Philippine

Lakuben dagiti Kabusor ti Jerusalem

1 Tattao ti Benjamin, panawanyo ti Jerusalem! Isalakanyo dagiti bagbagiyo! Puyotenyo ti trumpeta idiay Tekoa! Mangikabilkay iti pagilasinan idiay Bet-hakerem! Adda didigra ken pannakadadael nga aggapu iti amianan.

2 Napintas a siudad ti Sion, ngem madadaelto;

3 agkamponto sadiay dagiti ar-ari ken dagiti armadada. Ipatakderdanto dagiti toldada iti lawlaw ti siudad ket agkamponto ti tunggal maysa iti disso a kaykayatna.

4 Kunadanto, “Agsaganakay a manggubat iti Jerusalem! Darasenyo! Dumaruptay iti tengnga ti aldaw!” Ngem kunadanto, “Naladawen, ta dandani lumneken ti init ket umat-atiddogen dagiti anniniwan.

5 Dumaruptayo ita a rabii; dadaelentayo dagiti sarikedked ti siudad.”

6 Imbilin tiApoa Mannakabalin-amin kadagitoy nga ari nga agpukanda kadagiti kaykayo ket pagtutuonenda a panglakub iti Jerusalem. Kinunana, “Dusaek daytoy a siudad gapu ta bin-ig a panangidadanes ti adda kenkuana.

7 Kas iti panagubbog ti bubon, kasta met ti panagubbog ti kinadakes iti Jerusalem. Iti siudad, mangngegko ti uni ti panagdadael ken panagranggas; pasig a masakit ken nasugatan ti makitkitak.

8 Dakayo a taga-Jerusalem, pakaballaaganyo koma dagitoy a didigra amangan no panawankayo. Pagbalinek a disierto ti siudadyo, maysa a lugar nga awanto ti agnaed.”

Ti Nasukir nga Israel

9 Kinuna kaniak tiApoa Mannakabalin-amin, “Awanto ti matda iti Israel. Maikisapto a kas iti kaubasan a naburas amin a bungana. Ngarud, ispalem ti tunggal maysa ita ta adda pay tiempo.”

10 Insungbatko, “Siasino koma ti dumngeg kaniak no agsaoak kadakuada ket ballaagak ida? Nasubegda ket saanda a kayat ti dumngeg iti mensahem. Katawaanda ti kayatmo nga ibagak kadakuada.

11 OApo, mariknak met a gumil-ayab iti unegko ti pungtotmo kadakuada; saankon a maitured.”

Kinuna ngarud tiApo, “Idissuormo ti pungtotko kadagiti ubbing iti kalsada ken kadagiti ummong dagiti lallaki nga agtutubo. Maipanawto dagiti agassawa ken uray pay dagiti babbaket ken lallakay.

12 Alaentodagiti ganggannaet dagiti balbalayda, kasta met dagiti taltalon ken dagiti assawada. Dusaekto dagiti tattao iti daytoy a daga.

13 Nanumo man wenno nangato a tao, kayatda ti bumaknang iti saan a nalinteg a pamuspusan. Uray dagiti profeta ken papadi saurenda dagiti tattao.

14 Agtignaydaa kasla ketdin garadgad laeng dagiti sugat dagiti tattaok. Kunada nga awan pagdanagan idinto nga awan met talna.

15 Nagbainda kadi idi inaramidda dagitoy makarimon a bambanag? Saan! Pulos a dida nagbain; dida pay ammo ti rikna ti mabainan. Iti kasta, mapasagdanto a kas kadagiti dadduma inton dusaek ida ket daytanton ti paggibusanda. Siak, ni Yahweh ti agsasao.”

Sumiasi ti Israel iti Dalan ti Dios

16 KinunatiApokadagiti tattaona, “Agtakderkayo iti nagkurosan ti kalsada ket iwarasyo ti panagkitayo. Saludsodenyo no sadino ti ayan dagiti kadaanan a dalan ken ti kapintasan a pagnaan. Magnakayo iti daytoy ket agbiagkayto iti urnos ken talna.”

Ngem kinunada, “Saankami a magna iti dayta a dalan.”

17 Kalpasanna, nangdutok ni Yahweh kadagiti guardia a mangdengngeg iti ballaag ti trumpeta. Ngem kinunada, “Saanmi a kayat a denggen.”

18 Kinuna ngarud tiApo, “Dumngegkayo, dakayo a nasion, ket ammoenyo no anianto ti mapasamak kadagiti tattaok.

19 Dumngegka, daga! Kas dusa a maipatay kadakuada gapu kadagiti dakes nga aramidda, yegko ti pannakadadael kadagitoy a tattao. Ngamin ta dida tinungpal dagiti saok, ket linaksidda ti pannursurok.

20 Ania ti gapuna a yegda kaniak dagiti insenso a naggapu idiay Seba wenno bangbanglo a naggapu iti adayo a daga? Diak awaten dagiti datonda ket diak maay-ayo kadagiti sakrifisioda.

21 Iti kasta, mangikabilakto iti pakaitibkolan dagitoy a tattao, ket maitublakdanto. Matayto dagiti amma ken dagiti annakda, kasta met dagiti aggagayyem ken agkakaarruba.”

Rumaut dagiti Taga-Amianan

22 Kuna tiApo, “Adda tattao nga aggapu iti pagilian iti amianan; adda nabileg a nasion nga agsagsagana a makigubat.

23 Nagtagipana ken nagtagikampilanda; naranggas ken awan asida. Kasla daranudor ti taaw ti dalagudog dagiti kabalio a nagsakayanda. Sisasaganada a manggubat iti Jerusalem.”

24 Kuna dagiti tattao ti Jerusalem, “Nangngegmi ti damag, ket nalpaykami. Kasta unay ti butengmi, mariknami ti ut-ot a kas iti ut-ot ti agpasikal.

25 Dimi maitured ti mapan kadagiti away wenno magna kadagiti kalkalsada. Ngamin, nakaarmas dagiti kabusor, ket nakabutbuteng ti aglawlaw.”

26 Kuna tiApokadagiti tattaona, “Agarruatkayo iti nakersang a lupot, dakayo a tattaok, ket agtulidtulidkay iti dapu. Agdung-awkayo a kasla natay ti kakaisuna nga anakyo. Agsangitkayo iti napait, gapu ta kellaatto a rumaut ti mangdadael kadakayo.

27 Jeremias, inaramidka a manggugor ken mangsubok kadagiti tattaok tapno maammoan ken masuotmo dagiti kababalinda.

28 Napalalo ti kinasukirda; agpagnapagnada a mamarpardaya. Kasda la bronse ken landok; naigamerda amin iti kinadakes.

29 Napigsa ti panagpug-aw ti yubuyoban; rumubrob ti apuy a manglunag iti buli ngem saan a maisina ti rugit. Awan serserbi ti panaggugor, ta saan a maisina dagiti dakes a tattao.

