Philippine

1 Daytoyti mensahe nga impakaammo ni Yahweh ken ni Oseas nga anak ni Beeri. Panawen idi da Ozias, Jotan, Ahaz, Hezekias nga ar-ari iti Juda; ni Jeroboam nga anak ni Joas ti ari idi iti Israel.

Ti Asawa ni Oseas ken dagiti Annakna

2 Idi damo nga agsao ni Yahweh iti Israel babaen ken ni Oseas, kinunana, “Mangasawaka; liputannakanto ti asawam ket awanto ti duma kenkuana dagiti annakyo.”

3 Nangasawa ngarud ni Oseas ket inkallaysana ti maysa a babai nga agnagan Gomer nga anak ni Diblaim. Nagsikog ni Gomer. Naganak iti lalaki, ket kinuna ni Yahweh ken ni Oseas,

4 “Panaganamiti ‘Jezreel,’ agsipud ta iti saan a mabayag, dusaek ti ari ti Israel gapu kadagiti pammapatay nga inaramid ni Jehu a kapuonanna idiay Jezreel.Gibusak ti dinastia ni Jehu ket

5 parmekekto ti bileg ti armada ti Israel idiay Tanap ti Jezreel iti dayta nga aldaw.”

6 Nagsikog manen ni Gomer ket babai ti impasngayna. Kinuna ni Yahweh ken ni Oseas, “Lo-ruhamati ipanaganmo kenkuana, ta saankon nga ay-ayaten dagiti tattao ti Israel wenno pakawanen ida.

7 Ngem ay-ayatekto dagiti tattao ti Juda. Siak, ni Yahweh a Diosda, isalakankonto ida. Ngem diak aramiden daytoy babaen iti gubat—dagiti kampilan, bai wenno babaen kadagiti kabalio wenno nagkabalio a mannakigubat.”

8 Kalpasan ti pannakapusot ni Lo-ruhama, nagsikog manen ni Gomer, ket naaddaan manen iti anak a lalaki.

9 Kinuna ni Yahweh ken ni Oseas, “Lo-ammiti ipanaganmo kenkuana, gapu ta saanko a tattao dagiti tattao ti Israel ket saan met a siak ti Diosda.”

Maisubli ti Sigud a Kasasaad ti Israel

10 Umaduntodagiti Israelita. Kasdanto iti darat ti taaw a saan a marukod wenno mabilang ti kaaduda. Kuna ti Dios kadakuada, “Saan a dakayo dagiti tattaok,” ngem umayen ti aldaw a kunana kadakuada, “Dakayo ti annak ti sibibiag a Dios!”

11 Agkaykaysanto manen dagiti tattao ti Juda ken dagiti tattao ti Israel. Mangdutokdanto iti maymaysa a mangipangulo kadakuada, ket rumang-aydanto manen iti dagada. Wen, naindaklanto nga aldaw ti aldaw ti Jezreel!

1 Awaganyo ngarud dagiti padayo nga Israelita iti “Tattao ti Dios” ken “Ay-ayaten tiApo.”

Mangliliput a Gomer—Mangliliput nga Israel

2 Annakko, kasaoyo ni inayo—

uray no ibilangkon a saanko nga asawa

ket saan metten a siak ti asawana.

Agpakpakaasikayo kenkuana

nga isardengnan ti pannakikamkamalalana

ken panagbalbalangkantisna.

3 No dina isardeng ti aramidna,

labusak ket bay-ak a lamolamo

a kas iti daydi nga aldaw a pannakaipasngayna,

a kas iti aldaw a pannakayanakna.

Pagbalinek a natikag a daga nga awan ti agtubo a mula,

ket matayto iti waw.

4-5 Diak kaasian dagiti annakna;

balangkantis nga awan babainna ti inada.

Mismo nga isu ti nagkuna, “Surotek dagiti kaayan-ayatko,

isuda a mangted kaniak iti inumen ken taraonko,

pagan-anay a de lana ken linen, lana ken arak.”

6 Daytoy ti gapuna nga aladak iti siitsiitan,

bakudak ti pagnaanna tapno isardengnan dagiti aramidna.

