay Egipto

tapno uminumka iti Karayan Nile?

Ania ti gunggonam no mapanka idiay Asiria

tapno uminumka iti Karayan Eufrates?

19 Ti mismo a kinadakesmo ti pakadusdusaam;

maukomkanto gapu iti panangtallikudmo kaniak.

Maammoamto ti kinapait ken kinadakes

iti panangbaybay-am ken ni Yahweh a Diosmo,

ken saanmon a panagbuteng kaniak.

Daytoy ti saok nga Apo aDiosa Mannakabalin-amin.”

Madi ti Israel nga Agdaydayaw ken ni Yahweh

20 Kuna ti Apo aDios,

“Israel, nabayagen a linaksidmo ti panangiturayko.

Dimo kinayat ti agtulnog ken agdaydayaw kaniak.

Iti tunggal nangato a turod

ken iti sirok ti nalangto a kayo,

nagdaydayawka kadagiti didiosen,

nagiddaka a kasla balangkantis.

21 Immulaka a kas iti napili nga ubas,

kas kasayaatan a bukel ti frutas.

Ngem kitaem ti nagbalinam!

Kaska la nalungsot nga ubas,

nga awan serserbina, awan mangayat.

22 Uray no agdigoska iti adda apogna a danum,

ken agsabonka iti adu,

makitak latta ti mansa ti basolmo.

23 Kasano a kunam a dimo tinulawan ti bagim?

Kasano a kunam a dika nagdaydayaw kadagiti didiosen a Baal?

Kitaem ti panagbasolmo idi addaka iti tanap;

kitaem ti inaramidmo.

Arigmo ti agmaya a kamelio

a taray a taray

24 nga agdardaras nga agturong iti disierto.

Awan makapasardeng kenkuana.

Nalaka a biroken dagiti agtarigagay kenkuana,

ta sisasagana latta no masapulda.

25 Israel, dimo ipalubos nga agsakasakaka,

wenno mamagaan ta karabukobmo.

Ngem kunam, ‘Diak mabalin ti agsubli.

Ay-ayatek dagiti didiosen, ket surotek ida.’”

Rumbeng a Madusa ti Israel

26 Kuna tiApo, “Kas iti mannanakaw a maibabain no matiliwan iti aramidna, kastanto met a maibabainkayo amin nga Israelita—dagiti ariyo ken ofisialesyo, dagiti papadi ken profetayo.

27 Maibabainkayto amin—dakayo nga agkuna nga amayo ti kayo, ken inayo ti bato. Mapasamakto daytoy ta tinallikudandak ket saankayo a nagsubli kaniak. Ngem no adda rigatyo, dawatenyo nga isalakankayo.

28 “Ngem sadino ti ayan dagiti didiosen nga inaramidyo a pagdaydayawanyo? No adda rigatyo, bay-anyo nga isuda ti mangisalakan kadakayo—no kabaelanda! Juda, adu ti didiosem a kas iti kaadu dagiti ilim.

29 Ania aya ti reklamoyo? Apay a sinukirdak?

30 Awan serserbi ti panangdusak kadakayo; diyo kayat ti paisuro kaniak. Kaskayo la narungsot a leon, a nangpapatay kadagiti profetayo.

31 Dakay a tattao ti Israel, denggenyo a naimbag ti saok. Nagbalinak aya a let-ang kadakayo, kas iti nasipnget ken napeggad a daga? Saan! Apay ngarud a kunayo nga aramidenyonto ti kaykayatyo, ket pulos a dikayto agsubli kaniak?

32 Malipatan aya ti balasang ti alahasna? Malipatan aya ti babai ti kawesna nga agkasar? Ngem namin-adu a nalipatandak dagiti tattaok.

33 Nalaingka nga agarem! Mabalin a makasursuro kenka dagiti kadaksan a babbai.

34 Namansaan dagiti pagan-anaymo iti dara dagiti napanglaw ken awan basolna, saan nga iti dara dagiti mannanakaw.

“Ngem uray kasta,

35 kunam pay laeng, ‘Awan basolko; awan duadua a nagbaawen ti pungtot tiApokaniak.’ Ngem siak, ni Yahweh, dusaenkanto gapu ta ilibakmo a nagbasolka.