30 Maawagandanto iti naibelleng a pirak ta siak, ni Yahweh, linaksidko ida.”

Mangasaba ni Jeremias iti Templo

1-3 Imbaonnak tiApoa mapan iti ruangan ti Templo a serkan dagiti tattao ti Juda nga agdaydayaw. Imbagana nga agtakderak sadiay ket iwaragawagko ti sao tiApoa Mannakabalin-amin a Dios ti Israel. Kunana: “Baliwanyo ti panagbiagyo ken dagiti aramidyo tapno dikay pagtalawen iti daytoy a daga.

4 Diyo patienen ti mangallilaw a sasaoda: ‘Saantayo a maan-ano! Daytoy ti Templo tiApo, daytoy ti Templo tiApo, daytoy ti Templo tiApo!’

5 “Balbaliwanyo ti panagbiagyo, kasta met ti ugaliyo. Diyo pagdudumaen ti panangibilangyo iti tunggal maysa.

6 Diyo gundawayan dagiti ganggannaet, ulila ken balo. Dikay agpapatay kadagiti awan basolna ditoy nasantoan a lugar. Dikay agkararag kadagiti didiosen ta daytoy ti mangdadael kadakayo.

7 Iti kasta, ipaluboskonto nga agnaedkayo iti daytoy a daga nga intedko a kukua dagiti kapuonanyo iti agnanayon.

8 “Kitaenyo, awan ti magangganabyo kadagitoy mangallilaw a sasao.

9 Agtakawkayo, pumataykayo, makikamalalakayo, sapataanyo ti ulbod, agidatagkay iti daton ken ni didiosen a Baal ken agdaydayawkayo kadagiti didiosen a diyo am-ammo.

10 Kagurak dagitoy nga aramidyo, ket umaykayo pay la dumatag iti Templok, sayo kuna, ‘Saankami a maan-ano.’

11 Ipagarupyoaya a rukib dagiti mannanakaw ti Templok? Nakitak dagiti ar-aramidenyo.

12 Inkayidiay Silo,ti umuna a lugar a pinilik a pakadaydayawakket kitaenyo no ania ti inaramidko iti dayta a lugar gapu iti kinadakes dagiti tattaok nga Israelita.

13 Inaramidyo amin dagiti nasaok a basol. Namin-adun a kinasaokayo, ngem dikay nangipangag. Dikay met simmungbat idi inayabankayo.

14 Ngarud, ti inaramidko idiay Silo, aramidek met iti daytoy a Templok a pagtaltalkanyo. Iti daytoy a daga nga intedko kadakayo ken kadagiti kapuonanyo, aramidekto met ti kas iti inaramidko iti Silo.

15 Pagtalawenkayto iti imatangko kas iti panamagtalawko kadagiti kakabagianyo nga Efraimita. Siak, ni Yahweh, ti agsasao.”

Ti Kinasukir dagiti Tattao

16 Kinuna tiApo, “Jeremias, dimo ikarkararagan dagitoy a tattao. Dimo idawdawatan ida. Dimo ibabaet ida ta saanka nga ipangag.

17 Dimo aya makita dagiti ar-aramidenda kadagiti siudad ti Juda ken kadagiti kalkalsada ti Jerusalem?

18 Agurnongdagiti ubbing kadagiti pagsungrod. Mangaron dagiti lallaki ken aggamay met dagiti babbai iti masa nga aramidenda a tinapay nga idatagda iti diosa nga awaganda iti Reyna ti Langit. Agidatagda iti daton nga inumen kadagiti dadduma a didiosen tapno pagpungtotendak.

19 Ngem siak aya ti pagpungtotenda? Saan! Ti bagbagida met laeng ti dangran ken ibabainda.

20 Iti kasta, siak ni Yahweh aDios, idissuorkonto ti nakaro a pungtotko iti daytoy a lugar, kadagiti tattao ken animal, uray pay kadagiti kayo ken kadagiti mula. Kaslanto apuy ti pungtotko nga awan ti makaiddep.

21 “Dakayo a tattaok, naim-imbag laengen a kanenyo dagiti daton a mapuoran koma iti altar a mainayon kadagiti daton a maipalubos a kanenyo.

22 Idi inruarko dagiti kapuonanyo idiay Egipto, awan ti imbagak wenno imbilinko kadakuada maipapan kadagiti daton a mapuoran wenno aniaman a kita ti sakrifisio.

23 Ngem imbilinko kadakuada nga agtulnogda kaniak tapno siak ti Diosda ket isuda dagiti tattaok. Imbagak met kadakuada nga annurotenda ti panagbiag nga imbilinko tapno rumang-ayda.

24 Ngem saanda a dimngeg wenno nangipangag. Nagtulnogda ketdi iti nasukir ken dakes a pusoda, ket dida simmayaat no di ket dimmakesda.

25 Manipud rimmuar dagiti kapuonanyo idiay Egipto agpapan ita, saan a nagressat ti panangibaonko kadagiti adipenko a profeta.

26 Nupay kasta, didak inkaskaso wenno impangag. Pinatangkenyo ti uloyo. Ket ad-adda ti kinasukiryo ngem dagiti kapuonanyo.

27 “Jeremias, ibagamto dagiti saok kadakuada, ngem didakanto ipangag. Awagamto ida, ngem didakanto sungbatan.

28 Kunamto kadakuada: ‘Daytoy ti nasion a saan a nangipangag ken ni Yahweh a Diosda. Dida kayat ti paisuro. Awanen ti kinapudno. Dida pay ket sarsaritaenen.’”

Dagiti Dakes a Maar-aramid idiay Hinnom

29 Kuna tiApo,

“Agladingitkayo, dakayo a tattao ti Jerusalem;

agpukiskayo ket ibellengyo ti buokyo.

Agdung-awkayo iti tapaw dagiti turod,

ta siak, ni Yahweh, makapungtotak

ket linaksidko dagiti tattaok.

30 “Dakes ti inaramid dagiti tattao ti Juda. Inkabilda dagiti kagurgurak a didiosenda iti Templok ket tinulawanda.

31 IdiayTanap ti Hinnom, nangaramidda iti altar a managan Tofet a pagpuoranda kadagiti maidaton nga annakda. Awan imbilinko a kasta; awan dayta iti panunotko.

32 Iti kasta, dumtengto ti aldaw a saanen a Tofet wenno Tanap ti Hinnom ti naganna no di ket Tanap a Pagpapatayan. Ditoyto ti pagitaneman dagiti tattao kadagiti minatayda ta awanen ti sabali a lugar a pagitabonanda.

33 Agpaayto dagiti bangkay a taraon dagiti tumatayab ken dagiti atap nga animal, ket awanto ti mangbugaw kadakuada.

34 Agbalintoti daga a let-ang. Gibusakto ti ragsak ken rag-o kadagiti siudad ti Juda ken kadagiti kalkalsada ti Jerusalem. Saanton a mangngeg dagiti naragsak nga ariwawa ti parambak dagiti agkasar.