7 Surotennanto dagiti kaayan-ayatna,

dinanto makamakam ida.

Birokennanto ida ngem awanto ti masarakanna kadakuada.

Kalpasanna, kunananto,

“Agsubliak ken ni asawak, ta nasaysayaat ti kasasaadko idi iti dennana ngem ita.”

8 Pulos a dina bigbigen

a siak ti mangmangted idi kenkuana

iti trigo, arak, ti lana ken amin

a balitok ken pirak nga inusarna iti panagdaydayawna

ken ni Baal a didios.

9 Daytoy ti gapuna nga iti tiempo ti panagapit,

alaekto met laeng ti trigo ken ti arakko.

Alaekto met laeng ti intedko a pagan-anayna

a de lana ken linen.

10 Iti sango dagiti kaayan-ayatna

ikkatek amin a kawesna agingga a lamolamo

ket awanto ti makaisalakan kenkuana

iti pannakabalinko.

11 Gibusakon dagiti parambakna—

fiestana iti lutuad,

dagiti Aldaw a Panaginana a ngilinenna,

ken amin a nangayed a gimongna.

12 Dadaelekto dagiti kaubasan ken kaigosanna

a kinunana nga inted dagiti kaayan-ayatna,

kas tangdanna iti panagserbina kadakuada.

Pagbalinek a kabakiran dagiti kaubasan ken minuyoganna;

dadaelento ida dagiti atap nga ayup.

13 Wen, dusaekto tapno ikarona dagidi tiempo a nalipatannak,

idi nagpuor iti insenso kas datonna ken ni didiosen a Baal,

idi agar-aritos ken agkukuentas

a nangsurot kadagiti kaayan-ayatna.

Siak, ni Yahweh, ti nangibaga iti daytoy.

Ay-ayaten ti Dios dagiti Tattaona

14 Isut’ gapuna nga ipankonto manen iti let-ang.

Magun-odkonto manen ti panagayatna babaen

kadagiti makaay-ayo a sarita.

15 Isubliktokenkuana dagiti kaubasanna,

ket pagbalinekto ti Tanap ti Akor a ruangan ti namnama.

Sungbatannakto sadiay

a kas idi agtutubo pay laeng,

idi rimmuar idiay Egipto.

16 Iti dayta nga aldaw,

“Asawak,” kunananto kaniak.

Dinakton awagan iti “Baalko.”

17 Dinanton baliksen wenno mangngegan,

ti nagan dagiti Baal.

18 Iti dayta a tiempo, makitulagakto kadagiti amin nga atap nga ayup ken tumatayab tapno dida an-anoen dagiti tattaok. Ikkatekto amin nga armas a pakigubat iti daga, amin a kampilan ken bai tapno agbiag a natalna ken natalged dagiti tattaok.

19 Israel, pagbalinenkanto nga asawak;

Napudnoakto ket dikanto baybay-an;

Ipakitakto kenka ti di agbalbaliw nga ayat ken panangngaasi

ket agnanayonto a kukuaka.

20 Tungpalekto ti karik ta kukuaka

ket bigbigennakto a kasApo.

21-22 Iti dayta a tiempo, ipangagkonto dagiti kararag dagiti Israelita.Pagtudoekto ket agtubonto ti adu a trigo, ubas, ken olibo.

23 Ipasdekkontodagiti tattaok iti pagilian ket parang-ayekto ida. Ipakitakto ti panagayatko kadagiti makunkuna a “Saan a Maay-ayat” ken kadagiti makunkuna a “Dakayo ti tattaok.” Kunakto, “Dakayo dagiti tattaok,” ket isungbatdanto, “Sika ti Diosmi.”

Ni Oseas ken ti Mannakikamalala a Babai

1 Kinuna ti Apo kaniak, “Inka manen,ket ayatem ti maysa a babai a kamalala ti sabali a lalaki. Ayatem kas iti panagayatmo pay laeng kadagiti tattao ti Israel, uray no makiumanda kadagiti didiosen, ket pagay-ayatda ti mangidaton kadagiti kankanen nga ubas kadagiti didiosenda.”