36 Imbabam ta dayawmo babaen iti panagkamangmo kadagiti didiosen dagiti sabali a pagilian. Paayennakanto ti Egipto a kas iti panangpaay kenka ti Asiria.

37 Panawamto ti Egipto a nakadumogka gapu iti bainmo. Siak, ni Yahweh, linaksidko dagiti tattao a pagtaltalkam; awan pagimbagan a maitedda kenka.”

Categories
Jeremias

Jeremias 3

Mannakikamalala nga Israel

1 Kuna tiApo, “No isina ti lalaki ti asawana, ket pumanaw ti babai sa asawaen ti sabali, saan a mabalin a sublian ti lalaki ti asawana. Daytoy nga aramid ti mangtulaw iti daga. Ngem adu idi ti kaayan-ayatmo, Israel, ket ita kayatmo manen ti agsubli kaniak!

2 Tangadem dagiti tapaw dagiti turod. Adda aya lugar a dimo nakikaiddaan? Nagtugawka iti igid dagiti dalan a nagur-uray kadagiti makikaidda kenka. Kaska la Arabo nga agpadpadaan iti sanebenna iti let-ang. Tinulawam ti daga babaen iti kinabalangkantismo.

3 Daytoy ti gapuna a di nagtudo ken di met nagarbis. Balangkantiska a babai; awan a pulos ti babainmo.

4 “Ita, kunam kaniak, ‘Sika ti amak, ket inay-ayatnak manipud pay idi ubingak!

5 Saan nga agnanayon ti pungtotmo; agpatingga ti ungetmo!’ Daytoy ti kinunam, Israel, ngem nagum-umaka a nagaramid iti dakes.”

Masapul nga Agbabawi ti Israel ken ti Juda

6 Idipanawen ni Ari Josias, kinuna tiApokaniak, “Nakitam kadi ti inaramid ti Israel, dayta mangliliput a babai? Tinallikudannak ket simmang-at kadagiti nangato a turod ket nagbalangkantis iti tunggal sirok ti nalangto a kayo.

7 Impagarupko a kalpasan ti panagaramidna kadagitoy, agsubli kaniak ngem saan a nagsubli. Nakita amin daytoy ti manangallilaw a kabsatna a Juda.

8 Nakita met ti Juda nga insinak ti Israel, ket pinanawak agsipud ta naglikudannak ket nakikamkamalala. Nupay kasta, saan latta a nagbuteng ti mangliliput a kabsatna a Juda. Nakikamkamalala met

9 a kas ketdin awan ti aniamanna kenkuana. Tinulawanna ti daga, ket nagbalangkantis babaen iti panagdaydayawna kadagiti bato ken kayo.

10 Kalpasan amin dagitoy, naginsusubli kaniak ti Juda, ti manangallilaw a kabsat ti Israel. Saanna nga impapuso ti panagsublina. Siak, ni Yahweh, ti nagsao iti daytoy.”

11 Kinuna tiApokaniak a nupay tinallikudan ti Israel, impakitana a naim-imbag ngem ti manangallilaw a Juda.

12 Imbagana kaniak nga innak idiay amianan ket ipakaammok daytoy iti Israel, “Mannakikamalala nga Israel, agsublika kaniak. Manangngaasiak ket saanak nga agpungtot. Saan nga agnanayon ti pungtotko kenka.

13 Isuna laeng nga annugotem ti basolmo kaniak ket sinukirmo ni Yahweh a Diosmo. Ipudnom kaniak nga inayatmo dagiti didiosen iti sirok ti tunggal nalangto a kayo, ket dimo impangag dagiti bilinko. Siak, ni Yahweh, ti nagsao iti daytoy.

14 “Agsublikayo, dakayo a saan a napudno a tattao agsipud ta kukuakayo. Mangalaak iti maysa kadakayo iti kada ili ken dua iti kada familia ket isublikayo idiay Bantay Sion.