1 “Iti dayta a tiempo, mairuarto dagiti tultulang dagiti ari ken dagiti ofisiales ti Juda kadagiti tanemda. Mairuarto met dagiti tultulang dagiti profeta ken dagiti dadduma a nagnaed idiay Jerusalem.

2 Maiwaranto dagiti tultulang iti imatang ti init, ti bulan ken dagiti bituen nga inay-ayat ken nagserserbianda. Isuda ti nakiumanan ken nagdaydayawanda. Imbes a maummong ken maikali dagiti tulang, kasladanto takki a maiwarwara.

3 Dagiti tattao iti daytoy dakes a kaputotan a nakalasat nga agnaed kadagiti disso a nangibellengak kadakuada, kaykayatdanto ti matay ngem ti agbiag. Daytoy ti saok, siak ni Yahweh a Mannakabalin-amin.”

Ti Basol ken ti Pannakadusa

4 Imbaga tiAponga ibagak daytoy kadagiti tattaona, “No adda matuang, saan kadi aya a bumangon? No adda mayaw-awan iti dalan, saan kadi aya nga agsubli?

5 Apay ngarud, dakayo a tattaok, a tallikudandak ngem dikay met agsubli kaniak? Diyo mapanawan dagiti didiosenyo, ket diyo kayat ti agsubli kaniak.

6 Nupay sipapasnekak a dimngeg kadakayo, saankayo a nagsao iti pudno. Awan ti uray maysa kadakayo a nagladingit gapu iti kinadakesna. Awan ti nagsaludsod no ania ti dakes nga inaramidna. Aramiden ti tunggal maysa ti kaykayatna, kas iti kabalio a sipapardas nga agturong iti paggugubatan.

7 Uray ti kannaway iti tangatang ammona ti tiempo a panagsublina. Ammo ti kalapati, ti pagaw ken ti sallapingaw ti tiempo a mapanda iti sabali a lugar. Ngem, dakayo a tattaok, diyo ammo dagiti linteg iti panangiturayko kadakayo.

8 Kasano a kunayo a masiribkayo, ken ammoyo dagiti lintegko? Kitaenyo, nabaliwan dagiti linteg; binaliwan ida dagiti ulbod nga eskriba.

9 Naibabain dagiti mamasirib a tattaoyo; nariribuk ken nasiloanda. Dida inawat ti saok, ania ngarud ita ti sirib ti adda ita kadakuada?

10 Itikasta, itedkonto dagiti assawada kadagiti sabali a lallaki. Itedkonto met dagiti taltalonda kadagiti barbaro nga agtagikua. Isuda amin, nangato man wenno nanumo, naagumda. Agsaur met dagiti papadi ken profeta.

11 Awananiamanna kadakuada ti sugat dagiti tattaok. Kunada nga awan pagdanagan, idinto nga awan met talna.

12 Dakayo a tattaok, nagbainkayo kadi agsipud ta inaramidyo dagitoy makarimon a banag? Saan! Awan a pulos ti bainyo. Diyo pay ammo ti rikna ti mabainan. Iti kasta, matnagkayto a kas kadagiti dadduma. Inton dusaenkayo, isunton ti kanibusananyo. Siak, ni Yahweh, ti nangibaga iti daytoy.

13 “Tinarigagayak nga ummongen dagiti tattaok, kas iti tao a manggapas iti apitna. Ngem arigda iti ubas nga awan bungana, kas iti igos nga awan ibungana; nalaylay uray dagiti bulongda. Ngarud, impalubosko a sakupen dagiti ganggannaet ti dagada.”

14 “Apay nga agtutugawtayo nga awan ti ar-aramidentayo?” saludsoden dagiti tattao ti Dios. “Umaykayon, intayo kadagiti nasarikedkedan a siudad ket mataytayo sadiay. Inkeddeng tiApoa Diostayo a mataytayo. Inikkannatayo iti nasabidongan a danum nga inumentayo agsipud ta nagbasoltayo kenkuana.

15 Naguraytayo iti talna, ngem napaaytayo. Naguraytayo iti tiempo a pannakaagastayo, ngem panagbuteng ketdi ti dimteng.

16 Addan dagiti kabusortayo iti siudad ti Dan. Mangngegtayo ti banang-es dagiti kabalioda. No aggaraigi dagiti kabalioda, agkintayeg ti entero a daga. Immay dagiti kabusortayo tapno dadaelenda ti dagatayo ken ti amin a linaonna, ti siudadtayo ken dagiti tattaona.”

17 “Agannadkayo!” kuna tiApo, “ta mangibaonak kadagiti uleg a kumagat kadakayo; nagitada ken saanda a mapaamo.”

Agladingit ni Jeremias gapu kadagiti Kailianna

18 Maladingitanak ket saanak a maliwliwa,

nalpay ti pusok gapu iti leddaangko.

19 Denggenyo! Iti entero a daga

mangngegko nga isangsangit dagiti tattaok,

“Awanen aya tiApoidiay Sion?

Awanen aya sadiay ti ari ti Sion?”

Sumungbat ni Yahweh nga arida,

“Apay a pinagpungtotdak babaen iti panagdaydayawyo kadagiti imahen?

Apay a nagtamedkayo kadagiti awan serserbina a didiosenyo?”

20 Isangit dagiti tattao,

“Limmabasen ti kalgaw, nalpasen ti ani,

ngem saankam pay a naisalakan.”

21 Lumdaangak gapu iti ladingit dagiti tattaok.

Agdung-awak, naikkat a namimpinsan ti pigsak.

22 Awan kadin ti agas idiay Galaad?

Awan kadin ti mangngagas sadiay?

Apay a saan a napaimbag dagiti tattaok?

1 Kasla koma bubon ti ulok,

ket dagiti matak ubbog ti lua,

tapno aldaw ken rabii nga agsangitak

gapu kadagiti napapatay a tattaok.

2 Adda koma lugar a pagnaedak idiay let-ang

tapno maadaywak dagiti tattaok.

Agpapadada a managdakdakes,

bunggoy ida dagiti mangliliput.

3 Sisasaganada nga agulbod;

agturay ditoy a daga ti kinaulbod

a saan ketdi a ti kinapudno.

Kuna tiApo,

“Kanayon nga agbasol dagiti tattaok,

ket saanda a bigbigen a siak ti Diosda.”

4 Agannad ti tunggal maysa iti gayyemna;

awan met makapagtalek iti kabsatna.

Agsipud ta amin a kakabsat manangallilawda

ket tunggal maysa padpadaksenna ti gayyemna.

5-6 Allilawenda dagiti gagayyemda,

ket awan ti agsao iti pudno.

Nasursuroandan dagiti dilada nga agulbod,

nagbasolda ket dida kayat ti agbabawi.

Di agpatingga ti nadawel nga aramidda,

kasta met dagiti kinasikapda.

Kuna tiApo,

“Didak awaten dagiti tattaok.”

7 Daytoy ti gapuna a kuna ni Yahweh a Mannakabalin-amin,

“Gugorakto dagiti tattaok

ket suotekto ida.