2 Ngarud, gimmatangak iti babai. Nagbayadak iti 15 a bagi ti pirak ken pito salup a sebada.

3 Kinunak kenkuana, “Agtalinaedka kaniak. Kukuaka iti mabayag. Dika agbalangkantis wenno makikamalala ket kastaakto met kenka.”

4 Kastoyto ti rumbeng a panagbiag dagiti tattao ti Israel. Mabayag nga awanto ti ari wenno panguloda. Awanto met ti daton wenno nasantoan nga adigi. Awanto met iti balayda ti didiosen wenno imahen.

5 Ngem dumtengto ti tiempo nga agsublidanto manen ken ni Yahweh. Agkamangdanto iti maysa a kaputotan ni David nga arida. Agbutengdanto ken ni Yahweh ket awatendanto dagiti agkakaimbag a paraburna.

Ti Pammabasol ni Yahweh kadagiti Israelita

1 Adda pammabasol tiApokadagiti agnaed iti daga. Israel, dumngegka iti ibagana: “Awan kinapudno wenno panagiinnayat iti daytoy a pagilian ket saandak a bigbigen dagiti tattao a kas Dios.

2 Sapataan dagiti tattao ti karida ngem salungasingenda met laeng. Agulbod, agpapatay, agtakaw ken makikamalalada. Umadu ti krimen ket agsasaruno ti pammapatay!

3 Daytoy ti gapuna nga agladingit ti daga. Matay amin a sibibiag, amin nga animal ken tumatayab agraman dagiti ikan.”

Idarum ni Yahweh dagiti Papadi

4 Kuna tiApo, “Saan a dagiti tattao ti babalawek no di ket dakayo a padi.

5 Ti trabahoyo iti aldaw awan serserbina; mairaman met ti profeta nga awan mamaay ti aramidna. Ngarud, dadaelek ti Israel nga inayo.

6 Gapu ta awan ammoda, madadael dagiti tattaok. Gapu ta linaksidyo ti pannakaammo, ken ti pannursuro ti Dios nalipatanyo, laksidenkayto met agraman dagiti annakyo a kas papadik.

7 “Umadu dagiti papadi, ngem umadu met ti basolda kaniak; pagbalinek a pakaibabainan ti kinadayagyo.

8 Bumaknangkayo gapu iti basol dagiti tattaok, ket kayatyo nga umadu pay dagiti basbasolda.

9 Sagabaenyonto ti isu met la a dusa a sagabaen dagiti tattao!

10 Kanenyonto ti binglayyo kadagiti maidatag a sakrifisio ngem mabisinkayto pay laeng. Agdaydayawkayo kadagiti didiosen ngem dikayto maaddaan iti anak gapu ta tinallikudandak tapno surotenyo dagiti didiosen.”

Mababalaw ti Panagdayaw kadagiti Didiosen

11 Kuna tiApo, “Gapu iti baro ken daan nga arak, mapukaw ti pannakaawat dagiti tattaok.

12 Makiumanda iti imahen ta kayatda nga adda maipaltiing kadakuada. Maibaga aya ti sangaputol a kayo ti tarigagayanda a maammoan? Tinallikudandak. Kas iti babai nga agbalin a balangkantis, intedda ti bagida kadagiti sabali a dios.

13 Kadagiti sagrado a lugar iti tapaw dagiti bantay, agidatagda iti daton a mapuoran ket kadagiti turod, agpuorda iti insenso, gapu ta nasayaat ti linongda.

“Ngarud, agserbi dagiti annakyo a babbai a kas balangkantis ket makikamalala dagiti babbai a manugangyo.

14 Ngem diakto dusaen ida gapu ta uray dakayo, kaiddayo dagiti balangkantis iti temploken kaduayo ida nga agidatag kadagiti sakrifisio. Kas iti pagsasao, ‘Agtungpal iti pannakadadael dagiti tattao nga awanan pannakaawat.’

15 “Israel, uray no saanka a napudno kaniak, saan a mairaman ti Juda iti basolmo. Dika mapan agdaydayaw idiay Gilgal wenno idiay Bethaven. Dika met agkari sadiay iti nagan ni Yahweh a sibibiag.