15 Mangisaadakto kadagiti agtuturay nga agtulnog kaniak. Iturayandakayto a buyogen ti kinasirib ken pannakaawat.

16 Inton umadukayon iti daga, saanton a saritaen dagiti tattao ti maipapan iti ‘Lakasa ti Tulag ni Yahweh.’ Didanton panunoten wenno lagipen daytoy. Didanton masapul ket didanton agaramid iti sabali.

17 Iti dayta a tiempo, managanto ti Jerusalem iti ‘Trono ni Yahweh.’ Aguummongto sadiay dagiti nasion tapno agdaydayawda kaniak. Didanton tungpalen ti tarigagay ti dakes ken nasukir a pusoda.

18 Tumiponto ti Israel iti Juda ket agkuyogdanto nga agawid manipud iti daga iti amianan ket agsublida iti daga nga intedko kadagidi kapuonanyo a kukuada iti agnanayon.”

Ti Panagdaydayaw dagiti Tattao ti Dios kadagiti Didiosen

19 Kuna tiApo,

“Israel, tinarigagayak nga awatenka a kas anak,

ket ikkanka iti kapintasan a daga iti lubong.

Impagarupko nga ibilangnak nga ama

ken saannakton a paglikudan.

20 Ngem arigmo iti babai a liputanna ti asawana,

saanka a napudno kaniak.

Siak, ni Yahweh, ti nagsao iti daytoy.”

21 Adda mangngeg a saibbek kadagiti tapaw dagiti turod;

agdungdung-aw ken agpakpakaasi dagiti Israelita.

Ta nagbiagda a managbasol,

ket naglikudanda tiApoa Diosda.

22 Agsublikayo, dakay amin a nangtallikud itiApo;

paimbagennakayto ket pagbalinennakayto a napudno.

Kunayo, “Wen, agsublikami itiApo, agsipud ta isu ti Diosmi.

23 Awan ti naitulong ti panagdaydayaw kadagiti didiosen kadagiti tapaw dagiti turod. Aggapu laeng itiApoa Diostayo ti pannakaisalakan ti Israel.

24 Ngem gapu iti panagdaydayaw ken ni Baal a didiosen ti pannakaibabain, napukawmi dagiti pangen, arban ken annakmi—amin a nagbannogan dagidi kapuonanmi manipud idi punganay.

25 Rumbeng nga agiddatayo a sibabain ket abbongannatayo iti pannakaibabaintayo. Nagbasoltayo a kankanayon itiApoa Diostayo, datayo ken dagiti kapuonantayo. Ditay tinungpal dagiti bilinna.”

Categories
Jeremias

Jeremias 4

Maawis ti Israel nga Agbabawi

1 Kuna tiApo, “Tattao ti Israel, no kayatyo ti agbabawi, agsublikayo kaniak. No napudnokayo kaniak, ket ibellengyo dagiti didiosen a kagurgurak,

2 tumutopto ti panagsapatayo iti naganko. Iti kasta,dawatento dagiti amin a nasion a bendisionak ida, ket idaydayawdakto.”

3 KunatiApokadagiti taga-Juda ken kadagiti taga-Jerusalem, “Aradoenyo dagiti saan a naarado a talonyo; dikay agmula iti ayan dagiti sisiitan.

4 Tungpalenyo ti nakitulaganyo kaniak ngaApoyo ket idatonyo dagiti pusoyo kaniak, dakayo a tattao ti Juda ken Jerusalem. Ta no saan, gumil-ayabto ti pungtotko gapu kadagiti dakes nga aramidyo, ket sumged nga awan ti makaiddep.”

Maipakaammo ti Pannakaraut ti Juda

5 Pagunienyo ti trumpeta iti entero a daga!

Agpukkawkay iti nalawag a timek!

Ibagayo kadagiti tattao ti Juda ken ti Jerusalem

nga agkamangda kadagiti nasarikedkedan a siudad.

6 Mangipasdekkay iti bandera iti dalan nga agpa-Sion.

Agpaknikayo! Dikay agtaktak!

Adda didigra ken adu a panagdadael

a yeg ni Yahweh manipud iti amianan.