Nagbasol dagiti tattaok,

ania pay ti mabalinko nga aramiden kadakuada?

8 Kasla makapatay a pana dagiti dilada;

kanayon nga ulbod ti sawenda.

Nasayaat ti panagsao ti tunggal maysa iti kaarrubana,

ngem iti pusona, dakes ti panggepna.

9 Diakto kadi dusaen ida gapu kadagitoy?

Saankonto aya a balsen dagitoy a tattao?

Siak, ni Yahweh, ti nangibaga iti daytoy.”

10 Kinunak, “Dung-awakto dagiti bantay,

sangitakto met dagiti pagpaaraban idiay let-ang

ngamin ta namagaandan,

ket awanen ti magmagna kadakuada.

Saanen a mangngeg ti uga dagiti baka;

pimmanawen dagiti tumatayab ken dagiti atap nga animal.”

11 Kuna tiApo,

“Pagbalinekto ti Jerusalem a nagrebbaan,

a pagnaedan dagiti lobo iti let-ang.

Aglangalangto dagiti siudad ti Juda,

awanton ti agnaed kadakuada.”

12 Sinaludsodko, “OApo, apay a nadadael ti daga ken namaga a kasla let-ang ket awan ti agdaliasat? Siasino ti masirib a makaawat iti daytoy? Siasino ti nangipalawagam iti daytoy tapno ibagana met iti sabali a tao?”

13 Insungbat tiApo, “Napasamak daytoy, ta binaybay-an dagiti tattaok ti pannursuro nga impaalagadko kadakuada. Saanda a nagtulnog kaniak wenno agbiag a mayannurot iti imbagak.

14 Ngem inaramidda ti kaykayatda ket nagdaydayawda kadagiti imahen ni Baal kas insuro dagidi ammada.

15 Denggenyo ngarud ti aramidekto, siak, ni Yahweh a Mannakabalin-amin a Dios ti Israel: Pakanekto dagiti tattaok kadagiti napait a mulmula ken painumekto ida iti nasabidongan a danum.

16 Iwaraskonto ida kadagiti nasion a saanda pay a nadamdamag, kadagiti nasion a di met nadamdamag dagidi ammada. Ibaonkonto dagiti armada a maibusor kadakuada agingga a maikisapko amin ida.”

Agpatulong dagiti Taga-Jerusalem

17 Kuna tiApoa Mannakabalin-amin,

“Panunotenyo ti mapaspasamak!

Ayabanyo dagiti para dung-aw,

dagiti babbai nga agkanta kadagiti pamumpon a kansion.”

18 Kuna dagiti tattao,

“Ibagayo a darasenda ti umay, ket agdung-awda

agingga nga agsasangitkami,

ket agarubos dagiti luami.”

19 Denggenyo ti dung-aw idiay Sion,

“Nakabutbuteng ti pannakadadaelmi!

Napalalo ti pannakaibabainmi!

Masapul a panawanmi ti dagami,

narakraken dagiti balbalaymi.”

20 Kinunak,

“Dakayo a babbai, denggenyo ti kinuna tiApo,

ket ipangagyo dagiti saona.

Isuroyo nga agdung-aw dagiti annakyo a babbai

isuroyo dagiti gagayyemyo nga agkanta iti kansion ti pumpon.

21 Simrek ni patay kadagiti tawtawatayo,

ket immuneg kadagiti palasiotayo.

Pinatayna dagiti ubbing kadagiti kalsada

ken dagiti agtutubo kadagiti tiendaan.

22 Agkaiwara dagiti bangkay,

kasda la nabunton a rugit iti taltalon,

kasda la nagapas a pagay a nabati dagiti agani,

pagay nga awan ti mangurnong.

Daytoy ti imbaga tiApoa sawek.”

23 Kuna tiApo,

“Saan koma nga ipasindayag ti masirib ti kinasiribna,

wenno ti napigsa ti kinapigsana,

wenno ti nabaknang ti kinabaknangna.

24 Noadda siasinoman nga agpasindayag,

ipasindayagna koma nga am-ammo ken maawatannak.

Agsipud ta siak, ni Yahweh, manangngaasiak,

aramidek ti nalinteg ken naimbag ditoy lubong.

Dagitoy ti makaparagsak kaniak.

Siak, ni Yahweh, ti nangibaga iti daytoy.”

25-26 Kuna tiApo, “Dumtengen ti tiempo a dusaek dagiti tattao ti Egipto, Juda, Edom, Ammon, Moab ken amin nga agnaed iti let-ang a mangputed kadagiti buokda.Nakugit amin dagitoy ngem saanda a tinungpal ti katulagan nga iparangarangna. Awan kadagitoy a tattao ken awan kadagiti tattao ti Israel ti nangsalimetmet iti katulagak.”

Ti Pudno ken ti Saan a Pudno a Panagdaydayaw

1 Dakayo nga Israelita, ipangagyo ti mensahe tiApoa para kadakayo.

2 Kunana:

“Diyo tuladen ti aramid dagiti dadduma a nasion;

diyo pagdanagan dagiti pagilasinan iti tangatang,

uray no madanagan dagiti nasion.

3 Awan serserbi ti relihion dagitoy a tattao.

Mapukan ti kayo iti kabakiran sa makitikitan,

4 ket maarkosan iti pirak ken balitok.

Mapagkakamang kadagiti lansa

tapno saan nga agsisina.

5 Saan a makasao dagiti kakastoy nga imahen.

Awan dumada iti bambanti iti talon

a namulaan iti sandia.

Masapul a maawitda,

ta dida makapagna.

Diyo kabuteng ida,

ta didakay an-anoen;

ket awan naimbag a maitedda kadakayo.”

6 Apo, awan ti kas kenka; nabilegka ket naindaklan

ken mannakabalin ti naganmo.

7 Siasinoti di agdayaw kenka,

sika nga ari dagiti amin a nasion?

Rumbeng a madaydayawka.

Awan ti kas kenka

kadagiti amin a mamasirib kadagiti nasion

ken iti amin a pagarianda.

8 Nengneng ken maag dagiti amin a mamasirib kadakuada.

Ania ti masursuroda kadagiti kayo nga imahen?

9 Nakalupkopan dagiti didiosenda iti pirak a naggapu idiay Tarsis

ken balitok a naggapu idiay Ufas.

Aramid amin ida dagiti kumikitikit ken dagiti platero.

Nakawesanda iti lumabaga ken nangingina a lupot

nga inaramid dagiti agab-abel.

10 Ngem sika, OApo, ti pudno a Dios,

sika ti sibibiag a Dios,

ken ti agnanayon nga ari.

No makapungtotka, agginggined ti daga;

saan a maibturan dagiti nasion ti ungetmo.

(

11 Dakayo a tattao, ibagayo kadagiti didiosen a madadaeldanto ket awandanton iti uray ania a paset ti lubong. Saanda nga inaramid ti daga ken ti langit.)