16 Nasukir dagiti Israelita a kasla kadagiti urbon ti baka a nasubeg. Kasano a taraonak ida a kas kadagiti karnero iti pagaraban?

17 Adda dagiti tattao ti Israel iti pannakabalin dagiti didiosen. Bay-am a surotenda ti kaykayatda.

18 Kalpasan ti panaginumda iti adu nga arak, pagragsakanda iti panagbalangkantisda. Kaykayatda ti maibabain ngem ti maidaydayaw.

19 Maipanawdanto a kas man angin ti mangitayab kadakuada ket ibaindanto dagiti sakrifisioda.

1 “Denggenyo daytoy, dakayo a papadi!

Dumngegkayo, dakayo nga Israelita!

Dumngegkayo a nalaing,

dakayo a kameng ti familia ti ari!

Dakayo ti mangukom a mangyetnag koma iti hustisia

ngem dakayo met laeng ti pagdissuoran ti dusa!

Naipakatkayo a palab-og idiay Mizpa, maysa a silo idiay Bantay Tabor,

2 nagsukirkayo ket nailumlomkayo iti basol,

ngem dusaenkayo amin.

3 Sigud nga am-ammok ti Israel—dinak mabalin nga ilemmengan.

Saan a napudno kaniak ket saan a maikari nga agdaydayaw kaniak dagiti tattaona.”

Ballaag a maibusor iti Panagdaydayaw kadagiti Didiosen

4 Gapu iti dakes nga inaramid dagiti tattao, saanda a makasubli iti Dios. Saanda a maikkat ti panagdaydayawda kadagiti didiosen ket dida bigbigen ni Yahweh.

5 Natangsit dagiti tattao ti Israel ket daytoyto ti pakadusaanda. Matnagdanto gapu kadagiti basolda ket kaduadanto a matnag ti Juda.

6 Alaenda dagiti baka ken karneroda a puoran a kas sakrifisio ken ni Yahweh ngem awan serserbina. Saanda a mabirokan ni Yahweh ta pinanawanna ida.

7 Saanda a napudno kenkuana; saanna a kukua dagiti annakda. Ngarud, madadaeldanto, kasta met dagiti dagada.

Aggubat ti Juda ken Israel

8 Puyotenyo ti tangguyob idiay Gabaa! Pagunienyo ti trumpeta idiay Rama! Ipukkawyo ti ikkis ti gubat idiay Bethaven!Inkayo makigubat, dakayo a tattao ti Benjamin!

9 Dumtengen ti aldaw ti pannakadusa ket mamimpinsanto a madadael ti Israel. Tattao ti Israel, awan dudua a mapasamak daytoy!

10 Kuna ni Yahweh, “Makapungtotak gapu ta sinakup dagiti agtuturay ti Juda ti Israel, ket innalada ti sumagmamano a paset ti dagana. Ngarud, agdissuorto kadakuada ti pungtotko, kas iti maysa a layus.

11 “Agsagsagaba ti Israel gapu iti pannakaidadanesna; napukawna ti daga a kukuana iti imatang ti linteg. Ngamin, impapilitna ti napan nagpatulong kadagiti awan maitulongna kenkuana.

12 Rebbaek ti Israel ket dadaelekto dagiti tattao iti Juda.

13 Idi makita ti Israel ti sakitna, ken makita ti Juda dagiti sugatna, napan ti Israel idiay Asiria tapno agpatulong iti natan-ok nga emperador ngem dina ida maagasan wenno mapaimbag dagiti sugatda.

14 Narungsotakto a kas iti leon a mangdarup kadagiti tattao ti Israel ken Juda. Panawakto ida kalpasan ti panangrangrangkayko kadakuada. Ulodekto a yadayo ida ket awanto ti makaispal kadakuada.

15 “Panawakto dagiti tattaok agingga nga umdas ti panagsagabada gapu kadagiti basbasolda. Nalabit nga iti panagsagabada, ikagumaandakto a biroken.”

Saan a Napudno dagiti Tattao iti Panagbabawida

1 Kuna dagiti tattao,

“Agsublitayo itiApo.