7 Kas iti leon a rummuar iti rukibna,

umayen ti agdaddadael kadagiti nasion.

Umayna dadaelen ti Juda.

Madadaelto dagiti siudadna.

Ket mabaybay-andanton a rebrebba

nga awan ti agyan kadakuada.

8 Isut’ gapuna nga agkaweskay iti nakersang a lupot;

agsangit ken agdung-awkayo

agsipud ta gumilgil-ayab pay laeng ti pungtot tiApoiti Juda.

9 Kinuna tiApo, “Iti dayta nga aldaw, tumakrotto dagiti ari ken dagiti ofisiales. Makigtotto dagiti papadi ken maikulengto dagiti profeta.”

10 Kinunak, “O ApoDios, inallilawmo a namimpinsan dagiti tattao ti Jerusalem! Imbagam nga addanto talna ngem silalayat met ti kampilan iti karabukobda.”

11 Dumtengen ti tiempo a maipakaammo kadagiti tattao ti Jerusalem nga addanto makasinit nga angin-let-ang nga agturong kadakuada. Saanto a nakapsut nga angin a mangikay-ab laeng iti taep—

12 napigpigsanto nga angin ti yeg tiApo. TiApoa mismo ti mangibaga iti panangukomna kadagiti tattaona.

Likmuten dagiti Kabusor ti Juda

13 Kitaenyo, sumungad ti kabusor a kas ulep. Mayarig iti alipugpog dagiti luganna a pakigubat. Naparpardas dagiti kabaliona ngem dagiti agila. Nadadaeltayon! Ditay makalisin!

14 Jerusalem, dalusam ta pusom iti kinadakes tapno maisalakanka. Kasano pay kabayag ti panagpampanunotmo iti dakes?

15 Adda dagiti naibaon a naggapu idiay Dan ken kadagiti katurturodan ti Efraim a mangipakaammo iti dakes a damag.

16 Immayda a mangballaag kadagiti nasion ken mangibaga iti Jerusalem nga addan dagiti kabusor nga aggapu iti adayo a daga. Yikkisto dagitoy a kabusor ti pammutbuteng kadagiti siudad ti Juda.

17 Lakubendanto ti Jerusalem, kas kadagiti lallaki a mangguguardia iti maysa a talon agsipud ta binusorna tiApo. Daytoy ti sao tiApo.

18 Juda, sika met la ti akimbasol iti pannakadusam; dakes ngamin ti panagbiag ken aramidmo. Ti basolmo ti nangyeg iti daytoy a panagsagaba; sinalputna ta pusom.

Ay-ayen ni Jeremias dagiti Kailianna

19 Nagsakiten! Diak maibturan ti saemna.

Aggutok-gutok ti pusok!

Saanak a makatalna.

Mangngegko ti uni ti trumpeta

ken ti arimbangaw ti gubat.

20 Agsasaruno ti pannakadidigra;

aglangalang ti entero a daga.

Pagammoan la ta narba dagiti tolda

ket napigis dagiti kurtina.

21 Kasano ti kabayag a kitkitaek ti bandera

ken dengdenggek ti trumpeta?

22 Kinuna tiApo, “Nengneng dagiti tattaok;

saandak nga am-ammo.

Kasda la maag nga ubbing;

saanda a makaawat.

Nalaingda nga agaramid iti dakes,

ngem dida ammo ti agaramid iti naimbag.”

Masirmata ni Jeremias ti Umay a Pannakadadael

23 Kinitak ti daga—langalang nga awan mulana.

Kinitak ti langit—awan ti lawagna.

24 Kinitak dagiti bantay—agkinkintayegda.

Ket kinitak dagiti turod—agin-indayonda.

25 Pulos nga awan tao a nakitak,

nagpapanaw uray dagiti tumatayab.

26 Nagbalin a let-ang ti nabunga a daga,

narnarba dagiti amin a siudadna

gapu iti gumilgil-ayab a pungtot ni Yahweh.

(

27 Kinuna tiAponga aglangalangto ti entero a daga, ngem saannanto a dadaelen a mamimpinsan.)

28 Agladingitto ti daga,

ket agsipngetto ti langit.