Himno a Pagdaydayaw iti Dios

12 Pinarsua ni Yahweh ti daga babaen iti pannakabalinna;

babaen iti siribna, inaramidna ti lubong

ken inyukradna dagiti langit.

13 No agbilin ni Yahweh,

agdaranudor dagiti danum iti tangatang;

pagulepenna manipud iti pungto ti daga.

Paggilapenna ti kimat iti tudo,

ket ibulosna ti angin iti pagiduldulinanna.

14 Maag ken nengneng dagiti amin a tattao;

maibabain dagiti agar-aramid iti imahen

ta saan a pudno ken awan biag dagiti didiosen a partuatda.

15 Awan serserbida ket rumbeng a malaisda;

madadaeldanto inton ukomen ni Yahweh ida.

16 Saan a kasta ti Dios ni Jacob.

Isu ti nangaramid iti amin a banag;

pinilina dagiti Israelita a tattaona.

Yahweh a Mannakabalin-amin ti naganna.

Ti Umay a Pannakadadael ti Juda

17 Tattao ti Jerusalem, linakubdakayon dagiti kabusor! Alaenyo dagiti sanikuayo.

18 Pagtalawennakayon tiApo, ket ibellengnakayo iti sabali a daga—dadaelennakayo, agingga nga awan ti matda kadakayo. Daytoy ti sao tiApo.

19 Agasug dagiti tattao ti Jerusalem.

Kunada, “Nagkaro ketdin dagiti sugsugatmi!

Saanda a maimbagan!

Impagarupmi a maibturanmi daytoy!

20 Nadadael dagiti toldami;

napugsaten dagiti tali a galutda.

Nagtalawen dagiti lallaki nga annakmi,

awanen mangbangon manen iti toldami,

awanen ti mangibitin iti kurtinada.”

21 Insungbatko, “Nengneng dagiti pangulotayo;

saanda a paidalan itiApo.

Daytoy ti gapuna a saanda a nagballigi;

ket naiwarawara dagiti tattaotayo.

22 Denggenyo! Adda damag!

Adda dakkel a karibuso nga aggapu iti nasion ti amianan.

Dagiti armadana paglangalangenna dagiti siudad ti Juda,

pagbalinenna a taeng dagiti lobo.”

23 OApo, ammok nga awan ti tao a makaikeddeng iti pagtungpalanna;

awan ti makaituray iti biagna.

24 Isurom dagiti tattaomi, OApo;

ngem dinakam unay kadi ingetan

wenno dusaen no makapungtotka,

ta dayta ti kanibusananmi.

25 Idissuormo ti pungtotmo kadagiti nasion a di agdaydayaw kenka,

kadagiti tattao a manglaksid kenka.

Pinatayda dagiti tattaom,

namimpinsan a dinadaeldakami

ket binaybay-anda a rebrebba ti pagilianmi.

Ni Jeremias ken ti Tulag

1 Kinuna tiApokaniak,

2 “Denggem dagiti sagudayen daytoy a tulag. Ibagam kadagiti tattao ti Juda ken kadagiti agnanaed iti Jerusalem

3 a siak ni Yahweh a Dios ti Israel, ilunodko ti saan nga agtungpal kadagiti alagaden daytoy a tulag.

4 Isu met laeng ti imbilinko kadagiti kapuonanda idi iruarko ida idiay Egipto, ti daga a kasla landok nga urno kadakuada. Imbagak kadakuada a tungpalenda ti saok ken aramidenda ti amin nga imbilinko. Imbagak a no tungpalendak, tattaokto ida ket siakto ti Diosda.

5 Iti kasta, tungpalek ti karik kadagiti kapuonanda iti pannangtedko kadakuada iti nabaknang ken nadam-eg a daga a kukuada itan.”

“Wen, OApo,” kinunak.

6 Kalpasanna, kinuna tiApokaniak, “Inka kadagiti siudad ti Juda ken kadagiti kalkalsada ti Jerusalem. Ipakaammom ti mensahek sadiay ket ibagam kadagiti tattao nga ipangag ken tungpalenda dagiti alagaden daytoy a katulagan.

7 Idi iruarko dagiti kapuonanda idiay Egipto, sipapasnekak a nangballaag kadakuada, ket agpapan ita, balballaagak pay laeng dagiti tattao.

8 Ngem saanda a nangipangag wenno nagtulnog no di ket intultuloyda ti nagaramid iti dakes. Imbilinko kadakuada a tungpalenda ti katulagan ngem nagsukirda. Iti kasta, indissuorko kadakuada ti dusa kas nailanad iti daytoy a katulagan.”

9 Kalpasanna, kinuna tiApokaniak, “Adda panggep dagiti tattao ti Juda ken Jerusalem a mangbusor kaniak.

10 Sinublianda ti basol dagiti kapuonanda a di nagtungpal iti imbagak. Nagdaydayawda kadagiti didiosen. Sinalungasing ti Israel ken ti Juda ti nakitulagak kadagiti kapuonanda.

11 Iti kasta, siak, ni Yahweh, iballaagko kadakuada a dadaelekto ida ket saanda a makalisi. Uray no agpatulongda kaniak, saankonto nga ipangag ida.

12 Agpatulongto dagiti tattao ti Juda ken Jerusalem kadagiti didiosen a nagidataganda kadagiti daton a mapuoran. Ngem awanto ti maitulong dagitoy a didiosen inton umay daytoy a didigra.

13 Adu ti didiosenda a kas iti kaadu dagiti siudadda. Adu met dagiti altar a binangon dagiti agnanaed idiay Jerusalem a kas iti kaadu dagiti kalkalsada a pagidataganda kadagiti datonda iti dayta makarimon a didiosen a Baal.

14 Jeremias, dimo ikararagan wenno idawdawatan kaniak dagitoy a tattao. No agrigatda ket agpatulongda kaniak, saankonto nga ipangag ida.”

15 Kuna tiApo, “Agar-aramid iti dakes dagiti tattao nga ay-ayatek. Ania ti kalinteganda nga umay iti Templok? Ipagarupda aya a malisianda ti didigra babaen iti panagkaridaken panagidatagda kadagiti animal a kas daton? Agrag-odanto ngata?

16 Inawagak ida idi iti narukbos ken napintas nga olibo nga adu ti napipintas a bungana. Ngem ita, babaen iti gumilgil-ayab nga apuy, puorakto dagiti bulongna ken ikisapkonto dagiti sangana.

17 “Siak, ni Yahweh a Mannakabalin-amin, ti nangimula iti Israel ken Juda. Ngem ita, ikeddengko a madidigrada gapu iti dakes nga inaramidda. Pinagpungtotdak gapu kadagiti panagidatagda ken ni Baal kadagiti daton a mapuoran.”

Maisikat ni Jeremias

18 Impakaammo tiApokaniak nga isiksikatdak dagiti kabusorko.

19 Mayarigak iti naamo a karnero a maipan iti pagpartian ket diak ammo a dakes ti panggepda kaniak. Kinunkunada, “Pukanentayo ti kayo ita ta nasalun-at pay.Patayentayo tapno awanton ti makalaglagip kenkuana.”