Rinangrangkaynatayo, wen, ngem agasannatayto;

sinugatnatayo ngem bedbedannanto dagiti sugattayo.

2 Kalpasan ti dua wenno tallo nga aldaw,

pagungarennatayto, ket agbiagtayto iti imatangna.

3 Agpakumbabatayo iti imatang tiApo.

Ikagumaantayo ti mangbigbig kenkuana.

Awan duadua ti yaayna kadatayo,

kas iti idadateng ti parbangon,

kas iti damo a tudo a mangsibog iti daga.”

4 Ngem kuna tiApo, “Israel ken Juda, ania ti aramidek kadakayo? Agpukaw ti kinapudnoyo kaniak, a kasla angep iti bigat; arigna iti linnaaw a nasapa a mapukaw.

5 Daytoy ti gapuna nga imbaonko dagiti profetak a mangipakaammo iti pangngeddengko a mangyeg iti panagdadael. Nalawag ti kayatko nga aramiden kadakayo a tattaok.

6 Kalikagumakti saan nga agbalbaliw nga ayatyo, saan a dagiti animal a puoranyo. Kaykayatko nga ammoendak dagiti tattaok ngem dagiti datonda.

7 “Ngem apaman a simrekda iti daga ti Adam, sinalungasingda ti nagtutulaganmi.

8 Siudad dagiti managdakdakes ken mammapatay ti Galaad.

9 Bunggoy dagiti mannanakaw ti kayarigan dagiti papadina. Kanayonda nga agur-uray iti sanebenda. Agpapatayda uray iti dalan nga agturong iti nasantoan a lugar idiay ket igagarada nga aramiden.

10 Adda nakitak a nakarimrimon a banag iti Israel: tinulawan dagiti tattaok ti bagida babaen iti panagdaydayawda kadagiti didiosen.

11 “Ket dakayo a tattao ti Juda, adda met ar-aramidenyo, ket nangitudingakon iti tiempo a panangdusak kadakayo.

Ti Kinadakes ken ti Panagsukir ti Israel

1 “Tunggal panggepko nga agasan dagiti tattaok nga Israelita tapno rumang-ayda manen, awan sabali a maiparangarang kaniak no di ti kinadakesda ken ti saan a nasayaat nga aramidda. Agiinnulbodda; serkenda dagiti balbalay tapno agtakawda; kadagiti kalsada, agsaneb dagiti tulisan.

2 Dida pampanunoten nga ammok ti amin a kinadakesda. Ngem, nalikmutda kadagiti dakes nga aramidda, ket awan duadua a makitak dagiti basolda.”

Panagkukumplot iti Palasio

3 Kuna tiApo, “Babaen iti panangisikat dagiti tattao, allilawenda ti ari ken dagiti ofisialesna.

4 Saanda a napudno ket manangliliputda. Umasimbuyok a kas iti apuy ti urno ti gurada; wen, kas iti apuy a rubroban ti panadero no naisaganan a maluto ti masa.

5 Iti aldaw a nagkasangay ti ari, binartekda ti ari ken dagiti ofisialesna.

6 Wen, immapuyda a kas iti urno idi nagisikatda. Nagpatpatnag nga immasimbuyok ti pungtotda agingga a gimmil-ayab iti kabigatanna.

7 “Iti kapudot ti pungtotda, pinatayda dagiti panguloda. Nagsasaruno a napapatay dagiti arida, ngem awan nagkararag nga agpatulong kaniak.”

Israel ken dagiti Pagilian

8 Kuna tiApo, “Arig dagiti tattao ti Israel iti kankanen a nakusel. Agpannurayda kadagiti pagilian iti lawlawda

9 ket saanda a mabigbig a daytoy a panagtalek kadagiti ganggannaet ti nangibus iti pigsada. Aggibusen dagiti aldawda, ngem saanda pay nga ammo.

10 Natangsit ti Israel. Saksinto daytoy a maibusor kenkuana. Uray no napasamak amin dagitoy, saanda a nagsubli kaniak, siak, ni Yahweh a Diosda.