Nagsao tiApo;

impakaammonan ti pangngeddengna,

ket dinanto baliwan ti panunotna.

29 Agtatarayto amin a tattao

inton mangngegda ti dalagudog dagiti nagkabalio ken nagtagipana.

Addanto dagiti agkamang iti kabakiran;

addanto met dagiti aglemmeng kadagiti rangrangkis.

Mapanawanto amin a siudad,

ket awanto ti agnaed kadakuada.

30 Ket sika, Jerusalem, naituding a madadaelka.

Apay nga agkaweska pay laeng iti nalabaga?

Apay nga agalahaska iti balitok?

Apay a pinintaam pay laeng dagiti matam?

Awan serserbi ti panagpapintasmo!

Binaybay-andakan dagiti kaayan-ayatmo;

kayatdaka a papatayen.

31 Nakangngegak iti kasla asug ti agpaspasikal,

kasla ikkis ti babai nga agdadamo nga aganak.

Um-umkis ti Sion!

Al-alawenna ti angesna.

Igawgaw-atna dagiti imana a kunkunana,

“Saanakon a makalisi!

Umayen dagiti mangpapatay kaniak.”

Categories
Jeremias

Jeremias 5

Ti Basol ti Jerusalem

1 Dakayo a tattao ti Jerusalem, agtaraykayo kadagiti kalsadayo!

Agsiimkayo a nalaing!

Sukimatenyo dagiti plasa!

Kitaenyo no adda masarakanyo

a nalinteg ti aramidna

ken kinapudno ti sapsapulenna.

No adda, pakawanento tiApoti iliyo.

2 Uray no ibagayo nga agdaydayawkayo itiApo,

dinto met la pudno ti saoyo.

3 Awan duadua a ti kinapudno

ti birbiroken tiApo.

Sinaplitnakayo, ngem saankayo a nangrikna;

rinumeknakayo, ngem diyo kayat ti paisuro.

Natangken ti uloyo,

ket diyo nagpanawan dagiti basolyo.

4 Kinunak, “Uray ta nengneng met la dagitoy a tattao;

minamaag ti aramidda.

Dida ammo ti pagayatan tiApo,

wenno dagiti linteg ti Diosda.

5 Mapanakto kadagiti agtuturay

ket kasaok ida.

Ammoda ti pagayatan ti Diosda;

ammoda ti kayat tiAponga aramidenda.”

Ngem linaksidda ti panangituray tiApo;

dida kayat ti agtulnog kenkuana.

6 Daytoy ti gapuna a patayento ida dagiti leon ti kabakiran.

Rangrangkayento ida ti lobo ti let-ang,

ket agdakiwasto ti leopardo kadagiti ilida.

Pisangpisangennanto ti siasinoman a rummuar kadakuada.

Nakaad-adu ngamin ti basolda,

ket namin-adun a tinallikudanda ti Dios.

7 Sinaludsod tiApo, “Apay koma a pakawanek dagiti basol dagiti tattaok?

Tinallikudandak ket nagdaydayawda kadagiti didiosen.

Uray no intedko amin a masapulda,

nakikamalalada latta ket dagiti balangkantis ti kinadendennada.

8 Kasda la nabsog a toro a kabalio nga agsapsapul iti dakepenna,

tarigagayan ti tunggal maysa a kaiddaen ti asawa ti kaarubana.

9 Apay ketdin a diak dusaen ida gapu iti aramidda?

Apay ketdin a diak balsen ti kastoy a nasion?

10 Ibaonkonto dagiti kabusor

a mangpatpat iti kaubasanda,

ngem saan a mamimpinsan nga ikisapda.

Ibagakto kadakuada nga ikkatenda dagiti sangsanga,

ta saanko a kukua ida.

11 Liniputandak a namimpinsan,

dagiti tattao ti Israel ken ti Juda.”

Daytoy ti sao ni Yahweh.