20 Ketinkararagko, “OApoa Mannakabalin-amin, nalintegka nga ukom. Suotem ti puso ken panunot ti tao. Ipalubosmo kadi a makitak ti panangbalesmo kadagitoy a tattao, ta intalekko kenka daytoy a parikutko.”

21 Kayat idi dagiti taga-Anatot a mapapatayak. Imbagada kaniak a papatayendak no itultuloyko ti panangikaskasabak iti mensahe tiApo.

22 Kinuna ngarud tiApoa Mannakabalin-amin, “Dusaekto ida! Mapapatayto iti paggugubatan dagiti agtutuboda a lallaki. Matayto met iti bisin dagiti annakda.

23 Nangitudingak iti tiempo a panangyegko iti didigra kadagiti taga-Anatot ket inton dumteng dayta a tiempo, awanto ti makalasat kadakuada.”

Umasug ni Jeremias ken ni Yahweh

1 “OApo, no agreklamoak kenka,

maipakita a nalintegka.

Ngem sadino ti ayan ti hustisia?

Apay a narang-ay ti panagbiag dagiti managdakdakes?

Apay nga agballigi dagiti manangallilaw?

2 Imulam ida ket agramutda;

dumakkel ken agbungada.

Nasayaat panagsaoda’t maipapan kenka

ngem ti pusoda adayo kenka.

3 Ngem, OApo, ammonak,

makitam ti aramidko

ken ti panagayatko kenka.

Ukodem dagitoy dakes a tattao a kas kadagiti maparti a karnero;

ilasinmo ida agingga iti pannakapartida.

4 Kasano pay kabayag ti kinatikag ti dagami

ken ti pannakalaylay dagiti ruot iti tunggal talon?

Matayen dagiti animal ken tumatayab

gapu iti kinadakes dagiti tattaomi,

isuda nga agkuna, ‘Saan a makita ti Dios ti ar-aramidentayo.’”

5 Kinuna tiApo,

“Jeremias, no mabannogka a makilumba iti tao,

kasano ti pannakilumbam kadagiti kabalio?

Natalgedka iti awan sarikedkedna nga away

ngem kasano ti panagbiagmo iti kabakiran iti igid ti Jordan?

6 Uray dagiti kakabsatmo, liniputandaka; dagiti kameng ti bukodmo a familia,

tumiponda kadagiti mangdarup kenka.

Dika agtalek kadakuada uray no nasayaat ti panagsaoda.”

Agladingit ni Yahweh gapu kadagiti Tattaona

7 Kuna tiApo,

“Binaybay-ak ti Israel,

linaksidko ti pinilik a nasion.

Inyawatko dagiti tattao nga ay-ayatek iti pannakabalin dagiti kabusorda.

8 Binusordak dagiti pinilik a tattaok,

nagbalinda a kas iti leon iti kabakiran,

nginerngerandak, isu a kagurak ida.

9 Kasla billit dagiti pinilik a tattaok,

sippayoten ida dagiti kali iti aglikmut.

Ayabanyo dagiti atap nga animal,

ta umayda agpennek a mangan.

10 Adu a pastor ti nangdadael iti kaubasak,

inasak-asakda dagiti taltalonko;

pinaglangalangda ti nasayaat a dagak.

11 Pinagbalinda nga awan serserbina,

nakaay-ay-ay ti buyana.

Nagbalin a let-ang ti entero a daga,

ket awan man la ti mangikanawa.

12 Dimteng dagiti lallaki nga agdadael;

naglasatda iti nangangato a lugar iti let-ang.

Inyegko ti gubat a mangdadael iti sapasap a daga;

awan talna iti panagbiag dagiti tattao.

13 Nagmula dagiti tattaok iti trigo, ngem sisiit ti inapitda.

Inggaedda ti nagtrabaho,

ngem awan supapak ti bannogda.

Gapu iti kasta unay a pungtotko,

awan naapitda kadagiti mulada.”

Ti Kari ni Yahweh kadagiti Kaarruba ti Israel

14 Kuna tiApo, “Adda masaok maipapan kadagiti kaarruba ti Israel a nangdadael iti daga nga intedko kadagiti tattaok nga Israelita. Ikkatekto dagitoy a tattao iti dagada, kas iti mula a maparut iti nagtuboanna ket isalakankonto ti Juda iti pannakabalinda.

15 Ngem kalpasan ti panangipanawko kadakuada, kaasiakto met la ida. Isublikto ti tunggal nasion iti daga ken ilina.

16 No awatenda iti amin a pusoda ti wagas dagiti tattaok, ket pagsapatada ti nagan ni Yahweh a sibibiag, kas panangisuroda kadagiti tattaok nga agsapata ken ni didiosen a Baal—makipagnaeddanto kadagiti tattaok ket rumang-aydanto.

17 Ngem no adda pagilian a di agtulnog, parutekto a mamimpinsan ket dadaelekto. Siak, ni Yahweh, ti nagsao kadagitoy.”

Pangngarig maipapan iti Linen a Sapin

1 Imbaga tiApoa gumatangak iti linen a sapin ket isuotko; ngem imbagana a diak babbabasaen.

2 Gimmatangak ngarud iti linen a sapin ket kas imbilinna, insuotko.

3 Kinunana manen kaniak,

4 “Inka idiay Karayan Eufrates. Ikkatem ti sapin samo ilemmeng iti rengngat ti bato.”

5 Iti kasta, inlemmengko iti asideg ti Eufrates kas imbilinna.

6 Iti saan a nabayag, imbaga tiAponga agsubliak idiay Eufrates tapno alaek ti linen a sapin.

7 Nagsubliak iti karayan ket innalak ti sapin iti nangilemmengak. Ngem nadadaelen ket awanen ti serserbina.

8 Nagsao manen tiApokaniak ket kinunana,

9 “Kastoyto ti panangdadaelko iti kinatangsit ti Juda ken ti Jerusalem.

10 Saan nga impangag dagitoy dakes a tattao ti saok. Nasukir ken dakesda latta. Nagdaydayaw ken nagserbida kadagiti sabali a didiosen. Maipadadanto ngarud iti daytoy linen a sapin nga awanen ti serserbina.

11 Kas iti irut ti pannakaisuot ti linen a sapin iti siket, kayatko a kasta met ti irut ti ikakapet dagiti amin nga Israelita ken taga-Juda kaniak. Inaramidko daytoy tapno isudanto ti agbalin a tattaok a mangidaydayaw ken mangitan-ok iti naganko. Ngem dida met agtulnog kaniak.”

Ti Pangngarig maipapan iti Burnay ti Arak

12 Kinuna kaniak tiApoa Dios, “Jeremias, ibagam kadagiti Israelita a masapul a mapunno ti amin a burnay iti arak. Isungbatdanto nga ammoda a masapul a mapno amin a burnay iti arak.