11 “Kalapati ti kayarigan ti Israel. Maag ken saan a makaaw-awat. Pasaray umawag dagiti tattaona iti Egipto. No dadduma, agkamangda iti Asiria.

12 Ngem uray sadino ti pagturonganda, isarruagkonto ti iketko a mangtiliw kadakuada. Dusaekto ida gapu iti kinadakes nga inaramidda.

13 “Nakakaasinto ti pagbanaganda! Pinanawandak ket sinukirdak. Madidigradanto ta sinupringdak. Kayatko nga ispalen ida, ngem saanda a napudno iti panagdaydayawda kaniak.

14 Dida ipapuso ti agkararag kaniak; agiikkisda ketdi a kasda la pagano tunggal agkararagda. No agdawatda iti trigo ken arak, sugatsugatenda ti bagbagida.

15 Tinulongak ken pinapigsak ida. Ngem nagpanggepda iti maibusor kaniak.

16 “Simmurotda kadagiti didiosen nga awan pannakabalinna. Saanda a mapagtalkan a kas iti saan a nairteng a bai ti pana. Mapapatayto iti kampilan dagiti papanguloda gapu kadagiti panagilunlunodda ket katawaanto ida dagiti Egipcio.”

Mababalaw ti Israel iti Panagdaydayawna kadagiti Didiosen

1 Kuna tiApo, “Puyotenyo ti trumpeta! Adda dagiti kabusor a sumiplag iti dagak a kas kadagiti agila nga agam-ampayag. Winaswas ngamin dagiti tattaok ti tulagko, ket sinalungasingda ti pannursurok.

2 Uray no bigbigendak a kas Diosda ken kunada a tattaok ida, ket ibagada nga am-ammodak,

3 linaksidda met ti naimbag. Daytoy ti gapuna a sunsonento ida dagiti kabusorda.

4 “Nagisaad dagiti tattaok kadagiti ari nga awan ti pammalubosko. Nangdutok kadagiti agtuturay, agtuturay a diak binendisionan, wenno inanamongan. Innalada dagiti pirak ken balitokda ket nagaramidda kadagiti imahen a puon ti pakadadaelanda.

5-6 Kagurak ti balitok a sinan-baka a pagdaydayawan dagiti taga-siudad ti Samaria. Kasta unay ti pungtotko kadakuada. Kasano pay kabayag a gibusanda ti panagdaydayawda kadagiti imahen? Saan a Dios dayta a didiosen; aramid laeng ti tao. Maburburakto ti balitok a sinan-baka a pagdaydayawanda idiay Samaria.

7 Angin ti imulada,

ket alipugpogto ti apitenda!

Nadadael dagiti mulada,

awan ti bungada.

Ngem uray no adda bungada,

kanento dagiti ganggannaet.

8 Nagbalin ti Israel a kas iti dadduma a pagilian ket awanen serserbina a kas iti nabuong a banga.

9 Ngamin, nasubeg dagiti tattao ti Israel kas iti atap nga asno a mapan iti kaykayatna. Nagkamang iti Asiria ket nagbayad iti sumagmamano a pagilian tapno salaknibanda.

10 Iti saan a mabayag, agtiritirda iti ut-ot inton idadanes ida ti emperador ti Asiria.

11 “Uray mangbangon dagiti tattao ti Israel iti adu nga altar a pangikkat iti basol, umadu met ti lugar a pagbasolanda!

12 “Uray no isuratko dagiti adu a lintegko

nga agpaay kadakuada,

ibilangda dagitoy nga awan serserbina.

13 Magustoanda ti agidatag iti sakrifisio, ket kanenda ti karne dagiti idatonda. Ngem siak, ni Yahweh, diak maragsakan kadakuada, ket ita malagipko ti basolda ket dusaek ida. Isublikto ida idiay Egipto.

14 “Nagipatakder dagiti tattao ti Israel kadagiti palasio, ngem nalipatanda ti Namarsua kadakuada. Adu a nasarikedkedan a siudad ti binangon dagiti tattao ti Juda. Ngem mangyegakto iti apuy a mangpuor kadagiti palasioda ken dagiti siudadda.”