Laksiden ni Yahweh ti Israel

12 Saan a bigbigen dagiti tattao tiApo, ket kinunada, “Awanto ti aniaman nga aramidenna.Saantayonto a marigatan; ditayto agsagaba iti gubat wenno bisin.”

13-14 Kinunada a mannanao laeng dagiti profeta ket awan mensaheda a naggapu itiApo. Kinuna kaniak ti Apo aDiosa Mannakabalin-amin, “Jeremias, gapu ta kastoy ti imbaga dagitoy a tattao, pagbalinekto a kasla apuy dagiti saok iti ngiwatmo. Kaslanto kayo dagitoy a tattao ket ikisapto ida iti apuy.”

15 Tattao ti Israel, yegto tiApoti maysa a nasion a mangraut kadakayo. Aggapunto iti maysa a lugar, maysa a nasion a nabileg ken addan idi un-unana. Diyo ammo wenno maawatan ti pagsasaona.

16 Makapatay dagiti panada. Maingelda amin a soldado!

17 Kanendanto dagiti apit ken taraonyo. Patayendanto dagiti amin nga annakyo. Alaendanto amin nga arban ken pangenyo. Ibusendanto dagiti ubas ken igosyo. Rebbaento ti armadada dagiti siudad a nasarikedkedan a pagtaltalgedanyo.

18 Ngem kinuna tiApo, “Uray kadagita nga aldaw, diakto gudasen a mamimpinsan dagiti tattaok.

19 No saludsodenda no apay nga aramidek amin dagitoy, kastoy ti kunam, Jeremias, ‘Gapu ta linaksidyo tiApo, ket nagserbikayo kadagiti ganggannaet a didiosen iti dagayo. Agserbikayonto met kadagiti ganggannaet iti daga a saanyo a kukua.’”

Ballaagan ti Dios dagiti Tattaona

20 Kuna tiApo, “Ibagam kadagiti kaputotan ni Jacob, ibagam kadagiti tattao ti Juda:

21 Dumngegkayo,dakay a maag ken nakuneng a tattao, dakayo nga adda matana, ngem saan a makakita, dakayo nga adda lapayagna, ngem saan a makangngeg.

22 Siakni Yahweh. Awan kadi ti panagbutengyo kaniak? Apay a dikay agkintayeg iti sangoanak? Inkabilko ti darat a beddeng ti baybay, maysa a permanente a bangen a dina maballasiw. Mabalin nga agdawel ti baybay ngem dina malabsan; mabalin nga agdaranudor dagiti dalluyon ngem dida malasat.

23 Ngem dakayo a tattao, nasubeg ken nasukirkayo, tinallikudan ken pinanawandak.

24 Pulos a diyo napanunot a dayawendak uray no inyegko ti tudo kadagiti tiempo a kasapulanna ket nagapitkayo kadagiti naituding a panawen.

25 Ngem gapu iti kinadakesyo, nalapdankayo nga agsagrap kadagitoy agkakaimbag a banag.

26 “Adda dagiti managdakdakes a makipagnaed kadagiti tattaok. Aglemmengda nga agur-uray, kas kadagiti lallaki nga agipakat kadagiti pagsilo kadagiti tumatayab, ngem nagipakatda kadagiti pagipalab-og kadagiti tattao.

27 Kas iti mangnganup a mangpunno iti tangkal iti billit, pinunnoda dagiti balayda kadagiti sinamsamda. Daytoy ti gapuna a mannakabalin ken baknangda,

28 no apay a nalulukmeg ken nabubuttiogda. Awan pagpatinggaan dagiti dakes nga aramidda. Saanda nga ikkan ti kalintegan dagiti ulila wenno salakniban dagiti maidaddadanes.

29 “Ngem siak, ni Yahweh, dusaekto ida gapu kadagiti dakes nga aramidda. Balsekto daytoy a nasion!

30 Adda nakabutbuteng ken nakaal-alliaw a napasamak iti daga:

31 Pasig nga ulbod ti sasawen dagiti profeta. Isuro dagiti papadi ti kaykayatda ket magustoan met ti kasta dagiti tattaok. Ngem anianto ti aramidenda inton agpatingga amin dagitoy?”