13 Ibagam ngarud kadakuada a siak, ni Yahweh, painumekto iti arak dagitoy a tattao iti daytoy a daga agingga a mabartekda: dagiti ar-ari a kaputotan ni David, dagiti papadi, dagiti profeta ken amin nga umili ti Jerusalem.

14 Kalpasanna, pagdidinnungparekto ida a kasla burnay, lallakay man wenno ubbing. Diakto kaasian wenno ilalaen ida. Diakto sumardeng agingga a mapapatayko ida.”

Ballaagan ni Jeremias dagiti Natangsit

15 Tattao ti Israel, nagsaon tiApo!

Agpakumbabakayo ket dumngegkayo kenkuana.

16 Itan-okyo tiApoa Diosyo,

sakbay a yegna ti sipnget,

ket maitublakkayo kadagiti bantay.

Wen, itan-okyo sakbay a pagsipngetenna iti napalalo

ti lawag a birbirokenyo.

17 No dikay mangipangag,

sangitakto iti nalimed ti kinatangsityo.

Agsangitakto iti napait ket agarubosto ti luak

agsipud ta naipanaw a kas balud dagiti tattao tiApo.

18 Kinuna tiApokaniak, “Ibagam iti ari ken iti inana a reyna nga umulogda manipud iti tronoda, agsipud ta naikkaten dagiti napintas a korona iti uloda.

19 Nalakub dagiti il-ili ti Negeb; awan makaasideg kadakuada. Napapanawen dagiti amin a tattao ti Juda. Naitalawda a kas balud iti sabali a daga.”

20 Dakayo a tattao ti Jerusalem, kitaenyo! Umay dagiti kabusoryo nga aggapu iti amianan! Sadino ti yan dagiti tattao a naitalek kadakayo, dagiti tattaoyo a pagtangtangsityo?

21 Anianto ti kunayo no iturayandakayo dagiti tattao nga impagarupyo a gagayyemyo? Marigatankayto a kas iti babai nga agpasikal.

22 Saludsodenyo no apay a napasamak kadakayo daytoy? Apay a naray-ab dagiti pagan-anayyo? Apay a naramrameskayo? Napasamak dagitoy agsipud ta nadagsen unay ti basolyo.

23 Masuktan aya ti nangisit a tao ti kolor ti kudilna? Maikkat aya ti leopardo ti labangna? Saan! No kasta ti mapasamak dakayo nga agar-aramid iti dakes masursuroyo met koma ti agaramid iti naimbag.

24 Iwarawaranakayto tiApoa kas iti garami nga itayab ti angin-let-ang.

25 Kinuna tiApoa daytoyto ti gasatyo. Daytoy ti inkeddengna nga aramiden kadakayo, agsipud ta linipatanyo ti Dios, ket nagtalekkayo kadagiti saan a pudno a dios.

26 Uksobento tiApoti pagan-anayyo, ket ibabainnakayto.

27 Nakitanakayo ni Yahweh a nagaramid iti kagurgurana. Nakitanakay a simmursurot kadagiti didiosen dagiti pagano kadagiti turturod ken taltalon; kaslakayo la lalaki nga aggartem iti asawa ti kaarrubana wenno kasla kalakian a kabalio a kumamat iti kabaian. Asikayo pay, tattao ti Jerusalem! Kaanonto ti panagbalinyo a nadalus?

Ti Nakaro a Tikag

1 Kinuna tiApokaniak maipapan iti tikag,

2 “Agdungdung-aw ti Juda,

agbugbugsot dagiti siudadna.

Gapu iti ladingit,

agid-idda dagiti tattaona iti daga,

ket dumawat ti Jerusalem iti tulong.

3 Agpasakdo dagiti babaknang;

mapan dagiti adipenda kadagiti bubon

ngem awan masapulanda a danum,

agawidda nga awan nagyan kadagiti karambada.

Maupay ken mariribukda,

ket ilemmengda ti rupada.

4 Awan ti tudo ket namaga ti daga.

Agladingit dagiti mannalon, ilemmengda ti rupada.

5 Gapu ta awan ti ruot iti taltalon,

baybay-an ti ugsa ti kayyanak nga urbonna.

6 Agtakder dagiti atap nga asno iti tapaw dagiti turturod,

ket agal-alda a kasla atap nga aso.

Kumudrep ti panagkitada,

agsipud ta awanen ti arabenda.

7 Umasug kaniak dagiti tattaok a kunkunada,

‘Uray no agsaksi dagiti basolmi iti maibusor kadakami,

tulongannakam kadi, OApo, kas inkarim.

Namin-adun a naglikudandaka;

nagbasolkami kenka.

8 Sika laeng ti namnama ti Israel,

sika ti mangisalakan kadakami iti pakarigatanmi.

Apay a kaska la ganggannaet iti dagami?

Mayarigka iti agbibiahe

nga agdagus laeng iti maysa a rabii.

9 Apay a kaska la nakigtot?

Kaska la soldado nga awan gawayna a mangisalakan.

Awan duadua, OApo, nga addaka kadakami,

dakami dagiti tattaom;

saannakami kadi a baybay-an.’”

10 Kuna tiApomaipapan kadagitoy a tattao, “Kayatdak nga itarayan, ket saanda a magawidan dagiti bagida. Iti kasta, diak maragsakan kadakuada. Laglagipekto dagiti dakes nga aramidda, ket dusaekto ida gapu kadagiti basolda.”

11 Kinuna tiApokaniak, “Dimo kiddawen a tulongak dagitoy a tattao.

12 Uray no agayunarda, diakto ipangag ti dawatda. Uray no mangidatagda iti daton a mapuoran ken daton a makan, diakto awaten ida. Papatayekto ketdi ida iti gubat, bisin ken angol.”

13 Kalpasanna, kinunak, “O ApoDios, ammom nga ibagbaga dagiti profeta kadagiti tattao nga awanto ti gubat wenno bisin agsipud ta inkarim. Kunada nga addanto latta talna iti dagami.”

14 Ngem insungbat tiApo, “Agul-ulbod dagiti profeta iti naganko. Saanko nga imbaon ida. Awan ti imbilinko kadakuada ket pulos a diak kinasao ida. Saan a naggapu kaniak dagiti sirmata nga ibagbagada. Awan serserbi dagiti padto nga ibagbagada; ar-arapaapda laeng dagita.

15 Siak, ni Yahweh, ibagak kenka ti aramidekto kadagitoy a profeta a saanko nga imbaon ngem agsaoda iti naganko ket kunada nga awan ti gubat ken bisin a dumteng iti daytoy a daga. Papatayekto ida iti gubat ken bisin.

16 Kastoyto met ti pannakapapatay dagiti tattao a nangibagaanda kadagitoy. Maiwalangto dagiti bangkayda kadagiti lansangan ti Jerusalem, ket awanto ti mangitanem kadakuada. Mapasamakto amin dagitoy kadakuada, kadagiti assawada, kadagiti annakda a lallaki ken babbai. Pagbayadekto ida gapu iti kinadakesda.”

17 Imbilin tiApokaniak nga ibagak kadagiti tattao ti maipapan iti ladingitko ket kunak:

“Aldaw ken rabii nga agarubos koma dagiti luluak,

saanak koma a sumardeng nga agsangsangit

agsipud ta nasaem ti sugat dagiti tattaok;

wen, napalalo ti pannakadunorda.

18 No mapanak iti taltalon,

makitak dagiti bangkay dagiti natay iti gubat.

No mapanak kadagiti ili,

makitak dagiti tattao a matmatay iti bisin.

Itultuloy dagiti profeta ken papadi ti trabahoda

ngem saanda nga ammo ti ar-aramidenda.”

Umasug dagiti Tattao ken ni Yahweh

19 OApo, tinallikudam aya a namimpinsan ti Juda?

Kaguram aya dagiti tattao ti Sion?

Apay a dinangrannakami iti kasta unay

ket saankam a maimbagan?

Sapsapulenmi ti talna,

ngem awan ti naimbag a mauraymi.

Namnamaenmi ti maagasan,

ngem panagdanag ketdi ti maipaay.

20 Nagbasolkami kenka, OApo;

ipudnomi dagiti basbasolmi agraman dagiti kapuonanmi.

21 Laglagipem dagiti karim ket dinakam laisen

dimo ibabain ti Jerusalem

a yan ti nagloriaan a tronom.

Tungpalem ti nakitulagam kadakami.

22 Saan a makaited iti tudo dagiti didiosen dagiti nasion;

awan kadakuada ti makaited iti arbis.

Mangnamnamakami kenka, OApoa Diosmi,

agsipud ta sika laeng ti makaaramid kadagitoy.

Ti Dusa a Maipatay kadagiti Tattao ti Juda

1 KinunatiApokaniak, “Uray no da Moises ken Samuel ti agparintumeng, diak kaasian dagitoy a tattao. Papanawem ida; diak kayat a makita ida.

2 Nosaludsodenda ti rebbengda a papanan, ibagam daytoy kadakuada:

Dagiti naikeddeng a matay iti sakit,

matayda iti sakit.

Dagiti naikeddeng a matay iti gubat,

matayda iti gubat.

Dagiti naikeddeng a matay iti bisin,

matayda iti bisin.

Dagiti naikeddeng a maibalud, maibaludda!

3 Siak, ni Yahweh, nangikeddengak iti uppat a kita ti nakabutbuteng a didigra nga agdissuorto kadakuada: mapapataydanto iti gubat; ulod-ulodento dagiti aso dagiti bangkayda; kanento ida dagiti tumatayab, ken pagbibinggawanto dagiti atap nga animal dagiti matda.

4 Pagbalinektoida a pagbutbutngan dagiti pagarian ti lubong gapu iti dakes nga inaramid ni Manases nga anak ni Hezekias iti Jerusalem idi isu ti ari idiay Juda.”

5 Kuna tiApo,

“Siasinonto ti mangngaasi kadakayo,

dakayo a tattao ti Jerusalem,

siasinonto ti mangdung-aw kadakayo?

Siasinonto ti sumardeng

tapno damagenda ti kasasaadyo?

6 Dakayo a tattao, linaksiddak,

dakayo amin tinallikudandak.

Ngarud, dinissoankayo agingga a narumrumekkayo

gapu ta diak magawidanen ti pungtotko.

7 Iti tunggal ili iti daga,

kasla arutang nga ipurruakkayo iti angin.

Dinadaelkayo a tattaok;

pinatayko dagiti annakyo

gapu ta diyo insardeng ti dakes nga aramidyo.

8 Ad-adu dagiti babbai a balo

ngem dagiti darat iti igid ti baybay.

Pinatayko dagiti annakyo a lallaki idinto ta ubbingda pay,

ket pinagsagabak dagiti innada.

Kellaat nga indissuorko kadakuada

ti tuok ken buteng.

9 Natalimudaw ti ina

gapu iti ipapatay dagiti pito nga annakna;

kamkamatenna ti angesna.

Nagbalin a nasipnget ti aldawna,

naibabain ket nasaem ti ladingitna.

Papapataykayto kadagiti kabusoryo,

dakayo a sibibiag pay laeng.

Siak ni Yahweh, ti nangibaga iti daytoy.”

Agreklamo ni Jeremias ken ni Yahweh

10 Nagliday ketdin ti biagko! Apay nga inyanaknak pay laeng ni inak? Kasapulan a makisusik ken makisuppiatak iti amin a tao ditoy a daga. Diak nagpautang ket diak met immutang iti uray ania, ngem kaskasdi nga ilunoddak dagiti tattao.

11 OApo, pumudno koma dagiti lunodda kaniak no saan a naimbag ti panagserbik kenka ken no saanko nga indawdawatan dagiti kabusorko idi adda rigatda. (

12 Awan ti makatukkol iti landok, nangruna ti landok a nalaokan iti bronse a naggapu idiay amianan.)

13 Kinuna tiApokaniak, “Ibaonkonto dagiti kabusorda a mangipanaw kadagiti sanikua ken gameng dagiti tattaok, tapno madusada gapu iti basol nga inaramidda iti entero a daga.

14 Pagserbiekto ida kadagiti kabusorda iti daga a dida pay nadamdamag, agsipud ta kasla apuy ti pungtotko ket sumged iti agnanayon.”

15 Ket kinunak, “OApo, ammok a maawatam. Laglagipennak kadi ket tulongannak. Balsem dagiti mangidadanes kaniak. Dimo palubosan ida a mangpapatay kaniak. Laglagipem a gapu kenka, pinabpabainandak.

16 Nagsaoka kaniak ket impangagko ti amin nga imbagam. Kukuanak, OApoa Dios a Mannakabalin-amin, isut’ gapuna a ti saom pinunnona ti pusok iti rag-o ken ragsak.

17 Saanak a nakibunggoy kadagiti tattao a naayat iti katkatawa ken ragragsak. Gapu iti trabaho nga intedmo kaniak, nagmaymaysaak ket napnoak iti pungtot.

18 Apay a di met la agsardengen ti panagsagsagabak? Apay a di maagasan dagiti sugatko? Apay a dida maimbagan? Panggepnak kadi a paayen a kas iti namaga a waig iti kalgaw?”

19 Kastoy ti insungbat tiApo, “No agsublika kaniak, awatenka manen nga adipenko. No agsaoka iti nasayaat a saan ketdi a dagiti awan serserbina, agbalinkanto manen a profetak. Dagiti tattao ti umayto kenka, saan a sika ti mapanto kadakuada.

20 No maipapan kadagiti umili, pagbalinenkanto a kas iti natibker a bakud a bronse. Karangetdakanto ngem didakanto maparmek. Addaakto a mangsalaknib kenka tapno saanka a maan-ano.

21 Isalakankanto iti ima dagiti managdakdakes. Ikanawakanto iti pannakabalin dagiti naranggas a tattao. Siak, ni Yahweh, ti nagsao kadagitoy.”